Timbá libro ndrígu̱ún Reyes 15:1-34
15 Abiyam ni̱jkha̱nú ninindxu̱u̱ rey náa Judá índo̱ naʼni má 18 tsiguʼ dí xtáa raʼtáñajunʼ rey Jeroboán a̱ʼdióo Nebat.
2 Niʼtáñajunʼ mbá ajtsú tsiguʼ náa Jerusalén, ru̱dúu̱* mbiʼyuu Maacá, a̱ʼdá xíñíiʼ Abisalom.
3 Nikudaminaʼ ikháá má aʼkhá dí niʼni anu̱u̱* nákha ikhaa xóó tséʼtañajunʼ. Táʼni ñajuunʼ Jeobá Dios ndrígóo ga̱jma̱a̱ xúgíʼ a̱jkiu̱u̱n xó má niʼni wajin xiʼñúuʼ David.
4 Maski ajndu xúʼko̱, ga̱jma̱a̱ numuu dí nikudaminaʼ náa David, Jeobá Dios ndrígóo nixniúu mbáa bi̱ maʼtáñajunʼ* náa Jerusalén, nigíiʼ a̱ʼdióo mu mariʼkuriya̱a̱ʼ, mu xúʼko̱ xándáti̱ga̱a̱ Jerusalén.
5 Numuu dí David niʼni dí májánʼ náa iduu Jeobá, ga̱jma̱a̱ tágájnuriyo̱o̱ʼ nimbá náa dí niʼtáñajuunʼ maʼni náa mbá xúgíʼ mbiʼi dí nixtáa, i̱ndó má dí niʼniuu Urías xa̱bu̱ hitita.
6 Rehoboam nixmínaʼ má xúʼko̱ ga̱jma̱a̱ Jeroboán náa mbá xúgíʼ mbiʼi dí nikúwá.
7 Dí naʼthí xóó itháan ga̱jma̱a̱ numuu Abiyam, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá. Ma̱ngaa Abiyam ga̱jma̱a̱ Jeroboán nixmijná má xúʼko̱.
8 Ikhú Abiyam ndiyáa jxu̱u̱ʼ gajmíi̱n wajin xiʼñúuʼ, nidi̱i̱ náa Xuajñuu David, ga̱jma̱a̱ a̱ʼdióo Asá ni̱jkha̱nú ninindxu̱u̱ nuxi̱i̱ʼ rey.
9 Asá nigíʼdúu niʼtáñajunʼ náa Judá índo̱ naʼni má 20 tsiguʼ dí xtáa raʼtáñajunʼ rey Jeroboán náa Israel.
10 Niʼtáñajunʼ mbá 41 tsiguʼ náa Jerusalén. Xíñúuʼ mbiʼyuu Maacá, a̱ʼdá xíñíiʼ Abisalom.
11 Asá niʼni dí májánʼ náa iduu Jeobá, xó má niʼni wajin xiʼñúuʼ David.
12 Nixkawíin xa̱bekha bi̱ nugujuamíjna̱ bi̱ kúwá náa guʼwá rí nduyamajkhún dioses dí rígá náa xuajin. Ga̱jma̱a̱ niʼni gámbíin mbá xúgíinʼ xándú bi̱ xkawi̱i̱nʼ* bi̱ niniwíin wajin xiʼñúuʼ.
13 Asndu nirígú káyúuʼ dí naʼtáñajunʼ xíñúuʼ bi̱ mbiʼyuu Maacá, numuu dí ikhaa niʼnii mbáa xándú tsagaa mu mbiʼyamajkuíí náa poste rí mitsúʼkháan.* Asá niʼni gámbáa xándú tsagaa ga̱jma̱a̱ nitsikháa náa mata* Cedrón.
14 Mú táguma gámbáa náa rí mitsídánʼ. Maski ajndu xúʼko̱, Asá niʼni ñajuunʼ Jeobá ga̱jma̱a̱ xúgíʼ a̱jkiu̱u̱n náa mbá xúgíʼ mbiʼi dí nixtáa.
15 Ni̱ʼkha̱ kagu̱u̱ náa goʼwóo Jeobá dí ikhaa ga̱jma̱a̱ anu̱u̱ nini̱ kaʼwi̱i̱: Xóo plata, oro ga̱jma̱a̱ mbaʼa dí najmaa.
16 Asá nixmínaʼ má xúʼko̱ ga̱jma̱a̱ Baasá rey bi̱ xtáa náa Israel.
17 Rey Baasá bi̱ xtáa náa Israel ni̱jkha̱ náa Judá, nigíʼdúu niʼni májáanʼ xuajin Ramá mu xúʼko̱ nimbáa xágájnuu náa mbayuuʼ rey Asá bi̱ xtáa náa Judá ni má xáto̱ʼo̱o̱ ikhí.
18 Ikhú Asá ni̱jkha̱ kagu̱u̱ xúgíʼ plata ga̱jma̱a̱ oro dí xóó naguanúu náa cuarto dí kajti dí gíʼdoo numuu dí rígá náa goʼwóo Jeobá, ga̱jma̱a̱ náa cuarto dí kajti dí gíʼdoo numuu dí rígá náa goʼwóo* rey, ga̱jma̱a̱ nixnún xa̱bi̱i̱. Nda̱wa̱á rey Asá nikuʼma maʼga náa Ben-Hadad, a̱ʼdióo Tabrimón, a̱ʼdióo Hezión, rey ndrígóo Siria bi̱ nixtáa náa Damasco. Niʼthúu̱n:
19 “Rígá mbá dí nimbánulú ga̱jma̱a̱ náa anu̱lú. Nakuʼmá plata ga̱jma̱a̱ oro xóo regalo náa ikháán. Atatsíñááʼ rambájxáaʼ ga̱jma̱a̱ʼ rey Baasá bi̱ xtáa náa Israel, mu xúʼko̱ matsíngu̱u̱nʼ náa ikhúún”.
20 Ben-Hadad niʼnimbo̱o̱ dí niʼthúu̱n rey Asá, nikuʼmiin bi̱ nutañajúúnʼ soldado ndrígóo mu muni̱ gámbáa xuajin dí rígá náa Israel, nitu̱ʼu̱u̱n náa Ijón, Dan, Abel-Bet-Maacá, náa xúgíʼ Kinéret ga̱jma̱a̱ náa mbá xúgíʼ mbayuuʼ Neftalí.
21 Índo̱ Baasá niʼdxawuun rígi̱, mbá nacha̱ niniñuuʼ raʼni májáanʼ Ramá ga̱jma̱a̱ niguanúu náa Tirzá.
22 Rey Asá nigímbíin mbá xúgíinʼ xa̱bu̱ Judá, mu magún náa Ramá gúda̱a̱ itsí ga̱jma̱a̱ ixi̱ dí Baasá nijmuu mu maʼni májáanʼ ikhí, ikhaa rúʼko̱ nijmuu rey Asá mu maʼni májáanʼ Gueba dí rígá náa majñuuʼ xuajin chíʼgíiʼ* ndrígóo Benjamín ga̱jma̱a̱ náa Mizpá.
23 Dí naʼthí xóó itháan ga̱jma̱a̱ numuu Asá, tsiaki̱i̱ dí nigiʼdoo, xúgíʼ dí niʼni ga̱jma̱a̱ xuajin dí niʼni,* kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá. Mú índo̱ nikhi̱i̱ ndiyóo mbá nandii náa rajkhúu.
24 Ikhú Asá ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ náa nijuiʼdi̱ín ikhiin náa Xuajñuu David bi̱ nindxu̱u̱ wajin xiʼñúuʼ, ga̱jma̱a̱ a̱ʼdióo Jehosafat ni̱jkha̱nú ninindxu̱u̱ nuxi̱i̱ʼ rey.
25 Nadab a̱ʼdióo Jeroboán ni̱jkha̱nú ninindxu̱u̱ rey náa Israel índo̱ naʼni má a̱jma̱ tsiguʼ dí naʼtáñajunʼ rey Asá náa Judá, ga̱jma̱a̱ Nadab niʼtáñajunʼ náa Israel a̱jma̱ tsiguʼ.
26 Niʼni dí ra̱májánʼ náa iduu Jeobá. Niʼni xó má niʼni anu̱u̱ ga̱jma̱a̱ nikudaminaʼ ikháá má aʼkhá, dí niʼni dí israelitas mangiin muxuʼdamíjna̱.
27 Índo̱ Nadab gajmíi̱n mbá xúgíinʼ israelitas kúwá ruruguama̱ʼa̱a̱n Guibetón, Baasá a̱ʼdióo Ahíya bi̱ na̱ʼkha̱ náa goʼwóo Isacar niríyaʼ awan dí maʼniuu Nadab ga̱jma̱a̱ nixíyáa náa Guibetón, náa mbañúúnʼ filisteos.
28 Baasá nixíyáa índo̱ naʼni má ajtsú tsiguʼ dí rey Asá xtáa raʼtáñajunʼ náa Judá ga̱jma̱a̱ Baasá ni̱jkha̱nú ninindxu̱u̱ nuxi̱i̱ʼ rey.
29 Índo̱ ni̱jkha̱nú ninindxu̱u̱ rey, nigudíin mbá xúgíinʼ bi̱ kúwá náa goʼwóo Jeroboán, tániñuuʼ dí nimbáa maxtáa. Niʼni gámbíin xó má ajngóo Jeobá dí niʼtáriyaʼ xa̱bi̱i̱ bi̱ mbiʼyuu Ahíya xa̱bu̱ silonita.
30 Nirígá rígi̱ ga̱jma̱a̱ numuu aʼkhá dí nikudaminaʼ Jeroboán, ma̱ngaa dí niʼni muxuʼdamíjna̱ israelitas, ga̱jma̱a̱ numuu dí ra̱ʼkhá tháán nikásngañu̱u̱ʼ Jeobá, Dios ndrígóo Israel.
31 Dí naʼthí xóó itháan ga̱jma̱a̱ numuu Nadab, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
32 Asá nixmínaʼ má xúʼko̱ ga̱jma̱a̱ rey Baasá bi̱ xtáa náa Israel.
33 Baasá a̱ʼdióo Ahíya ni̱jkha̱nú ninindxu̱u̱ rey náa xúgíʼ Israel náa Tirzá índo̱ naʼni má ajtsú tsiguʼ dí rey Asá xtáa raʼtáñajunʼ náa Judá, ga̱jma̱a̱ niʼtáñajunʼ mbá 24 tsiguʼ.
34 Mú niʼni dí ra̱májánʼ náa iduu Jeobá. Niʼni xó má niʼni Jeroboán ga̱jma̱a̱ nikudaminaʼ ikháá má aʼkhá, dí niʼni dí israelitas muxuʼdamíjna̱.
Mbaʼa nota
^ O “nánée”.
^ O “tátée”.
^ Náa ajngáa hebreo naʼthí, “mbá lámpara”.
^ Náa ajngáa hebreo ajngáa rígi̱ kuajtuminaʼ ga̱jma̱a̱ “ambóo xujkhúʼ”. Ajngáa rígi̱ najmaa mu mutawéñííʼ mbáa.
^ O “bóo”.
^ O “náa naʼtáñajunʼ”.
^ O “tribu”.
^ O “niʼni májáanʼ”.
