Timbá libro ndrígóo Crónicas 29:1-30
29 Rey David niʼthún mbá xúgíinʼ xa̱bu̱ xuajin: “A̱ʼdióʼ Salomón, bi̱ Dios niraʼwíi, kaʼníí dxámá nindxu̱u̱ ga̱jma̱a̱ xóó nda̱a̱ dí ejmañuu,* ñajunʼ rígi̱ ra̱ʼkhá tháán mba̱a̱, numuu dí raʼkháa goʼwóo mbáa xa̱bu̱ú, guʼwá náa mbiʼyamajkuíí Jeobá Dios maguma.
2 Ni̱ni̱ mbá tsiaki̱i̱ mba̱a̱ mu ma̱ni̱ratoo xúgíʼ dí majmaa náa goʼwóo Dios ndrígóʼ. Ndiʼyáʼ oro mu majmaa náa dí naguma ga̱jma̱a̱ oro, plata mu majmaa náa dí naguma ga̱jma̱a̱ plata, cobre mu majmaa náa dí naguma ga̱jma̱a̱ cobre, hierro mu majmaa náa dí naguma ga̱jma̱a̱ hierro, ixi̱ mu majmaa náa dí naguma ga̱jma̱a̱ ixi̱, xúʼko̱ má itsí ónice ga̱jma̱a̱ itsí dí natima náa pared, ma̱ngaa itsí dí color dí najmún mu murawíi xtiʼkhuu, ga̱jma̱a̱ mixtiʼkhu enii itsí rí mitsaanʼ* ma̱ngaa mbaʼa itsí alabastro.
3 Ga̱jma̱a̱ numuu dí ra̱ʼkhá tháán eyoʼ dí maguma goʼwóo Dios ndrígóʼ, ikha jngóo ma̱ngaa na̱xna̱ oro ga̱jma̱a̱ plata dí nigújxi̱i̱ náa goʼwóʼ mu majmaa náa maguma goʼwóo Dios ndrígóʼ, raʼkháa i̱ndó xúgíʼ dí niniʼñúuʼ xawii mu majmaa náa maguma guʼwá rí mikaʼwu,
4 ma̱ngaa niniʼñúuʼ mbá 102,600 kilo* oro dí na̱ʼkha̱ náa Ofir ga̱jma̱a̱ mbá 239,400 kilo* plata dí niguma kaʼwi̱i̱ mu magugóo ga̱jma̱a̱ pared náa mbá xúgíʼ cuarto,
5 mu majmaa náa xúgíʼ ñajunʼ dí naguma ga̱jma̱a̱ oro, náa xúgíʼ ñajunʼ dí naguma ga̱jma̱a̱ plata, ga̱jma̱a̱ mu majmúún náa xúgíʼ ñajunʼ rí nuni̱ ñumbáá. Ikha jngóo dí xúgi̱ rá, tsáá nandoo ma̱ʼkha̱ kayóo mbá dí maxnúu Jeobá rá.”
6 Ikhú nixnaximi̱jna̱ príncipes bi̱ kúwá náa guʼwún anu̱ún,* príncipes bi̱ kúwá náa xuajin majkhaʼ* dí rígá náa Israel, bi̱ nutañajúúnʼ mbá mil ga̱jma̱a̱ cien, mangiin bi̱ kajkuáa ñawúúnʼ muñewa̱a̱n xúgíʼ dí gíʼdoo rey.
7 Ikhiin nixna mu dí majmaa náa maguma goʼwóo Dios bi̱ gajkhun, mbá 171,000 kilo* oro, mbá 10,000 dáricos,* mbá 342,000 kilo* plata, mbá 615,600 kilo* cobre ga̱jma̱a̱ mbá 3 millón 420 mil kilo* hierro.
8 Bi̱ guáʼdáá itsí rí mitsaanʼ nixna mu majti náa cuarto náa kajti dí gíʼdoo numuu náa goʼwóo Jeobá, dí kajkuáa ñawúunʼ nañewu̱u̱n Jehiel xa̱bu̱ guersonita.
9 Xa̱bu̱ xuajin ra̱ʼkhá tháán nidxúún dí nixna tsigijñaʼ rígi̱, numuu dí nixnáá Jeobá tsigijñaʼ rígi̱ ga̱jma̱a̱ xúgíʼ a̱jkiu̱ún, ma̱ngaa rey David ra̱ʼkhá tháán nidxuu.
10 Ikhú David niʼni mba̱a̱ Jeobá náa inún mbá xúgíinʼ xa̱bu̱ xuajin. David niʼthí: “Gaguma mba̱a̱n asndu kámuu, Tátá Jeobá, Dios ndrígóo anu̱xu̱ Israel.
11 Ikháán ndrígáaʼ Tátá Jeobá, dí mba̱ʼu̱, tsiaki̱i̱, rí mitsiʼyá, gamajkhu ga̱jma̱a̱ rí naxpíbínʼ, numuu dí ndrígáaʼ ikháán mbá xúgíʼ dí rígá náa mekhu ga̱jma̱a̱ náa ku̱ba̱ʼ. Ndrígáaʼ ikháán dí nutañajunʼ, Tátá Jeobá. Ikháán itháan mba̱a̱n náa xúgíinʼ.
12 Náa ikháán na̱ʼkha̱ mbújkha̱a̱ ga̱jma̱a̱ gamajkhu, ga̱jma̱a̱ ikháán má naratáñajuíínʼ xúgíʼ. Náa ñawáanʼ rígá tsiaki̱i̱ ga̱jma̱a̱ ñawáanʼ naʼngo̱o̱ naʼni mbaʼwi̱i̱n ga̱jma̱a̱ naxnún tsiaki̱i̱ xúgíinʼ.
13 Ikha jngóo dí xúgi̱, Dios ndrígúxu̱, nuxna̱a̱xu núma̱aʼ ga̱jma̱a̱ nu̱ni̱ mba̱a̱ mbiʼyaaʼ dí mitsaanʼ.
14 Mú tsáá lá nindxu̱ʼ ikhúún ga̱jma̱a̱ tsáá lá nindxu̱u̱ xuajñunʼ mu dí ma̱ndoo muxna̱a̱ʼxu tsigijñaʼ rígi̱ dí nagájnuu náa a̱jkiu̱xu̱ rá. Numuu dí xúgíʼ na̱ʼkha̱ náa ikháán. Ga̱jma̱a̱ náa ñawáanʼ má e̱ʼkha̱ xúgíʼ dí nixna̱a̱ʼxu.
15 Náa inaaʼ ikháán nindxu̱xu̱ xóo xa̱bu̱ naguwaáʼ ga̱jma̱a̱ xa̱bu̱ bi̱ nagún rajnguʼwún,* xó má xúgíinʼ wajin xiʼñúxu. Numuu dí mbiʼi ndrígúxu̱ náa tsu̱du̱u̱ ku̱ba̱ʼ nindxu̱u̱ xóo ndájkua rí nándáa rí gíʼthu̱u̱n.
16 Tátá Jeobá, Dios ndrígúxu̱, xúgíʼ mbújkha̱a̱ dí nigímbóóxu mu dí mu̱nixu̱ mbá guʼwá náa marigá mbiʼyaaʼ dí kaʼwu, náa ñawáanʼ má ikháán e̱ʼkha̱, ndrígáaʼ ikháán má xúgíʼ.
17 Dios ndrígóʼ, nda̱yo̱o̱ májánʼ dí ikháán natatsinunʼ a̱jkiu̱ún xa̱bu̱ ga̱jma̱a̱ nanigua̱a̱ʼ índo̱ nuni̱ rí májánʼ. Ga̱jma̱a̱ mbá xúgíʼ a̱jkiu̱nʼ nixna xúgíʼ rígi̱, ga̱jma̱a̱ ra̱ʼkhá tháán edxunʼ índo̱ nda̱yo̱o̱ rí xa̱bu̱ xuajñanʼ bi̱ kúwá gi̱i̱ nixnajxi̱ tsigijñaʼ rígi̱ náa ikháán dí nagájnuu náa a̱jkiu̱ún.
18 Tátá Jeobá, Dios ndrígóo Abrahán, Isaac ga̱jma̱a̱ Israel, Dios ndrígu̱ún wajin xiʼñúxu. Atani̱ dí marigá asndu kámuu dí nandún muni̱ ga̱jma̱a̱ rí nundxa̱ʼwa̱míjna̱ náa a̱jkiu̱ún xa̱bu̱ xuajñanʼ, ga̱jma̱a̱ atani̱ rí magiwa̱a̱nʼ a̱jkiu̱ún kuyaaʼ.
19 Araxnáá mbá a̱jkiu̱u̱n kájxi̱ a̱ʼdióʼ Salomón mu maʼnimbo̱o̱ kiʼtáñajunʼ ndrígáaʼ, dí naʼni marmáʼáan a̱jkia̱a̱nʼ ga̱jma̱a̱ xtángoo ndrígáaʼ. Mu maʼni mbá xúgíʼ rígi̱, ma̱ngaa dí maʼni mbá guʼwáaʼ dí ikhúún nigímbóó dí maguma ga̱jma̱a̱”.
20 Ikhú David niʼthúún mbá xúgíinʼ xa̱bu̱ xuajin: “Dí xúgi̱ rá, gu̱ni̱ mba̱a̱ Jeobá Dios ndrígala”. Ikhú mbá xúgíinʼ xa̱bu̱ xuajin nini̱ mba̱a̱ Jeobá, Dios ndrígu̱ún wajin xiʼñúúnʼ, niguaʼndutiga̱ ga̱jma̱a̱ nismbati̱gu̱u̱n náa inuu Jeobá, ma̱ngaa náa inuu rey.
21 Nixnajxi̱ má xúʼko̱ tsigijñaʼ náa inuu Jeobá, ga̱jma̱a̱ nixnajxi̱ tsigijñaʼ dí nakarámáʼ náa inuu Jeobá. Dí i̱mba̱ néjtsuu nixnajxi̱i̱n mbá 1,000 e̱jín xédí, mbá 1,000 mugu̱ e̱jmba̱a̱, mbá 1,000 mugu̱ ga̱jma̱a̱ tsigijñaʼ dí nagadirámuuʼ, ra̱ʼkhá tháán mbaʼa tsigijñaʼ nixnajxi̱ dí ga̱jma̱a̱ numún mbá xúgíinʼ xa̱bu̱ Israel.
22 Ga̱jma̱a̱ gagi nikúwá ruphiʼtsu ma̱ngaa naʼwa̱a̱n náa inuu Jeobá mbiʼi rúʼko̱. Dí maʼni a̱jma̱ nuthu, nigi̱i̱ʼ mani̱ndxu̱u̱ rey Salomón, a̱ʼdióo David, ga̱jma̱a̱ nigi̱i̱ʼ náa inuu Jeobá xóo mbáa bi̱ mbayá edxu̱u̱ ga̱jma̱a̱ Sadoc nigi̱i̱ʼ xóo ndxajkun.
23 Salomón nigi̱ʼi̱ xóo rey náa xíliu̱u̱* Jeobá, náa xtiʼkhuu anu̱u̱ David. Niʼtáñajunʼ májánʼ ga̱jma̱a̱ xúgíinʼ xa̱bu̱ Israel ninimbu̱u̱n kuyáá.
24 Xúgíinʼ príncipes, soldado bi̱ mixkujiinʼ ga̱jma̱a̱ mbá xúgíinʼ e̱ji̱i̱n rey David ninimbu̱u̱n kuyáá rey Salomón.
25 Jeobá ra̱ʼkhá tháán niʼni mba̱a̱ Salomón náa inún mbá xúgíinʼ xa̱bu̱ Israel. Ga̱jma̱a̱ nixnúu gamajkhu xóo rí tákánáá nimbáa rey náa Israel.
26 David a̱ʼdióo Jesé niʼtáñajunʼ náa mbá xúgíʼ Israel.
27 Mbá 40 tsiguʼ niʼtáñajunʼ náa Israel. Náa Hebrón niʼtáñajunʼ mbá juwan tsiguʼ ga̱jma̱a̱ náa Jerusalén niʼtáñajunʼ mbá 33 tsiguʼ.
28 Nikhi̱i̱ nikháñuu, gagi nixtáa dí mba̱yu̱u̱ʼ nixtáa. Nigiʼdoo mbújkha̱a̱ ga̱jma̱a̱ nikhánáá gamajkhu. A̱ʼdióo bi̱ mbiʼyuu Salomón ni̱jkha̱nú ninindxu̱u̱ nuxi̱i̱ʼ rey.
29 Dí naʼthí xóó itháan ga̱jma̱a̱ numuu rey David, xúgíʼ dí niʼni kiʼnirámáʼ náa i̱yi̱i̱ʼ dí niʼni vidente* Samuel, profeta* Natán ga̱jma̱a̱ Gat xa̱bu̱ bi̱ ndaʼyoo rí nawasngájmáá.*
30 Xú káʼnii ni̱ʼkha̱ ragi̱ʼi̱ raʼtáñajunʼ, tsiaki̱i̱ rí nigiʼdoo ga̱jma̱a̱ xúgíʼ dí nirígá nákhá mbiʼi rí ikhaa nixtáa. Dí niʼni náa Israel ga̱jma̱a̱ dí niʼni gajmíi̱n xa̱bu̱ ñajunʼ bi̱ nikúwá náa mbájndi nixtáa.
Mbaʼa nota
^ O “wabaaʼ”.
^ O “nagui̱i̱”.
^ Náa ajngáa hebreo naʼthí, “7,000 talentos”.
^ O “tátiu̱ún”.
^ O “tribu”.
^ Náa ajngáa hebreo naʼthí, “100,000 talentos”.
^ Náa ajngáa hebreo naʼthí, “18,000 talentos”.
^ Náa ajngáa hebreo naʼthí, “10,000 talentos”.
^ Náa ajngáa hebreo naʼthí, “5,000 talentos”.
^ O “bi̱ nigún rundri̱ga̱ xuajin”.
^ O “trono ndrígóo”.
^ O “gaʼyee, bi̱ naʼthí dí marigá”.
^ O “visión”.
