Timbá i̱yi̱i̱ʼ rí niʼnirámáʼ Pedro 1:1-25
1 I̱yi̱i̱ʼ rígi̱ niʼnirámáʼ Pedro apóstol ndrígóo Jesucristo, mu maʼga inún bi̱ kaxtaʼwíin bi̱ nigún gákuwá mbá xngaa asndu náá, xóo náa Ponto, Galacia, Capadocia, Asia ga̱jma̱a̱ Bitinia,
2 xó má ndiʼyoo Anu̱lú Dios asndu nákha ginii rí maguma kaʼwáanʼ ga̱jma̱a̱ espíritu, mu xúʼko̱ maguánú munimbala ma̱ngaa rí mawaxtíjñáanʼla ga̱jma̱a̱ eʼdiuu Jesucristo:
Gundrígú má xúʼko̱ rí májánʼ wéñuuʼ a̱jkiu̱u̱n ga̱jma̱a̱ dí tsímáá ndrígóo Dios.
3 Gaguma mba̱a̱ Dios ga̱jma̱a̱ Anu̱u̱ Tátá ndrígúlú Jesucristo, numuu rí nagáwi̱i̱nʼ a̱jkiu̱u̱n niʼni rí magumáanʼ mbu̱júu̱ʼ mu xúʼko̱ muguaʼthi̱i̱n mbá rí mbajyúuʼ asndu kámuu, kuaʼdáá rígi̱ numuu rí Jesucristo nigabi̱i̱* náa majñúnʼ bi̱ nikháñún,
4 dí mundrígúla tséʼga, na̱nguá mitsaga ni má tséjndooʼ. Rígi̱ nigixi̱i̱ mekhuíí mu makhánala ikháanʼ,
5 bi̱ guáʼdáá fe náa Dios ga̱jma̱a̱ ikhaa nañewanla ga̱jma̱a̱ tsiakii ndrígóo mu xúʼko̱ muxkamaa rí makáwáanʼla dí rígá má xawii makujmaa náa iwáá mbiʼi.
6 Ikhaa rúʼko̱ numuu dí ikháanʼla kúwáanʼ gagi wéñuuʼ, maski má ndayóoʼ imbá guáthá mbiʼi rí makuwáanʼla ngíná numuu mixtiʼkhu xkujndu,
7 mu xúʼko̱ fe ndrígála dí niraʼnuu xkujndu magiʼdoo itháan numuu ki xóo oro, dí naguámbáa índo̱ nanújngoo náa aguʼ mu maguma kaʼwi̱i̱, ga̱jma̱a̱ xúʼko̱ marigá mbá numuu rí fe ndrígála magruigú gamajkhu, maguma mba̱a̱ asndu mbiʼi rí makujmaa Jesucristo.
8 Maski má ikháanʼ nimbá miʼtsú túya̱a̱ mú nandala kuya̱a̱. Maski má xúgi̱ tséya̱a̱la mú kuaʼdáála fe náa ikhaa ga̱jma̱a̱ kuwáanʼla gagi wéñuuʼ, kuaʼdáála mbá gagi rí nditháan xámbáa rí nindxu̱u̱ mitsaanʼ wéñuuʼ
9 ga̱jma̱a̱ numuu fe ndrígála makáwáanʼla.
10 Profetas* bi̱ nitariyaʼ ga̱jma̱a̱ numuu rí nixtagixi̱i̱ mu makhánala ikháanʼ numuu rí májánʼ wéñuuʼ a̱jkiu̱u̱n Dios ndiya̱ʼ ga̱jma̱a̱ ninigajma̱a̱ tsumáá wéñuuʼ ga̱jma̱a̱ numuu rí makáwáanʼla.
11 Dios nijmuu guápha̱á espíritu santo* ndrígóo mu maʼthí dí Cristo mamínuuʼ ga̱jma̱a̱ nda̱wa̱á maguma mba̱a̱. Ikhaa rúʼko̱ numuu dí profetas ndiya̱ʼ mbuyáá ndiéjunʼ gágíʼnuu Cristo ga̱jma̱a̱ náá mbiʼi̱i̱.
12 Ikhiin niguasngájmún dí ñajunʼ dí kúwá runi̱ na̱nguá nindxu̱u̱ mu mambáñún ikhiin, nindxu̱u̱ mu mambáyala ikháanʼ. Profetas ninirámáʼ dí ikháanʼ nijuiʼtála, nidxawíínla náa majñúnʼ bi̱ nutaraʼa ajngáa rí májánʼ ga̱jma̱a̱ tsiakii ndrígóo espíritu santo dí nigajtaa mekhuíí. Rígi̱ ma̱ngaa dí ángeles nandún wéñuuʼ rí mbuyáá.
13 Mú gakuwáanʼla xawii muñejunʼ ga̱jma̱a̱ gundxaʼwa̱a̱ májánʼ edxa̱la dí mu̱ni̱, guraʼti̱i̱n má xúʼko̱ rí májánʼ mundrígú índo̱ gákujmaa Jesucristo.
14 Ganindxa̱la xóo e̱ji̱n bi̱ nunimbu̱ún, guniʼñááʼ ru̱ni̱ dí nu̱nila nákhá xóó tséniʼniiʼ ikhaa,
15 gíʼmaa mani̱ndxa̱la xó má bi̱ nindxa̱ʼwála numuu rí ikhaa nindxu̱u̱ kaʼwii, ikha jngóo ganindxu̱u̱ kaʼwu náa xúgíʼ dí gúnila,
16 numuu rí xó má naʼthí náa kiʼnirámáʼ: “Gíʼmaa ma̱nindxa̱a̱ʼ mikaʼwíín numuu rí ikhúún ni̱ndxu̱ʼ mikaʼwún”.
17 Á mu nuxuʼmámíjná náa Anulú bi̱ mbáníí e̱nda̱ʼa̱a̱ cuenta náa mámbáa rí naʼni, náa xúgíʼ dí nu̱nila gu̱nila ga̱jma̱a̱ gamíi náa nguáthá mbiʼi rí xóó kuwáanʼ náa numbaaʼ rígi̱.
18 Ikháanʼ má ndu̱ya̱a̱la rí tájmaa plata ni má oro dí naguámbáa mu maguma káwáanʼla ga̱jma̱a̱ náa rí xóo kuwáanʼla nákha ginii dí ragíʼdoo numuu, dí xóo niniña̱a̱ʼ wajinʼ xiʼñála makuwáanʼ.
19 Nijmaa eʼdiuu Cristo, mbá eʼdi rí gíʼdoo wéñuuʼ numuu, xóo eʼdiuu mbáa mugu̱ bi̱ nda̱a̱ rí gíʼdoo, bi̱ mikaʼwii.
20 Gajkhun má rí ikhaa niwaxtaʼwíi* nákha xóó tsígiʼi numbaaʼ, mú ga̱jma̱a̱ numala ikháanʼ nikujmaa náa iwáá mbiʼi.
21 Ga̱jma̱a̱ numuu ikhaa, ikháanʼ nakumala kuya̱a̱ Dios, bi̱ nikuxi̱i̱* náa majñúnʼ bi̱ nikháñún ga̱jma̱a̱ niʼni rí maguma mba̱a̱ mu xúʼko̱ ikháanʼla ma̱ndoo maguaʼdáá fe náa ikhaa ma̱ngaa dí marigá rí muguaʼthi̱i̱nla náa Dios.
22 Xúgi̱ rí niguma káʼwáanʼla numuu dí nunimbala kuya̱a̱ rí gajkhun ga̱jma̱a̱ rígi̱ niʼni dí maguaʼdámíjna ngajua xóo kaníkháanʼ dí ragíʼdoo a̱jma̱ inuu, gaʼnda̱la kuyamíjna̱ ga̱jma̱a̱ xúgíʼ a̱jkia̱la.
23 Numuu rí tágumáanʼ ga̱jma̱a̱ mbá tsígáʼ* dí naʼga, nigumáanʼ ga̱jma̱a̱ tsígáʼ dí tséʼga, rí nindxu̱u̱ ajngá rawuunʼ Dios dí ndaʼya, rí tséguámbáa.
24 Numuu rí “xúgíinʼ xa̱bu̱ numbaaʼ ni̱ndxu̱ún* xóo iná ga̱jma̱a̱ xúgíʼ dí guáʼdáá nindxu̱u̱ xóo ri̱ʼi̱ dí rígá xanáá; iná nujndooʼ ga̱jma̱a̱ riʼyu̱u̱ nagajtaa,
25 mú ajngóo Jeobá* ndajyúuʼ asndu kámuu mbiʼi”. Ajngáa rígi̱ nindxu̱u̱ “ajngáa” májánʼ dí nijuiʼtála.
Mbaʼa nota
^ O “nitujxi̱i̱”, “ndiʼya̱a̱”.
^ O “gaʼyee”, “bi̱ nuthi dí marigá”.
^ O “ndiʼyoo asndu nákha ginii”.
^ O “niʼnigabi̱i̱”, “niʼni mbaʼya̱a̱”.
^ Xóo muʼthá, mbá tsígáʼ rí nawiʼtóo o naxná xndúu.
^ Náa ajngáa griego naʼthí, “xúgíʼ xuwiʼ nindxu̱u̱”.
