Timbá libro ndrígu̱ún Reyes 17:1-24
17 Elías* xa̱bu̱ tisbita, mbáa xa̱bu̱ bi̱ na̱ʼkha̱ náa Galaad, niʼthúu̱n Acab: “¡Naxna̱a̱ʼ ajngóʼ ga̱jma̱a̱ numuu mbiʼyuu Jeobá, Dios ndrígóo Israel, bi̱ ikhúún na̱ni̱ ñajuunʼ* dí xárígá a̱jma̱ʼ ni má ruʼwa náa mbá nguáthá tsiguʼ rígi̱. Maxnúu á mu ikhúún gátha̱!”.
2 Elías nigruigú ajngóo Jeobá rígi̱:
3 “Atagájnaaʼ mi̱dxu̱ʼ, ayuʼ xígií náa nagájnuu a̱jkha̱ʼ,* ga̱jma̱a̱ atarkaʼwuminaʼ náa mata* Kerit. Xígií náa nagájnuu a̱jkha̱ʼ náa Jordán.
4 Migi̱i̱n iya mata ga̱jma̱a̱ ikhúún makuʼmíin yu̱wa̱ʼ dí magún kudúún dí miʼtsu”.
5 Mbá nacha̱ ni̱jkha̱ ga̱jma̱a̱ niʼni xó má niʼthúu̱n Jeobá. Ni̱jkha̱ ga̱jma̱a̱ nixtáa náa mata Kerit, dí rígá xígií náa nagájnuu a̱jkha̱ʼ náa Jordán.
6 Yu̱wa̱ʼ naguwáʼ kudúún pan ga̱jma̱a̱ xuwiʼ náa ikhaa, miʼcha̱ ga̱jma̱a̱ wakíʼ. Ga̱jma̱a̱ naʼga̱a̱n iya mata.
7 Mú káaʼ nguáthá mbiʼi niʼni, mata nijndo̱o̱ʼ, numuu dí nánguá exnúu ruʼwa náa xuajin.
8 Ikhú nigruigú ajngóo Jeobá rígi̱:
9 “Ayuʼ náa Sarepta, mbaaʼ dí rígá náa Sidón ga̱jma̱a̱ aguanáaʼ ikhí. Ikhúún makuʼmaa mbáa a̱ʼgú xuáʼa dí maxnáaʼ rí miʼtsu”.
10 Ikhú ni̱jkha̱ náa Sarepta. Índo̱ ni̱jkha̱nú náa riejuun xuajin, nixkamaa mbáa a̱ʼgú xuáʼa rí nagujxi̱i̱ ixi̱, nindxaʼwóo ga̱jma̱a̱ niʼthúu̱n: “Mbá péñu,* aya̱ jcháaʼ mbá chíʼgíiʼ* iyaʼ ma̱ga̱nʼ”.
11 Índo̱ ni̱jkha̱ gáyáʼ, nindxaʼwóo ga̱jma̱a̱ niʼthúu̱n: “Mbá péñu, aya̱ jcháaʼ chíʼgíiʼ pan ma̱ngaa”.
12 A̱ʼgu̱ niriʼñuu: “Natha̱nʼ ga̱jma̱a̱ numuu mbiʼyuu Jeobá Dios ndrígáaʼ dí ragúʼdoo pan. Káaʼ mbá chíʼgíiʼ xóó harina kajkuáa náa daan rayaʼ mba̱a̱ ga̱jma̱a̱ káaʼ chíʼgíiʼ xóó aceite ka̱jni̱ʼ náa daan rayaʼ chíʼgíiʼ. Dí xúgi̱ xtáá ragújxíi nguáthá ixi̱ mu maʼgáaʼ gáni̱ mújúunʼ rí miʼkhu ga̱jmu̱ʼ a̱ʼdióʼ. Iwáá má xúgi̱ gúpíʼtsuxu̱, nda̱wa̱á makhañúxu”.
13 Ikhú Elías niʼthúu̱n: “Xámíñáaʼ, ayu̱u̱ʼ gátani̱ májáánʼ dí niratá. Mú ginii, ga̱jmaaʼ dí rígá mu matani̱ mbá pan dijndi chíʼgíiʼ, ga̱jma̱a̱ aya̱ jcháaʼ rexa̱a̱ gi̱i̱ miʼkhu. Nda̱wa̱á gídxúuʼ gátani̱ májáánʼ dí miʼtsu ga̱jma̱a̱ a̱ʼdiáaʼ.
14 Numuu dí rígi̱ rí naʼthí Jeobá Dios ndrígóo Israel: ‹Harina dí xóó kajkuáa náa daan rayaʼ mba̱a̱ xámbá, ni má aceite dí xóó ka̱jni̱ʼ náa daan rayaʼ chíʼgíiʼ xámbá asndu índo̱ gáʼganú mbiʼi dí Jeobá gáʼni dí maxnáa̱ ruʼwa náa tsu̱du̱u̱ ku̱ba̱ʼ›”.
15 Ikha jngóo niʼni xó má niʼthúu̱n Elías. Ga̱jma̱a̱ rúʼko̱ niʼni dí ikhaa gajmíi̱n bi̱ kúwíin náa goʼwóo muguáʼdáá má xúʼko̱ ganitsu mba̱yu̱u̱ʼ mbiʼi.
16 Harina dí kajkuáa náa daan rayaʼ mba̱a̱ támbá, ga̱jma̱a̱ aceite dí ka̱jni̱ʼ náa daan rayaʼ chíʼgíiʼ támbá. Xó má ajngóo Jeobá dí niʼthí Elías.
17 Nguáthá mbiʼi nda̱wa̱á, a̱ʼdióo a̱ʼgu̱ bi̱ goʼwóo niʼñuu nandii, niʼñuu gakhi̱i̱ rí asndu niniñuuʼ rayá jxi̱ʼ.
18 Ikhú a̱ʼgu̱ niʼthúu̱n Elías: “Xa̱bi̱i̱ Dios bi̱ gajkhun, ndiéjunʼ ni̱ña̱a̱nʼ jngóo. Ni̱dxa̱ʼ gátani̱ marmáʼáan a̱jkiu̱nʼ dí nikiéʼkhúnʼ ga̱jma̱a̱ mu mataxíyáa̱ a̱ʼdióʼ ráʼ.”
19 Mú Elías niʼthúu̱n: “Araxniúʼ a̱ʼdiáaʼ”. Ikhú niríguíi náa rí kayáraʼaa ru̱dúu̱,* ga̱jma̱a̱ nitsimuu kayáa náa cuarto dí grígu náa tsu̱du̱u̱ guʼwá, náa dí ikhaa naguanúu ga̱jma̱a̱ nitámaaʼ náa xiawuu.
20 Ikhú niʼtákáñuu Jeobá: “Tátá Jeobá, Dios ndrígóʼ, lá matani̱ rí mamínuuʼ asndu a̱ʼgú xuáʼa bi̱ náa naguanúʼ rí asndu matani̱ dí makhañúu a̱ʼdióo ma̱ngaa ráʼ.”
21 Ikhú nimbátámuuʼ náa awúu̱n ada̱ mbá ajtsú nuthu ga̱jma̱a̱ niʼtákáñuu Jeobá: “Tátá Jeobá, Dios ndrígóʼ, atanigabi̱i̱ ada̱ bigi̱, mbá péñu”.
22 Jeobá niʼdxawuun rí niʼtájkháan Elías, ikha jngóo niʼni rí ada̱ magabi̱i̱ ga̱jma̱a̱ rí maʼni̱i̱ a̱jkiu̱u̱n.
23 Elías ndiyáraʼaa ada̱ ga̱jma̱a̱ nika̱jta̱a̱ kayáa náa cuarto dí agoo. Ni̱jkha̱ gáxniáa ru̱dúu̱ ada̱ ga̱jma̱a̱ niʼthúu̱n: “Atayáá, ndaʼya a̱ʼdiáaʼ”.
24 Índo̱ ndiʼyoo rígi̱ a̱ʼgu̱, niʼthúu̱n Elías: “Dí xúgi̱ nda̱yo̱o̱ gajkhun dí ikháán nindxa̱a̱ʼ mbáa xa̱bi̱i̱ Dios, xúgíʼ ajngóo Jeobá dí nagájnuu náa rawaanʼ nindxu̱u̱ gajkhun”.
Mbaʼa nota
^ Rí nandoo gáʼthúu̱n ‹Dios ndrígóʼ nindxu̱u̱ Jeobá›.
^ Náa ajngáa hebreo naʼthí, “bi̱ gújuan náa inuu”.
^ O “este”.
^ O “bóo”.
^ O “ataniu̱ʼ mbá rí májánʼ”.
^ O “lajuíin”.
^ O “nánée”.
