Timbá i̱yi̱i̱ʼ rí niʼnirámáʼ Juan 2:1-29

  • Jesús nindxu̱u̱ mbá tsigijñaʼ rí ma̱ndoo mambaxíiʼ gajmiúlú Dios (1, 2)

  • “Nuʼnimbulú má xúʼko̱ kiʼtáñajunʼ ndrígóo” (3-11)

    • Mbá kiʼtáñajunʼ wayuu ga̱jma̱a̱ mbá dí nuxi̱ʼ (7, 8)

  • Ga̱jma̱a̱ numuu dí naʼnirámáʼ i̱yi̱i̱ʼ (12-14)

  • “Xáʼndala kuya̱a̱ numbaaʼ” (15-17)

  • Najuiʼthá ga̱jma̱a̱ numuu bi̱ tsíyoo gáʼyoo Cristo (18-29)

2  E̱ji̱nʼ nindxa̱la, naniraʼmáʼ rígi̱ inala mu xúxuʼdámijná nimbá aʼkhá. Á mu mbáa rí ikháanʼ nakudaminaʼ aʼkhá, kuaʼdaa mbáa bi̱ nambáyulú* bi̱ xtáa mbóó ga̱jma̱a̱ Anu̱lú: Ikhaa nindxu̱u̱ Jesucristo bi̱ jmbii. 2  Ikhaa nindxu̱u̱ mbá tsigijñaʼ rí ma̱ndoo mambajxíiʼ gajmiúlú Dios* ga̱jma̱a̱ numuu aʼkhúlú, mú raʼkháa i̱ndó ndrígúlú ikháánʼ, ma̱ngaa ndrígu̱ún xúgíinʼ xa̱bu̱ bi̱ kúwá náa xúgíʼ numbaaʼ. 3  Nduʼyáá rí najkua̱ʼnulú nuniʼniiʼ: Á mu nuʼnimbulú má xúʼko̱ kiʼtáñajunʼ ndrígóo. 4  Á mu mbáa naʼthí “ikhúúnʼ nijkhánú niniʼniiʼ” mú na̱nguá eʼnimbánuu kiʼtáñajunʼ ndrígóo, xtáa raʼni nduwaʼ ga̱jma̱a̱ nda̱a̱ dí gajkhun náa ikhaa. 5  Á mu mbáa naʼnimbo̱o̱ ajngóo, rí nandoo kaʼyoo Dios ni̱jkha̱nú niʼni kájxi̱ náa ikhaa. Xígi̱ kaʼnii nduʼyáá rí kuwáanʼ mbóó gajmiúlú ikhaa. 6  Bi̱ naʼthí rí xtáa mbóó ga̱jma̱a̱ ikhaa gíʼmaa majngruigo̱o̱ xó má ikhaa* nijngruigo̱o̱. 7  A̱ngui̱nʼ, tséniraʼmáʼ mbá kiʼtáñajunʼ nuxi̱ʼ náa inala, nindxu̱u̱ mbá rí wayuu rí ikháanʼ má niguaʼdáá asndu nákha ginii. Kiʼtáñajunʼ wayuu rígi̱ nindxu̱u̱ ajngáa dí ikháanʼ má nidxawíínla. 8  Maski ajndu xúʼko̱, naniraʼmáʼ mbá kiʼtáñajunʼ nuxi̱ʼ rí naʼthí dí gajkhun ga̱jma̱a̱ numuu ikhaa ma̱ngaa numala ikháanʼ, numuu dí mikrína na̱jkha̱ raguambáa ga̱jma̱a̱ aguʼ dí gajkhun nambiʼitiga̱ má. 9  Bi̱ naʼthí dí xtáa náa rígá aguʼ mú nawi̱yu̱u̱ʼ kaʼyoo ndxájuu kaʼníí xtáa náa mikrína. 10  Bi̱ nandoo kaʼyoo ndxájuu xtáa má xúʼko̱ náa rígá aguʼ ga̱jma̱a̱ nda̱a̱ nimbá rí maʼni majngrádaaʼ. 11  Mú bi̱ nawi̱yu̱u̱ʼ kaʼyoo ndxájuu xtáa ga̱jma̱a̱ jngruigo̱o̱ náa mikrína, tséʼyoo náa ejkha̱, numuu rí mikrína naʼni rí xákruigo̱o̱.* 12  E̱ji̱nʼ, naniraʼmáʼ rígi̱ inala numuu rí Dios niʼni mba̱a̱ a̱jkiu̱u̱n kaʼyoo má aʼkhála ga̱jma̱a̱ numuu mbiʼyuu ikhaa.* 13  Xabuanii, naniraʼmáʼ rígi̱ inala numuu rí ni̱jkua̱nú niniʼníiʼ bi̱ xtáa asndu nákha ginii. Jiámá ga̱jma̱a̱ wa̱ʼxa̱ʼ, naniraʼmáʼ rígi̱ inala numuu rí niʼngala ni̱ni̱ gajmiála Gixa̱a̱.* E̱ji̱n majkhiinʼ, naniraʼmáʼ rígi̱ inala numuu dí ni̱jkua̱nú niniʼníiʼ Anu̱lú. 14  Xabuanii, naniraʼmáʼ rígi̱ inala numuu dí ni̱jkua̱nú niniʼníiʼ bi̱ xtáa asndu nákhá ginii. Jiámá ga̱jma̱a̱ wa̱ʼxa̱ʼ, naniraʼmáʼ rígi̱ inala numuu rí migújkiáanʼla ga̱jma̱a̱ ajngóo Dios rígá má xúʼko̱ náa ikháanʼla, ma̱ngaa niʼngala ni̱ni̱ gajmiála Gixa̱a̱.* 15  Xáʼndala kuya̱a̱ numbaaʼ ni má dí rígá náa numbaaʼ. Á mu mbáa nandoo kaʼyoo numbaaʼ, ngajua ndrígóo Anu̱lú nda̱a̱ náa ikhaa. 16  Numuu rí nimbá dí rígá náa numbaaʼ, xóo rí xuyuuʼ xa̱bu̱ nagua̱ʼa̱ maʼni, rí nagua̱ʼa̱ iduu ma̱ngaa dí naʼnimbamínáʼ ga̱jma̱a̱ dí gíʼdoo, tséʼkha̱ náa Anu̱lú, na̱ʼkha̱ náa numbaaʼ. 17  Xúgíʼ dí rígá náa numbaaʼ ga̱jma̱a̱ dí xa̱bu̱ nagua̱ʼa̱ muni̱ na̱jkha̱ mambáa, mú bi̱ naʼni rí nandoo Dios maxtáa asndu kámuu mbiʼi. 18  E̱ji̱nʼ, xúgi̱ má nindxu̱u̱ iwáá hora. Ikháanʼ má nidxawíín rí na̱ʼkha̱ bi̱ tsíyoo gáʼyoo Cristo.* Mú rí xúgi̱ nikujmiin mbaʼin bi̱ tsíñún guyáá Cristo, ikha jngóo nduʼyáá má rí kuwáanʼlu náa iwáá hora. 19  Ikhiin nigájnún náa majñulú, mú na̱nguá ni̱ndxu̱ún xó má ikháanʼlú, á mu ni̱ndxu̱ún xó má ikháánʼ, ikhiin maguanún ga̱jma̱á ni̱ndxu̱lú. Mú nigájnún mu makujmaa kaʼwu dí raʼkháa xúgíinʼ ni̱ndxu̱ún xó má ikháanʼlú. 20  Dios bi̱ kaʼwii niraʼwáanʼla ikháanʼ ga̱jma̱a̱ xúgiáanʼla ikháanʼ kuaʼdáála ku̱ma̱. 21  Naniraʼmáʼ rígi̱ inala raʼkháa mu tséniʼnúuʼ dí gajkhun, nindxu̱u̱ numuu rí nuniʼnúuʼla ga̱jma̱a̱ ndu̱ya̱a̱ dí nimbá minduwaʼ tséʼkha̱ náa dí gajkhun. 22  Tsáá nindxu̱u̱ bi̱ naʼni nduwaʼ rá. Lá raʼkháa bi̱ naʼnigaʼduunʼ rí Jesús nindxu̱u̱ Cristo ráʼ. Ikhaa bugi̱ bi̱ tsíyoo gáʼyoo Cristo:* Bi̱ tsékumu̱u̱ kaʼyoo Anu̱lú ni má A̱ʼdióo. 23  Asndu tsáa bi̱ tségiʼdoo fe náa Ada̱ xúʼko̱ má Anu̱lú xágruiguíi ma̱ngaa. Mú bi̱ gáʼni nuwiinʼ Ada̱, Anu̱lú ma̱ngaa magruiguíi. 24  Ikháanʼla gakuwáanʼ má xúʼko̱ náa rí nidxawíín asndu nákha ginii. Á mu rí nidxawíín asndu nákha ginii rígá má xúʼko̱ náa ikháanʼla, mangáanʼ makuwáanʼla má xúʼko̱ mbóó gajmiála Ada̱ xúʼko̱ má náa Anu̱lú ma̱ngaa. 25  Rígi̱ nindxu̱u̱ dí ikhaa mina̱a̱ʼ nikudaminaʼ maxnúlú: Rí makuwáanʼ kámuu mbiʼi. 26  Nanirámáʼ rígi̱ inala mu muñeumíjna̱ náa bi̱ nandún muni̱ nduwáanʼla. 27  Mú ikháanʼla, ikhaa niraʼwánʼla ga̱jma̱a̱ espíritu santo,* espíritu rígá náa ikháanʼla, ikha jngóo tséyala ma mbáa bi̱ maʼsngála. Espíritu dí na̱ʼkha̱ náa ikhaa nindxu̱u̱ gajkuwiin ga̱jma̱a̱ tséʼni nduwaʼ, Dios nijmuu espíritu ndrígóo mu maʼsngála ikháanʼ ga̱jma̱a̱ numuu xúgíʼ dí rígá. Ikha jngóo gakuwáanʼ mbóó gajmiála ikhaa xó má espíritu niʼsngála mu̱ni̱. 28  Rí xúgi̱ e̱ji̱nʼ, gakuwáanʼla má xúʼko̱ mbóó gajmiála, mu xúʼko̱ índo̱ ikhaa gákujmaa ma̱ndoo muʼtá ga̱jma̱a̱ xúgíʼ a̱jkiu̱lú* ma̱ngaa rí xútsingulú ga̱jma̱a̱ numuu rí natiyulú índo̱ ikhaa gáʼkha̱a̱.* 29  Á mu ikháanʼla ndu̱ya̱a̱ dí ikhaa nindxu̱u̱ jmbii, ma̱ngaa má ndu̱ya̱a̱la rí asndu tsáa bi̱ naʼni rí jmbu nigumaa náa ikhaa.

Mbaʼa nota

^ O “abogado”.
^ O “mu ma̱ndoo makuwáánʼ tsímáá gajmiúlú Dios”. Atayáá glosario, mambajxíín.
^ Xóo muʼthá, Jesús.
^ Náa ajngáa griego naʼthí, “nirugoo iduu”.
^ Xóo muʼthá, Jesús.
^ Náa ajngáa griego naʼthí, “xa̱bu̱ Xkawi̱i̱ʼ”.
^ Náa ajngáa griego naʼthí, “xa̱bu̱ Xkawi̱i̱ʼ”.
^ O “anticristo”.
^ O “anticristo”.
^ O “xi̱ʼ kaʼwu”, “tsiakii ndrígóo Dios”. Atayáá glosario, espíritu santo.
^ O “ámiulu”.
^ Atayáá glosario, presencia.
TRADUCCIÓN DEL NUEVO MUNDO DE LAS SANTAS ESCRITURAS
1 Juan 2
me̱ʼpha̱a̱
Araxnuu Biblia náa Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt