Timbá libro ndrígu̱ún Reyes 12:1-33
12 Rehoboam ni̱jkha̱ náa Siquem, numuu dí xúgíinʼ xa̱bu̱ Israel niguwáʼ náa Siquem mu mugíiʼ rey.
2 Índo̱ Jeroboán a̱ʼdióo Nebat niʼdxawun rígi̱ (ikhaa kaʼníí xtáa náa Egipto, numuu dí nigáyúu niʼni rey Salomón, ikhaa xtáa náa Egipto).
3 Núkhú má ikhú, nixuʼmiin magún gúyáaʼ Jeroboán. Nda̱wa̱á ikhaa gajmíi̱n mbá xúgíinʼ xa̱bu̱ Israel nigún gúyáá Rehoboam ga̱jma̱a̱ nitháán:
4 “Ana̱a̱ʼ* niʼni rí yókiuxu maʼni gújkhúʼ, mú, á mu ikháán natani̱ rí maʼni wabaʼ ñajunʼ ga̱jma̱a̱ dí maʼni wipi yoko rí nixnúxu̱ mudá ana̱a̱ʼ, ikháanʼxu̱ mu̱ni̱ ñajuaanʼ”.
5 Ikhaa niriʼñúún: “Ga̱ʼgua̱a̱ʼla ga̱jma̱a̱ gutangáanʼla gúyoʼ índo̱ gáʼni ajtsú mbiʼi”. Ikhú xa̱bu̱ nigúun.
6 Rey Rehoboam nirajxu̱u̱n bi̱ kuya̱ edxu̱u̱* bi̱ nini̱ ñajuunʼ Salomón bi̱ nindxu̱u̱ anu̱u̱ nákhá kaʼníí xtáa ndaʼya, nirajxu̱u̱n: “Ndiéjunʼ etu̱nʼla rí mathu̱u̱n xa̱bu̱ xuajin bugi̱ rá.”
7 Ikhiin niriʼñáán: “Á mu dí xúgi̱ natani̱ ñajúúnʼ xa̱bu̱ xuajin bugi̱, natadxawún ga̱jma̱a̱ natriʼñún ga̱jma̱a̱ májánʼ, ikhiin mani̱ndxu̱ún má xúʼko̱ xa̱bia̱a̱ʼ”.
8 Mú ikhaa táʼdxawun consejo rí nixnáá bi̱ kuya̱ edxu̱u̱, ga̱jma̱a̱ nirajxu̱u̱n bi̱ itháan jiámá bi̱ ndija̱a̱ gajmíi̱n, ga̱jma̱a̱ dí xúgi̱ ikhiin numbayíí.
9 Nirajxu̱u̱n: “Ndiéjunʼ gutu̱nʼla ikháan’. Xa̱bu̱ bugi̱ nithunʼ: ‹Atani̱ rí maʼni wipi wáa yoko rí nixnúxu̱ mudá ana̱a̱ʼ›. Ndiéjunʼ gúriʼñún xá.”
10 Jiámá bi̱ mbóó ndija̱a̱ gajmíi̱n nitháán: “Xa̱bu̱ buʼko̱ bi̱ nithaanʼ: ‹Ana̱a̱ʼ niʼni ki̱wu̱n yókiuxu, atani̱ wipi wáa ikháán›, gíʼmaa dí marathu̱u̱n: ‹A̱ʼdióo ñawúnʼ dí chíʼgíiʼ* maʼni itháan mi̱du̱ ki xóo tsaguuʼ* anu̱ʼ.
11 Anu̱ʼ nixnála mu̱da yoko dí ki̱wu̱n, mú ikhúún ma̱xnala mu̱da rí itháan ki̱wu̱n. Anu̱ʼ wáá má nixpájtiáanʼla, mú ikhúún maxpajtiáanʼla itháan gakhi̱i̱›”.*
12 Jeroboán gajmíi̱n xúgíinʼ eʼwíinʼ nitangiín gúyáá Rehoboam índo̱ niʼni ajtsú mbiʼi, xó má índo̱ rey niʼthún “Gutangáanʼla gúyoʼ índo̱ gáʼni ajtsú mbiʼi”.
13 Mú rey niriʼñúún ga̱jma̱a̱ mijkoo xa̱bu̱, ninújngurámuuʼ consejo rí nixnáá bi̱ kuya̱ edxu̱u̱.
14 Niʼnimbo̱o̱ consejo rí nixnáá jiámá, niʼthún: “Anu̱ʼ nixnála mu̱da yoko dí ki̱wu̱n, mú ikhúún ma̱xnala mu̱da rí itháan ki̱wu̱n. Anu̱ʼ wáá má nixpájtiáanʼla, mú ikhúún maxpajtiáanʼla itháan gakhi̱i̱”.
15 Ikha jngóo rey na̱nguá niʼdxawuun rí nithi xa̱bu̱ xuajin, numuu dí Jeobá niʼni rí xúʼko̱ má gárígá. Mu xúʼko̱ mambanúu ajngóo Jeobá dí Ahíya xa̱bu̱ silonita niʼthúu̱n Jeroboán a̱ʼdióo Nebat.
16 Índo̱ xúgíinʼ xa̱bu̱ Israel ndiyáá dí rey na̱nguá nindoo gáʼdxawún, xa̱bu̱ xuajin nitháán rey: “Ikháanʼxu̱ nda̱a̱ dí kaʼyuxu̱ náa David, túndrígúuxu nimbá náa a̱ʼdióo Jesé. Ikha jngóo xa̱bu̱ Israel, gaʼgua̱a̱ʼ gajmiála dioses ndrígala. ¡Ga̱jma̱a̱ dí xúgi̱, ikháán David, aratáñajunʼ náa guʼwáaʼ rá!”. Ikhú mbá xúgíinʼ xa̱bu̱ Israel nitangiín náa guʼwún.*
17 Mú Rehoboam niʼtáñajúúnʼ má xúʼko̱ israelitas bi̱ nikúwá náa xuajin dí rígá náa Judá.
18 Ikhú rey Rehoboam nikuʼmaa Adoram bi̱ naʼtáñajúúnʼ bi̱ nuñajunʼ gakhi̱i̱ mu maʼga gáʼñúún, mú mbá xúgíinʼ xa̱bu̱ Israel nixiyáa ga̱jma̱a̱ itsí. Rey Rehoboam niʼngo̱o̱ nitsima̱a̱ náa cárriu̱u̱ mu magáyúu maʼga Jerusalén.
19 Israelitas nixujximíjna̱ náa inún bi̱ kúwíin náa goʼwóo David asndu rí mbiʼi xúgi̱.
20 Índo̱ xúgíinʼ xa̱bu̱ Israel nidxawíín dí Jeroboán nitanga̱a̱, nindxa̱ʼwa̱a̱ náa nigimbíin mbaʼin xa̱bu̱ ga̱jma̱a̱ ikhí nigíiʼ mu mani̱ndxu̱u̱ rey náa mbá xúgíʼ Israel. Nimbáa ndawa̱a̱ tsáa ni̱jkha̱ kidxúúnʼ bi̱ kúwá náa goʼwóo David, i̱ndó má xuajin chíʼgíiʼ* ndrígóo Judá.
21 Índo̱ Rehoboam ni̱jkha̱nú náa Jerusalén, mbá nacha̱ nigímbíin mbá xúgíinʼ bi̱ kúwá náa goʼwóo Judá, ga̱jma̱a̱ bi̱ naguwáʼ náa xuajin chíʼgíiʼ ndrígóo Benjamín, mbá 180,000 soldado bi̱ kaxtaʼwíin, mu muxmijná gajmiún bi̱ kúwá náa goʼwóo Israel. Ga̱jma̱a̱ murtanga̱a̱ rí maʼtáñajunʼ Rehoboam a̱ʼdióo Salomón.
22 Ikhú Semaya, xa̱bi̱i̱ Dios nigruigú ajngóo Dios bi̱ gajkhun rígi̱:
23 “Aratháán Rehoboam a̱ʼdióo Salomón, rey ndrígóo Judá, ga̱jma̱a̱ mbá xúgíinʼ bi̱ kúwá náa goʼwóo Judá, ma̱ngaa bi̱ naguwáʼ náa xuajin chíʼgíiʼ ndrígóo Benjamín ga̱jma̱a̱ eʼwíinʼ xa̱bu̱ xuajin:
24 ‹Rígi̱ dí naʼthí Jeobá: “Xátsimala gúxmíjná gajmiála a̱ngia̱la israelitas. Mámbáa gátanga̱a̱ goʼwóo, numuu rí ikhúún ni̱ni̱ dí xígi̱ gárígá”›”. Ikha jngóo ikhiin ninimbu̱u̱n dí niʼthí Jeobá ga̱jma̱a̱ nitangiín náa guʼwún, xó má Jeobá niʼthún.
25 Jeroboán niʼni májáanʼ xuajin Siquem dí rígá náa kúbá Efraín ga̱jma̱a̱ ikhí má niguanúu nixtáa. Nda̱wa̱á nigájnúu ni̱jkha̱ gáʼni májáanʼ xuajin Penuel.
26 Jeroboán niʼthúu̱n a̱jkiu̱u̱n: “Dí xúgi̱ rí nutañajunʼ matanga̱a̱ náa goʼwóo David.
27 Á mu xa̱bu̱ natsimún má xúʼko̱ náa Jerusalén mu muxnajxi̱ tsigijñaʼ gamajkhu náa goʼwóo Jeobá, a̱jkiu̱ún xa̱bu̱ xuajin rígi̱ matanga̱a̱ náa tátiu̱ún Rehoboam, rey ndrígóo Judá. Tsiaki̱i̱ má dí muxiñún ga̱jma̱a̱ matangi̱ín gajmiún Rehoboam, rey ndrígóo Judá”.
28 Índo̱ niguámbóo ninda̱ʼa̱ consejo rey, niʼnii a̱jmi̱i̱n e̱jín xédí ga̱jma̱a̱ oro, ga̱jma̱a̱ niʼthúún xa̱bu̱ xuajin: “Xa̱bu̱ Israel, gakhi̱i̱ rí ikháanʼla mutsimala náa Jerusalén, gi̱i̱ xtáa Dios ndrígala bi̱ niguwáanʼla náa ku̱ba̱ʼ Egipto”.
29 Ikhú nitsriguii mbáa náa xuajin Betel ga̱jma̱a̱ imba̱a̱ náa Dan.
30 Rígi̱ niʼni dí ikhiin muxudamíjna̱ aʼkhá, xa̱bu̱ nagún asndu náa Dan mu mbuyamajkuíí a̱ʼdá xédí bi̱ frígu ikhí.
31 Ga̱jma̱a̱ ikhaa niʼni guʼwá náa rí nduyamajkhún dioses náa rí mitsídánʼ, ga̱jma̱a̱ nigruigi̱i̱n xa̱bu̱ xuajin bi̱ na̱nguá nindxu̱ún levitas mu mani̱ndxu̱ún ndxajkun.
32 Jeroboán ma̱ngaa niʼni mbá ndxa̱a̱ náa gu̱nʼ migiñuʼ, mbiʼi 15 ñajunʼ gu̱nʼ, mbá ndxa̱a̱ xóo dí narígá náa Judá, náa dí nakarámáʼ tsigijñaʼ dí niʼni náa Betel, nixnájxi̱ tsigijñaʼ náa e̱jín xédí bi̱ ikhaa niʼnii. Ga̱jma̱a̱ nigruigi̱i̱n ndxajkun náa rí mitsídánʼ rí niʼni dí rígá náa Betel.
33 Mbiʼi 15 ñajunʼ gu̱nʼ migiñuʼ, gu̱nʼ dí ikhaa má niraʼwíí, nigíʼdu̱u̱ nixnájxi̱ tsigijñaʼ náa dí ikhaa niʼni náa Betel. Niʼni mbá ndxo̱o̱ xuajin Israel ga̱jma̱a̱ nitsimuu náa dí nakarámáʼ tsigijñaʼ mu maxnájxi̱ tsigijñaʼ ga̱jma̱a̱ mu markúní.
Mbaʼa nota
^ O “tátiáaʼ”.
^ O “lajuíin”.
^ O “íxtuun”.
^ Maxpájtiin ga̱jma̱a̱ mbá ñuñuu rí trámáʼ ajua̱nʼ xíníʼ.
^ Náa ajngáa hebreo naʼthí, “guʼwá xtíin”.
^ O “tribu”.
