Timbá i̱yi̱i̱ʼ rí na̱jkha̱ inún Corintios 2:1-16
2 A̱ngui̱nʼ, índo̱ ni̱jkhá gáyala mu ma̱tala ajngóo Dios dí rígá ngu̱ʼwa̱ rí nindxu̱u̱ mitsúʼkháan, táta̱la ga̱jma̱a̱ ajngáa rí miʼskoo ni má tásngajmá rí najmañuʼ wéñuuʼ.
2 Índo̱ nixtáá ga̱jma̱á nindxa̱la, nindoʼ ma̱tala i̱ndó ga̱jma̱a̱ numuu Jesucristo, ma̱ngaa xóo nijuiʼdujmaa náa ixi̱.
3 Índo̱ ni̱jkhá náa ikháanʼla niku̱mu̱ʼ dí ragúʼdoo tsiakii, nimíñúʼ wéñuuʼ rí asndu nigúʼwún.
4 Índo̱ nitaráʼala táta̱la ga̱jma̱a̱ ajngáa dí najmún xa̱bu̱ bi̱ nduyáá wéñuuʼ, nisngajmála tsiakii ndrígóo espíritu santo*
5 mu xúʼko̱ maguaʼdáá fe náa tsiakii ndrígóo Dios, raʼkháa náa ku̱ma̱ ndrígu̱ún xa̱bu̱.
6 Ikháanʼlú nuʼthá ga̱jma̱a̱ numuu ku̱ma̱ náa majñúúnʼ bi̱ guáʼdáá mbá fe gújkhúʼ, raʼkháa ku̱ma̱ ndrígu̱ún xa̱bu̱ bi̱ kúwá xúgi̱,* ni má ku̱ma̱ ndrígu̱ún xa̱bu̱ ñajunʼ bi̱ kúwá xúgi̱ bi̱ maʼga̱nú mandáti̱gi̱i̱n.
7 Nuʼthá ga̱jma̱a̱ numuu ku̱ma̱ ndrígóo Dios dí rígá ngu̱ʼwa̱ rí nindxu̱u̱ mitsúʼkháan, rí niʼni makujmaa nákha xóó nda̱a̱ numbaaʼ xkawiʼ rígi̱,* mu mbiʼyamajkulú.
8 Ku̱ma̱ rígi̱ túniʼnuuʼ xa̱bu̱ ñajunʼ bi̱ kúwá náa numbaaʼ rígi̱,* numuu dí á mu nuniʼnuuʼ, túdujmaa Tátá Jesús náa ixi̱.
9 Xó má kiʼnirámáʼ: “Nimbáa táʼyoo, nimbáa táʼdxun, nimbáa tándxa̱ʼwáminaʼ rí Dios niʼni mújúunʼ rí maxnún xa̱bu̱ bi̱ nandún kuyáá”.
10 Ikháanʼlú rí Dios nisngájmulú ga̱jma̱a̱ espíritu santo ndrígóo, numuu dí espíritu santo ndrígóo ndaʼyoo xúgíʼ asndu rí itháan mi̱jnu̱ʼ dí nandxa̱ʼóo edxu̱u̱ Dios.
11 Lá xtáa mbáa xa̱bu̱ bi̱ ndaʼyoo xóo endxa̱ʼwáminaʼ i̱mba̱a̱ xa̱bu̱ ráʼ. Na̱nguá, i̱ndó ikhaa eʼyoo dí rígá náa a̱jkiu̱u̱n,* xúʼko̱ má Dios ma̱ngaa, nimbáa xáʼngo̱o̱ gáʼyoo dí endxa̱ʼwáminaʼ ikhaa, i̱ndó espíritu santo ndrígóo.
12 Ikháanʼlú tséniʼñámíjná maxnúlú ikha ku̱ma̱* ndrígóo numbaaʼ, nuniʼñámíjná maxnúlu ikha espíritu rí na̱ʼkha̱ náa Dios mu muniʼnúuʼ xúgíʼ rí májánʼ dí Dios nixnúlú.
13 Mangáánʼ nuʼthá numuu rígi̱, mú tséjmulú ajngáa rí na̱ʼkha̱ náa ku̱ma̱ ndrígu̱ún xa̱bu̱, nuʼthá rí naʼsngáa espíritu santo. Ikha jngóo nuʼthá ga̱jma̱a̱ numuu Dios ga̱jma̱a̱ ajngáa rí na̱ʼkha̱ náa ikhaa.
14 Xa̱bu̱ numbaaʼ na̱nguá egruigú rí naxná espíritu ndrígóo Dios numuu dí ragíʼdoo numuu eʼyoo ikhaa, ni má xáʼga̱nú maninuuʼ, numuu rí ndayóoʼ dí Dios mambáyúu mu maʼga̱nú mikro̱ʼo̱o̱.
15 Mú xa̱bu̱ bi̱ naniñaminaʼ maxnúu ikha Dios, naʼnigájma̱a̱ xúgíʼ dí na̱ʼkha̱ náa Dios, mú nimbáa xa̱bu̱ xándoo mbaʼyoo xóo eʼni.
16 Numuu dí “tsáá ni̱jkha̱nú nininuuʼ xóo endxa̱ʼóo edxu̱u̱ Jeobá* mu maʼthúu̱n xóo maʼni xá.” Mú ikháanʼ kuaʼdáá ku̱ma̱ ndrígóo Cristo.
