Timbá i̱yi̱i̱ʼ rí na̱jkha̱ inún Corintios 14:1-40
14 Gusngajmá má xúʼko̱ ngajua, mú ma̱ngaa gu̱ni̱ tsiakimíjna̱la makánala rí Dios naxná, mú itháan dí mutaríyaʼ* dí marigá nda̱wa̱á.
2 Numuu rí bi̱ naʼthí i̱mba̱ ajngáa na̱nguá eʼthúún xa̱bu̱, naʼthúu̱n Dios, numuu rí nimbáa tsékro̱ʼo̱o̱ maski má espíritu santo* naʼni maʼthí ajngáa ngu̱ʼwa̱ rí mitsúʼkháan.
3 Mú bi̱ naʼtáriyaʼ naxná tsiakii, nayambáá ga̱jma̱a̱ naʼni̱i̱ a̱jkiu̱ún xa̱bu̱ ga̱jma̱a̱ ajngóo.
4 Bi̱ naʼthí mbá ajngáa naxnáminaʼ tsiakii i̱ndó ikhaa, mú bi̱ naʼtáriyaʼ naxnún tsiakii bi̱ kúwá náa nagimbáanʼ.
5 Manigu̱ʼ rí xúgiáanʼla ikháanʼ muta̱la i̱mba̱ ajngáa, mú itháán maʼndoʼ dí mutaríyaʼla. Itháán májánʼ nindxu̱u̱ rí mbáa maʼtáriyaʼ ki xóo rí maʼthí i̱mba̱ ajngáa, i̱ndó á mu naguwíjnga̱a̱* ajngáa mu xúʼko̱ maxnún tsiakii bi̱ nagimbíi̱n.
6 Mú a̱ngui̱nʼ, á mu xúgi̱ na̱jkhánú náa ikháanʼla ga̱jma̱a̱ na̱tala i̱mba̱ ajngáa, dí gámbáyala rúʼko̱ rá. Lá raʼkháa itháán mambáyala á mu na̱tala mbá rí na̱ʼkha̱ náa Dios, ku̱ma̱, mbá kiʼtáriyaʼ o mbá kiʼsngáa ráʼ.
7 Xúʼko̱ má erígá índo̱ mbáa na̱ʼdu̱u̱ flauta o arpa.* Á mu tséwáán kaʼwu rí naʼdu̱u̱, lá ma̱ndoo mbáa makro̱ʼo̱o̱ rí nawáán ráʼ.
8 Á mu aʼwóo trompeta na̱nguá ewáán kaʼwu, tsáá gáʼni rataminaʼ mu maʼga gáxmínaʼ rá.
9 Xúʼko̱ má á mu ikháanʼla nuta̱la ajngáa rí maʼni mingíjyúuʼ mikrua̱ʼa̱a̱ʼ, xú káʼnii gáʼyoo i̱mba̱a̱ dí kuwáanʼ ruta̱la rá. Mani̱ndxu̱u̱ ndíí rí gúta̱la.
10 Náa numbaaʼ nuthi mbaʼa ajngáa ga̱jma̱a̱ xúgíʼ ma̱ndoo mikrua̱ʼa̱a̱ʼ.
11 Mú á mu ikhúúnʼ tsékro̱ʼo̱ʼ rí najuiʼthá, bi̱ naʼthí mbaʼyoo rí ikhúúnʼ ni̱ndxu̱ʼ xóo mbáa xa̱bu̱ na̱ʼkha̱á, ga̱jma̱a̱ ikhúúnʼ mba̱yo̱o̱ rí ikhaa nindxu̱u̱ xóo mbáa xa̱bu̱ na̱ʼkha̱á.
12 Xúʼko̱ má rígá ga̱jma̱a̱ numala. Numuu rí nandala wéñuuʼ makánala rí naxnálá espíritu santo, gu̱ni̱ tsiakimíjna̱ makánala rí mambáyala muxnu̱u̱n tsiakii bi̱ nagimbíi̱n.
13 Ikha jngóo, bi̱ naʼthí i̱mba̱ ajngáa gaʼtájkáan* mu majmaa maʼtájuíi.
14 Numuu rí á mu natajkáan náa i̱mba̱ ajngáa, raʼkháa ikhúúnʼ etajkáan, nindxu̱u̱ rí nixnúʼ espíritu santo ga̱jma̱a̱ ikhúúnʼ tsékro̱ʼo̱ʼ rí na̱tha̱.
15 Ndiéjunʼ gíʼmaa ma̱ni̱ rá. Matajkáan ga̱jma̱a̱ rí espíritu santo nixnúʼ, mú ma̱ngaa matajkáan rí nakro̱ʼo̱ʼ. Ma̱ni̱ ajmúú ga̱jma̱a̱ rí espíritu santo nixnúʼ, mú ma̱ngaa ma̱ni̱ ajmúú rí nakro̱ʼo̱ʼ.
16 Numuu rí á mu nu̱ni̱ mba̱a̱ Dios ga̱jma̱a̱ mbá rí nixnála espíritu santo, xú káʼnii gúthi “xúʼko̱ gáʼni”* xa̱bu̱ bi̱ kuwáanʼ gajmiála ga̱jma̱a̱ numuu rí nutajkáan mu muxnáa núma̱aʼ á mu tsékru̱ʼu̱u̱n rí nuta̱la xá.
17 Gajkhun má rí xóo naraxnáa núma̱aʼ nindxu̱u̱ májánʼ, mú tséxnúu tsiakii i̱mba̱a̱ xa̱bu̱.
18 Naxna̱a̱ núma̱aʼ Dios numuu rí na̱tha̱ itháán mbaʼa ajngáa ki xóo ikháanʼla.
19 Maski má xúʼko̱ náa nagimbáanʼ nanigu̱ʼ ma̱ta̱ witsu ajngáa rí mikru̱ʼu̱u̱n rí nasngáa ki xóo ma̱ta̱ mbá diez mil náa i̱mba̱ ajngáa.
20 A̱ngui̱nʼ, xúndxa̱ʼwa̱míjna̱la xóo e̱ji̱n. Ganindxa̱la xóo e̱ji̱n mu xúnila dí ra̱májánʼ, mú gundxaʼwamíjna̱ xóo xabuanii.
21 Náa Xtángoo kiʼnirámáʼ: “‹Mathu̱u̱n xuajen rígi̱ ga̱jma̱a̱ mbá ajngáa ndrígu̱ún xa̱bu̱ naguwaáʼ ga̱jma̱a̱ ajngáa ndrígu̱ún bi̱ tséniʼniúnʼ, maski ajndu xúʼko̱ ikhiin xúnimbu̱ún›, eʼthí Jeobá”.*
22 Dí marata̱ mbá ajngáa nindxu̱u̱ mbá tsinaʼ náa bi̱ tsénimbu̱ún kuyáá Jesús, raʼkháa bi̱ nunimbu̱u̱n kuyáá, mú kiʼtáriyaʼ nindxu̱u̱ mbá tsinaʼ náa bi̱ nunimbu̱u̱n kuyáá Jesús, raʼkháa náa bi̱ tsénimbu̱u̱n.
23 Numuu rí, á mu rígá náa nagimbáanʼla ga̱jma̱a̱ xúgiáanʼla nuta̱la i̱ʼwáʼ ajngáa ga̱jma̱a̱ ikhú natu̱ʼu̱u̱n eʼwíinʼ xa̱bu̱ o bi̱ tsénimbu̱ún kuyáá Jesús, lá xúthi rí nakáguanla xáʼ.
24 Á mu xúgiáanʼlá kuwáanʼ rutaríyaʼ índo̱ gáto̱ʼo̱o̱ mbáa bi̱ tséʼnimbo̱o̱ kaʼyoo Jesús o i̱mba̱a̱ xa̱bu̱, maku̱mu̱u̱ rí gíʼdoo aʼkhúun ma̱ngaa rí nuxpriguíí índo̱ gáʼyoo xóo nindxu̱u̱ ga̱jma̱a̱ rí xóo kúwá ruthi xúgíinʼ.
25 Numuu rí ngu̱ʼwa̱ rí gíwánʼ náa a̱jkiu̱ún maʼga̱nú makujmaa, ikhaa masmbáti̱go̱o̱ mbayííʼ ga̱jma̱a̱ mbaʼyamajkuu Dios ikhú maʼthí: “Gajkhun rí Dios xtáa ga̱jma̱á nindxa̱la”.
26 Ikha jngóo a̱ngui̱nʼ, ndiéjunʼ gíʼmaa mu̱nila rá. Índo̱ gagimbáanʼla mbáa naʼni ajmúú mbá salmo, i̱mba̱a̱ gíʼdoo mbá kiʼsngáa, i̱mba̱a̱ gíʼdoo mbá rí Dios nisngájmuu, i̱mba̱a̱ najmañuu naʼthí i̱mba̱ ajngáa, i̱mba̱a̱ bi̱ najmañuu naguíjnga̱a̱* ajngáa. Xúgíʼ rí gúnila, gu̱ni̱ mu muxnamíjnala tsiakii.
27 Á mu tikhuun nuthi i̱ʼwáʼ ajngáa, guthi a̱jmi̱i̱n o ajtsíin ma̱ngaa guthi índo̱ kaʼñún muthi. Mú gíʼmaa maxtáa mbáa bi̱ maʼtájuíi rí nuthi.
28 Á mu nda̱wa̱a̱ mbáa bi̱ naguíjnga̱a̱ ajngáa gaguanúún wíí ga̱jma̱a̱ gutamijná i̱ndó ikhiin ga̱jma̱a̱ Dios.
29 Guthi a̱jmi̱i̱n o ajtsíin profetas* ga̱jma̱a̱ eʼwíinʼ guyáá ndiéjunʼ eyoo gáʼthúu̱n rí nuthi.
30 Mú, á mu mbáa bi̱ gíʼ ikhí nagruigú rí nasngájmuu Dios, bi̱ xtáa raʼthí ginii, ganiñuuʼ raʼthí.
31 Numuu rí xúgiáanʼ ikháanʼ mámbáa ma̱ndoo maʼtáriyaʼ, mu xúʼko̱ xúgiáanʼ gájmañala ga̱jma̱a̱ muxnamíjnálá tsiakii.
32 Índo̱ profetas najmún rí naxnún espíritu santo gíʼmaa muñewa̱a̱n xóo majmúún.
33 Numuu rí Dios nindxu̱u̱ mbáa Dios bi̱ gíʼdoo rí tsímáá ga̱jma̱a̱ gíʼdoo kuduun xúgíʼ.
Xó má narígá náa xúgíʼ rí nagimbíi̱n a̱ngiu̱lú,*
34 gu̱ʼu̱ ragíʼmaa muthi náa nagímbíin numuu dí rakáʼñun muthi. Gíʼmaa munimbu̱u̱n xó má naʼthí náa Xtángoo.
35 Á mu rígá rí nandoo majmañuu, náa goʼwóo gáraxu̱u̱ ajmbio̱o̱, numuu rí majthi̱ʼ nindxu̱u̱ rí mbáa a̱ʼgu̱ maʼthí náa nagimbíi̱n.
36 Lá náa ikháanʼ nigájnuu ajngá rawuunʼ Dios ráʼ. Lá i̱ndó ikháanʼ nindxa̱la bi̱ nindrígula ráʼ.
37 Á mu mbáa naku̱mu̱u̱ rí nindxu̱u̱ profeta o gíʼdoo mbá rí naxná espíritu santo, gíʼmaa mbaʼyoo rí nanirámáʼ náa ikháanʼla nindxu̱u̱ kiʼtáñajunʼ ndrígóo Tátá.
38 Á mu mbáa nanújngoramuuʼ rígi̱, xúʼko̱ má Dios xáʼni nuwiinʼ* ma̱ngaa.
39 Ikha jngóo a̱ngui̱nʼ, gu̱ni̱ tsiakimíjna̱ má xúʼko̱ rí mutaríyaʼla ga̱jma̱a̱ xúrikún bi̱ nuthi i̱ʼwáʼ ajngáa.
40 Mú gu̱nila xúgíʼ ga̱jma̱a̱ gamajkhu ma̱ngaa xó má kaʼyoo.
Mbaʼa nota
^ Rígi̱ ma̱ngaa nandoo gáʼthúu̱n rí miʼtáraʼa ajngá rawuunʼ Dios.
^ O “naʼtájuíi”.
^ O “rí tséʼya”.
^ O “gaʼni tsajkuun”.
^ O “amén”.
^ O “naʼtájuíi”.
^ O “gaʼyee”, “bi̱ nuthi dí marigá”.
^ Náa ajngáa griego naʼthí, “bi̱ kaʼwiin”.
^ O mbáa “bi̱ tsékro̱ʼo̱o̱ kayuuʼ xáʼganú má makro̱ʼo̱o̱”.
