Timbá i̱yi̱i̱ʼ rí na̱jkha̱ inún Corintios 4:1-21
4 Xúgíinʼ gíʼmaa mbu̱yu̱xu xóo bi̱ numbayíí Cristo ga̱jma̱a̱ xa̱bu̱ bi̱ gajkuáa ñawúúnʼ ajngóo Dios dí rígá ngu̱ʼwa̱ rí nindxu̱u̱ mitsúʼkháan.
2 Rí ndayóoʼ muni̱ xa̱bu̱ bugi̱, gíʼmaa mani̱ndxu̱ún jmbiin.
3 Tséʼniuʼ má wéñuuʼ á mu ikháanʼla o mbáa xa̱bu̱ ñajunʼ gáʼnimbánuu numuʼ. Asndu má ikhúúnʼ tsémbáyuminaʼ.
4 Numuu rí ku̱ma̱ ndrígóʼ tséʼnigawúnʼ, mú raʼkháa rúʼko̱ eyoo gáʼthí rí ni̱ndxu̱ʼ mbáa xa̱bu̱ jmbii. I̱ndó Jeobá* nindxu̱u̱ bi̱ naʼthí rí á mu májánʼ o ra̱májánʼ dí na̱ni̱.
5 Ikha jngóo xútanúmáá nimbáa nákha xóó tséjkha̱nú mbiʼi rí kaʼyoo, asndu mbiʼi rí gáʼkha̱a̱ Tátá. Ikhaa maguwíi náa nambiʼi xúgíʼ dí rígá mingu̱ʼwa̱ náa mikrína ga̱jma̱a̱ masngájma rí gíwánʼ náa a̱jkiu̱ún xa̱bu̱. Ikhú Dios maʼninuma̱a̱ mámbáa rí kaʼyoo.
6 A̱ngui̱nʼ, ni̱tala ga̱jma̱a̱ numuʼ ikhúúnʼ ma̱ngaa numuu Apolos mu mambáyala má ikháanʼ ga̱jma̱a̱ numuxu ikháanʼ nikrua̱ʼa̱la xtángoo rígi̱: “Xánújngurámála rí kiʼnirámáʼ”. Mu xúʼko̱ xúni̱ mbaʼumíjna̱la ma̱ngaa xútha rí mbáa itháán gíʼdoo numuu ki xóo i̱mba̱a̱.
7 Ndiéjunʼ rí naʼni maraʼdáá itháán numaaʼ ki xóo eʼwíinʼ rá. Lá raʼkháa xúgíʼ rí xtaʼdáá nixnáaʼ Dios ráʼ. Á mu ikhaa nixnáaʼ xúgíʼ, náá numuu rí natanimbamína’ asndu natani̱ xóo xúgíʼ rí xtaʼdáá niʼnga̱a̱ʼ nikhánaaʼ ga̱jma̱a̱ tsiakii ndrígáaʼ rá.
8 Kuwáanʼ má gagi ráʼ. Lá kuaʼdáá má xúgíʼ ráʼ. Lá nigíʼdi̱i̱ má nitañájunʼ ndajkuáanʼ ráʼ. Ra̱ʼkhá tháán májánʼ á mu xúʼko̱, mu mangáanʼxu ma̱ndoo mutañájunʼ ga̱jma̱á nindxa̱la.
9 Numuu rí naku̱mu̱ʼ rí ikháanʼ bi̱ ni̱ndxu̱xu̱ʼ apóstoles Dios niniñuxu nda̱wa̱á kayuuʼ xóo xa̱bu̱ bi̱ nijuiʼthá makhañún, numuu rí ni̱jkuánú nini̱ndxu̱xu̱ʼ mbá rí xa̱bu̱ ga̱jma̱a̱ ángeles kúwá rumindííʼ.*
10 Ikháanʼ ni̱ndxu̱xu̱ʼ xóo skágunʼ ga̱jma̱a̱ numuu Cristo, mú ikháanʼla nakrua̱ʼa̱la ga̱jma̱a̱ numuu Cristo; ikháanʼxu raguáʼdáá tsiakii, mú ikháanʼla guaʼdáála tsiakii; ikháanʼ nduyamajkuala, mú ikháanʼxu tsíñún gúyuxu.
11 Asndu mbiʼi rígi̱ nanújnguxu ewiʼ, nakándawuxu, na̱nguá guáʼdáá mbaʼa xtíñuxuʼ,* nuxnuxu, nda̱a̱ guʼwúxu,
12 nuñejunʼ gakhi̱i̱ ga̱jma̱a̱ ñawúnxu. Índo̱ nutawéñuxu nutajkáanxu* ga̱jma̱a̱ numún; índo̱ nuxkuxu, naʼngo̱o̱ a̱jkiu̱xu;
13 índo̱ nunigámáanʼxu nuriʼña̱a̱xu ga̱jma̱a̱ ajngáa gua̱ba̱ʼ.* Asndu xúgi̱ xa̱bu̱ ndu̱yu̱xu rí ni̱ndxu̱xu̱ʼ náskha náa numbaaʼ rígi̱, mbá rí nda̱a̱ rí ejmaa nditháan.
14 Na̱nguá eni̱raʼmáʼ rígi̱ mu ma̱ni̱ majtiáanʼla, nindxu̱u̱ mu maxna̱la consejo xóo e̱ji̱nʼ bi̱ nandoʼ ka̱ñu̱u̱n.
15 Maski ajndu guaʼdiinla 10,000 bi̱ nisngála ga̱jma̱a̱ numuu Cristo, mú mbáwíí ana̱la guáʼdaa; ga̱jma̱a̱ numuu Cristo Jesús ikhúúnʼ ni̱jkhánú ninindxu̱ʼ xóo ana̱la ga̱jma̱a̱ numuu ajngáa rí májánʼ.
16 Ikha jngóo natakháñala rí mu̱ni̱ xó má rí na̱ni̱ ikhúúnʼ.
17 Nakuʼmáa Timoteo bi̱ nindxu̱u̱ asndu xóo a̱ʼdióʼ bi̱ nandoʼ ka̱yo̱o̱, bi̱ naʼnimbánuu xúgíʼ ga̱jma̱a̱ numuu Tátá. Ikhaa maʼni marmáʼáan a̱jkia̱la xúgíʼ rí xóo ikhúúnʼ na̱ni̱ ñajuunʼ* Cristo Jesús ga̱jma̱a̱ rí xóo nasngáa náa xúgíʼ guʼwá rí nagimbíi̱n.*
18 Tikhuun nuni̱ mbaʼumíjna̱, asndu naku̱mu̱ún rí xáʼgá gáñu̱u̱n.
19 Mú, á mu Jeobá* nandoo, nacha̱ má maʼgá, ga̱jma̱a̱ tsixmiéjunʼ rí gúthi bi̱ nuni̱ mbaʼumíjna̱, nandoʼ mba̱yo̱o̱ á mu guáʼdáá tsiakii ndrígóo Dios.
20 Raʼkháa rí nuʼtháá nasngájma rí nuʼnimbulú kuʼyáá Xa̱bu̱ Ñajunʼ ndrígóo Dios,* nindxu̱u̱ rí nu̱ʼni̱, xúʼko̱ nakujmaa á mu kuaʼdáá tsiakii ndrígóo Dios.
21 Dí eyala, nandala maʼgá ka̱yo̱ʼ xkuíyá ráʼ. O nandala rí maʼgánú ga̱jma̱a̱ májánʼ a̱jkiu̱nʼ dxe̱ʼ.
Mbaʼa nota
^ Náa ajngáa griego naʼthí, “teatro”.
^ Náa ajngáa griego naʼthí, “tsaʼtsáanʼxu”.
^ O “nunixu̱ tsajkuun”.
^ Náa ajngáa griego naʼthí, “nutakáñiixu”.
^ Náa ajngáa griego naʼthí, “kambo̱ʼ”.
