Timbá libro ndrígóo Crónicas 28:1-21
28 Ikhú David nigímbíin náa Jerusalén mbá xúgíinʼ príncipes bi̱ kúwá náa Israel: Príncipes bi̱ kúwá náa xuajin majkhaʼ,* ga̱jma̱a̱ bi̱ kuya̱ edxu̱u̱ náa grupo bi̱ nuni̱ ñajunʼ náa rey, bi̱ nutañajúúnʼ mbá mil ga̱jma̱a̱ cien, bi̱ kuya̱ edxu̱u̱ náa mbá xúgíinʼ bi̱ nuñewa̱a̱n dí gíʼdoo rey, ga̱jma̱a̱ xediu̱u̱ rey mangiin e̱ji̱i̱n, bi̱ kuya̱ edxu̱u̱ náa bi̱ nuñewa̱a̱n,* ma̱ngaa mbá xúgíinʼ xa̱bekha bi̱ xkujiinʼ ga̱jma̱a̱ kijmaratiin.
2 Ikhú rey David niwi̱ji̱ ga̱jma̱a̱ niʼthí:
“Gudxawunʼla a̱ngui̱nʼ ga̱jma̱a̱ xa̱bu̱ xuajñunʼ. Nigájnuu náa a̱jkiu̱nʼ dí ma̱ni̱ mbá guʼwá náa mbayáa jxu̱u̱ʼ arca* dí nimbánuu ndrígóo Jeobá, ga̱jma̱a̱ xóo náa masngutámáʼ rajkhúu Dios ndrígúlú. Niniratoo dí majmaa mu maguma.
3 Mú Dios bi̱ gajkhun niʼthúnʼ: ‹Ikháán xátani̱ mbá guʼwá náa marigá mbiʼyuʼ, numuu dí nitaxmína̱ʼ ga̱jma̱a̱ nitaxídíí eʼdi›.
4 Mú Jeobá, Dios ndrígóo Israel, niraʼwúún náa mbá xúgíinʼ bi̱ kúwá náa goʼwóo anu̱ʼ* mu mani̱ndxu̱ʼ rey náa Israel asndu kámuu. Numuu dí niraʼwíi Judá xóo bi̱ mbayá edxu̱u̱, náa mbá xúgíinʼ bi̱ kúwá náa goʼwóo Judá, niraʼwíin bi̱ kúwá náa goʼwóo anu̱ʼ, ga̱jma̱a̱ náa e̱ji̱i̱n anu̱ʼ niraʼwúún ikhúún mu mani̱ndxu̱ʼ rey náa xúgíʼ Israel.
5 Jeobá nixniúʼ mbaʼin e̱ji̱nʼ, ga̱jma̱a̱ náa mbá xúgíinʼ ikhiin niraʼwíi a̱ʼdióʼ Salomón mu magi̱ʼi̱ náa xílí* dí naʼtáñajunʼ Jeobá náa Israel.
6 Ikhaa niʼthúnʼ: ‹A̱ʼdiáaʼ Salomón nindxu̱u̱ bi̱ maʼni goʼwóʼ ga̱jma̱a̱ rexo̱o̱ goʼwóʼ, numuu dí niraʼwi̱i̱ xóo a̱ʼdióʼ ga̱jma̱a̱ ikhúún mani̱ndxu̱ʼ anu̱u̱.
7 Ma̱ni̱ rí maʼtáñajunʼ mbajyúuʼ asndu kámuu, á mu ikhaa naʼnimbo̱o̱ má xúʼko̱ kiʼtáñajunʼ ndrígóʼ ga̱jma̱a̱ dí na̱tha̱ maguma, xó má xtáa raʼni xúgi̱›.
8 Ikha jngóo na̱tala náa inún mbá xúgíinʼ xa̱bu̱ Israel, ga̱jma̱a̱ náa inún xa̱bi̱i̱ Jeobá, ma̱ngaa náa inuu Dios ndrígúlú: Dí gunimíjna̱ muniʼnuuʼ ga̱jma̱a̱ mu̱nimbala tsumáá xúgíʼ kiʼtáñajunʼ ndrígóo Jeobá Dios ndrígala, mu xúʼko̱ makuwáanʼla mba̱yu̱u̱ʼ náa ku̱ba̱ʼ májánʼ rígi̱ ga̱jma̱a̱ xúʼko̱ muniʼñááʼ náa ñawúúnʼ e̱jña̱la nda̱wa̱á rí ikháanʼ.
9 Ikháán a̱ʼdióʼ Salomón, ataniʼniiʼ májánʼ Dios ndrígóo ana̱a̱ʼ, atani̱ ñajuunʼ ga̱jma̱a̱ xúgíʼ a̱jkia̱a̱nʼ ma̱ngaa ga̱jma̱a̱ gagi,* numuu dí Jeobá naʼninuuʼ májánʼ a̱jkiu̱ún xa̱bu̱, ndaʼyoo dí nandún muni̱ ga̱jma̱a̱ dí nundxaʼwamíjna̱. Á mu dí ikháán natayáaʼ, ikhaa maniñaminaʼ dí mataxkamaa, mú á mu natatsíñááʼ ikhaa ni xándoo kaʼyaaʼ asndu kámuu.
10 Jeobá niraʼwíín mu matani̱ mbá guʼwá náa xa̱bu̱ mbuyamajkuíí. Xámíñáaʼ ga̱jma̱a̱ atiejunʼ”.
11 Nda̱wa̱á David nixnúu a̱ʼdióo Salomón xtiʼkhuu xóo maguma corredor ga̱jma̱a̱ mbaʼa cuarto dí magiʼdoo, xó má cuarto náa kajti dí najmún, ga̱jma̱a̱ cuarto dí rígá náa tsu̱du̱u̱ guʼwá, ma̱ngaa cuarto dí rígá awúún ga̱jma̱a̱ cuarto dí náa Dios naʼni mba̱a̱ a̱jkiu̱u̱n kaʼyoo aʼkhá.*
12 Nixnúu xtiʼkhuu xó má espíritu ndrígóo Dios nixná ikhoo maʼni, nisngájmuu xú káʼnii gáguma rexo̱o̱ goʼwóo Jeobá, xúgíʼ náa muphiʼtsu dí marigá mbájndi, náa cuarto náa kajti dí gíʼdoo numuu dí rígá náa goʼwóo Dios bi̱ gajkhun, ga̱jma̱a̱ náa cuarto náa kajti dí gíʼdoo numuu dí niguma kaʼwi̱i̱,*
13 ma̱ngaa náa grupo náa kúwá ndxajkun ga̱jma̱a̱ levitas, ga̱jma̱a̱ náa mbá xúgíʼ ñajunʼ dí naguma náa goʼwóo Jeobá, ma̱ngaa mbá xúgíʼ dí niguma mu majmaa náa ñajunʼ dí naguma náa goʼwóo Jeobá.
14 Ikhaa niʼthí nguáthá phú ki̱wu̱n oro, oro dí nijmaa mu maguma ga̱jma̱a̱ mbá xúgíʼ dí najmaa náa mixtiʼkhu ñajunʼ, ga̱jma̱a̱ nguáthá ki̱wu̱n dí niguma ga̱jma̱a̱ plata, ma̱ngaa mbá xúgíʼ dí najmaa mu maguma mixtiʼkhu ñajunʼ,
15 ma̱ngaa xóo nguáthá ki̱wu̱n candelabros dí oro ga̱jma̱a̱ lámparas dí oro, xóo ki̱wu̱n mámbá candelabro ga̱jma̱a̱ lámparas ndrígóo, ma̱ngaa xóo nguáthá ki̱wu̱n candelabros dí plata, ga̱jma̱a̱ mámbá candelabro ga̱jma̱a̱ lámparas ndrígóo, xó má najmaa,
16 ma̱ngaa nguáthá ki̱wu̱n oro dí majmaa náa mesa náa trámáʼ pan dí karngujxi̱,* dí majmaa náa mámbá mesa, ga̱jma̱a̱ nguáthá ki̱wu̱n plata dí majmaa náa mesa dí niguma ga̱jma̱a̱ plata,
17 ga̱jma̱a̱ nguáthá ki̱wu̱n tenedor, xua̱a̱ ga̱jma̱a̱ daan rayaʼ dí mbawíí oro, ma̱ngaa nguáthá ki̱wu̱n xua̱a̱ majkhaʼ dí niguma ga̱jma̱a̱ oro, mu majmaa náa mámbá xua̱a̱ majkhaʼ, ma̱ngaa nguáthá ki̱wu̱n xua̱a̱ majkhaʼ dí niguma ga̱jma̱a̱ plata, mu majmaa náa mámbá xua̱a̱ majkhaʼ.
18 Ma̱ngaa niʼthí nguáthá phú ki̱wu̱n oro dí niguma kaʼwi̱i̱ mu majmaa náa mikarámáʼ rí ndataun, ga̱jma̱a̱ querubín bi̱ nigumiin ga̱jma̱a̱ oro bi̱ juáʼwíi xpíjpiúún, bi̱ náa ndájkhún rígá arca dí nimbánuu ndrígóo Jeobá, dí nandoo gáʼthúu̱n cárriu̱u̱ Dios.
19 David niʼthí: “Ñawúunʼ Jeobá nirígá náa ikhúún, ga̱jma̱a̱ ikhaa niʼni dí majmañuʼ mu maniraʼmáʼ náa xtiʼkhuu xóo maguma”.
20 Ikhú David niʼthúu̱n a̱ʼdióo Salomón: “Gakhi̱i̱ a̱jkia̱a̱nʼ gátani̱ ga̱jma̱a̱ xámíñáaʼ, atiejunʼ. Xámíñáaʼ ni má xáguáʼáánʼ, numuu dí Jeobá, Dios ndrígóʼ xtáa ga̱jma̱á nindxa̱a̱ʼ. Xániñaaʼ ni má xániñati̱ga̱a̱n. Maxtáa ga̱jma̱á nindxa̱a̱ʼ asndu índo̱ gámbá raguma xúgíʼ ñajunʼ dí gáguma náa goʼwóo Jeobá.
21 Gi̱i̱ kúwá grupo ndxajkun ga̱jma̱a̱ levitas bi̱ muni̱ xúgíʼ ñajunʼ dí gáguma náa goʼwóo Dios bi̱ gajkhun. Xtaʼdiin bi̱ kúwá xawii muñejunʼ ga̱jma̱a̱ bi̱ najmañún muni̱ asndu ndiéjunʼ má ñajunʼ, xó má príncipes ga̱jma̱a̱ mbá xúgíinʼ xa̱bu̱ xuajin munimbu̱u̱n xúgíʼ ikha dí gáraxnu̱u̱n”.
Mbaʼa nota
^ O “tribu”.
^ O “soldado”.
^ O “e̱jna̱”.
^ O “táteʼ”.
^ O “trono”.
^ O “ga̱jma̱a̱ mbá a̱jkia̱a̱nʼ gagi”.
^ O “cuarto náa gídáʼ arca”.
^ O “dí najuixnájxi̱ náa Dios”.
^ Xóo muʼthá, pan dí najuixnájxi̱.
