Timbá i̱yi̱i̱ʼ rí na̱jkha̱ inún Corintios 3:1-23
3 A̱ngui̱nʼ, tándoo gáta̱la xóo xa̱bu̱ bi̱ nakru̱ʼu̱u̱n xóo endxaʼwoo edxu̱u̱ Dios, ni̱tala xóo xa̱bu̱ numbaaʼ, numuu rí náa Cristo nindxa̱la xóo e̱ji̱n.
2 Nixna̱la yáʼdú muwan raʼkháa ganitsu gújkhúʼ, numuu rí kaʼníí majkiáanʼla. Asndu xúgi̱ má ragújkiáanʼla,
3 numuu dí kaʼníí nindxa̱la xóo xa̱bu̱ numbaaʼ. Numuu dí nagiʼdala ga̱jma̱a̱ naxíguala kuyamíjna̱ kaníkáanʼ, lá raʼkháa xígi̱ ni̱ndxu̱ún xa̱bu̱ numbaaʼ ga̱jma̱a̱ xúʼko̱ má eni̱la mangáanʼ ráʼ.
4 Índo̱ mbáa naʼthí “ikhúúnʼ na̱jkhá kidxuuʼ Pablo”, “ikhúún na̱jkhá kidxuuʼ Apolos”, lá raʼkháa xígi̱ esngajmá rí nu̱ni̱ xóo eni̱ xa̱bu̱ numbaaʼ ráʼ.
5 Ndiéjunʼ nindxu̱u̱ Apolos. Dí nindxu̱u̱ Pablo. Ikháanʼxu i̱ndó nindxuxu bi̱ nuni̱ ñajuunʼ Tátá, bi̱ nimba̱yála mu ikháanʼ muguaʼdáá fe.
6 Ikhúúnʼ ni̱du, Apolos nixíjyooʼ, mú Dios niʼni mbaja̱a̱,
7 ikha jngóo ni má bi̱ naʼdu ni má bi̱ naxíjyooʼ gíʼdoo numuu, i̱ndó Dios, bi̱ naʼni mbaja̱a̱.
8 Mú bi̱ naʼdu ga̱jma̱a̱ bi̱ naxíjyooʼ ikha̱á má ñajunʼ rí eni̱, mú mámbáa xa̱bu̱ magruigúu rí mada̱a̱ʼ xó má ñajunʼ rí niʼni.
9 Numuu rí ikháanʼxu nindxu̱xu bi̱ numbáyiixu Dios. Mú ikháanʼ nindxa̱la mbaaʼ náa rí Dios naʼdu ga̱jma̱a̱ nindxa̱la guʼwá rí Dios niʼni.
10 Numuu rí Dios nisngájmuʼ rí májánʼ wéñuuʼ a̱jkiu̱u̱n maski ajndu ikhúúnʼ rakáʼyoʼ, ikhúúnʼ nitsiji rajkúu guʼwá xóo mbáa xa̱bu̱ bi̱ najmañuu naʼni guʼwá, mú i̱mba̱a̱ bi̱ nakuxi̱rámáaʼ náa rí ikhúúnʼ niʼgíʼ. Mámbáa gíʼmaa mañewu̱u̱n ñajunʼ rí naʼni.
11 Numuu rí nimbáa xándoo matsiji i̱mba̱ wájíʼ rajkúu guʼwá, numuu dí rígá má, ikhaa nindxu̱u̱ Jesucristo.
12 Mbáa ma̱ndoo makuxi̱ guʼwá ga̱jma̱a̱ oro, plata, itsí rí mitsaanʼ, ixi̱ o rajxa̱.
13 Mú maʼga̱nú makujmaa ñajunʼ rí naʼni mámbáa. Mbiʼi rí gárígá gamiéjunʼ, mbiʼi rúʼko̱ aguʼ masngájma xú káʼnii nindxu̱u̱ ñajunʼ rí naʼni mámbáa.
14 Á mu ñajunʼ rí naʼni mbáa índo̱ nakuxi̱rámaaʼ náa tsu̱du̱u̱ rajkúu guʼwá nakríyaaʼ, ikhaa bugi̱ bi̱ marigá rí mada̱a̱ʼ.
15 Á mu ñajunʼ rí naʼni mbáa nakha, ikhaa má gándati̱go̱o̱, mú ikhaa makríya̱a̱ʼ; xóo mbáa bi̱ nakríya̱a̱ʼ náa aguʼ.
16 Lá tséya̱a̱ rí ikháanʼ ñajuanla xóo guʼwá rí nduyamajkuíí Dios ga̱jma̱a̱ rí espíritu santo* ndrígóo Dios rígá náa ikháanʼla ráʼ.
17 Á mu mbáa gáʼnijngudi guʼwá rí nduyamajkuíí Dios, Dios maʼnimbátiga̱a̱ xa̱bu̱ buʼko̱, numuu rí guʼwá náa nduyamajkuíí Dios nindxu̱u̱ kaʼwu ga̱jma̱a̱ ikháanʼ nindxa̱la guʼwá rúʼko̱.
18 Nimbáa xáʼninduwaminaʼ: Á mu mbáa dí ikháanʼla nandxa̱ʼwáminaʼ rí najmañuu náa numbaaʼ rígi̱,* gaʼni rí asndu xóo tséʼyoo mu maʼga̱nú mani̱ndxu̱u̱ mbáa xa̱bu̱ bi̱ najmañuu.
19 Numuu rí Dios ndaʼyoo dí ku̱ma̱ dí rígá náa numbaaʼ rígi̱ tséjmaa, xó má naʼthí náa kiʼnirámáʼ: “Ikhaa naʼni majngrádiinʼ bi̱ najmañún ga̱jma̱a̱ rí nuni̱”.
20 Ma̱ngaa kiʼnirámáʼ: “Jeobá* ndaʼyoo rí ku̱ma̱ ndrígu̱ún xa̱bu̱ bi̱ najmañún nditháan nda̱a̱ rí ejmaa”.
21 Ikha jngóo nimbáa xáʼnimbamínáʼ ga̱jma̱a̱ numuu mbáa xa̱bu̱ú, numuu dí xúgíʼ dí rígá kaʼyala má ikháanʼ:
22 Tséʼniuu má á mu Pablo, Apolos, Cefas,* numbaaʼ, dí makuwáanʼ, rí makhañúlúʼ, dí rígá xúgi̱ o dí marigá nda̱wa̱á. Xúgíʼ kaʼyala ikháanʼ.
23 Ikháanʼla nindxa̱la xa̱bi̱i̱ Cristo ga̱jma̱a̱ Cristo kaʼyoo náa Dios.
Mbaʼa nota
^ Ma̱ngaa nutháán Pedro.
