Timbá i̱yi̱i̱ʼ rí niʼnirámáʼ Juan 3:1-24
3 ¡Gu̱ya̱a̱la dí Anu̱lú ra̱ʼkhá tháán eyoo kaʼyulú, rí asndu naxnámbiʼyulú e̱ji̱i̱n Dios! Ikhaa rúʼko̱ rí nindxu̱lú. Mú numbaaʼ tséʼniniánʼlú numuu rí na̱nguá ni̱jkha̱nú niʼninuwiinʼ Dios.
2 A̱ngui̱nʼ, dí xúgi̱ ni̱ndxu̱lú e̱ji̱i̱n Dios, mú xóó tsékujmaa xóo phú gánindxu̱lú. Nduʼyáá rí índo̱ gákujmaa manindxu̱lú xó má ikhaa, numuu rí mbuʼyáá xóo phú nindxu̱u̱.
3 Nu̱ʼni̱ kaʼwumijnáánʼ má ikháánʼ á mu nugua̱ʼthi̱i̱n marigá rígi̱ numuu rí ikhaa nindxu̱u̱ mikaʼwii.
4 Asndu tsáá bi̱ naʼni aʼkhá xtáa ranújngurámuuʼ xtángoo, numuu rí aʼkhá nanújngurámuuʼ xtángoo.
5 Ikháanʼla má ndu̱ya̱a̱ rí ikhaa ni̱ʼkha̱ mu marígu̱u̱ aʼkhúlú ga̱jma̱a̱ náa ikhaa nda̱a̱ aʼkhá.
6 Nimbáa bi̱ xtáa mbóó ga̱jma̱a̱ ikhaa tsékudamina’ aʼkhá, numuu rí bi̱ naʼni aʼkhá na̱nguá ndiʼyoo ni má táʼganú maʼninuwiin’.
7 E̱ji̱nʼ, xúniʼñámijná rí nimbáa maʼninduwáanʼla. Bi̱ naʼni rí jmbu nindxu̱u̱ jmbii xó má Jesús nindxu̱u̱ jmbii.
8 Bi̱ naʼni aʼkhá na̱ʼkha̱ náa Gixa̱a̱ numuu rí Gixa̱a̱ nixtáa raʼni má xúʼko̱ aʼkhá asndu nákha wájyúuʼ.* Mú A̱ʼdióo Dios ni̱ʼkha̱ ga̱jma̱a̱ numuu rígi̱: Rí maʼnigámbáa rí naʼni Gixa̱a̱.
9 Nimbáa bi̱ nigumaa náa Dios naʼni aʼkhá, numuu rí tsígáʼ* ndrígóo Dios rígá náa ikhaa ga̱jma̱a̱ ikhaa xándoo maʼni aʼkhá, numuu rí nigumaa náa Dios.
10 Rígi̱ esngájmiin bi̱ nindxu̱ún e̱ji̱i̱n Dios ga̱jma̱a̱ bi̱ nindxu̱ún e̱ji̱i̱n Gixa̱a̱: Bi̱ tséʼni rí jmbu tséʼkha̱ náa Dios ni má bi̱ tsíyoo gáʼyoo ndxájuu.
11 Rígi̱ nindxu̱u̱ ajngáa rí nidxawíínla asndu nákha ginii: Rí maʼndulu kuʼyamijná,
12 raʼkháa xóo Caín bi̱ ni̱ʼkha̱ náa Gixa̱a̱* ga̱jma̱a̱ nixíya̱a̱ gi̱ʼtio̱o̱. Náá numuu rí nixíya̱a̱ xá. Numuu rí niʼni nindxu̱u̱ ra̱májánʼ, mú rí niʼni gi̱ʼtio̱o̱ nindxu̱u̱ májánʼ.
13 A̱ngui̱nʼ, xáʼñala tsiánguá rí numbaaʼ nawiyu̱u̱ʼ kaʼyala.
14 Ikháánʼlú nduʼyáá rí asndu xóo nikháñulu má, mú nitangáanʼ nikuwa̱a̱nʼ numuu rí nandulú kuʼñúún a̱ngiu̱lú. Bi̱ tsíyoo gáʼyoo ndxájuu nindxu̱u̱ asndu xóo nikháñuu má.
15 Asndu tsáá bi̱ nawi̱yu̱u̱ʼ kaʼyoo ndxájuu, nindxu̱u̱ mbáa bi̱ nagudíin xa̱bu̱ ga̱jma̱a̱ ikháanʼla má ndu̱ya̱a̱ rí nimbáa bi̱ nagudíin xa̱bu̱, xándoo maxtáa kámuu mbiʼi.
16 Ga̱jma̱a̱ numuu rígi̱ ni̱jkhua̱nú niniʼnuuʼlú ngajua: Numuu rí ikhaa nixnájximina’ makhañúu* ga̱jma̱a̱ numulú, xúʼko̱ má mangáánʼ ndayóoʼ makañúlu* ga̱jma̱a̱ numún a̱ngiu̱lú.
17 Á mu mbáa gíʼdoo dí rígá náa numbaaʼ rígi̱ ga̱jma̱a̱ ndaʼyoo dí ndxájuu rígá rí ndayóoʼ, mú tségáwíi̱nʼ a̱jkiu̱u̱n kaʼyoo, xú káʼnii gándoo gárígá ngajua ndrígóo Dios náa ikhaa xá.
18 E̱ji̱nʼ, xáʼyóoʼ muʼtháá rí nandulú kuʼyamijná, gusngajmá ga̱jma̱a̱ dí nu̱ʼni̱ rí gajkhun nandulú kuʼyamijná.
19 Mu xúʼko̱ gúʼyáá rí naguwa̱ʼlú náa rí gajkhun ga̱jma̱a̱ mu̱ʼni̱ mbaʼyoo a̱jkiu̱lú rí Dios nandoo kaʼyulú,
20 maski ajndu a̱jkiu̱lú naʼnigínáánʼ mú Dios nindxu̱u̱ itháan mba̱a̱ ki xóo a̱jkiu̱lú ga̱jma̱a̱ naninuuʼ xúgíʼ.
21 A̱ngui̱nʼ, á mu a̱jkiu̱lú tséʼni gínáánʼ ma̱ndoo muʼtháán Dios ga̱jma̱a̱ xúgíʼ a̱jkiu̱lú,
22 xúgíʼ rí nunda̱ʼa̱a̱, ikhaa maxnúlú numuu rí nuʼnimbulú kiʼtáñajunʼ ndrígóo ga̱jma̱a̱ nu̱ʼni̱ rí ikhaa nanigu̱u̱ʼ.
23 Rígi̱ nindxu̱u̱ kiʼtáñajunʼ ndrígóo: Rí muguaʼdáálú fe náa mbiʼyuu Jesucristo, bi̱ nindxu̱u̱ A̱ʼdióo ga̱jma̱a̱ rí maʼndulú kuʼyamijná xó má ikhaa niʼtáñajunlú.
24 Ma̱ngaa, bi̱ naʼnimbo̱o̱ kiʼtáñajunʼ ndrígóo naxtáa mbóó ga̱jma̱a̱ Dios ga̱jma̱a̱ Dios naxtáa mbóó ga̱jma̱a̱ xa̱bu̱ buʼko̱. Espíritu rí ikhaa nixnúlú naʼni mbuʼyáá rí ikhaa xtáa mbóó ga̱jma̱á ni̱ndxu̱lú.
Mbaʼa nota
^ Náa ajngáa griego naʼthí, “asndu nákha nigi̱ʼdu̱u̱”.
^ Xóo muʼthá, mbá tsígáʼ rí nawiʼtóo o naxná xndúu.
^ Náa ajngáa griego naʼthí, “xa̱bu̱ Xkawi̱i̱ʼ”.
