Timbá libro ndrígu̱ún Reyes 13:1-34
13 Jeobá nikuʼmaa mbáa xa̱bi̱i̱ ma̱ʼkha̱ náa Betel bi̱ na̱ʼkha̱ náa Judá, índo̱ Jeroboán wíji̱ náa dí nakarámáʼ tsigijñaʼ mu markúní.
2 Ikhú niʼthí dí Jeobá niʼtáñajuunʼ, nindxaʼwájmaa dí nakarámáʼ tsigijñaʼ: “¡Ikháán náa nakarámáʼ tsigijñaʼ! Rígi̱ dí naʼthí Jeobá: ‹¡Atayáá! ¡Náa goʼwóo David magumaa mbáa ada̱ bi̱ mbiʼyuu Josías! Ikhaa matsikárámíiʼ náa ikháán ndxajkun bi̱ kúwá náa rí mitsídánʼ bi̱ nurkuní náa ikháán, ga̱jma̱a̱ matsikhá i̱tsu̱ún xa̱bu̱ numbaaʼ náa ikháán›”.
3 Mbiʼi rúʼko̱ nixná mbá tsinaʼ índo̱ niʼthí: “Rígi̱ nindxu̱u̱ tsinaʼ dí Jeobá niʼtáriyaʼ: Náa nakarámáʼ tsigijñaʼ mawiʼtájngaa ga̱jma̱a̱ idiʼ* dí grígu tsu̱du̱u̱ magadíí”.
4 Índo̱ rey niʼdxawun ajngáa dí niʼthí xa̱bi̱i̱ Dios bi̱ gajkhun dí nindxaʼwájmaa náa nakarámáʼ tsigijñaʼ dí rígá náa Betel, ikhú Jeroboán nirígúu ñawúunʼ náa nakarámáʼ tsigijñaʼ, niʼni jmbuu ñawúunʼ náa xa̱bu̱, niʼthí: “¡Gurugua̱a̱!”. Ikhú ñawúunʼ dí nikruiyaʼ nikháñúu,* nánguá nindoo maʼba̱a̱n.
5 Ikhú náa nakarámáʼ tsigijñaʼ niwiʼtájngaa ga̱jma̱a̱ idiʼ dí grígu tsu̱du̱u̱ nigadíí, xó má tsinaʼ dí xa̱bi̱i̱ Dios bi̱ gajkhun nikuʼmaa Jeobá maʼthí.
6 Ikhú rey niʼthúu̱n xa̱bi̱i̱ Dios bi̱ gajkhun: “Mbá péñu,* aratakáñíí Jeobá Dios ndrígáaʼ, atanda̱ʼa̱a̱ ga̱jma̱a̱ numuʼ mu maʼni̱i̱ ñawúnʼ”. Ikha jngóo xa̱bi̱i̱ Dios bi̱ gajkhun niʼtákáñuu Jeobá, ga̱jma̱a̱ ñawúunʼ rey niʼni̱i̱ xó má nákha ginii.
7 Ikhú rey niʼthúu̱n xa̱bi̱i̱ Dios bi̱ gajkhun: “Ayi̱ náa goʼwóʼ, aguanáaʼ mu matatsiʼtsu, ga̱jma̱a̱ atatsíñuʼ dí maxna̱a̱ʼ mbá regalo”.
8 Mú xa̱bi̱i̱ Dios bi̱ gajkhun niʼthúu̱n rey: “Maski ajndu maraxnu̱ʼ mbá ta̱pha̱ guʼwáaʼ, xáʼgá ga̱jma̱á nindxa̱a̱ʼ, ni má xákuíʼtsú ga̱jma̱a̱ xága̱nʼ iyaʼ náa ku̱ba̱ʼ rígi̱.
9 Numuu dí Jeobá niʼtáñajunʼ rígi̱: ‹Xátatsiʼtsu ni má xágíin iyaʼ, xátangaán ga̱jma̱a̱ kamba̱a̱ náa má ni̱dxa̱ʼ›”.
10 Ikha jngóo ni̱jkha̱a̱ ga̱jma̱a̱ i̱mba̱ kamba̱a̱, tátanga̱a̱ ga̱jma̱a̱ kamba̱a̱ dí ni̱jkha̱ ga̱jma̱a̱ náa Betel.
11 Xtáa mbáa profeta* nikhi̱i̱ náa Betel, ga̱jma̱a̱ e̱ji̱i̱n nigún gúyáá nitháán anu̱ún xúgíʼ dí xa̱bi̱i̱ Dios bi̱ gajkhun niʼni mbiʼi rúʼko̱ náa Betel ga̱jma̱a̱ dí niʼthúu̱n rey. Nda̱wa̱á dí nitháán rígi̱,
12 anu̱ún nirajxu̱u̱n: “Náá kamba̱a̱ ni̱jkha̱a̱ ga̱jma̱a̱ xá.” E̱ji̱i̱n nisngajmáá náá kamba̱a̱ ni̱jkha̱a̱ ga̱jma̱a̱ xa̱bi̱i̱ Dios bi̱ gajkhun bi̱ ni̱ʼkha̱ náa Judá.
13 Ikhaa niʼthún e̱ji̱i̱n: “Gugrígu xíliu̱u̱ búrru”. Ikha jngóo ikhiin nigrigu xíliu̱u̱ búrru ga̱jma̱a̱ ikhaa nigriguii.
14 Ikhaa ni̱jkha̱ kidxuuʼ xa̱bi̱i̱ Dios bi̱ gajkhun, nixkamaa gíʼ náa mbá agoo ixi̱ mba̱a̱. Ikhú nirajxu̱u̱: “Ikháán nindxa̱a̱ʼ xa̱bi̱i̱ Dios bi̱ gajkhun bi̱ na̱ʼkha̱ náa Judá ráʼ.” Ikhaa niriʼñuu: “Aan, ikhúún”.
15 Profeta nikhi̱i̱ niʼthúu̱n: “Ayi̱ náa goʼwóʼ mu matatsiʼtsu”.
16 Mú ikhaa niriʼñuu: “Xándoo matangu̱ún ga̱jma̱á nindxa̱a̱ʼ náa guʼwáaʼ, ni má xándoo makuíʼtsú ga̱jma̱a̱ ma̱ga̱nʼ iyaʼ ga̱jma̱á nindxa̱a̱ʼ náa ku̱ba̱ʼ rígi̱.
17 Numuu dí Jeobá niʼtáñajunʼ ma̱ni̱ rígi̱: ‹Xátatsiʼtsu ni má xágíin iyaʼ ikhí. Xátangaán náa kamba̱a̱ dí nidxu̱ʼ ga̱jma̱a̱›”.
18 Ikhú profeta nikhi̱i̱ niʼthúu̱n: “Ikhúún mangúún nindxu̱ʼ profeta xó má ikháán, Jeobá nikuʼmaa mbáa ángel ndrígióo mu maʼthúnʼ: ‹Atani̱ dí matanga̱a̱ ga̱jma̱á nindxa̱a̱ʼ náa guʼwáaʼ, mu makuiʼtsu ga̱jma̱a̱ maga̱a̱n iyaʼ›”. (Niʼni nduwaaʼ).
19 Nitanga̱a̱ ga̱jma̱a̱ náa goʼwóo mu makuiʼtsu ga̱jma̱a̱ maga̱a̱n iyaʼ.
20 Índo̱ tri̱gi̱i̱n náa mesa, profeta bi̱ nitanga̱a̱ kayáa nigruigú ajngóo Jeobá,
21 niʼthúu̱n xígu xa̱bi̱i̱ Dios bi̱ gajkhun bi̱ na̱ʼkha̱ náa Judá: “Rígi̱ dí naʼthí Jeobá: ‹Numuu rí nitaxújximínáʼ náa dí Jeobá niʼtáñajuaanʼ matani̱, tátatsimbaaʼ dí Jeobá Dios ndrígáaʼ nikuʼmáán matani̱,
22 nitangaánʼ mu matatsiʼtsu ga̱jma̱a̱ migi̱i̱n iyaʼ náa ku̱ba̱ʼ rígi̱ maski ajndu nijuiʼthánʼ “Xátatsiʼtsu ga̱jma̱a̱ xágíin iyaʼ”, ikha jngóo ikháán makhañáaʼ ga̱jma̱a̱ xájuiʼdi̱ín náa nijuiʼdi̱ín wajin xiʼñáaʼ›”.
23 Nda̱wa̱á dí xa̱bi̱i̱ Dios bi̱ gajkhun niʼga̱a̱n ga̱jma̱a̱ nikuiʼtsu, ikhú profeta nikhi̱i̱ bi̱ nitanga̱a̱ kayáa nigrígu xíliu̱u̱ búrru.
24 Ikhú ni̱jkha̱a̱, mú náa kamba̱a̱ ndiʼyoo mbáa león ga̱jma̱a̱ nixíyáa. Náa kri̱ga̱a̱ nikháñúu ikhí wíji̱ búrru ga̱jma̱a̱ león.
25 Tikhuun xa̱bu̱ ninújngún ikhí, ndiyáá dí kri̱ga̱a̱ nikháñúu náa kamba̱a̱ ga̱jma̱a̱ león wíji̱ náa kri̱ga̱a̱. Nitu̱ʼu̱u̱n náa xuajin rí xtáa profeta nikhi̱i̱ ga̱jma̱a̱ nitháán xúgíʼ rí ndiyáá.
26 Índo̱ profeta bi̱ nitanga̱a̱ kayáa niʼdxawun, ikhú niʼthí: “Nindxu̱u̱ xa̱bi̱i̱ Dios bi̱ gajkhun bi̱ nikujximínáʼ náa dí Jeobá niʼtáñajuunʼ maʼni. Ikha jngóo, xó má Jeobá niʼthúu̱n, Jeobá nixnájxi̱i̱ náa león mu maʼni gawúunʼ ga̱jma̱a̱ maxíyáa”.
27 Ikhú niʼthún e̱ji̱i̱n: “Gugrígu xíliu̱u̱ búrru”. Ikhú ikhiin nigrigu xíliu̱u̱.
28 Ikhaa niguajthun kamba̱a̱ ni̱jkha̱, ndiʼyoo dí xa̱bu̱ kri̱ga̱a̱ nikháñúu náa kamba̱a̱. Búrru ga̱jma̱a̱ león wájun náa níjniúu, león na̱nguá niʼkhu̱u̱ xa̱bu̱ ni má táʼni gawúunʼ búrru.
29 Profeta nikhi̱i̱ nikujxi̱i̱ xa̱bi̱i̱ Dios bi̱ gajkhun bi̱ nikháñúu, nitámáaʼ náa búrru ga̱jma̱a̱ nitanga̱a̱ kayáa náa xuajñuu, mu maxtáa ngíná ga̱jma̱a̱ numuu dí nikháñúu ma̱ngaa mu maʼdi̱i̱.
30 Ikha jngóo nitámáaʼ wajinʼ náa majui̱ʼdi̱i̱ ikhaa. Ikhiin nimbi̱ya̱ʼ ga̱jma̱a̱ numuu, ma̱ngaa nithi: “¡Ngíná nitagíʼníí ndxájuʼ!”.
31 Índo̱ niguámbu̱u̱n nidi̱i̱, niʼthún e̱ji̱i̱n: “Índo̱ ikhúún gákáñúnʼ, gu̱diu̱únla náa nijuiʼdi̱i̱ xa̱bi̱i̱ Dios bi̱ gajkhun. Gundríyáala itsuʼ náa kajti itsu̱u̱ ikhaa.
32 Dí Jeobá nikuʼmaa maʼthí ga̱jma̱a̱ numuu dí nakarámáʼ tsigijñaʼ dí rígá náa Betel, ga̱jma̱a̱ numuu xúgíʼ guʼwá náa nduyamajkhún dioses dí rígá náa mitsídánʼ xuajin dí rígá náa Samaria mambanúu tsiaki̱i̱”.
33 Jeroboán tániñuuʼ raʼni dí ra̱májánʼ, ni má nda̱wa̱á dí nirígá rígi̱. Nigruigi̱i̱n asndu tsíín xa̱bíi̱ bi̱ kúwá náa xuajin mu mani̱ndxu̱ún ndxajkun náa rí mitsídánʼ. Naxnúu ñajunʼ rí mani̱ndxu̱u̱ ndxajkun* asndu tsáa má eyoo ikhaa ga̱jma̱a̱ naʼthí: “Bugi̱ ma̱ngaa gánindxu̱u̱ ndxajkun bi̱ maxtáa náa rí mitsídánʼ”.
34 Aʼkhá rígi̱ dí nirígá náa goʼwóo Jeroboán niʼni dí maguma gámbáa ga̱jma̱a̱ mandáti̱ga̱a̱ náa mbá xúgíʼ tsu̱du̱u̱ ku̱ba̱ʼ.
Mbaʼa nota
^ O “idiʼ dí ngajtsaʼ”, xóo muʼthá, idiʼ dí gíʼdoo xtangoo tsigijñaʼ.
^ Náa ajngáa hebreo naʼthí, “nijndooʼ”.
^ O “ataniu̱ʼ mbá rí májánʼ”.
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “naʼni majníí ñawúunʼ náa”.
