Timbá libro ndrígu̱ún Reyes 19:1-21
19 Ikhú Acab niʼthúu̱n Jezabel mbá xúgíʼ dí niʼni Elías ga̱jma̱a̱ xú káʼnii nigudíin profetas* ga̱jma̱a̱ espada.
2 Ikhú Jezabel nikuʼmaa mbáa bi̱ maʼthúu̱n Elías: “¡Dioses gúni̱ rí mamínuuʼ á mu tséxiñáa ikháá má hora rígi̱ xó má nikháñún mámbíin dí ikhiin!”.
3 Elías ra̱ʼkhá tháán nimíñuu, ikha jngóo nigáyúu numuu rí tsíyoo makhañúu. Ni̱jkha̱nú náa Beer-Seba rí kaʼyoo Judá ga̱jma̱a̱ ikhí niniñuuʼ bi̱ nambáyúu.
4 Nijkha xígií náa ku̱ba̱ʼ mijxooʼ,* ni̱jkha̱ mbá mbiʼi kañiiʼ, asndu índo̱ ni̱jkha̱nú náa mbá xtáʼdu̱u̱ iná ga̱jma̱a̱ nigi̱ʼi̱ ikhí. Ninda̱ʼa̱ rí makhañúu, niʼthí: “¡Ikhí rá! Ngínún lá ikhúún Jeobá, ataxíñu̱u̱n, numuu rí na̱nguá nindxu̱ʼ itháán májáanʼ xa̱bu̱ ki xóo wajin xiʼñúnʼ”.
5 Ikhú nibóoʼ ga̱jma̱a̱ niʼgu náa agoo iná xtáʼdu̱u̱, mú nda̱a̱ tsu̱ma̱ mbáa ángel nixkajmaa ga̱jma̱a̱ niʼthúu̱n: “Atujxa̱a̱ʼ ga̱jma̱a̱ atatsiʼtsu”.
6 Índo̱ ikhaa nigruiga̱a̱ iduu ndiʼyoo rí náa tsu̱du̱u̱ itsí rí mijkha kaʼmáʼ mbá pan rí dijndi ga̱jma̱a̱ mbá daan rayaʼ iyaʼ. Nikuiʼtsu ga̱jma̱a̱ niʼga̱a̱n, nda̱wa̱á nitanga̱a̱ nibáaʼ xígií.
7 Mbu̱júu̱ ángel ndrígióo Jeobá nitanga̱a̱ rí maʼni a̱jma̱ nuthu, nixkajmaa ga̱jma̱a̱ niʼthúu̱n: “Atujxa̱a̱ʼ ga̱jma̱a̱ atatsiʼtsu. Á mu tsétatsiʼtsu mitsínguánʼ wéñuuʼ gáta̱ya̱a̱ náa mi̱dxu̱ʼ”.
8 Ikha jngóo nitujxu̱u̱, nikuiʼtsu ga̱jma̱a̱ niʼga̱a̱n. Dí niʼkhu̱ rúʼko̱ nixnúu tsiaki̱i̱ mu maʼngo̱o̱ maʼga mbá 40 mbiʼi ga̱jma̱a̱ mbá 40 mbruʼun asndu náa kúbá Horeb, náa kúbá ndrígóo Dios bi̱ gajkhun.
9 Nito̱ʼo̱o̱ náa mbá tsíñu ga̱jma̱a̱ ikhí niʼgu mbruʼun rúʼko̱. Nda̱a̱ tsu̱ma̱ niʼdxawuun ajngóo Jeobá rígi̱: “Dí tani̱ gi̱i̱ Elías.”
10 Ikhaa niriʼñuu: “Ni̱ni̱ má xúʼko̱ ñajuunʼ Jeobá ga̱jma̱a̱ gagi, Dios bi̱ naʼtáñajúúnʼ ángeles. Xa̱bu̱ xuajin Israel niniñaaʼ runimbaníí rí nimbánaaʼ gajmiáanʼ, nini̱ gámbáa náa nutsikarámáʼ tsigijñaʼ, niradíin profetas ndrígáaʼ ga̱jma̱a̱ espada, ga̱jma̱a̱ mbáwún ikhúún xóó eguanúʼ, rí xúgi̱ nandún muxiñúu mangúún”.
11 Mú Dios niʼthúu̱n: “Agajnáaʼ, añejún náa kúbá náa inuu Jeobá”. Ga̱jma̱a̱ Jeobá xtáa ranújngoo ikhí. Ni̱ʼkha̱ mbá giñánʼ gakhi̱i̱ ga̱jma̱a̱ tsiaki̱i̱ ndrígóo nikuíʼtájngaa kúbá ma̱ngaa nikuíʼtá tsíñu náa inuu Jeobá, mú Jeobá ndawa̱a̱ náa giñánʼ rúʼko̱. Nda̱wa̱á dí nixnúu giñánʼ, ikhú niʼxma, ga̱jma̱a̱ Jeobá ndawa̱a̱ má náa dí niʼxma rúʼko̱.
12 Nda̱wa̱á dí niʼxma, ikhú nigájnuu aguʼ, mú Jeobá ndawa̱a̱ má náa aguʼ rúʼko̱ ma̱ngaa. Nda̱wa̱á dí nigájnuu aguʼ, ikhú niwáán mbá aʼwá wabaʼ ga̱jma̱a̱ mañúú.
13 Índo̱ Elías niʼdxawuun aʼwá, ikhú nirugoo inuu ga̱jma̱a̱ xtíñuu rí kiejuunʼ,* nigájnuu ga̱jma̱a̱ niwi̱ji̱ náa riejuun tsíñu. Ikhú aʼwá nirajxu̱u̱: “Dí tani̱ gi̱i̱ Elías”.
14 Ikhaa niriʼñuu: “Ni̱ni̱ má xúʼko̱ ñajuunʼ Jeobá ga̱jma̱a̱ gagi, Dios bi̱ naʼtáñajúúnʼ ángeles. Xa̱bu̱ xuajin Israel niniñaaʼ runimbaníí rí nimbánaaʼ gajmiáanʼ, nini̱ gámbáa náa nutsikarámáʼ tsigijñaʼ, niradíin profetas ndrígáaʼ ga̱jma̱a̱ espada, ga̱jma̱a̱ mbáwún ikhúún xóó eguanúʼ, rí xúgi̱ nandún muxiñúu mangúún”.
15 Jeobá niʼthúu̱n: “Atanga̱án, ayu̱u̱ʼ xígií náa ku̱ba̱ʼ mijxooʼ rí na̱jkha̱ náa Damasco. Índo̱ gidxu̱ʼnú atraʼwíi Hazael mu mani̱ndxu̱u̱ rey náa Siria.
16 Atraʼwíi Jehú a̱ʼdá xíñiiʼ Nimsí, mu mani̱ndxu̱u̱ rey náa Israel. Ga̱jma̱a̱ atraʼwíi Eliseo* a̱ʼdióo Safat bi̱ na̱ʼkha̱ náa Abel-Meholá mu mani̱ndxu̱u̱ profeta ga̱jma̱a̱ ikhaa mariʼkuriñáánʼ.
17 Bi̱ gákriyaaʼ náa espada ndrígóo Hazael maxíyáa Jehú, ga̱jma̱a̱ bi̱ gákriya̱a̱ʼ náa espada ndrígóo Jehú maxíyáa Eliseo.
18 Náa Israel naguanún xóó mbá 7,000 israelitas bi̱ túsmba̱ti̱gu̱u̱n náa inuu Baal ga̱jma̱a̱ túxnáá beso”.
19 Ikha jngóo Elías nigájnáa ikhí, ni̱jkha̱ ga̱jma̱a̱ nixkamaa Eliseo a̱ʼdióo Safat, bi̱ xtáa raxnúu xku̱bi̱. Nañajunʼ gajmíi̱n mbá 12 yunta* xedi̱ ga̱jma̱a̱ ikhaa ejkha̱ ragi̱ʼi̱ kidííʼ nañajunʼ gajmíi̱n mbá yunta. Elías nikuʼmaminaʼ ga̱jma̱a̱ nixtrámaaʼ xtíñuu rí kiejuunʼ.
20 Eliseo niniñúúnʼ kidííʼ xedi̱ ga̱jma̱a̱ ni̱jkha̱ ragáyúu kidxuuʼ Elías, niʼthúu̱n: “Mbá péñu,* atatsíñúʼ dí maʼgá gátangawuu anu̱ʼ ga̱jma̱a̱ ru̱dúʼ,* ndiʼkhún maʼgá kidxaaʼ”. Elías niʼthúu̱n: “Ayuʼ, lá xtáá rarikhaaʼ ráʼ.”
21 Ikha jngóo nitanga̱a̱, ni̱jkha̱ kagui̱i̱n a̱jmi̱i̱n xedi̱ xóo tsigijñaʼ. Nijmuu ixi̱ arado ga̱jma̱a̱ yoko mu makumbuʼ xúñún xedi̱, nda̱wa̱á nixnúún xa̱bu̱ ga̱jma̱a̱ ikhiin ni̱ʼphu̱. Nda̱wa̱á dí rúʼko̱ nigíʼdu̱u̱ ni̱jkha̱ kidxuuʼ Elías ga̱jma̱a̱ nigíʼdu̱u̱ niʼni ñajuunʼ.
Mbaʼa nota
^ O “gaʼyee, bi̱ nuthi dí marigá”.
^ O “desierto”.
^ O “xtíin rí nugíʼ profetas”.
^ Rí nandoo gáʼthúu̱n, ‹Dios bi̱ naʼni káwíin›.
^ O “12 par”.
^ O “ataniu̱ʼ mbá rí májánʼ”.
^ O “táteʼ ga̱jma̱a̱ náneʼ”.
