Timbá libro ndrígóo Crónicas 26:1-32
26 Xígi̱ kaʼnii nirui̱ʼti̱i̱n bi̱ wájun náa xkrugua. Bi̱ naguwáʼ náa coreítas, ikhí xtáa Meselemías a̱ʼdióo Coré, bi̱ na̱ʼkha̱ náa Asaf.
2 Meselemías nigiʼdiin e̱ji̱i̱n: Timbáa nindxu̱u̱ Zacarías, raga̱jmi̱i̱n Jediael, ragajtsíin Zebadías, ragajkui̱i̱n Jatniel,
3 witsiin Elam, majuiinʼ Jehohanán ga̱jma̱a̱ bi̱ juwiin Elieho-Enái.
4 Obed-Edom nigiʼdiin e̱ji̱i̱n: Timbáa nindxu̱u̱ Semaya, raga̱jmi̱i̱n Jehozabad, ragajtsíin Joá, ragajkui̱i̱n Sacar, witsiin Netanel,
5 majuiin Amiel, juwiin Isacar, bi̱ migiñiiʼ Peuletái, Dios niʼni tsajkurámaaʼ.
6 A̱ʼdióo bi̱ mbiʼyuu Semaya nigiʼdiin e̱ji̱i̱n bi̱ nitañajunʼ náa guʼwún anu̱ún, numuu dí ikhiin nindxu̱ún xa̱bu̱ xkujiinʼ ga̱jma̱a̱ kijmaratiin.
7 Bugi̱ nindxu̱ún e̱ji̱i̱n Semaya: Otní, Refael, Obed ga̱jma̱a̱ Elzabad, a̱ngui̱i̱n Elzabad ninindxu̱u̱ Elihú ga̱jma̱a̱ Semakías, mangiin nindxu̱ún xa̱bekha bi̱ kijmaratiin.
8 Xúgíinʼ buʼko̱ nindxu̱ún e̱ji̱i̱n Obed-Edom. Ikhiin, e̱jñu̱ún mangiin a̱ngiu̱ún nindxu̱ún xa̱bekha bi̱ kijmaratiin ga̱jma̱a̱ nijuiʼsngúún mu muni̱ ñajunʼ, mbá 62 nindxu̱ún bi̱ naguwáʼ náa Obed-Edom.
9 Meselemías nigiʼdiin e̱ji̱i̱n ga̱jma̱a̱ nikúwá a̱ngui̱i̱n, mbá 18 xa̱bekha bi̱ kijmaratiin.
10 Hosá bi̱ na̱ʼkha̱ náa Merarí nigiʼdiin e̱ji̱i̱n. Simrí nindxu̱u̱ bi̱ kayá edxu̱u̱, maski ajndu ikhaa na̱nguá nindxu̱u̱ a̱ʼdá giʼnii, mú anu̱u̱* nigíiʼ mbayá edxu̱u̱,
11 bi̱ maʼni raga̱jmi̱i̱n nindxu̱u̱ Hilquías, ragajtsíin Tebalías, ragajkui̱i̱n Zacarías. Dí mbá xúgíinʼ e̱ji̱i̱n ga̱jma̱a̱ a̱ngui̱i̱n Hosá, ninindxu̱ún mbá 13.
12 Bi̱ kuya̱ edxu̱u̱ náa bi̱ naguájun náa xkrugua kajkuáa ñawúúnʼ ñajunʼ dí naguma náa goʼwóo Jeobá, xó má a̱ngiu̱ún.
13 Ikhú nirawíi suértiu̱ún* bi̱ kúwá náa guʼwún anu̱ún, tséʼniuu má nguáthá mbaʼin kúwá náa guʼwún, mu xúʼko̱ murui̱ʼta̱a̱ xkrugua.
14 Selemías nigájnuu mbiʼyuu mañewu̱u̱n xkrugua dí rígá xígií náa nagájnuu a̱jkha̱ʼ.* Nda̱wa̱á niri̱ya̱ʼ suértiu̱u̱ a̱ʼdióo Zacarías, mbáa bi̱ naxná májánʼ consejo, ikhaa nigájnuu mbiʼyuu mañewu̱u̱n xkrugua dí rígá xígií náa norte.
15 Obed-Edom nigájnuu mbiʼyuu mañewu̱u̱n xkrugua dí rígá xígií náa sur, ga̱jma̱a̱ e̱ji̱i̱n nixnajxu̱u̱n muñewa̱a̱n náa kajti xúgíʼ dí najmún.
16 Supim ga̱jma̱a̱ Hosá nigájnuu mbiʼñún dí muñewa̱a̱n xkrugua dí rígá xígií náa narámaaʼ a̱jkha̱ʼ,* náa mijngii rígá Xkrugua dí mbiʼyuu Saléket,* náa kamba̱a̱ mba̱a̱ dí natsimuu, mbá grupo bi̱ nuñewa̱a̱n wájun náa níjñún i̱mba̱ grupo.
17 Kúwá mbá majuiin levitas xígií náa nagájnuu a̱jkha̱ʼ. Ga̱jma̱a̱ náa norte kúwá mbá a̱jkhui̱i̱n dí mbiʼi, xúʼko̱ má náa sur. Ga̱jma̱a̱ náa kajti xúgíʼ dí najmún majmiin majmiin kuájun.
18 Náa corredor dí rígá xígií náa narámaaʼ a̱jkha̱ʼ, wájun mbá a̱jkhui̱i̱n náa kamba̱a̱ mba̱a̱ ga̱jma̱a̱ mbá a̱jkhui̱i̱n wájun náa corredor.
19 Xígi̱ kaʼnii nirui̱ʼti̱i̱n bi̱ wájun náa xkrugua, bi̱ naguwáʼ náa coreítas ga̱jma̱a̱ náa meraritas.
20 Ahíya bi̱ na̱ʼkha̱ náa levitas, kajkuáa ñawúunʼ dí mañewu̱u̱n cuarto náa kajti dí gíʼdoo numuu dí rígá náa goʼwóo Dios bi̱ gajkhun, ga̱jma̱a̱ cuarto náa kajti dí gíʼdoo numuu dí niguma kaʼwi̱i̱.*
21 E̱ji̱i̱n Ladán, xóo muʼthá bi̱ naguwáʼ náa Ladán bi̱ nindxu̱u̱ xa̱bu̱ guersonita, Jehielí ninindxu̱u̱ bi̱ ndiyá edxu̱u̱ náa goʼwóo anu̱u̱ Ladán,
22 xó má e̱ji̱i̱n Jehielí, Zetam ga̱jma̱a̱ ndxájuu Joel. Ikhiin kajkuáa ñawúúnʼ dí muñewa̱a̱n cuarto náa kajti dí gíʼdoo numuu dí rígá náa goʼwóo Jeobá.
23 Bi̱ nindxu̱ún amramitas, izharitas, hebronitas ga̱jma̱a̱ uzielitas,
24 Sebuel bi̱ na̱ʼkha̱ náa Guersom, a̱ʼdióo Moisés, nindxu̱u̱ bi̱ kayá edxu̱u̱ náa kajti xúgíʼ dí najmún.
25 Bi̱ naguwáʼ náa ndxájuu, bi̱ mbiʼyuu Eliezer, nindxu̱u̱ Rehabías, Jesayá, Joram, Zicrí ga̱jma̱a̱ Selomot.
26 Selomot gajmíi̱n a̱ngui̱i̱n kajkuáa ñawúúnʼ dí muñewa̱a̱n cuarto náa kajti dí gíʼdoo numuu dí niguma kaʼwi̱i̱, ga̱jma̱a̱ dí niʼni kaʼwi̱i̱ rey David, bi̱ kuya̱ edxu̱u̱ náa guʼwún anu̱ún, bi̱ nutañajúúnʼ mbá mil ga̱jma̱a̱ cien, mangiin bi̱ nutañajúúnʼ soldado.
27 Nini̱ kaʼwi̱i̱ dí niguwáánʼ kudúún náa nixmijná mu majmaa náa goʼwóo Jeobá.
28 Ma̱ngaa nuñewa̱a̱n xúgíʼ dí niʼni kaʼwi̱i̱ vidente* Samuel, Saúl a̱ʼdióo Quis, Abner a̱ʼdióo Ner ga̱jma̱a̱ Joab a̱ʼdióo Zeruyá. Xúgíʼ dí mbáa naʼni kaʼwi̱i̱ nagún kudúún mu mañewu̱u̱n Selomit gajmíi̱n a̱ngui̱i̱n.
29 Bi̱ naguwáʼ náa izharitas, Kenanías gajmíi̱n e̱ji̱i̱n nindrigú mixtiʼkhu ñajunʼ dí muni̱ rexa̱a̱ náa goʼwóo Dios, xóo dí mani̱ndxu̱ún soldado ga̱jma̱a̱ bi̱ munimbaníí xkujndu náa Israel.
30 Bi̱ naguwáʼ náa hebronitas, Hasabías gajmíi̱n a̱ngui̱i̱n, mbá 1,700 xa̱bekha bi̱ kijmaratiin, ikhiin kajkuáa ñawúúnʼ mbá xúgíʼ ñajunʼ dí naguma náa Israel náa mbaaʼ dí rígá náa Jordán xígií náa narámaaʼ a̱jkha̱ʼ. Kajkuáa ñawúúnʼ mbá xúgíʼ ñajunʼ dí naguma náa Jeobá ga̱jma̱a̱ náa rey.
31 Bi̱ naguwáʼ náa Hebrón, Jeriya nindxu̱u̱ bi̱ kayá edxu̱u̱ náa hebronitas xó má bi̱ naguwáʼ náa guʼwún anu̱ún. Índo̱ naʼni má 40 tsiguʼ dí naʼtáñajunʼ David, ndiñíinʼ náa ikhiin ga̱jma̱a̱ nixkamiin xa̱bekha bi̱ xkujiinʼ ga̱jma̱a̱ kijmaratiin náa Jazer dí rígá náa Galaad.
32 A̱ngui̱i̱n ikhaa ninindxu̱ún mbá 2,700 xa̱bekha bi̱ kijmaratiin, bi̱ kuya̱ edxu̱u̱ náa guʼwún anu̱ún. Ikha jngóo rey David nixnún ñajunʼ muni̱ náa rubenitas, náa gaditas ga̱jma̱a̱ náa mbá ta̱pha̱ xuajin chíʼgíiʼ* ndrígóo Manasés dí mbuyáá mbá xúgíʼ ñajunʼ dí nuni̱ náa Dios bi̱ gajkhun ga̱jma̱a̱ náa rey.
Mbaʼa nota
^ O “tátée”.
^ O “este”.
^ O “oeste”.
^ O “Puerta de Saléket”.
^ O “dí najuixnájxi̱ náa Dios”.
^ O “tribu”.
