Timbá libro ndrígóo Crónicas 27:1-34
-
Bi̱ nuni̱ ñajuunʼ rey (1-34)
27 Xóo nguáthá mbaʼin israelitas bi̱ kuya̱ edxu̱u̱ náa guʼwún anu̱ún, bi̱ nutañajúúnʼ mil ga̱jma̱a̱ bi̱ nutañajúúnʼ cien, ga̱jma̱a̱ mbá xúgíinʼ soldado bi̱ numbayíí rey, bi̱ kúwá náa grupo dí nuriʼkumijná* xóo nuñajunʼ mámbá igu̱nʼ, xúʼko̱ eni̱ dí mbá xúgíʼ gu̱nʼ rí mbá tsiguʼ. Mbá 24,000 kúwá náa mámbá grupo.
2 Bi̱ kayá edxu̱u̱ náa timbá grupo, bi̱ nuñajunʼ timbá gu̱nʼ nindxu̱u̱ Jasobeam a̱ʼdióo Zabdiel, mbá 24,000 xa̱bekha kúwá náa grupo ndrígóo.
3 Bi̱ naguwáʼ náa Pérez, ikhaa nindxu̱u̱ bi̱ naʼtáñajúúnʼ xúgíinʼ bi̱ kuya̱ edxu̱u̱ bi̱ kaʼñún muñejunʼ rí timbá gu̱nʼ.
4 Dodái xa̱bu̱ ahohíta nindxu̱u̱ bi̱ naʼtáñajúúnʼ bi̱ kaʼñún muñejunʼ dí maʼni a̱jma̱ igu̱nʼ, ga̱jma̱a̱ Miclot nindxu̱u̱ bi̱ kayá edxu̱u̱, ga̱jma̱a̱ náa grupo ndrígóo kúwá mbá 24,000.
5 Bi̱ maʼni ajtsíin bi̱ kayá edxu̱u̱, náa bi̱ kaʼñún muñejunʼ rí maʼni ajtsú igu̱nʼ nindxu̱u̱ Benaya a̱ʼdióo ndxajkun bi̱ kayá edxu̱u̱ Jehoiadá, ga̱jma̱a̱ náa grupo ndrígóo kúwá mbá 24,000.
6 Benaya bigi̱ nindxu̱u̱ mbáa soldado bi̱ xkujiiʼ bi̱ xtáa náa mbá 30, ga̱jma̱a̱ ikhaa kayá edxu̱u̱ náa mbá 30. Ga̱jma̱a̱ a̱ʼdióo bi̱ mbiʼyuu Amizabad nindxu̱u̱ bi̱ kayá edxu̱u̱ náa grupo ndrígóo.
7 Bi̱ maʼni a̱jkhui̱i̱n bi̱ kayá edxu̱u̱, náa bi̱ kaʼñún muñejunʼ rí maʼni a̱jkhu̱ igu̱nʼ nindxu̱u̱ giʼtio̱o̱* Joab bi̱ mbiʼyuu Asahel, ga̱jma̱a̱ a̱ʼdióo bi̱ mbiʼyuu Zebadías ninújnga̱a̱ xtiʼkhuu índo̱ ndáwa̱a̱ ikhaa, ga̱jma̱a̱ náa grupo ndrígóo kúwá mbá 24,000.
8 Bi̱ maʼni witsiin bi̱ kayá edxu̱u̱, náa bi̱ kaʼñún muñejunʼ rí maʼni witsu igu̱nʼ nindxu̱u̱ Samhut xa̱bu̱ izrahíta, ga̱jma̱a̱ náa grupo ndrígóo kúwá mbá 24,000.
9 Bi̱ maʼni majuiin bi̱ kayá edxu̱u̱, náa bi̱ kaʼñún muñejunʼ rí maʼni majun igu̱nʼ nindxu̱u̱ Irá a̱ʼdióo Iqués xa̱bu̱ tecoíta, ga̱jma̱a̱ náa grupo ndrígóo kúwá mbá 24,000.
10 Bi̱ maʼni juwiin bi̱ kayá edxu̱u̱, náa bi̱ kaʼñún muñejunʼ dí maʼni juwan igu̱nʼ nindxu̱u̱ Hélez xa̱bu̱ pelonita, bi̱ na̱ʼkha̱ náa Efraín, ga̱jma̱a̱ náa grupo ndrígóo kúwá mbá 24,000.
11 Bi̱ maʼni migiñiiʼ bi̱ kayá edxu̱u̱, náa bi̱ kaʼñún muñejunʼ dí maʼni migiñuʼ igu̱nʼ nindxu̱u̱ Sibecái xa̱bu̱ husatita, bi̱ na̱ʼkha̱ náa zerahítas, ga̱jma̱a̱ náa grupo ndrígóo kúwá mbá 24,000.
12 Bi̱ maʼni mijna gu̱wi̱i̱nʼ bi̱ kayá edxu̱u̱, náa bi̱ kaʼñún muñejunʼ dí maʼni mijna gu̱wa̱ʼ igu̱nʼ nindxu̱u̱ Abí-Ézer xa̱bu̱ anatotita, bi̱ na̱ʼkha̱ náa Benjamín, ga̱jma̱a̱ náa grupo ndrígóo kúwá mbá 24,000.
13 Bi̱ maʼni gu̱wi̱i̱nʼ bi̱ kayá edxu̱u̱, náa bi̱ kaʼñún muñejunʼ dí maʼni gu̱wa̱ʼ igu̱nʼ nindxu̱u̱ Maharái xa̱bu̱ netofatita, bi̱ na̱ʼkha̱ náa zerahítas, ga̱jma̱a̱ náa grupo ndrígóo kúwá mbá 24,000.
14 Bi̱ maʼni 11 bi̱ kayá edxu̱u̱, náa bi̱ kaʼñún muñejunʼ dí maʼni 11 igu̱nʼ nindxu̱u̱ Benaya xa̱bu̱ piratonita, bi̱ na̱ʼkha̱ náa Efraín, ga̱jma̱a̱ náa grupo ndrígóo kúwá mbá 24,000.
15 Bi̱ maʼni 12 bi̱ kayá edxu̱u̱, náa bi̱ kaʼñún muñejunʼ dí maʼni 12 igu̱nʼ nindxu̱u̱ Heldái xa̱bu̱ netofatita, bi̱ na̱ʼkha̱ náa Otniel, ga̱jma̱a̱ náa grupo ndrígóo kúwá mbá 24,000.
16 Bigi̱ nindxu̱ún bi̱ ndiya̱ edxu̱u̱ náa xuajin majkhaʼ* dí rígá náa Israel: Bi̱ ndiyá edxu̱u̱ náa rubenitas ninindxu̱u̱ Eliezer a̱ʼdióo Zicrí, bi̱ ndiyá edxu̱u̱ náa simeonitas ninindxu̱u̱ Sefatías a̱ʼdióo Maacá,
17 bi̱ ndiyá edxu̱u̱ náa bi̱ naguwáʼ náa Leví ninindxu̱u̱ Hasabías a̱ʼdióo Quemuel, bi̱ ndiyá edxu̱u̱ náa bi̱ naguwáʼ náa Aarón ninindxu̱u̱ Sadoc,
18 bi̱ ndiyá edxu̱u̱ náa bi̱ naguwáʼ náa Judá ninindxu̱u̱ Elihú, mbáa ndxájuu David, bi̱ ndiyá edxu̱u̱ náa bi̱ naguwáʼ náa Isacar ninindxu̱u̱ Omrí a̱ʼdióo Miguel,
19 bi̱ ndiyá edxu̱u̱ náa bi̱ naguwáʼ náa Zabulón ninindxu̱u̱ Ismayá a̱ʼdióo Abdías, bi̱ ndiyá edxu̱u̱ náa bi̱ naguwáʼ náa Neftalí ninindxu̱u̱ Jerimot a̱ʼdióo Azriel,
20 bi̱ ndiyá edxu̱u̱ náa bi̱ naguwáʼ náa Efraín ninindxu̱u̱ Hosea a̱ʼdióo Azazías, bi̱ ndiyá edxu̱u̱ náa bi̱ naguwáʼ náa mbá ta̱pha̱ xuajin chíʼgíiʼ* ndrígóo Manasés ninindxu̱u̱ Joel a̱ʼdióo Pedaya,
21 bi̱ ndiyá edxu̱u̱ náa bi̱ naguwáʼ náa mbá ta̱pha̱ xuajin chíʼgíiʼ ndrígóo Manasés bi̱ nikúwá náa Galaad ninindxu̱u̱ Idó a̱ʼdióo Zacarías, bi̱ ndiyá edxu̱u̱ náa bi̱ naguwáʼ náa Benjamín ninindxu̱u̱ Jaasiel a̱ʼdióo Abner,
22 ga̱jma̱a̱ bi̱ ndiyá edxu̱u̱ náa bi̱ naguwáʼ náa Dan ninindxu̱u̱ Azarel a̱ʼdióo Jeroham. Bigi̱ ninindxu̱ún príncipes bi̱ nikúwá náa xuajin majkhaʼ dí rígá náa Israel.
23 David na̱nguá niguxniin bi̱ xóó táʼga̱nú 20 tsigúúnʼ, numuu dí Jeobá má nikudaminaʼ dí Israel maʼni ra̱ʼkhá tháán mbaʼin xóo a̱ʼgua̱a̱n bi̱ tri̱gi̱i̱n mekhuíí.
24 Joab a̱ʼdióo Zeruyá nigíʼdu̱u̱ niʼni̱i̱ censo, mú táguámbóo, ga̱jma̱a̱ numuu censo rígi̱ niʼni rí Dios makásngañu̱u̱ʼ kaʼyoo Israel. Ga̱jma̱a̱ táʼga̱nú maxtagijxi̱i̱ náa i̱yi̱i̱ʼ nguáthi̱i̱n nikúwá nákhá mbiʼi rí nixtáa rey David.
25 Azmávet a̱ʼdióo Adiel kajkuáa ñawúunʼ dí mañewu̱u̱n cuarto náa kajti rí gíʼdoo numuu náa goʼwóo rey, Jonatán a̱ʼdióo Uzías kajkuáa ñawúunʼ dí mañewu̱u̱n náa kajti xúgíʼ rí najmún* dí rígá náa xanáá, náa xuajin mba̱ʼu̱, náa xuajin majkhaʼ ga̱jma̱a̱ náa torre.
26 Ezrí a̱ʼdióo Kelub naxnún ikha bi̱ nuñajunʼ xanáá nudu náa mbaaʼ.
27 Simeí xa̱bu̱ ramatita kajkuáa ñawúunʼ mbaaʼ náa kiʼdu uva. Zabdí xa̱bu̱ sifmita kajkuáa ñawúunʼ uva rí najma̱a̱ rí naxtagijxi̱i̱ náa rígá vino.
28 Baal-Hanán xa̱bu̱ guederita kajkuáa ñawúunʼ mbaaʼ náa kiʼdu olivo ga̱jma̱a̱ sicómoros dí rígá náa Sefelá. Joás kajkuáa ñawúunʼ náa naxtagijxi̱i̱ aceite.
29 Sitrái xa̱bu̱ saronita kajkuáa ñawúunʼ mañewu̱u̱n xedi̱ bi̱ nuphiʼtsu náa Sarón, ga̱jma̱a̱ Safat a̱ʼdióo Adlái kajkuáa ñawúunʼ mañewu̱u̱n xedi̱ náa xkua̱.
30 Obil xa̱bu̱ ismaelita kajkuáa ñawúunʼ mañewu̱u̱n camello. Jehdeyá xa̱bu̱ meronotita kajkuáa ñawúunʼ mañewu̱u̱n búrru*
31 ga̱jma̱a̱ Jaziz xa̱bu̱ hagrita kajkuáa ñawúunʼ dí mañewu̱u̱n mugu̱. Xúgíinʼ buʼko̱ nindxu̱ún bi̱ kuya̱ edxu̱u̱ bi̱ nuñewa̱a̱n rí gíʼdoo rey David.
32 Jonatán a̱ʼdá giʼtio̱o̱ David nindxu̱u̱ bi̱ naxná consejo ga̱jma̱a̱ secretario, nindxu̱u̱ mbáa xa̱bu̱ najmañuu. Jehiel a̱ʼdióo Hacmoní nindxu̱u̱ bi̱ nañewu̱u̱n e̱ji̱i̱n rey.
33 Ahitofel nindxu̱u̱ bi̱ naxnúu consejo rey ga̱jma̱a̱ Husái xa̱bu̱ arkita nindxu̱u̱ bi̱ nambájxu̱u̱ ga̱jma̱a̱* rey.
34 Nda̱wa̱á dí Ahitofel nixtáa Jehoiadá a̱ʼdióo Benaya ga̱jma̱a̱ Abiatar, ga̱jma̱a̱ Joab ninindxu̱u̱ bi̱ niʼtáñajúúnʼ soldado ndrígóo rey.
Mbaʼa nota
^ Náa ajngáa hebreo naʼthí, “bi̱ nataʼa̱án ga̱jma̱a̱ bi̱ nagájna̱án”.
^ Náa ajngáa hebreo tséʼthí á mu giʼtáá o giʼnii.
^ O “tribu”.
^ O “lajuíin”.
^ O “cuarto náa kajti rí gíʼdoo numuu”.
^ Náa ajngáa hebreo naʼthí, “búrra”.
^ O “bi̱ naku̱mu̱u̱ kaʼyoo”.
