Timbá libro ndrígóo Crónicas 4:1-43
4 Bugi̱ nindxu̱ún e̱ji̱i̱n Judá: Pérez, Hezrón, Carmí, Hur ga̱jma̱a̱ Sobal.
2 Reayá a̱ʼdióo Sobal ninindxu̱u̱ anu̱u̱* Jáhat, Jáhat ninindxu̱u̱ anu̱u̱ Ahumái ga̱jma̱a̱ Lahad. Bugi̱ nindxu̱ún bi̱ naguwáʼ náa guʼwún zoratitas.
3 Bugi̱ nindxu̱ún e̱ji̱i̱n anu̱u̱ Etam: Jezreel, Ismá ga̱jma̱a̱ Idbás (gi̱ʼtiu̱ún dxáʼgú nigumbiʼyuu Hazelelponí),
4 Penuel ninindxu̱u̱ anu̱u̱ Guedor, ga̱jma̱a̱ Ézer ninindxu̱u̱ anu̱u̱ Husá. Bugi̱ ninindxu̱ún e̱ji̱i̱n Hur, anu̱u̱ Belén, (Hur ninindxu̱u̱ timbáa a̱ʼdióo Efrata).
5 Asjur anu̱u̱ Tecoa nigiʼdiin a̱jmi̱i̱n gu̱ʼwi̱i̱: Helá ga̱jma̱a̱ Naará.
6 Naará nigiʼdaa ga̱jma̱a̱ Ahuzam, Héfer, Temení ga̱jma̱a̱ Haahastarí. Buʼko̱ ninindxu̱ún e̱ji̱i̱n Naará.
7 E̱ji̱i̱n Helá ninindxu̱u̱ Zéret, Izhar ga̱jma̱a̱ Etnán.
8 Coz ninindxu̱u̱ anu̱u̱ Anub, Zobebá ga̱jma̱a̱ bi̱ naguwáʼ náa Aharhel a̱ʼdióo Harum.
9 Jabez niguma mba̱a̱ itháan ki xóo a̱ngui̱i̱n, ru̱dúu̱* nixná mbiʼyuu Jabez,* numuu dí niʼthí: “Ni̱ni̱i̱ ga̱jma̱a̱ gaʼkhu”.
10 Jabez niʼtákáñuu Dios ndrígóo Israel, niʼthúu̱n: “¡Magúʼthu̱u̱n dí matani̱ tsajkurámúúnʼ ga̱jma̱a̱ matani̱ dí maʼni mba̱a̱ mbayuʼ! ¡Magúʼthu̱u̱n dí ñawáanʼ marigá ga̱jma̱á nindxu̱ʼ ga̱jma̱a̱ matie̱wu̱nʼ náa gamiéjunʼ, mu xúʼko̱ xáminuuʼ gáʼni nimbá!”. Ikha jngóo Dios nixnúu dí nindo̱ʼo̱o̱.
11 Suha bi̱ nindxu̱u̱ ndxájuu Kelub anu̱u̱ Mehir, Mehir anu̱u̱ Estón.
12 Estón ninindxu̱u̱ anu̱u̱ Bet-Rafá, Paséah, Tehiná ga̱jma̱a̱ Tehiná ninindxu̱u̱ anu̱u̱ Ir-Nahás. Bugi̱ ninindxu̱ún xa̱bekha bi̱ naguwáʼ náa Recá.
13 E̱ji̱i̱n Quenaz ninindxu̱u̱ Otniel ga̱jma̱a̱ Seraya, a̱ʼdióo* Otniel ninindxu̱u̱ Hatat.
14 Meonotái ninindxu̱u̱ anu̱u̱ Ofrá. Seraya ninindxu̱u̱ anu̱u̱ Joab, ga̱jma̱a̱ Joab ninindxu̱u̱ anu̱u̱ Gue-Harasim,* nigumbiʼyuu xúʼko̱ numuu dí ikhí nikúwá bi̱ najmañún nuñajunʼ.
15 E̱ji̱i̱n Caleb a̱ʼdióo Jefuné ninindxu̱u̱ Iru, Elá ga̱jma̱a̱ Naam, a̱ʼdióo* Elá ninindxu̱u̱ Quenaz.
16 E̱ji̱i̱n Jehalelel ninindxu̱u̱ Zif, Zifá, Tiría ga̱jma̱a̱ Asarel.
17 E̱ji̱i̱n Ezrá ninindxu̱u̱ Jéter, Méred, Éfer ga̱jma̱a̱ Jalón, mbáa dí a̱ʼgiu̱u̱* Méred nigiʼdaa Míriam, Samái ga̱jma̱a̱ Isbá, anu̱u̱ Estemoa.
18 (A̱ʼgiu̱u̱ Méred bi̱ nindxu̱u̱ judía nigiʼdaa Jéred, anu̱u̱ Guedor, Héber bi̱ ninindxu̱u̱ anu̱u̱ Socó, ga̱jma̱a̱ Jecutiel bi̱ ninindxu̱u̱ anu̱u̱ Zanóah). Bugi̱ ninindxu̱ún e̱ji̱i̱n Bitías, wáxióo* faraón, bi̱ ndiyáa Méred.
19 Náa e̱ji̱i̱n a̱ʼgiu̱u̱ Hodías, giʼtio̱o̱ Náham na̱ʼkha̱ anu̱u̱ Queilá xa̱bu̱ garmita ga̱jma̱a̱ Estemoa xa̱bu̱ maacatita.
20 E̱ji̱i̱n Shimón ninindxu̱u̱ Amnón, Riná, Ben-Hanán ga̱jma̱a̱ Tilón. E̱ji̱i̱n Isí ninindxu̱u̱ Zóhet ga̱jma̱a̱ Ben-Zóhet.
21 Bugi̱ nindxu̱ún e̱ji̱i̱n Selá a̱ʼdióo Judá: Er, anu̱u̱ Lecá, ga̱jma̱a̱ Laadá, anu̱u̱ Maresá, bi̱ naguwáʼ náa guʼwún bi̱ nuni̱ xtíin paska rí májánʼ bi̱ kúwá náa goʼwóo Asbea,
22 ga̱jma̱a̱ Joquim, xa̱bekha bi̱ naguwáʼ náa Cozebá, Joás ga̱jma̱a̱ Saraf, bi̱ nidiin gu̱ʼú moabitas, ga̱jma̱a̱ Jasubí-Léhem. Rígi̱ nigumarámáʼ asndu nákha wajyúuʼ.
23 Ikhiin nuni̱ daan, nikúwá náa Netaim ga̱jma̱a̱ Guederá. Nikúwá ikhí ga̱jma̱a̱ nini̱ ñajuunʼ rey.
24 E̱ji̱i̱n Simeón ninindxu̱u̱ Nemuel, Jamín, Jarib, Zérah ga̱jma̱a̱ Shaúl.
25 Shaúl ninindxu̱u̱ anu̱u̱ Salum, Salum ninindxu̱u̱ anu̱u̱ Mibsam, ga̱jma̱a̱ Mibsam ninindxu̱u̱ anu̱u̱ Mismá.
26 Mismá ninindxu̱u̱ anu̱u̱ Hamuel, Hamuel ninindxu̱u̱ anu̱u̱ Zacur, ga̱jma̱a̱ Zacur ninindxu̱u̱ anu̱u̱ Simeí.
27 Simeí nigiʼdiin mbá 16 e̱ji̱i̱n jiámá ga̱jma̱a̱ mbá majuiin wa̱ʼxa̱ʼ,* mú a̱ngui̱i̱n táguáʼdiin mbaʼin e̱ji̱n, nimbáa bi̱ na̱ʼkha̱ náa guʼwún tágiʼdiin mbaʼin e̱ji̱i̱n xóo xa̱bu̱ Judá.
28 Ikhiin nikúwá náa Beer-Seba, Moladá, Hazar-Sual,
29 Bilhá, Ézem, Tolad,
30 Betuel, Hormá, Ziclag,
31 Bet-Marcabot, Hazar-Susim, Bet-Birí ga̱jma̱a̱ Saaraim. Rígi̱ ninindxu̱u̱ xuajin náa nikúwíin asndu mbiʼi dí niʼtáñajunʼ David.
32 Xuajin náa nikúwá ninindxu̱u̱ Etam, Ain, Rimón, Token ga̱jma̱a̱ Asán, mbá witsu xuajin,
33 mú tségixnuu xuajin dí rígá mbájndi náa xuajin rígi̱ asndu náa Baal. Xígi̱ kaʼnii niguwáʼ rakúwá ga̱jma̱a̱ xuajin náa nikúwíin.
34 Mesobab, Jamlec, Josá a̱ʼdióo Amasías,
35 Joel, Jehú (a̱ʼdióo Josibías, a̱ʼdióo Seraya, a̱ʼdióo Asiel),
36 Elioenái, Jaacoba, Jesohaya, Asaya, Adiel, Jesimiel, Benaya
37 ga̱jma̱a̱ Zizá (a̱ʼdióo Sifí, a̱ʼdióo Alón, a̱ʼdióo Jedayá, a̱ʼdióo Simrí, a̱ʼdióo Semaya),
38 xa̱bu̱ bugi̱ ndiya̱ edxu̱u̱ náa mámbá guʼwún, ga̱jma̱a̱ bi̱ nikúwá náa guʼwún wajin xiʼñúúnʼ niʼni mbaʼin.
39 Nigún náa mijngii ku̱ba̱ʼ Guedor, náa mata* dí naguanúu xígií náa nagájnuu a̱jkha̱ʼ,* nigún gúyáʼ ra̱jxa̱ mu mu̱phu̱ mugiu̱ún.
40 Ra̱ʼkhá tháán mba̱a̱ ra̱jxa̱ májánʼ nixkamaa ikhí, ga̱jma̱a̱ náa mbaaʼ rúʼko̱ ma̱ja̱nʼ, nda̱a̱ gamíi mbóó tsímáá kri̱ga̱. Nákha ginii ikhí nikúwá camitas.
41 Mbiʼñún xa̱bu̱ bi̱ na̱ʼkha̱ gi̱i̱ nikúwá nákha mbiʼi dí nixtáa raʼtáñajunʼ rey Ezequías náa Judá. Ikhiin nini̱ gámbáa guʼwá xtíin ndrígu̱ún camitas ga̱jma̱a̱ meunim bi̱ nikúwá ikhí. Niradíin ga̱jma̱a̱ nánguá eñún dí mbiʼi xúgi̱, ikhí má nikúwíin numuu dí ikhí rígá ra̱jxa̱ mu mu̱phu̱ mugiu̱ún.
42 Tikhuun simeonitas, mbá 500 xa̱bekha nigún náa kúbá Seír. Bi̱ ndiyá edxu̱u̱ ninindxu̱u̱ Pelatías, Nearías, Refayá ga̱jma̱a̱ Uziel, e̱ji̱i̱n Isí.
43 Nini̱ gámbíin amalequitas bi̱ xóó niguanún bi̱ nini̱ kawúmíjná ikhí, ga̱jma̱a̱ ikhí kúwá asndu dí mbiʼi xúgi̱.
Mbaʼa nota
^ O “tátée”.
^ O “nánée”.
^ Mbiʼyuu Jabez ma̱ndoo mambríguii ga̱jma̱a̱ ajngáa hebreo dí nandoo gáʼthúu̱n ‹gaʼkhu›.
^ Náa ajngáa hebreo naʼthí, “e̱ji̱i̱n”.
^ Rí nandoo gáʼthúu̱n ‹mata náa kúwá bi̱ najmañún nuñajunʼ›.
^ Náa ajngáa hebreo naʼthí, “e̱ji̱i̱n”.
^ Mbáa nindxu̱u̱ Bitías, bi̱ naʼthí ga̱jma̱a̱ numuu náa versículo 18.
^ O “a̱ʼdée dxáʼgú”.
^ O “i̱jín go̱ʼo̱”.
^ O “bóo”.
^ O “este”.
