Timbá i̱yi̱i̱ʼ rí niʼnirámáʼ Pedro 2:1-25
2 Guniʼñááʼ xúgíʼ enii dí ra̱májánʼ, nduwaʼ, dí maʼni a̱jma̱ inala, tsixígú, dí mutanúmamíjnála.
2 Gu̱ni̱ xóo eni̱ e̱ji̱n bi̱ ndiʼkhún egumiin, gunimíjna rí magua̱ʼa̱ wéñuuʼ muwan yáʼdú rí kaʼwu dí nindxu̱u̱ ajngá rawuunʼ Dios, mu rígi̱ maʼni dí mbajáanʼ ga̱jma̱a̱ maʼga kaguánʼ mu makáwáanʼla,
3 ma̱ndoo mu̱nila rígi̱ á mu ndu̱ya̱a̱la rí Tátá májáanʼ a̱jkiu̱u̱n.
4 Á mu nuxuʼmámíjná náa ikhaa, mbá itsí rí ndaʼya rí xa̱bu̱ táʼndún gúyáá, mú Dios niraʼwíi ga̱jma̱a̱ gíʼdoo numuu náa ikhaa,
5 ikháanʼ má nindxa̱la xóo itsí rí ndaʼya, náa niguma guʼwá ga̱jma̱a̱ espíritu ndrígóo Dios mu muxnaxí tsigijñaʼ xó má ikha dí naxná espíritu ndrígóo Dios rí ikhaa nagruigú ga̱jma̱a̱ numuu Jesucristo.
6 Náa mbá Kiʼniraʼmáʼ naʼthí: “¡Gu̱ya̱a̱la! Náa Sion nagrígu mbá itsí rí kaxtaʼwíí mbá itsí rí itháan gíʼdoo numuu dí nagi̱ʼi̱ ga̱jma̱a̱ guʼwá, bi̱ gágiʼdoo fe náa ikhaa nditháan xátanga̱a̱ a̱jkiu̱u̱n”.*
7 Ikháanʼ ndu̱ya̱a̱ rí ikhaa gíʼdoo numuu, numuu rí nunimbala kuya̱a̱. Mú “itsí rí taʼndún gájmúún bi̱ nuni̱ guʼwá, ikhaa rúʼko̱ ni̱jkha̱nú ninindxu̱u̱ itsí rí itháan gíʼdoo numuu”,
8 “mbá itsí rí naʼni majngrádáánʼ ga̱jma̱a̱ mbá itsí rí naʼni ngawúúnʼ xa̱bu̱”. Ikhiin najngradiinʼ numuu rí tsénimbu̱ún ajngá rawuunʼ Dios. Ikhaa rúʼko̱ numuu dí nijuaxtaʼwíin.
9 Mú ikháanʼ nindxa̱la “mbá raza bi̱ kaxtaʼwii, mbá nguéjmíin reyes bi̱ ni̱ndxu̱ún ndxajkun, mbá xuajen kaʼwu, mbá xuajen kiejunʼ dí Dios ndiyáʼ, mu mutariya̱ʼ náa xúgíʼ xuajen rí májánʼ wéñuuʼ a̱jkiu̱u̱n Dios”* bi̱ nindxa̱ʼwála náa mikrína mu mbuya̱a̱ aguʼ mitsaanʼ ndrígóo.
10 Nákha ginii na̱nguá nindxa̱la mbá xuajen, mú rí xúgi̱ nindxa̱la xuajñuu Dios; nákha ginii na̱nguá nigáwíinʼ a̱jkiu̱u̱n Dios kaʼya̱la, mú rí xúgi̱ ikhaa nigáwíinʼ a̱jkiu̱u̱n kaʼya̱la.
11 A̱ngui̱nʼ, natakháñala xóo xa̱bu̱ bi̱ naguwa̱áʼ ga̱jma̱a̱ bi̱ nakúwá nguáthá mbiʼíí, gunigaʼduunʼ má xúʼko̱ rí nagua̱ʼa̱ maʼni xuyala, dí nu̱ni̱ gajmiála má xúʼko̱.
12 Gu̱ni̱ má xúʼko̱ rí májánʼ náa inún xúgíinʼ xa̱bu̱ mu índo̱ gúthi dí ni̱nila mbá dí ra̱májánʼ ikhiin má gúyáá dí májánʼ e̱nila, nda̱wa̱á ikhiin muni̱ mba̱a̱ Dios náa mbiʼi rí ikhaa gáʼyoo xóo ni̱ndxu̱lú.
13 Xó má nandoo Tátá gunimba̱la kuñu̱u̱n xúgíinʼ xa̱bu̱ ñajunʼ, tséʼniuu á mu nindxu̱u̱ rey bi̱ gíʼdoo itháan numuu,
14 o xa̱bu̱ ñajunʼ, xó má bi̱ nuxuʼmiin mu muxprigún bi̱ nuni̱ dí ra̱májánʼ ga̱jma̱a̱ mbuyamajkún bi̱ nuni̱ rí májánʼ.
15 Dí nandoo Dios nindxu̱u̱ rí índo̱ ikháanʼ kuwáanʼ ru̱ni̱ dí májánʼ, mu̱ni̱ rí maʼni wíí rawúúnʼ* bi̱ tséndxa̱ʼwa̱a̱ edxu̱ún rí nuthi.
16 Gakuwáanʼ xóo xa̱bu̱ bi̱ na̱nguá ni̱ndxu̱ún ñumbáá, mú xájmala rúʼko̱ mu mu̱ni̱ dí ra̱májánʼ, gajmala mu manindxa̱la ñumbáá ndrígóo Dios.
17 Guyamajkúún xúgíinʼ enii xa̱bu̱, gaʼndala kuñu̱u̱n xúgíinʼ a̱ngiu̱lú, gamiñála kuya̱a̱ Dios, guxna̱a̱ gamajkhu rey.
18 Xúgíinʼ bi̱ nuñambáá gíʼmaa mbuyamajkún bi̱ nutañajúúnʼ ga̱jma̱a̱ xúgíʼ gamajkhu rí ikhiin kaʼñún mundrígú, raʼkháa i̱ndó bi̱ míjíinʼ ga̱jma̱a̱ bi̱ guabaaʼ a̱jkiu̱ún, ma̱ngaa bi̱ naʼni mingíjyúuʼ matanimbaníí rí nandún.
19 Dios ndaʼyoo rí gíʼdoo numuu xa̱bu̱ bi̱ naʼni tsiakimínáʼ mu magiʼdoo mbá ku̱ma̱ kaʼwu náa ikhaa, ma̱ngaa dí naʼngo̱o̱ naraʼnuu ga̱ʼkhu̱ ga̱jma̱a̱ namínuuʼ maski ajndu ragíʼdoo aʼkhúun.
20 Á mu nuxnala ga̱jma̱a̱ numuu rí nu̱ni̱ aʼkhá, lá gíʼdoo numuu rí maʼngala ga̱jma̱a̱ numuu rígi̱ ráʼ. Mú Dios nanigu̱u̱ʼ wéñuuʼ índo̱ ikháanʼla naʼngala numíniiʼ numuu rí nu̱ni̱ dí májánʼ.
21 Ga̱jma̱a̱ numuu rígi̱ dí nijuatsaʼwála, numuu rí mínaaʼ má Cristo nimínuuʼ ga̱jma̱a̱ numala, xúʼko̱ nigíʼ mbá xkri̱da mu ikháanʼ mbuyaridáá xóo niʼni.*
22 Ikhaa na̱nguá nikudaminaʼ nimbá aʼkhá ni má na̱nguá niʼni nduwaʼ.
23 Índo̱ nitha wéñiiʼ, ikhaa na̱nguá nitanga̱a̱ mu maʼtá wéñúúnʼ. Índo̱ xtáa ramínuuʼ na̱nguá niʼthún rí maʼniún dí raʼkhí. Rí niʼni, niniñuuʼ náa ñawúunʼ bi̱ na̱nda̱ʼa̱a̱ cuenta xó má kaʼyoo.
24 Ikhaa má nigu̱ aʼkhá ndrígúlú ga̱jma̱a̱ xuyuuʼ índo̱ nifrajkaa náa ixi̱, mu xúʼko̱ makáwáánʼ náa aʼkhá ga̱jma̱a̱ makuwáánʼ ru̱ʼni̱ dí jmbu. Ga̱jma̱a̱ “rí ikhaa nigawúunʼ niʼni rí ikháanʼ maguma tanala”.
25 Numuu rí ikháanʼ nini̱ndxa̱la xóo mugu̱ bi̱ nindáti̱gi̱i̱n, mú rí xúgi̱ nitángáanʼla náa báxtúu ga̱jma̱a̱ náa bi̱ nañewanla.
Mbaʼa nota
^ Náa ajngáa griego naʼthí, “xátiyu̱u̱ʼ”.
^ Náa ajngáa griego naʼthí, “rí májánʼ”. Xóo muʼthá, cualidades ndrígóo ga̱jma̱a̱ rí xóo naʼni dí kaʼyoo magruigú gamajkhu.
^ Náa ajngáa griego naʼthí, “mupujtu rawúúnʼ”, “mugidaʼ amaʼ rawúúnʼ”.
^ Náa ajngáa griego naʼthí, “mujngríga náa ikhaa ni̱jkha̱”.
