Timbá i̱yi̱i̱ʼ rí niʼnirámáʼ Juan 4:1-21
4 A̱ngui̱nʼ, xúnimbala ajngáa dí nakujma̱á dí na̱ʼkha̱* náa Dios, gíʼmaa mbu̱ya̱a̱ á mu gajkhun na̱ʼkha̱ náa Dios, numuu rí nikujmiin mbaʼin wéñuuʼ profetas bi̱ minduwiinʼ náa numbaaʼ.
2 Xúʼko̱ kaʼnii gándoo gúya̱a̱ á mu ajngáa na̱ʼkha̱ náa Dios: Xúgíʼ ajngáa rí nasngájma dí Jesucristo ni̱ʼkha̱ xóo xa̱bu̱ numbaaʼ* na̱ʼkha̱ náa Dios.
3 Á mu ajngáa rígi̱ tséʼthi ga̱jma̱a̱ numuu Jesús, tséʼkha̱ náa Dios. Nindxu̱u̱ ajngáa ndrígóo bi̱ tsíyóo gáʼyoo Cristo,* bi̱ ikháanʼla nidxawíín rí ma̱ʼkha̱ ga̱jma̱a̱ xtáa má náa numbaaʼ.
4 E̱ji̱nʼ, ikháanʼ naguwaʼla náa Dios ga̱jma̱a̱ niʼngala ni̱ni̱ gajmiála ikhiin,* numuu rí bi̱ kuwáanʼ mbóó gajmiála nindxu̱u̱ itháan mba̱a̱ ki xóo bi̱ xtáa mbóó ga̱jma̱a̱ numbaaʼ.
5 Ikhiin naguwáʼ náa numbaaʼ, ikha jngóo nuthi ga̱jma̱a̱ numuu dí rígá náa numbaaʼ ga̱jma̱a̱ numbaaʼ naʼdxawúún.
6 Ikháánʼlú naguwa̱ʼ náa Dios. Bi̱ na̱jkha̱nú naniniiʼ Dios naʼdxawunlú, bi̱ tséʼkha̱ náa Dios tséʼdxawunlú. Xúʼko̱ nandoo nduʼyáá xú káʼnii nindxu̱u̱ ajngáa dí gajkhun ga̱jma̱a̱ ajngáa rí minduwaʼ.
7 A̱ngui̱nʼ, gaʼndulú kuʼyamijná má xúʼko̱ kaníkháanʼ, numuu rí ngajua na̱ʼkha̱ náa Dios ga̱jma̱a̱ asndu tsáá bi̱ nandoo kaʼyoo ndxájuu nigumaa náa Dios ga̱jma̱a̱ naniniiʼ Dios.
8 Bi̱ tsíyóo kaʼyoo ndxájuu na̱nguá nijkha̱nú nininiiʼ Dios, numuu rí Dios nindxu̱u̱ ngajua.
9 Xígi̱ kaʼnii nijkha̱nú nikujmaa ngajua ndrígóo Dios náa ikháánʼlú: Dios nikuʼmaa A̱ʼdióo bi̱ mbáwíí náa numbaaʼ mu xúʼko̱ ikháánʼlú ma̱ndoo makuwáánʼ ga̱jma̱a̱ numuu ikhaa.
10 Rígi̱ rí phú nindxu̱u̱ ngajua: Raʼkháa dí ikháánʼ nindulú kuʼyáá Dios nindxu̱u̱ rí ikhaa nindoo kaʼyulú ikháánʼ ga̱jma̱a̱ nikuʼmaa A̱ʼdióo xóo tsigijñaʼ mu mambajxíiʼ gajmiúlú* ga̱jma̱a̱ numuu aʼkhúlú.
11 A̱ngui̱nʼ, á mu Dios nindoo kaʼyulú xígi̱ kaʼnii, ikháánʼ mangáánʼ gíʼmáánʼ rí maʼndulú kuʼyamijná.
12 Nimbáa xa̱bu̱ táʼyoo Dios nimbá miʼtsú. Á mu nandulú kuʼyamijná má xúʼko̱ kaníkháanʼ, Dios maxtáa má xúʼko̱ náa ikháánʼ ga̱jma̱a̱ ngajua ndrígóo mani̱ndxu̱u̱ kájxi̱ náa ikháánʼlú.
13 Ga̱jma̱a̱ numuu rígi̱ nduʼyáá rí kuwáánʼ mbóó gajmiúlú ikhaa ga̱jma̱a̱ ikhaa xtáa mbóó ga̱jma̱á nindxu̱lú: Numuu rí ikhaa nixnúlú espíritu ndrígóo.
14 Ikháánʼ mangáánʼ nduʼyáá rí Anu̱lú nikuʼmaa A̱ʼdióo mu maʼnikríya̱a̱ʼ numbaaʼ ga̱jma̱a̱ nuʼthá numuu rúʼko̱.
15 Á mu mbáa najkha̱nú ndaʼyoo rí Jesús nindxu̱u̱ A̱ʼdióo Dios, Dios naxtáa mbóó ga̱jma̱a̱ xa̱bu̱ buʼko̱ ma̱ngaa xa̱bu̱ buʼko̱ naxtáa mbóó ga̱jma̱a̱ Dios.
16 Ikháánʼ nijkuánúlú niniʼnuuʼ ngajua dí gíʼdáánʼlú Dios ga̱jma̱a̱ nduʼyáá dí gajkhun nandoo kaʼyulú.
Dios nindxu̱u̱ ngajua ga̱jma̱a̱ xa̱bu̱ bi̱ gíʼdoo ngajua naxtáa mbóó ga̱jma̱a̱ Dios ma̱ngaa Dios naxtáa mbóó ga̱jma̱a̱ xa̱bu̱ buʼko̱.
17 Xó má ngajua nijkha̱nú ninindxu̱u̱ kájxi̱ náa ikháánʼlú mu mbiʼi rí mixtandaʼáánlú cuenta ma̱ndoo muʼthá ga̱jma̱a̱ xúgíʼ a̱jkiu̱lú, numuu rí xó má nindxu̱u̱ Cristo, xúʼko̱ má nindxu̱lú mangáánʼ náa numbaaʼ rígi̱.
18 Nda̱a̱ gamíi náa rígá ngajua, numuu rí ngajua dí na̱jkha̱nú nanindxu̱u̱ kájxi̱ naríya̱a̱ʼ gamíi, numuu rí gamíi tséniñulú mu̱ʼni̱ xúgíʼ dí nandulú. Bi̱ gíʼdoo gamíi, ngajua dí rígá náa ikhaa na̱nguá ni̱jkha̱nú ninindxu̱u̱ kájxi̱.
19 Ikháán’ nandulú kuʼyáá numuu dí ikhaa ginii nindoo kaʼyulú.
20 Á mu mbáa naʼthí “ikhúúnʼ nandoʼ ka̱yo̱o̱ Dios” mú nawi̱yu̱u̱ʼ kaʼyoo ndxájuu, naʼninduwaʼ. Numuu rí bi̱ tsíyoo kaʼyoo ndxájuu bi̱ ndaʼyoo ga̱jma̱a̱ iduu, nda̱a̱ xóo maʼndoo kaʼyoo Dios bi̱ na̱nguá eʼngo̱o̱ gáʼyoo.
21 Nindrígúlú náa ikhaa kiʼtáñajunʼ rígi̱: Bi̱ nandoo kaʼyoo Dios ma̱ngaa gaʼndoo kaʼyoo ndxájuu.
Mbaʼa nota
^ Náa ajngáa griego naʼthí, “náa xuwiʼ”.
^ O “anticristo”.
^ Xóo muʼthá, profetas bi̱ minduwiinʼ.
