Timbá i̱yi̱i̱ʼ rí na̱jkha̱ inún Corintios 1:1-31
1 Ikhúúnʼ Pablo, bi̱ nijuaxtíya̱a̱ʼ mu mani̱ndxu̱u̱ apóstol ndrígóo Cristo Jesús numuu rí xúʼko̱ nindoo Dios ga̱jma̱a̱ ndxájulú Sóstenes nunirámáʼxu i̱yi̱i̱ʼ rígi̱
2 mu maʼga náa inún a̱ngiu̱lú bi̱ nuni̱ ñajuunʼ Dios bi̱ nagimbíi̱n* náa Corinto, ikháanʼ bi̱ niguma kaʼwáanʼla ga̱jma̱a̱ numuu Cristo Jesús, bi̱ Dios niraʼwáanʼla, xúʼko̱ má bi̱ nuthi asndu náá ga̱jma̱a̱ numuu mbiʼyuu Tátá ndrígúlú Jesucristo, Tátá ndrígu̱ún ikhiin ga̱jma̱a̱ ndrígúxu̱ ikháanʼ:
3 Garigá rí májánʼ wéñuuʼ a̱jkiu̱u̱n* Dios náa ikháanʼla ga̱jma̱a̱ rí tsímáá ndrígóo Anu̱lú Dios ma̱ngaa ndrígóo Tátá Jesucristo.
4 Naxna̱a̱ má xúʼko̱ núma̱aʼ Dios ndrígóʼ ga̱jma̱a̱ numala, numuu rí ga̱jma̱a̱ numuu Cristo Jesús nisngájma rí májánʼ wéñuuʼ a̱jkiu̱u̱n* kaʼyala.
5 Ga̱jma̱a̱ numuu ikhaa, Dios naxnúlú xúgíʼ rí maguaʼdáá, dí majmañulú muʼthá májánʼ ga̱jma̱a̱ xúgíʼ enii ku̱ma̱,
6 xó má Dios ni’ni rí munimbala ku̱ya̱a̱ májánʼ Cristo,
7 ikha jngóo ikháanʼla maguaʼdáá xúgíʼ rí gáʼyala asndu índo̱ gákujmaa Tátá ndrígúlú Jesucristo.
8 Dios má gáʼni rí maguajún jmbu asndu índo̱ gártumuu mbiʼi, mu xúʼko̱ nda̱a̱ nimbá rí maguma tsu̱da̱la mbiʼi rí gáʼkha̱a̱ Tátá ndrígúlú Jesucristo.
9 Dios nindxu̱u̱ jmbii. Ikhaa nindxa̱ʼwála mu makuwáanʼ mbóó gajmiála A̱ʼdióo, Jesucristo bi̱ nindxu̱u̱ Tátá ndrígúlú.
10 Rí xúgi̱ a̱ngui̱nʼ, natakháñala ga̱jma̱a̱ numuu mbiʼyuu Tátá ndrígúlú Jesucristo, rí xúgiáanʼ ikháanʼla mbóó rí gúta̱la ga̱jma̱a̱ xúrkuajimíjná kaníkáanʼ, mbóó ku̱ma̱ gáguaʼdáála ga̱jma̱a̱ ikháá má rí gúndxaʼwamíjna̱la.
11 Numuu rí tikhuun bi̱ kúwá náa goʼwóo Cloe nithu̱nʼ dí nagiʼda̱ʼla kaníkáanʼ a̱ngui̱nʼ.
12 Na̱tala rígi̱ numuu rí ikháanʼ mámbá rí jngrui̱gala ru̱tha̱, nu̱tha̱: “Ikhúúnʼ na̱jkhá kidxuuʼ Pablo”, “ikhúúnʼ na̱jkhá kidxuuʼ Apolos”, “ikhúúnʼ na̱jkhá kidxuuʼ Cefas”,* “ikhúúnʼ na̱jkhá kidxuuʼ Cristo”.
13 Lá niʼniwájiminaʼ Cristo ráʼ. Lá Pablo nijuiʼdujmaa náa ixi̱ ga̱jma̱a̱ numala ráʼ. O lá ga̱jma̱a̱ numuu mbiʼyuu Pablo nijnguála iyááʼ ráʼ.
14 Naxna̱a̱ núma̱aʼ Dios numuu rí nimbáa dí ikháanʼ na̱nguá nikuʼmáaʼ iyááʼ, i̱ndó Crispo ga̱jma̱a̱ Gayo,
15 mu xúʼko̱ nimbáa rí ikháanʼla xáʼthi rí nijngúun iyááʼ ga̱jma̱a̱ numuu mbiʼyuʼ.
16 Gajkhun má rí nikuʼmíinʼ iyááʼ bi̱ kúwá náa goʼwóo Estéfanas. I̱ndó buʼko̱, nánguá ermáʼáan a̱jkiu̱nʼ á mu nikúwá eʼwíinʼ bi̱ nikuʼmíin iyááʼ.
17 Cristo nikungu̱u̱nʼ mu mataráʼaʼ ajngáa rí májánʼ raʼkháa rí makuʼmíinʼ iyááʼ xa̱bu̱, na̱nguá ni̱tha̱ ajngáa rí maʼni miʼskoo mikru̱ʼu̱u̱nʼ mu xúʼko̱ xánindxu̱u̱ ndíí ixi̱ náa rí nikháñuu* Cristo.
18 Ajngáa rí najuiʼtáraʼa ga̱jma̱a̱ numuu Jesús rí nikháñuu náa ixi̱* na̱nguá gíʼdoo numuu eyáá bi̱ nagún makhañún, mú ikháanʼlu bi̱ naguma káwáánʼ nduʼyáá rí nindxu̱u̱ tsiakii ndrígóo Dios.
19 Numuu rí kiʼnirámáʼ: “Ma̱ni̱ gámbáa ku̱ma̱ ndrígu̱ún bi̱ najmañún ga̱jma̱a̱ mayéngaa kaníí rí nduyáá bi̱ nakru̱ʼu̱u̱n”.
20 Náá ni̱jkha̱ bi̱ najmañuu wéñuuʼ rá. Náá ni̱jkha̱ bi̱ naʼsngáa xtángoo rá. Náá ni̱jkha̱ bi̱ nandxa̱ʼóo wéñuuʼ edxu̱u̱ ga̱jma̱a̱ dí xtáa rarígá xúgi̱* rá. Lá raʼkháa Dios niʼni rí ku̱ma̱ ndrígóo numbaaʼ xágiʼdoo numuu ráʼ.
21 Numuu rí xa̱bu̱ bi̱ kúwá náa numbaaʼ rígi̱ nikumu̱ún kuyáá itháan ku̱ma̱ ndrígu̱ún ikhiin, ikha jngóo na̱nguá niguánú niniʼniiʼ Dios, mú Dios nisngájma ku̱ma̱ ndrígóo índo̱ niʼni káwíin bi̱ ninimbu̱ún kuyáá ikhaa ga̱jma̱a̱ ajngáa rí najuiʼtáraʼa rí xa̱bu̱ numbaaʼ nduyáá dí ragíʼdoo numuu.
22 Bi̱ judíos nduya̱ʼ mbuyáá milagro, mú bi̱ griegos nduya̱ʼ ku̱ma̱.
23 Mú ikháanʼlú nuʼtáraʼa dí Cristo nijuiʼdujmaa náa ixi̱, mbá rí naʼni majngrádiinʼ bi̱ judíos ga̱jma̱a̱ xa̱bu̱ numbaaʼ nduyáá dí ragíʼdoo numuu.
24 Mú bi̱ nijuaxtaʼwíin tséʼniuu má judíos o griegos, ikhiin nduyáá rí Cristo nindxu̱u̱ tsiakii ndrígóo Dios ga̱jma̱a̱ ku̱ma̱ ndrígóo Dios.
25 Xa̱bu̱ nduyáá rí mbá dí na̱ʼkha̱ náa Dios ragíʼdoo numuu ga̱jma̱a̱ ragíʼdoo tsiakii, mú rí na̱ʼkha̱ náa Dios gíʼdoo itháan ku̱ma̱ ga̱jma̱a̱ tsiakii ki xóo ikhiin.
26 A̱ngui̱nʼ, guyejximíjnala ikháanʼla bi̱ nijuaxtaʼwáanʼ: Ndawi̱i̱n bi̱ ra̱ʼkhá tháán ejmañún eyáá xa̱bu̱ ni má bi̱ guáʼdáá tsiakii ni má e̱jñu̱ún xa̱bu̱ bi̱ guáʼdáá numún.
27 Dios niraʼwíin bi̱ xa̱bu̱ numbaaʼ nduyáá dí raguáʼdáá numún mu maríyaʼ gamajkhúún bi̱ najmañún wéñuuʼ. Dios niraʼwíin bi̱ na̱nguá guáʼdáá tsiakii náa numbaaʼ mu maríyaʼ gamajkhúún bi̱ guáʼdáá tsiakii.
28 Dios niraʼwíí rí xa̱bu̱ nduyáá dí ragíʼdoo numuu, rí tsíñún gúyáá ma̱ngaa rí tséjmaa mu mambáa rí najmaa,
29 ikha jngóo nimbáa xándoo maʼnimbamínáʼ náa inuu Dios.
30 Ga̱jma̱a̱ numuu ikhaa, ikháanʼ kuwáanʼ mbóó gajmiála Cristo Jesús, bi̱ ni̱jkha̱nú ninindxu̱u̱ ku̱ma̱ rí na̱ʼkha̱ náa Dios náa ikháanʼlu, rí jmbu, ma̱ngaa rí niguma kaʼwáánʼ ga̱jma̱a̱ rí nijuiʼtsiwáanʼ,
31 mu marigá xó má kiʼnirámáʼ: “Bi̱ naʼnimbamínáʼ, gaʼnimbamínaʼ ga̱jma̱a̱ numuu Jeobá”.*
