Timbá i̱yi̱i̱ʼ rí na̱jkha̱ inún Corintios 11:1-34
11 Guyaridoʼ ikhúún’, xó má ikhúún’ eyaridoo Cristo.
2 Nadxuʼ ka̱ya̱la numuu rí náa xúgíʼ narmáʼáan a̱jkia̱la e̱ni̱ ga̱jma̱a̱ nunimbáníí xó má rí ni̱tala.
3 Mú nandoʼ mbu̱ya̱a̱la rí Cristo kayá edxu̱u̱ náa xa̱biya̱, xa̱biya̱ kayá edxu̱u̱ náa a̱ʼgu̱, xó má Dios kayá edxu̱u̱ náa Cristo.
4 Asndu tsáá xa̱biya̱ bi̱ narugoo edxu̱u̱ mu maʼtájkáan o maʼtáriyaʼ, naríyaʼ gamajkhuu edxu̱u̱,
5 mú asndu tsáá a̱ʼgu̱ bi̱ tsérúgoo edxu̱u̱ mu maʼtájkáan o maʼtáriyaʼ, naríyaʼ gamajkhuu edxu̱u̱ numuu rí asndu xóo niʼda tsaʼtsaʼ edxu̱u̱.
6 Á mu a̱ʼgu̱ tsérúgoo edxu̱u̱ gíʼmaa maʼda, á mu rí ma̱jti̱ʼ eʼyoo a̱ʼgu̱ dí maʼda edxu̱u̱ o maʼda tsaʼtsaʼ gíʼmaa marúgoo.
7 Xa̱biya̱ ragíʼmaa marúgoo edxu̱u̱. Numuu rí ikhaa kiejxu̱u̱ xóo Dios ga̱jma̱a̱ naxnúu gamajkhu, mú a̱ʼgu̱ naxnúu gamajkhuu xa̱biya̱.
8 Numuu rí xa̱biya̱ tséʼkha̱ náa a̱ʼgu̱, a̱ʼgu̱ na̱ʼkha̱ náa xa̱biya̱.
9 Xa̱biya̱ tágumaa ga̱jma̱a̱ numuu a̱ʼgu̱, a̱ʼgu̱ nigumaa ga̱jma̱a̱ numuu xa̱biya̱.
10 Ikha jngóo ga̱jma̱a̱ numún ángeles, a̱ʼgu̱ gíʼmaa marugoo edxu̱u̱ mu masngájma rí ndaʼyamajkuu bi̱ kayá edxu̱u̱ náa ikhaa.
11 Náa bi̱ ni̱ndxu̱ún xa̱bi̱i̱ Tátá, a̱ʼgu̱ na̱nguá xtáa á mu nda̱wa̱a̱ xa̱biya̱, ni má xa̱biya̱ na̱nguá xtáa á mu nda̱wa̱a̱ a̱ʼgu̱.
12 Numuu rí xó má a̱ʼgu̱ na̱ʼkha̱ náa xa̱biya̱, xúʼko̱ má ma̱ngaa xa̱biya̱ nagumaa náa a̱ʼgu̱. Mú xúgíʼ dí rígá na̱ʼkha̱ náa Dios.
13 Gu̱ta̱ má ikháanʼla. Lá májánʼ rí mbáa a̱ʼgu̱ xárugoo edxu̱u̱ mu maʼtákáñuu Dios ráʼ.
14 Ma̱jti̱ʼ nindxu̱u̱ rí mbáa xa̱biya̱ maniñuuʼ mbaʼya edxu̱u̱ numuu rí tágumaa xúʼko̱.
15 Mú, lá ragájkhun rí índo̱ mbijua xtátsu edxu̱u̱ a̱’gu̱ nindxu̱u̱ mbá gamajkhu náa ikhaa xáʼ. Numuu rí xtátsiu̱u̱n nijuixnáá mu marúgoo ga̱jma̱a̱ edxu̱u̱.
16 Á mu mbáa, rígá i̱mba̱ rí nandoo maʼnimbánuu ki xóo rí nita̱, gaʼyoo rí ni má ikháanʼxu ní má bi̱ nuni̱ ñajuunʼ Dios na̱nguá guáʼdááxu i̱mba̱ rí munimbáníí.
17 Mú, ga̱jma̱a̱ rí ma̱tala rígi̱ na̱nguá edxuʼ ka̱ya̱la numuu rí índo̱ nagimbáanʼla na̱nguá embáyumíjná, i̱ndó nunimíjna̱la dí raʼkhí.
18 Ni̱jkhánú nidxawuun rí índo̱ nagimbáanʼ nuniwájimíjná kaníkáanʼla ga̱jma̱a̱ nanimboʼ rí xúʼko̱ e̱ni̱.
19 Gajkhun má rí muniwájimíjná, mu xúʼko̱ makujmaa tsáa rí ikháanʼla magruiguíi Dios.
20 Índo̱ ikháanʼla nagimbáanʼ, raʼkháa mu mu̱phu ganitsu wañuu Tátá.
21 Numuu rí índo̱ naphu, mámbáa má nikuiʼtsu wapáá, mú mbáa naxkidxu̱u̱ ga̱jma̱a̱ i̱mba̱a̱ najnga̱a̱.
22 Lá nda̱a̱ guʼwála muphiʼtsu ga̱jma̱a̱ muwa̱nla ráʼ. O lá tséyamajkúún bi̱ nuni̱ ñajuunʼ Dios ga̱jma̱a̱ nuríyaʼ gamajkhún bi̱ na̱nguá guáʼdáá nditháan ráʼ. Ndiéjunʼ gándoo gáta̱la. Lá ma̱tala rí nadxuu a̱jkiu̱nʼ eni̱la ráʼ. Ga̱jma̱a̱ numuu rígi̱, tsédxuu a̱jkiu̱nʼ eni̱la.
23 Numuu rí ikhúúnʼ nisngála, ikháá má rí nigruígú náa Tátá. Mbruʼun rí mixnájxíi Tátá Jesús, niguajtuun mbá pan
24 nda̱wa̱á rí nixnáa núma̱a̱ʼ Dios, nikuíʼtá ga̱jma̱a̱ niʼthí: “Rígi̱ nandoo gáʼthúu̱n xuyuʼ rí majuixnáxi ga̱jma̱á numala. Gu̱nila má xúʼko̱ rígi̱ mu marmáʼáan a̱jkia̱la kuyo̱ʼ”.
25 Nda̱wa̱á índo̱ niguámbóo ni̱ʼkhu̱ wañuu,* xúʼko̱ má niʼni ga̱jma̱a̱ copa, ikhú niʼthí: “Copa rígi̱ nandoo gáʼthúu̱n rí nambánuu nuxi̱ʼ rí nagiʼdoo numuu ga̱jma̱a̱ eʼdiuʼ. Gu̱nila má xúʼko̱ rígi̱ mu marmáʼáan a̱jkia̱la kuyo̱ʼ mámbá rí nawa̱nla”.
26 Numuu rí mámbá rí índo̱ gákuwáanʼ ra̱phu pan rígi̱ ga̱jma̱a̱ índo̱ gúwan rí ka̱jnu̱ʼ náa copa makuwáanʼ ru̱ta̱ rí nikháñuu Tátá, asndu índo̱ ikhaa gáʼkha̱a̱.
27 Ikha jngóo, asndu tsáá bi̱ gíkhu̱ pan ga̱jma̱a̱ gágáan rí ka̱jnu̱ʼ náa copa ndrígóo Tátá rí na̱nguá kaʼyoo, magiʼdoo aʼkhúun numuu dí tséʼyamajkhuu xuyuuʼ ga̱jma̱a̱ eʼdiuu Tátá.
28 Ginii gayejmaminaʼ ga̱jma̱a̱ índo̱ gáʼyoo rí májáanʼ nindxu̱u̱, i̱ndó ikhú ma̱ndoo mi̱khu̱ pan ga̱jma̱a̱ maga̱a̱n rí ka̱jnu̱ʼ náa copa.
29 Numuu rí bi̱ na̱ʼkhu̱ ga̱jma̱a̱ bi̱ naʼga̱a̱n rí asndu tséʼyoo ndiéjunʼ eyoo gáʼthúu̱n xuyuuʼ Tátá, ikháá má eyááʼ rí mamínuuʼ.
30 Ikha jngóo mbaʼáanʼ rí ikháanʼ guabáanʼ ga̱jma̱a̱ naʼniala nandii ma̱ngaa mbaʼin nikháñún má.*
31 Á mu nuyejmamijná májánʼ xóo ni̱ndxu̱lú, i̱ndó xúʼko̱ xúmíniʼlú.
32 Mú, índo̱ naxtanduʼulú muxnaxíi cuenta, Jeobá* naxprígúlú mú xúguáʼníí rí mugiʼniin xa̱bu̱ numbaaʼ.
33 Ikha jngóo a̱ngui̱nʼ, índo̱ gágimbáanʼla mu mu̱phu ganitsu rúʼko̱, guguaʼtu̱u̱n eʼwíinʼ.
34 Á mu mbáa naxkidxu̱u̱, gakuiʼtsu náa goʼwóo mu xúʼko̱ xáminuuʼ índo̱ gagimbáanʼla. Mú i̱ʼwáʼ dí rígá manimbánuu índo̱ gáʼgá ñuʼú.
Mbaʼa nota
^ O “wakíʼ”.
^ Rígi̱ na̱nguá nindxu̱u̱ xóo índo̱ nakháñun xa̱bu̱, nandoo gáʼthúu̱n rí nuniñaaʼ rambájxu̱u̱n gajmiún Dios.
