Timbá i̱yi̱i̱ʼ rí na̱jkha̱ inún Corintios 8:1-13
8 Rí xúgi̱, ga̱jma̱a̱ numuu ganitsu rí nijuixnáxi̱ náa xándú, nduʼyáá rí xúgiáanʼ kuaʼdáá ku̱ma̱. Ku̱ma̱ naʼnimbámináʼ, mú ngajua naxná tsiakii.
2 Á mu mbáa nandxa̱ʼwáminaʼ dí rígá mbá rí ndaʼyoo, mú ndayóoʼ makro̱ʼo̱o̱ xóo phú gíʼmaa.
3 Á mu mbáa nandoo kaʼyoo Dios, Dios nandoo kaʼyoo xa̱bu̱ bugi̱.
4 Ga̱jma̱a̱ numuu dí miʼtsu ganitsu rí nijuixnáxi̱ náa xándú, nduʼyáá rí mbáa xándú nda̱a̱ rí nindxu̱u̱ náa numbaaʼ ga̱jma̱a̱ dí mbáwíí Dios xtáa.
5 Numuu rí mbaʼin xa̱bu̱ nuthi dí kúwá dioses mekhuíí ga̱jma̱a̱ náa tsu̱du̱u̱ ku̱ba̱ʼ, xó má mbaʼin bi̱ nuthúún “dioses” ga̱jma̱a̱ “tátá”.
6 Mú ikháanʼlu nduʼyáá rí xtáa mbáwíí Dios bi̱ ñajuunʼ Anu̱lú, náa ikhaa na̱ʼkha̱ xúgíʼ ga̱jma̱a̱ numuu ikhaa nandoo nakúwáanʼlu. Ma̱ngaa xtáa mbáwíí Tátá, Jesucristo, ga̱jma̱a̱ numuu ikhaa ni̱jkha̱nú nirígá xúgíʼ ga̱jma̱a̱ numuu ikhaa kúwáanʼlú mangáanʼ.
7 Mú raʼkháa xúgíinʼ guáʼdáá ku̱ma̱ rígi̱. Tikhuun, numuu rí nákha ginii ndiyamajkhún xándú, índo̱ na̱ʼphu̱ ganitsu rígi̱ nakumu̱ún rí asndu xóo nijuixnáxi̱ ganitsu rígi̱ náa xándú, naʼni gawúunʼ ku̱ma̱ ndrígu̱ún numuu rí gua̱ba̱ʼ.
8 Mú ganitsu tséʼni muxuʼmámíjná náa Dios. Á mu tséʼphu tséʼni̱ má aʼkhá, á mu naphu̱lú tséguaʼdáá itháan numulú náa eʼwíinʼ.
9 Guñewa̱a̱n rí nuraʼwíí mu̱nila mu xúni̱ majngrádiinʼ eʼwíinʼ bi̱ guabiinʼ.
10 Numuu rí á mu mbáa gáʼyaaʼ ikháán bi̱ xtaʼdáá ku̱ma̱ rí natsiʼtsu náa nduyamajkhún xándú, lá xáʼga kayáa ku̱ma̱ ndrígóo bi̱ guabaaʼ mi̱khu̱ rí najuaxnáxi̱ náa xándú ráʼ.
11 Ga̱jma̱a̱ numuu ku̱ma̱ ndrígáaʼ natani̱ gachíi ndxájuaaʼ bi̱ guabaaʼ, mbáa ndxájuaaʼ bi̱ Cristo nikháñuu ga̱jma̱a̱ numuu.
12 Índo̱ ikháanʼ nakiéʼkala náa inún a̱ngia̱la xúgi̱ kaʼnii ga̱jma̱a̱ nunigawíínʼ ku̱ma̱ gua̱ba̱ʼ ndrígu̱ún, kuwáanʼ ruxudamíjná aʼkhá náa Cristo.
13 Ikha jngóo á mu ganitsu naʼni majngrádaaʼ ndxájuʼ, ní xátangu̱ún miʼkhu xuwiʼ, mu xáni majngrádaaʼ ndxájuʼ.
