Timbá i̱yi̱i̱ʼ rí niʼnirámáʼ Pedro 4:1-19
4 Numuu rí nákha Cristo ninindxu̱u̱ xa̱bu̱ nimínuuʼ, xúʼko̱ má mangáanʼla gu̱ni̱ratáá ku̱ma̱ ndrígála mu mundxaʼwamíjná xó má ikhaa, numuu rí xa̱bu̱ bi̱ namínuuʼ naniñuuʼ raʼni aʼkhá
2 mbiʼi rí xóó kuwáanʼla náa tsu̱du̱u̱ ku̱ba̱ʼ,* xúni̱ rí nandún xa̱bu̱, gu̱nila rí nandoo Dios.
3 Numuu rí nijmala mba̱yu̱u̱ʼ mbiʼi mu mu̱ni̱ rí nanigu̱u̱nʼ xa̱bu̱ numbaaʼ, xóo rí mu̱ni̱ xúgíʼ enii dí xkawiʼ* rí magua̱ʼa̱ itháan mu̱bála gajmiála eʼwíinʼ, rí muwa̱nla wéñuuʼ iya najnga̱a̱, rí muʼgua náa ndxa̱a̱ náa rí tsíñewa̱a̱n dí eni̱, náa ndxa̱a̱ rí najngi̱i̱n ga̱jma̱a̱ náa nduyamajkhún xándú, mbá dí ra̱májánʼ kayuuʼ.
4 Ikhiin tsékru̱ʼu̱u̱n náá numuu rí ikháanʼ tséjkua kidxúúnʼ mu mu̱ni̱ gagimijnála ga̱jma̱a̱ dí ra̱májánʼ xó má eni̱ ikhiin, ikha jngóo nuthi dí raʼkhí ga̱jma̱a̱ numala.
5 Mú xa̱bu̱ bugi̱ muxnaxi̱i̱ cuenta náa bi̱ xtáa xawii mandi̱ʼi̱i̱n cuenta bi̱ nduya ga̱jma̱a̱ bi̱ nikháñún.
6 Ikha jngóo mangiin bi̱ nikháñún nijuiʼthúún ajngáa rí májánʼ, mu xúʼko̱ maski ajndu mixtandi̱ʼi̱i̱n cuenta xó má xa̱bu̱ numbaaʼ ikhiin ma̱ndoo makuwá ga̱jma̱a̱ ikha rí naxná espíritu ndrígóo Dios.
7 Mbiʼi rí mambáa xúgíʼ dí rígá nijngiyuu má. Ikha jngóo gundxa̱ʼwa̱míjna̱ májánʼ ga̱jma̱a̱ gakuwáanʼla xawii mutajkáan* má xúʼko̱.
8 Mú gaʼndala kuyamíjna̱ wéñuuʼ numuu rí ngajua narugurámuuʼ mbaʼa aʼkhá.
9 Gundríguíin ga̱jma̱a̱ májánʼ eʼwíinʼ, xúxiéʼkhála.
10 Xó má regalo rí nikánala mámbáa rí ikháanʼ, gajmala mumbáñún eʼwíinʼ xóo bi̱ nuñajunʼ májánʼ bi̱ nindrigú rí májánʼ wéñuuʼ a̱jkiu̱u̱n* Dios maski ajndu rakáʼñún rí naxná mixtiʼkhu enii rí májánʼ.
11 Á mu mbáa naʼthí, gaʼni xóo mbáa bi̱ naʼtáriyaʼ ajngóo Dios ga̱jma̱a̱ á mu mbáa nambáñún eʼwíinʼ, gaʼni xó má eʼni mbáa bi̱ nagruigú tsiakii ndrígóo Dios, mu xúʼko̱ Dios maguma mba̱a̱ náa xúgíʼ ga̱jma̱a̱ numuu Jesucristo. Náa ikhaa gáʼga gamajkhu ga̱jma̱a̱ tsiakii asndu kámuu mbiʼi. Xúʼko̱ gáʼni.*
12 A̱ngui̱nʼ, xáʼniala tsiánguá ga̱jma̱a̱ xkujndu rí kúwáanʼ ranújngala rí nindxu̱u̱ xóo aguʼ, rí asndu xóo kuwáanʼ rugiʼníí mbá rí tséniʼnúuʼ.
13 Rí gíʼmaa mu̱ni̱, gaʼdxala dí mumíniiʼ xó má nimínuuʼ Cristo, mu xúʼko̱ makuwáanʼla gagi ga̱jma̱a̱ maʼdxala índo̱ ikhaa gákujmaa nguáthá mba̱a̱ nindxu̱u̱.
14 Á mu nutawéñala ga̱jma̱a̱ numuu mbiʼyuu Cristo gakuwáanʼla gagi, numuu rí espíritu rí naxná dí mitsaanʼ, xúʼko̱, espíritu ndrígóo Dios rígá náa ikháanʼla.
15 Nimbáa dí ikháanʼ xámínúuʼ ga̱jma̱a̱ numuu rí nagudíin xa̱bu̱, rí naʼni kúwáʼ, rí nindxu̱u̱ mbáa xa̱bu̱ ra̱májáanʼ o nakudaminaʼ náa xkujndu dí rakáʼyoo.
16 Á mu mbáa namínúuʼ ga̱jma̱a̱ numuu rí nindxu̱u̱ cristiano ragíʼmaa mati̱yu̱u̱ʼ, rí gíʼmaa maʼni, gaʼni mba̱a̱ má xúʼko̱ Dios ga̱jma̱a̱ numuu mbiʼyuu rí nikhánáá.
17 Numuu rí ni̱ʼkha̱nú má mbiʼi rí mixtandi̱ʼi̱i̱n cuenta bi̱ kúwá náa goʼwóo Dios. Á mu nagi̱ʼdu̱u̱ ginii náa ikháanʼlú, ndiéjunʼ gúgíʼníí bi̱ tsénimbu̱u̱n ajngáa rí májánʼ ndrígóo Dios rá.
18 Á mu xa̱bu̱ jmbii nakríyaaʼ ga̱jma̱a̱ xtájkáan, ndiéjunʼ lá gágíʼnuu xa̱bu̱ bi̱ nda̱a̱ gamajkuu ga̱jma̱a̱ xa̱bu̱ aʼkhá rá.
19 Ikha jngóo bi̱ kúwá rumíniiʼ ga̱jma̱a̱ numuu rí nuni̱ dí nandoo Dios, gumbáyúmíjná náa ñawúunʼ bi̱ niʼniwíi dí rígá, bi̱ nindxu̱u̱ jmbii, índo̱ kúwáan’ ru̱ni̱ rí májánʼ.
Mbaʼa nota
^ Náa ajngáa griego naʼthí, “mbiʼi rí xóó kuwáanʼla náa xuwiʼ”.
^ O “mu̱ni̱ tsajkuunʼ”.
^ O “Amén”.
