Timbá i̱yi̱i̱ʼ rí na̱jkha̱ inún Corintios 9:1-27
9 Lá raʼkháa ikhúúnʼ etañájuminaʼ ráʼ. Lá raʼkháa ikhúúnʼ ni̱ndxu̱ʼ apóstol ráʼ. Lá táyóo Jesús bi̱ nindxu̱u̱ Tátá ndrígúlú ráʼ. Lá raʼkháa ikháanʼ nindxa̱la ñajunʼ rí ni̱ni̱ ga̱jma̱a̱ numuu Tátá ráʼ.
2 Maski má eʼwíinʼ nduyáá rí na̱nguá ni̱ndxu̱ʼ apóstol, mú ikháanʼla ndu̱ya̱a̱ rí ni̱ndxu̱ʼ, numuu rí ikháanʼ nindxa̱la tsinaʼ rí nasngájma dí ikhúúnʼ ni̱ndxu̱ʼ apóstol náa Tátá.
3 Rígi̱ rí na̱thu̱u̱n bi̱ nutanumuʼ.
4 Lá rakáʼyulú muphiʼtsu ga̱jma̱a̱ muʼwa̱a̱n ráʼ.
5 Lá xándoo mu̱ʼgua̱ gajmiúlú a̱ʼgiu̱lú bi̱ ma̱ngaa nindxu̱u̱ xa̱bi̱i̱ Jesús, xó má eni̱ eʼwíinʼ apóstoles, a̱ngui̱i̱n Tátá ga̱jma̱a̱ Cefas* ráʼ.
6 O lá i̱ndó ikhúúnʼ ga̱jmu̱ʼ Bernabé mbaʼyóoʼ muñejunʼ mu makuwáanʼxu ráʼ.
7 Lá xtáa mbáa soldado bi̱ ikhaa má eʼninumaminaʼ ráʼ. Lá xtáa mbáa bi̱ naʼdu uvas ga̱jma̱a̱ tséʼkhu xndúu índo̱ najma̱a̱ ráʼ. Lá xtáa mbáa bi̱ nañewu̱u̱n mugu̱ ga̱jma̱a̱ tséʼga̱a̱n mbá chíʼgíiʼ yaʼdún mugiu̱u̱ xáʼ.
8 Dí xtáá rata̱la̱ rígi̱, lá i̱ndó xa̱bu̱ numbaaʼ e̱ndxa̱ʼwa̱míjna̱ xúgi̱ kaʼnii ráʼ. Lá raʼkháa xúʼko̱ má eʼthí náa Xtángoo ma̱ngaa ráʼ.
9 Numuu rí náa Xtángoo ndrígóo Moisés kiʼnirámáʼ: “Xátagídáʼ amaʼ rawuunʼ xede̱ bi̱ nakujmbi̱i̱ tsígáʼ”. Lá Dios naxmiéjunʼ kaʼñún xede̱ ráʼ.
10 O lá niʼthí ga̱jma̱a̱ numulú ikháanʼ dxe̱ʼ. Xúʼko̱, nigumarámáʼ ga̱jma̱a̱ numulú ikháanʼ, numuu rí xa̱bu̱ bi̱ naxkubi ga̱jma̱a̱ bi̱ narujtsi tsígáʼ nuni̱ numuu rí naguáʼthi̱i̱n mbá rí makhánún.
11 Á mu ikháanʼ bi̱ nidúxu náa ikháanʼla dí na̱ʼkha̱ náa Dios. Lá raʼkhí gánindxu̱u̱ rí mudrígúxu rí gúxnuxu mu mumbáyumíjna̱xu ga̱jma̱a̱ ráʼ.
12 Á mu iwáá nuxnu̱u̱nla rí guaʼdáá eʼwíinʼ xa̱bu̱, lá ikháanʼ na̱nguá kaʼyuxu makánuxu ráʼ. Mú ikháanʼxu tsénda̱ʼa̱la maski ajndu ma̱ndoo munixu̱,* naʼnguxuʼ xúgíʼ rígi̱ mu xúni̱ majngrádaaʼ nimbáa índo̱ gútaráʼaxu ajngáa rí májánʼ ga̱jma̱a̱ numuu Cristo.
13 Lá na̱nguá e̱ya̱a̱ ikháanʼ rí xa̱bu̱ bi̱ nuni̱ ñajunʼ rí mitsúʼkháan na̱ʼphu̱ rí mitsúʼkháan dí rígá náa guʼwá rí nduyamajkuíí Dios xáʼ. Lá tséya̱a̱la rí xa̱bu̱ bi̱ nuñajunʼ má xúʼko̱ náa nakarámáʼ tsigijñaʼ, nakhánún mbá chíʼgíiʼ tsigijñaʼ rí najuixnáxi̱ xáʼ.
14 Xúʼko̱ má, Tátá niʼtáñajunʼ rí bi̱ gútaraʼa rí májánʼ makuwá ga̱jma̱a̱ ajngáa rí májánʼ.
15 Ikhúúnʼ nditháan tánda̱ʼa̱ rí mumbayúʼla. Tséniraʼmáʼ i̱yi̱i̱ʼ rígi̱ mu ma̱tala rí mumbáyúʼla, numuu rí itháan májánʼ makhañúʼ ki xóo... ¡Xániʼñuuʼ rí nimbáa marígú káyúʼ rí naʼni maʼdxuu a̱jkiu̱nʼ dí mataráʼa má xúʼkhiínʼ!
16 Índo̱ nataráʼa nda̱a̱ mbá numuu rí manimbamínáʼ numuu rí ikhaa kaʼyoʼ ma̱ni̱. ¡Gínúla ikhúúnʼ á mu tsétaráʼa ajngáa rí májánʼ!
17 Á mu na̱ni̱ rígi̱ ga̱jma̱a̱ xúgíʼ a̱jkiu̱nʼ, rígá mbá rí mada̱a̱ʼ, mú, á mu tsíyóʼ gáni, mbaʼyóoʼ ma̱ni̱ má tsiakii, numuu rí ikhaa nindxu̱u̱ rí nikhánuʼ ma̱ni̱.
18 Mú, ndiéjunʼ nindxu̱u̱ rí mada̱a̱ʼ rá. Índo̱ gátaraʼa ajngáa rí májánʼ, xáruma rí ma̱ni̱ mu xúʼko̱ xánujngurámúʼ ñajunʼ rí nikhánuʼ dí mataráʼa ajngáa rí májánʼ.
19 Maski má ni̱ndxu̱ʼ mbáa xa̱bu̱ bi̱ naʼtáñajuminaʼ, mú ni̱ni̱ rí mani̱ndxu̱ʼ ñumbáá ndrígu̱ún xúgíinʼ xa̱bu̱ mu maʼngo̱ʼ mathu̱u̱n mbaʼin xa̱bu̱ asndu xó má eʼngo̱o̱.
20 Náa xa̱bu̱ judíos nini̱ rí mangúún ni̱ndxu̱ʼ judío mu xúʼko̱ maʼngo̱ʼ mathu̱u̱n xa̱bu̱ judíos. Náa bi̱ nunimbáníí xtángoo ni̱ni̱ xóo rí mangúún nanimbánuu xtángoo mu xúʼko̱ maʼngo̱ʼ mathu̱u̱n bi̱ nunimbáníí xtángoo, maski má ikhúúnʼ na̱nguá xtáá náa majñu̱u̱ʼ xtángoo.
21 Náa xa̱bu̱ bi̱ tsénimbáníí xtángoo ni̱ni̱ xóo rí mangúún tsénimbánuu xtángoo mu xúʼko̱ maʼngo̱ʼ mathu̱u̱n bi̱ na̱nguá enimbáníí xtángoo, mú ikhúúnʼ ninimbánuu xtángoo ndrígóo Dios ga̱jma̱a̱ xtángoo ndrígóo Cristo.
22 Náa bi̱ guabiinʼ ninindxu̱ʼ guabúnʼ mangúún mu xúʼko̱ ma̱ndoo mambáñún bi̱ guabiinʼ. Nijkhánú ninindxu̱ʼ xóo kaʼniún xúgíinʼ enii xa̱bu̱ mu xúʼko̱ tikhuun makáwíin.
23 Mú na̱ni̱ xúgíʼ ga̱jma̱a̱ numuu ajngáa rí májánʼ, mu matarúʼún eʼwíinʼ.
24 Lá tséya̱a̱ rí bi̱ nagáñún, xúgíinʼ egáñún mú mbáwíí bi̱ naʼngo̱o̱ nada̱a̱ʼ ráʼ. Xúʼko̱ má gúgayála mangáanʼ mu maʼngala muda̱a̱ʼ.
25 Xúgíinʼ bi̱ nagáñún nusngajma rí nuñewa̱a̱n náa xúgíʼ rí nuni̱. Gajkhun má, rígi̱ nuni̱ mu mundrígú mbá rí muda̱a̱ʼ* dí xájyúuʼ mba̱yu̱u̱ʼ, mú ikháanʼ nu̱ʼni̱ mu mundrígú mbá rí muʼda̱a̱ʼ rí mbajyúuʼ mba̱yu̱u̱ʼ.
26 Ikhúúnʼ tségayúʼ mbaʼ magayúuʼ ga̱jma̱a̱ tsékuʼmá náa inuu giñánʼ.
27 Rí phú na̱ni̱, na̱ni̱ gínáa xuyuʼ ga̱jma̱a̱ na̱ni̱ rí manindxu̱u̱ ñumbáá ndrígóʼ, mu raʼkháa gáʼni rí nda̱wa̱á rí nitarúʼún eʼwíinʼ xágruigún Dios.
Mbaʼa nota
^ Ma̱ngaa nutháán Pedro.
^ Náa ajngáa griego naʼthí, “nutañájunʼxu”.
^ Náa ajngáa griego naʼthí, “corona”.
