Timbá i̱yi̱i̱ʼ rí na̱jkha̱ inún Corintios 10:1-33
10 Rí xúgi̱ a̱ngui̱nʼ, nandoʼ mbu̱ya̱a̱ rí wajin xiʼñúlú nigún náa agoo du̱u̱n, xúgíinʼ ninújngún náa tapo̱o̱ lamáa,
2 xúgíinʼ nijngún iyááʼ ga̱jma̱a̱ numuu Moisés náa majñu̱u̱ʼ du̱u̱n ma̱ngaa náa lamáa,
3 xúgíinʼ ni̱ʼphu̱ ikha̱á má ganitsu rí na̱ʼkha̱ náa Dios,
4 xúgíinʼ niʼwa̱a̱n iyaʼ dí na̱ʼkha̱ náa Dios. Numuu dí niʼwa̱a̱n iyaʼ dí nigájnuu náa itsí rí na̱jkha̱ kidxúúnʼ, itsí rúʼko̱ ninindxu̱u̱ Cristo.
5 Mú, mbaʼin dí ikhiin túni rí nanigu̱u̱ʼ Dios, ikha jngóo nikháñún náa ku̱ba̱ʼ mijxooʼ.*
6 Xúgíʼ rígi̱ nindxu̱u̱ mbá xkri̱da mu mambáyulú ikháanʼ mu xágua̱ʼa̱ mu̱ʼni̱ dí ra̱májánʼ, xó má nini̱ ikhiin.
7 Ma̱ngaa xúʼyamajkhún xándú xó má nini̱ tikhuun dí ikhiin, xó má naʼthí náa kiʼnirámáʼ: “Xa̱bu̱ xuajen nitri̱gi̱i̱n niphiʼtsu ga̱jma̱a̱ niʼwa̱a̱n, nda̱wa̱á niguájxu̱u̱n mu muni̱ gagimijná”.
8 Ma̱ngaa ragíʼmaa muʼbúlú xkawiʼ kayuuʼ gajmiúlú eʼwíinʼ,* xó má nini̱ tikhuun dí ikhiin nibúúnʼ xkawiʼ kayuuʼ gajmiún eʼwíinʼ,* ikha jngóo mbóó mbiʼi nikháñún mbá 23,000 xa̱bu̱.
9 Ma̱ngaa xúʼgíʼ tsáʼkhá náa Jeobá,* xó má nini̱ tikhuun dí ikhiin ga̱jma̱a̱ nda̱wa̱á nikháñúún índo̱ niʼphu̱u̱n a̱bu̱nʼ.
10 Xúxieʼkhá xó má nini̱ tikhuun dí ikhiin, ikhaa numuu rúʼko̱ dí mbáa ángel* ndrígóo Dios niʼni gámbíin.
11 Xúgíʼ rígi̱ nirígá mu mani̱ndxu̱u̱ xóo mbá xkri̱da náa ikháanʼlú ga̱jma̱a̱ nigumarámáʼ mu maʼtámúʼúnlú, ikháanʼ bi̱ kuwáanʼ náa iwáá mbiʼi* rígi̱.
12 Ikha jngóo bi̱ naku̱mu̱u̱ rí wíji̱ gañewumínáʼ mu xáxpátri̱ga̱a̱.
13 Nimbá tsáʼkhá rí na̱ʼkha̱nú náa inala xánindxu̱u̱ mixtiʼkhu ki xóo rí nuraʼníí xúgíinʼ xa̱bu̱. Mú Dios nindxu̱u̱ jmbii ga̱jma̱a̱ ikhaa xániñuuʼ ma̱ʼkha̱ tsáʼkhá rí xáʼngala gúraʼníí, índo̱ gáʼkha̱nú tsáʼkhá, ikhaa má gámbáyala mu maʼngala muraʼníí.
14 Ikha jngóo a̱ngui̱nʼ bi̱ nandoʼ ka̱ya̱la, gunitsíngumíjnála náa xándú.
15 Na̱tala xóo xa̱bu̱ bi̱ najmañún nundxa̱ʼwa̱a̱ májánʼ edxu̱ún. Gu̱ya̱a̱ ikháanʼ á mu májánʼ nindxu̱u̱ rí na̱tala.
16 Lá raʼkháa copa náa ka̱jnu̱ʼ vino dí ikháanʼ nuxna̱a̱ núma̱aʼ Dios nandoo gáʼthúu̱n eʼdiuu Cristo ráʼ. Lá raʼkháa pan dí nuxuíʼtálú nandoo gáʼthúu̱n xuyuuʼ Cristo ráʼ.
17 Numuu dí káaʼ mbóó pan rígá, ikháanʼ maski ajndu mbaʼánʼ ni̱ndxu̱lú mbóó xuwiʼ, numuu dí i̱ndó pan rúʼko̱ naʼpulú xúgiáanʼ.
18 Gundxaʼwamíjna̱ ga̱jma̱a̱ numún xa̱bu̱ Israel. Lá raʼkháa na̱ʼphu̱ gajmiún Dios rí najuixnáxi̱ náa nakarámáʼ tsigijñaʼ xáʼ.
19 Ikha jngóo, káʼnii lá eyoʼ gátala, gíʼdoo numuu dí najuixnájxi̱ náa mbáa xándú ráʼ. O dí mbáa xándú gíʼdoo numuu dxe̱ʼ.
20 Na̱nguá. Rí phú nandoʼ gátala dí nuxnajxi̱ xóo tsigijñaʼ xa̱bu̱, nuxnáxi náa xa̱bu̱ wéñiiʼ raʼkháa náa Dios; ikhúún tsíyóʼ makuwáanʼ mbóó gajmiála xa̱bu̱ wéñiiʼ.
21 Xándoo muwa̱nla náa copa ndrígóo Jeobá* ga̱jma̱a̱ náa copa ndrígu̱ún xa̱bu̱ wéñiiʼ. Ma̱ngaa xándoo mupiʼtsula “náa mesa ndrígóo Jeobá”* ga̱jma̱a̱ náa mesu̱ún xa̱bu̱ wéñiiʼ.
22 O lá kuwáanʼ ‹ruʼgíʼ tsáʼkhá náa Jeobá* mu makiʼnáa kaʼyulú› ráʼ. Lá ikháanʼ kuaʼdáá itháan tsiakii ki xóo ikhaa xáʼ.
23 Xúgíʼ ma̱ndoo matani̱, mú raʼkháa xúgíʼ gáyambáá. Xúgíʼ ma̱ndoo matani̱, mú raʼkháa xúgíʼ exná tsiakii.
24 Nimbáa xáyáʼ rí mambáyúu ikha̱á, gáyáʼ dí mambáñún eʼwíinʼ.
25 Gupu̱la xúgíʼ xuwiʼ rí naxtangojo̱o̱, xúrajxi̱ mu xáʼni gawúunʼ ku̱ma̱ ndrígála,
26 numuu “rí Jeobá* kaʼyoo ku̱ba̱ʼ ga̱jma̱a̱ xúgíʼ dí rígá ikhí”.
27 Á mu mbáa bi̱ tséʼnimbo̱o̱ kaʼyoo Cristo naʼtála muʼgua náa goʼwóo ga̱jma̱a̱ ikháanʼ nandala muʼgua, aphu xúgíʼ dí gáxnálá mu xáʼni gawúunʼ ku̱ma̱ ndrígála.
28 Mú, á mu mbáa naʼtála “rígi̱ nijuixnáxi̱ xóo tsigijñaʼ”, xáphu̱ mu xúni̱ gawíínʼ bi̱ niʼtála ma̱ngaa ga̱jma̱a̱ numuu ku̱ma̱ ndrígála.
29 Tséta ga̱jma̱a̱ numuu ku̱ma̱ ndrígáaʼ, nata̱ ga̱jma̱a̱ numuu ku̱ma̱ ndrígóo i̱mba̱a̱ xa̱bu̱. Ikha jngóo, maski ajndu ma̱ndoo ma̱ni̱ rí nandoʼ, tsíyóʼ rí ku̱ma̱ ndrígóo i̱mba̱a̱ xa̱bu̱ maʼthí dí ra̱májánʼ nindxu̱u̱ dí nandoʼ ma̱ni̱.
30 Maski ajndu á mu nakhu mbá ganitsu ma̱ngaa naxna̱a̱ núma̱aʼ Dios ga̱jma̱a̱ numuu rúʼko̱, lá gíʼmaa ma̱ni̱ rígi̱ á mu eʼwíinʼ nuta numuʼ ráʼ.
31 Ikha jngóo, tséʼniuu á mu kuwáanʼ ruphiʼtsu o nawa̱nla o rígá i̱mba̱ rí kuwáanʼ ru̱ni̱, gu̱ni̱ xúgíʼ mu maʼga gamajkhu náa Dios.
32 Xúni̱ majngrádiinʼ judíos ni má griegos, ni má bi̱ nuni̱ ñajuunʼ Dios,*
33 xó má ikhúúnʼ na̱nguá eni̱ i̱ndó dí mambáyuminaʼ, naʼgíʼ na̱ni̱ rí mambáñún eʼwíinʼ mu xúʼko̱ ma̱ndoo makáwíin.
