Timbá i̱yi̱i̱ʼ rí na̱jkha̱ inún Corintios 7:1-40
7 Numuu rí ikháanʼla niniraʼmáʼ, itháan májánʼ rí mbáa xa̱biya̱ xáguguaa* nimbáa a̱ʼgu̱.
2 Numuu dí xúgi̱ najmaʼnuuʼ asndu náá rí nubúúnʼ xkawiʼ kayuuʼ gajmiún eʼwíinʼ,* itháan májánʼ rí mámbáa xa̱biya̱ magiʼdaa a̱ʼgiu̱u̱ ga̱jma̱a̱ mámbáa a̱ʼgu̱ magiʼdaa ajmbio̱o̱.*
3 Xa̱biya̱ gíʼmaa maʼnimbánuu rí nandoo* a̱ʼgiu̱u̱ xúʼko̱ má a̱ʼgu̱ gíʼmaa maʼnimbánuu rí nandoo ajmbio̱o̱.
4 A̱ʼgu̱ tséʼtañajuunʼ xuyuuʼ, ajmbio̱o̱ eʼtáñajuunʼ. Xúʼko̱ má xa̱biya̱ tséʼtañajuunʼ xuyuuʼ, a̱ʼgiu̱u̱ eʼtáñajuunʼ.
5 Xúniʼñáánʼ rubala, i̱ndó á mu xúʼko̱ nimbánala nájmáanʼ mbá nguáthá mbiʼi, mu majmala mbiʼi mutajkáan numuu dí rúʼko̱ nindxu̱u̱ májánʼ ga̱jma̱a̱ nda̱wa̱á mubala mbu̱júu̱ʼ. Mu xágruiga̱ tsáʼkhá Gixa̱a̱* náa inala numuu dí a̱jkia̱la tséʼgo̱o̱ gágiʼthu̱u̱n.
6 Na̱tala rí ma̱ndoo mu̱nila rígi̱, mú na̱nguá nindxu̱u̱ mbá xtángoo.
7 Manigu̱ʼ dí xúgíinʼ xa̱bu̱ mani̱ndxu̱ún xóo ikhúúnʼ. Mú mámbáa nakhánúu dí Dios má naxnúu: Tikhuun nudamijná mú eʼwíinʼ naguanún ndajkuíín.
8 Bi̱ xóó tsédamijná mangiin gu̱ʼú xuáʼa̱, na̱thu̱u̱n dí itháan májánʼ maguanún xóo ikhúúnʼ.
9 Mú á mu tséʼngo̱o̱ a̱jkia̱la, gudamijná, itháan májánʼ gáʼni dí mudamijná ki xóo rí majngruigala mijkháanʼ.
10 Bi̱ ninigu̱nʼ na̱thu̱u̱n muni̱ rígi̱, raʼkháa ikhúúnʼ, Tátá eʼthúún rí a̱ʼgu̱ ragíʼmaa maniñuuʼ ajmbio̱o̱.
11 Á mu a̱ʼgu̱ naniñuuʼ ajmbio̱o̱, gaxtáa mbáwíí, xanújúunʼ o gambáxíiʼ ga̱jma̱a̱ ajmbio̱o̱. Xa̱biya̱ ragíʼmaa maniñuuʼ a̱ʼgiu̱u̱.
12 Mú eʼwíinʼ na̱thu̱u̱n, ikhúúnʼ raʼkháa Tátá, á mu mbáa ndxájulú gíʼdaa a̱ʼgiu̱u̱ bi̱ na̱nguá gíʼdoo fe náa Tátá ga̱jma̱a̱ a̱ʼgu̱ nandoo maguanúu ga̱jma̱a̱, ragíʼmaa maniñuuʼ.
13 Á mu mbáa a̱ʼgu̱ gíʼdaa ajmbio̱o̱ bi̱ na̱nguá gíʼdoo fe náa Tátá ga̱jma̱a̱ xa̱biya̱ nandoo maguanúu ga̱jma̱a̱, a̱ʼgu̱ xániñuuʼ ajmbio̱o̱.
14 Numuu rí xa̱biya̱ bi̱ na̱nguá gíʼdoo fe náa Tátá naguma kaʼwi̱i̱ ga̱jma̱a̱ numuu a̱ʼgiu̱u̱, xúʼko̱ má a̱ʼgu̱ bi̱ na̱nguá gíʼdoo fe náa Tátá naguma kaʼwi̱i̱ ga̱jma̱a̱ numuu ndxájulú. Á mu na̱nguá, e̱jñún mani̱ndxu̱ún mitsagiin, mú ga̱jma̱a̱ numuu rígi̱, xúgi̱ ni̱ndxu̱ún mikaʼwiin.
15 Mú, á mu bi̱ na̱nguá gíʼdoo fe náa Tátá nandoo maʼga̱a̱, gaʼga̱a̱. Ni má ndxájulú xa̱biya̱ ni má ndxájulú a̱ʼgu̱ xáʼyóoʼ maʼniuu tsiakii mu maxtáa ga̱jma̱a̱. Numuu rí Dios nindxaʼwála mu makuwáanʼ tsímáá.
16 Ikháán a̱ʼgu̱, xú káʼnii tayáá á mu matani̱ kríya̱a̱ʼ o xátani̱ kríya̱a̱ʼ ajmbia̱a̱ʼ rá. Xa̱biya̱, xú káʼnii tayáá á mu matani̱ kríya̱a̱ʼ o xátani̱ kríya̱a̱ʼ a̱ʼgia̱a̱ʼ rá.
17 Mámbáa má gaxtáa xó má Jeobá* niniñuuʼ maxtáa xó má xtáa nákha Dios nindxa̱ʼóo. Ikhaa rígi̱ rí na̱ta̱ náa xúgíʼ guʼwá nagimbíi̱n.*
18 Lá mbáa xa̱bu̱ nithu xtóo xuyuuʼ tsáʼkhúun nákha Dios nindxa̱ʼóo ráʼ. Xáʼni asndu xóo rí tárujtu. Lá mbáa xa̱bu̱ xóó tárujtu xtóo xuyuuʼ tsáʼkhúun nákha Dios nindxa̱ʼóo ráʼ. Xárujtu má.
19 Numuu rí na̱nguá má gíʼdoo numuu rí matrujtu o xátrujtu xtóo xuyuuʼ tsáʼkháanʼ. Rí itháan gíʼdoo numuu nindxu̱u̱ rí matanimbáníí xtángoo ndrígóo Dios.
20 Mámbáa má gáxtáa xó má xtáa nákha Dios nindxa̱ʼóo.
21 Lá ñumbáá nindxa̱a̱ʼ nákha Dios nindxa̱ʼwáaʼ ráʼ. Xáxmiéjuanʼ ga̱jma̱a̱ numuu rúʼko̱. Á mu kaʼnii matatsiʼñáánʼ ranindxa̱a̱ʼ ñumbáá, xátatsiʼñáánʼ manújngoo xúʼkhiín.
22 Numuu rí asndu tsáá bi̱ nindxu̱u̱ ñumbáá nákhi Dios nindxa̱ʼóo, rí xúgi̱ niguma kríyaaʼ ga̱jma̱a̱ numuu Cristo. Xúʼko̱ má, asndu tsáa bi̱ na̱nguá nindxu̱u̱ ñumbáá nákha Dios nindxa̱ʼóo, mú rí xúgi̱ nindxu̱u̱ ñumbáá ndrígóo Cristo.
23 Mba̱a̱ nijmanumáá ga̱jma̱á numala, ikha jngóo guniʼñáánʼ rani̱ndxa̱la ñumbáá ndrígu̱ún xa̱bu̱.
24 A̱ngui̱nʼ, mámbáa má gáxtáa xó má Dios niniñuuʼ maxtáa, xó má xtáa nákha ikhaa nindxa̱ʼóo.
25 Ga̱jma̱a̱ numún xa̱bu̱ bi̱ xóó tsínigu̱nʼ ma̱ngaa bi̱ xóó tsínuju̱nʼ, na̱nguá gúʼdoʼ nimbá kiʼtáñajunʼ ndrígóo Tátá, mú ma̱tala rí naku̱mu̱ʼ. Dí naʼthí mbáa bi̱ Tátá nigáwíinʼ a̱jkiu̱u̱n kaʼyoo mu manidxu̱u̱ jmbii.
26 Ga̱jma̱a̱ numuu xkujndu dí narígá xúgi̱, naku̱mu̱ʼ rí itháan májánʼ rí xa̱bu̱ maxtáa xó má xtáa.
27 Lá ndiyáa má a̱ʼgu̱ ráʼ. Xátaʼyáʼ rí matatsiʼñáaʼ. Lá xóó tséyáa a̱ʼgu̱ ráʼ. Xátaʼyáaʼ a̱ʼgu̱ mbi̱ya̱a̱.
28 Á mu mbáa nanigúnʼ, na̱nguá má ekudaminaʼ nimbá aʼkhá. Á mu nudamijná xa̱bu̱ bi̱ xóó ndajkuíín,* na̱nguá má exudami̱jna̱ nimbá aʼkhá. Mú bi̱ gúdamijná maguaʼdáá xkujndu. Ikhúúnʼ nandoʼ mambáyala mu xáguáʼníí rúʼko̱.
29 Ma̱ngaa a̱ngui̱nʼ, na̱tala rí naguanúu imbá chíʼgíiʼ mbiʼi. Ikha jngóo, asndu xúgi̱ bi̱ guáʼdiin guʼñu̱ún guni̱ asndu xóo raguáʼdiin,
30 bi̱ numbi̱ya̱ʼ guni̱ asndu xóo tsémbi̱ya̱ʼ; bi̱ nadxún guni̱ asndu xóo tsédxún; bi̱ nutsi rí maguaʼdáá guni̱ asndu xóo raguáʼdáá,
31 bi̱ najmún dí rígá náa numbaaʼ guni̱ asndu xóo rí tséjmún. Numuu dí na̱jkha̱ raxtiʼkhuu dí rígá náa numbaaʼ.
32 Ikhúúnʼ nandoʼ rí ikháanʼ xáxmiéjuanla. Xa̱bu̱ bi̱ xóó tsénigúnʼ naxmiéjuunʼ maʼni ñajuunʼ Tátá, nandoo mbaʼyoo xóo gáʼni mu Tátá maʼndoo kaʼyoo.
33 Mú xa̱bu̱ bi̱ ninigúnʼ naxmiéjuunʼ ga̱jma̱a̱ numuu dí rígá náa numbaaʼ xóo gáʼni mu a̱ʼgiu̱u̱ maʼndoo kaʼyoo,
34 ga̱jma̱a̱ naʼni a̱jma̱ a̱jkiu̱u̱n. A̱ʼgu̱ bi̱ xóó tsénujúnʼ ma̱ngaa wáxá bi̱ xóó tsébóoʼ ga̱jma̱a̱ xa̱bu̱, naxmiéjúúnʼ muni̱ ñajuunʼ Tátá ga̱jma̱a̱ nanindxu̱ún mikaʼwiin náa xuñúnʼ ma̱ngaa xóo endxa̱ʼwa̱míjna̱. A̱ʼgu̱ bi̱ ninújúnʼ naxmiéjuunʼ ga̱jma̱a̱ numuu dí rígá náa numbaaʼ, xóo gáʼni mu ajmbio̱o̱ maʼndoo kaʼyoo.
35 Na̱tala rígi̱ mu mambáyala má ikháanʼ. Raʼkháa mu marikala,* nindxu̱u̱ mu maxkajxáanʼ mu̱ni̱ rí kaʼyoo, rí mu̱ni̱ má xúʼko̱ ñajuunʼ Tátá ga̱jma̱a̱ dí nda̱a̱ dí gárikala.
36 Á mu mbáa tséʼngo̱o̱ gárikoo dí nagua̱ʼa̱ mabóoʼ ga̱jma̱a̱ mbáa* numuu rí mbáwíí xóó ga̱jma̱a̱ nánguá nindxu̱u̱ dxámaá o dxáʼguú, rígi̱ rí gíʼmaa maʼni: Ganigúnʼ o ganújúnʼ tséʼni má aʼkhá.
37 Á mu mbáa niraʼwíí má náa a̱jkiu̱u̱n ga̱jma̱a̱ nakudaminaʼ rí maʼnimbánuu ma̱ngaa ndaʼyoo rí tséyóoʼ má manigúnʼ o manújúnʼ ga̱jma̱a̱ naʼngo̱o̱ má narikhoo* dí nagua̱ʼa̱ mabóoʼ ga̱jma̱a̱ mbáa, májánʼ á mu xúʼko̱ eʼni.
38 Ikha jngóo bi̱ nanigúnʼ o nanújúnʼ májánʼ má eʼni, mú itháan májánʼ eʼni bi̱ tsénigúnʼ o tsénújúnʼ.
39 A̱ʼgu̱ xándoo mbayáa i̱mba̱a̱ xa̱bu̱ á mu ajmbio̱o̱ kaʼníí xtáa. Mú á mu ajmbio̱o̱ nikháñuu, ma̱ndoo mbayáa asndu tsáá má eyoo, mú gáyáa bi̱ naʼni ñajuunʼ Tátá.
40 Mú ikhúúnʼ naku̱mu̱ʼ rí maxtáa itháan gagi á mu tsétanga̱a̱ manújúunʼ. Ikhúúnʼ mangúún nda̱yo̱o̱ gajkhun rí gúʼdoo espíritu santo* ndrígóo Dios.
Mbaʼa nota
^ Xóo muʼthá, xábooʼ ga̱jma̱a̱.
^ O “jmba̱yi̱i̱”.
^ Rígi̱ nandoo gáʼthúu̱n rí mubúúnʼ.
^ Náa ajngáa griego naʼthí, “bi̱ xóó tsébúúnʼ gajmiún mbáa”.
^ Náa ajngáa griego naʼthí, “marajkuáa ñuu apala”.
^ Náa ajngáa griego naʼthí, “naʼni dí raʼkhí”.
^ Náa ajngáa griego naʼthí, “naʼtáñajuunʼ”.
