Timbá i̱yi̱i̱ʼ rí na̱jkha̱ inún Corintios 12:1-31
12 A̱ngui̱nʼ nandoʼ mbu̱ya̱a̱ xúgíʼ rí namínáanʼlu Dios.
2 Ikháanʼ má ndu̱ya̱a̱la rí nákha nindxa̱la xa̱bu̱ bi̱ xóó raguáʼdáá fe náa Tátá, ikháanʼ nduyamajkhún xándú bi̱ na̱nguá ethi ga̱jma̱a̱ na̱jkua̱la tsu̱du̱ún.
3 Ikha jngóo nandoʼ mbu̱ya̱a̱la rí nimbáa xándoo “maʼtátsríguíi Jesús” á mu naʼthí ga̱jma̱a̱ espíritu santo* ndrígóo Dios, nimbáa xándoo maʼthí rí “Jesús nindxu̱u̱ Tátá” á mu ragíʼdoo espíritu santo.
4 Rígá mixtiʼkhu enii rí nimínáanʼlu Dios, mú xúgíʼ rígi̱ na̱ʼkha̱ náa espíritu santo.
5 Rígá mixtiʼkhu ñajunʼ, mú mbáwíí Tátá,
6 rígá mixtiʼkhu enii xóo eʼni espíritu santo, mú mínaaʼ má Dios naʼnimbánuu xúgíʼ.
7 Rí xóo nayambáá espíritu santo nakujmaa náa xúgíinʼ, Dios naxná mu mambáñúún xúgíinʼ.
8 Espíritu santo naʼni rí tikhuun muthi rí nakru̱ʼu̱u̱n eʼwíinʼ, espíritu santo nambáñún muthi rí eʼwíinʼ tséyáá;
9 ga̱jma̱a̱ i̱mba̱a̱ espíritu santo nambáyúu magiʼdoo fe ga̱jma̱a̱ i̱mba̱a̱ espíritu santo má rúʼko̱ nambáyúu mu maʼni tanúún eʼwíinʼ.
10 I̱mba̱a̱ mu maʼni milagros, i̱mba̱a̱ mu maʼtíriyaaʼ rí marígá nda̱wa̱á, i̱mba̱a̱ mu maninuu’ á mu náa Dios e̱ʼkha̱ mbáa ajngáa, i̱mba̱a̱ mu maʼthí mixtiʼkhu ajngáa, i̱mba̱a̱ mu maʼtájuíi ajngáa.
11 Mú xúgíʼ rígi̱ naʼni ikháá má espíritu santo, bi̱ naxnúu mámbáa xó má ikhaa eyoo.
12 Numuu rí xó má xuyuuʼ mbáa xa̱bu̱ nindxu̱u̱ mbóó, mú mbaʼa rí kaguminaʼ. Maski ajndu mbaʼa rí kaguminaʼ mú mbóó má xuwiʼ nindxu̱u̱, xúʼko̱ má ma̱ngaa nindxu̱u̱ Cristo.
13 Numuu rí xúgiáanʼlú, judíos o griegos, ñumbáá o bi̱ na̱nguá nindxu̱u̱ ñumbáá, niguatsúwáanʼlu ga̱jma̱a̱ ikháá má espíritu mu makuwa̱a̱nʼ náa mbóó xuwiʼ ga̱jma̱a̱ xúgiáánʼ nikhánulú ikháá má espíritu.
14 Xuyulú mbaʼa rí kaguminaʼ, raʼkháa mbóó.
15 Á mu rajkuáaʼ gáʼthí “numuu rí na̱nguá nidxu̱ʼ ñawáanʼ, ikha jngóo rakáʼyoʼ náa xuyaaʼ”, raʼkháa ga̱jma̱a̱ numuu rúʼko̱ rí nánguá kaguminaʼ náa xuwiʼ.
16 Á mu cháʼwáanʼ gáʼthí “numuu rí na̱nguá nindxu̱ʼ idaaʼ, ikha jngóo na̱nguá kaʼyoʼ náa xuyaaʼ”, mú raʼkháa ga̱jma̱a̱ numuu rúʼko̱ rí nánguá kagujtuminaʼ náa xuwiʼ.
17 Á mu xúgíʼ xuyulúʼ nindxu̱u̱ idulú, xú káʼnii gándoo gúʼdxawíín rá. Á mu rí xúgíʼ gánindxu̱u̱ cháʼwunʼlú, xú káʼnii gándoo gáyeyulú rá.
18 Mú, Dios niguma rí kagujtuminaʼ náa xuyulú xó má ikhaa nindoo.
19 Á mu mbóó gánindxu̱u̱ xúgíʼ, náá gárígá xuyulúʼ rá.
20 Mbaʼa rí kaguminaʼ, mú mbóó xuwiʼ nindxu̱u̱.
21 Idulú xándoo maʼthúun ñawúnlu “nda̱a̱ rí ejmáán ján”, ni má edxu̱lú xándoo maʼthúu̱n rajkúlú “nda̱a̱ rí ejmáanʼ”.
22 Maski ajndu nakujmaa dí ragíʼdoo numuu tikhuu rí kagujtuminaʼ náa xuyulúʼ mú najmaa.
23 Tikhuu dí rígá náa xuyulúʼ rí ikháanʼ nakumulú rí na̱nguá mitsaanʼ nuruguáálú májánʼ, xúʼko̱ e’ni rí xuyulú dí natiyulú eʼni itháan májánʼ ekujmaa.
24 Mú i̱ʼwáʼ rí kaguminaʼ náa xuyulú rí nagui̱i̱ nda̱a̱ má rí eyóoʼ. Numuu rí Dios nixnúu itháan gamajkhu ki xóo i̱ʼwáʼ,
25 mu xúʼko̱ xáruiʼtamínáʼ xuwiʼ, mámbá rí kuajtuminaʼ náa xuwiʼ naxmiéjúúnʼ rí muñeumíjna̱.
26 Á mu mbá rí kuajtuminaʼ náa xuwiʼ namínuuʼ, xúgíʼ namínuuʼ. Á mu mbá nagruigú gamajkhu xúgíinʼ nadxún gajmiún ikhaa.
27 Ikháanʼ nindxala xuyuuʼ Cristo, ga̱jma̱a̱ mámbáa rí ikháanʼ kuajtuminaʼ náa xuyuuʼ.
28 Dios nixnúún mámbá ñajunʼ xa̱bu̱ bi̱ kúwá náa nagimbáanʼ: Ginii apóstoles, nda̱wa̱á profetas,* bi̱ nusngáa, bi̱ nuni̱ milagros, bi̱ nuni̱ thana, bi̱ nuyambáá, bi̱ najmiin nuxna ikha ga̱jma̱a̱ bi̱ nuthi mixtiʼkhu ajngáa.
29 Lá ragájkhun dí raʼkháa xúgíinʼ ni̱ndxu̱ún apóstoles, raʼkháa xúgíinʼ ni̱ndxu̱ún profetas, raʼkháa xúgíinʼ ni̱ndxu̱ún bi̱ nusngáa ga̱jma̱a̱ raʼkháa xúgíinʼ eni̱ milagros ráʼ.
30 Lá ragájkhun dí raʼkháa xúgíinʼ najmiin nuni̱ thana, raʼkháa xúgíinʼ najmiin nuthi mixtiʼkhu ajngáa ga̱jma̱a̱ raʼkháa xúgíinʼ najmiin mutajuíi ajngáa ráʼ.
31 Gu̱ni̱ tsiakimíjna̱la mundrígúlá rí itháan mba̱a̱ rí Dios naxnála, ga̱jma̱a̱ numuu xúgíʼ rígi̱ ikhúúnʼ ma̱tala mbá rí itháan májánʼ ki xóo rígi̱.
Mbaʼa nota
^ O “gaʼyee”, “bi̱ nuthi dí marigá”.
