Timbá i̱yi̱i̱ʼ rí niʼnirámáʼ Pedro 5:1-14
5 Ikhúún’ ma̱ngaa ni̱ndxu̱ʼ mbáa bi̱ kayá edxu̱u̱, mbáa bi̱ ndiʼyoo xóo nimínuuʼ Cristo ga̱jma̱a̱ ni̱ndxu̱ʼ mbáa bi̱ maguma mba̱a̱ gajmíi̱n bi̱ kaxtaʼwíin, nandu̱ʼu̱u̱n rígi̱ bi̱ kuya̱ edxu̱u̱, bi̱ kúwá náa ikháanʼla:
2 Guñewu̱u̱n mugiu̱u̱ Dios bi̱ kúwá náa ñawánla, gujngawiinla májánʼ, xúni̱ rí xóo katsudáanʼla, gu̱ni̱ numuu rí nandala mu̱ni̱ ñajuunʼ Dios, ni má xúni̱ numuu rí nandala mudaaʼ, gu̱ni̱ ga̱jma̱a̱ xúgíʼ a̱jkia̱la,
3 xúnila̱ rí xóo ikháanʼ kaʼyala dí kaʼyoo Dios, gunimíjna̱ rí muxnu̱u̱n mbá májánʼ xkri̱da mugiu̱u̱ Dios.
4 Índo̱ gákujmaa báxtúu bi̱ phú kayá edxu̱u̱, ikháanʼla mundrígúu mbá* rí mitsaanʼ wéñuuʼ rí nditháan xújndooʼ.
5 Xúʼko̱ má mangáanʼ jiámá, gunimbala ku̱ñu̱u̱n bi̱ itháan wanii.* Ganindxa̱la* xa̱bu̱ guabáanʼ índo̱ gúniúun rí májánʼ eʼwíinʼ, numuu rí Dios tsíyoo gáʼyoo rí nuni̱ mbaʼumíjna̱ xa̱bu̱, mú nasngájma rí májánʼ wéñuuʼ a̱jkiu̱u̱n náa bi̱ ni̱ndxu̱ún xa̱bu̱ guabiinʼ.
6 Gu̱ni̱ guabamijnála̱ náa ñawúunʼ Dios rí gíʼdoo tsiakii, mu xúʼko̱ ikhaa maʼnimbaʼwáanʼla índo̱ gáʼga̱nú mbiʼi,
7 ga̱jma̱a̱ guniʼñáánʼ náa ikhaa xúgíʼ rí naʼni maxmiéjuanla, numuu rí ikhaa naxmiéjuunʼ kaʼyala.
8 ¡Gundxa̱ʼwa̱míjna má xúʼko̱ rí májánʼ ga̱jma̱a̱ gakuwáanʼla xawii! Numuu rí Gixa̱a̱, bi̱ nindxu̱u̱ xa̱bu̱ sia̱nʼ ndrígála jngruigo̱o̱ náa níjniála randxaʼwá xóo mbáa león bi̱ ndayáaʼ mbáa tsáa mikhu̱u̱.
9 Guguajújti̱i̱nla, gu̱ni̱ gújkhúʼ má xúʼko̱ fe ndrígála, numuu rí ndu̱ya̱a̱ má, dí xúgíinʼ a̱ngiu̱lú kúwá rumíniinʼ ikha̱á xó má ikháanʼlu.
10 Nda̱wa̱á rí niʼngala nimíníinʼ mbá nguáthá mbiʼi, Dios bi̱ májánʼ wéñuuʼ a̱jkiu̱u̱n, bi̱ nindxaʼwála mundrígú gamajkhu asndu kámuu gajmiála Cristo, ikhaa mínaaʼ má gámbóo raʼni ratáanʼla. Ikhaa má gáʼni rí maguajúnla jmbu ga̱jma̱a̱ rí maʼni migújkiáanʼla ma̱ngaa rí maguajúnla gújkhúʼ.
11 Garigá má xúʼko̱ tsiakii náa ikhaa asndu kámuu. Xúʼko̱ gáʼni.*
12 Najmiuʼ Silvano* mbáa ndxájulú bi̱ nda̱yo̱o̱ rí nindxu̱u̱ jmbii náa Dios, mu mambáyuʼ maʼnirámáʼ mbá guáthá ajngáa rí maxnála tsiakii ga̱jma̱a̱ ma̱tala rí gajkhun mundrígúla rí májánʼ wéñuuʼ a̱jkiu̱u̱n Dios. Gakuwáanʼ má xúʼko̱ náa ikhaa.
13 Narajxáanʼla a̱ʼgu̱ bi̱ xtáa náa Babilonia, bi̱ Dios niraʼwíi xó má ikháanʼla, ma̱ngaa Marcos bi̱ nindxu̱u̱ a̱ʼdióʼ.
14 Guraximijnáaʼla ga̱jma̱a̱ beso rí nasngájma dí nandala kuyamíjna̱.
Garigá dí tsímáá náa xúgiáanʼla ikháanʼ bi̱ kuwáanʼ mbóó jnduʼ gajmiála Cristo.
Mbaʼa nota
^ Náa ajngáa griego naʼthí, “corona”.
^ O “bi̱ kuya̱ edxu̱u̱”.
^ Náa ajngáa griego naʼthí, “gaguʼwánla xóo mbá xtíin”.
^ O “Amén”.
^ Ma̱ngaa nutháán Silas.
