Timbá libro ndrígu̱ún Reyes 21:1-29
21 Nda̱wa̱á dí nijngoo xúgíʼ rígi̱, nirígá mbá xkujndu ga̱jma̱a̱ numuu mbaaʼ náa kiʼdu uva dí kaʼyoo Nabot xa̱bu̱ Jezreel. Mbaaʼ náa kiʼdu uva rígi̱ rígá náa Jezreel, náa mijngii gíʼ guʼwá dí naʼtáñajunʼ Acab, rey bi̱ xtáa náa Samaria.
2 Acab niʼthúu̱n Nabot: “Araxnúʼ mbayaaʼ náa kiʼdu uva mu ma̱ni̱ xtagíyáʼ, numuu dí rígá náa mijngii goʼwóʼ. Ma̱ndoo maxna̱a̱ʼ imbo̱o̱ mbaaʼ náa kiʼdu uva dí itháan májánʼ, o á mu tsíyaaʼ, maxna̱a̱ʼ mbújkha̱a̱”.
3 Mú Nabot niʼthúu̱n Acab: “Ikhúún nditháan xáxna̱a̱ʼ dí nigruigúu náa wajin xiʼñúnʼ. Numuu dí raʼkhí gáʼyoo Jeobá”.
4 Ikhú Acab nita̱ʼa̱a̱ náa goʼwóo ngíná ga̱jma̱a̱ najmúu, numuu dí Nabot xa̱bu̱ Jezreel niʼthúu̱n, “Xáxna̱a̱ʼ dí nigruigúu náa wajin xiʼñúnʼ”. Nda̱wa̱á ni̱jkha̱a̱ gábóoʼ náa xia̱wuu, nirkaʼwu inuu ga̱jma̱a̱ nánguá nindoo gákuiʼtsu.
5 Jezabel bi̱ nindxu̱u̱ a̱ʼgiu̱u̱ ni̱jkha̱ gáʼyoo ga̱jma̱a̱ nirajxu̱u̱: “Náá numuu dí najmáa wéñuuʼ dí asndu tsíyaaʼ gátatsiʼtsu rá.”
6 Acab niriʼñuu: “Numuu dí ni̱thu̱u̱n Nabot xa̱bu̱ Jezreel ‹Atago̱jo̱ʼ mbayaaʼ náa kiʼdu uva. O maxna̱a̱ʼ imbo̱o̱ mbaaʼ náa kiʼdu uva dí itháan májánʼ›. Mú ikhaa niʼthúnʼ ‹Xáxna̱a̱ʼ mbayuʼ jún›”.
7 Ikhú a̱ʼgiu̱u̱ niʼthúu̱n: “Lá raʼkháa ikháán nindxa̱a̱ʼ rey bi̱ naʼtáñajunʼ náa Israel ráʼ. Atujxa̱a̱ʼ, atatsiʼtsu, xájmáaʼ. Ikhúún maxna̱a̱ʼ mbayuuʼ Nabot xa̱bu̱ Jezreel náa kiʼdu uva”.
8 Ikhú Jezabel niʼnirámáʼ mbá i̱yi̱i̱ʼ ga̱jma̱a̱ numuu mbiʼyuu Acab, ma̱ngaa nigíʼma tséyúu má ikhaa. Nda̱wa̱á nikuʼma náa inún bi̱ kuya̱ edxu̱u̱ ga̱jma̱a̱ náa inún xa̱bu̱ bi̱ guáʼdáá numún bi̱ kúwá náa xuajñuu Nabot.
9 Niʼnirámáʼ náa i̱yi̱i̱ʼ: “Guthu̱u̱n xa̱bu̱ dí xúpiʼtsu, gu̱ni̱ dí Nabot magi̱ʼi̱ náa inún xa̱bu̱ xuajin.
10 Gu̱ni̱ dí a̱jmi̱i̱n xa̱bu̱ bi̱ raguáʼdáá numún matri̱gi̱i̱n náa inuu, ikhiin muthi rígi̱ ga̱jma̱a̱ numuu ‹¡Niratátsríguíi Dios ga̱jma̱a̱ rey!›. Nda̱wa̱á guríya̱a̱ʼ rexa̱a̱, guxíyáa ga̱jma̱a̱ itsí”.
11 Ikha jngóo, xa̱bu̱ bi̱ kúwá náa xuajin rúʼko̱, bi̱ kuya̱ edxu̱u̱ ga̱jma̱a̱ bi̱ guáʼdáá numún nini̱ xó má eʼthí náa i̱yi̱i̱ʼ dí nikuʼma Jezabel.
12 Nithúún xa̱bu̱ dí xúpiʼtsu ga̱jma̱a̱ nini̱ dí Nabot magi̱ʼi̱ náa inún xa̱bu̱ xuajin.
13 Ikhú niguáʼnú a̱jmi̱i̱n xa̱bu̱ bi̱ raguáʼdáá numún nitri̱gi̱i̱n náa inuu Nabot, nigi̱ʼdi̱i̱ nithi dí raʼkhí ga̱jma̱a̱ numuu náa inún xúgíinʼ xa̱bu̱ xuajin. Nithi: “¡Nabot niʼtátsríguíi Dios ga̱jma̱a̱ rey!”. Ikhú niriya̱a̱ʼ náa rexo̱o̱ xuajin, nixiyáa ga̱jma̱a̱ itsí.
14 Nda̱wa̱á nixuʼma ajngáa rígi̱ náa Jezabel: “Nabot nixiyáa ga̱jma̱a̱ itsí”.
15 Índo̱ Jezabel niʼdxuun dí nikháñúu Nabot, ikhú niʼthúu̱n Acab: “Ga̱ʼcha̱a̱ʼ, ayáa mbayuuʼ Nabot xa̱bu̱ Jezreel náa kiʼdu uva dí na̱nguá nindoo gágújua̱a̱ʼ. Numuu dí Nabot nánguá xtáa. Nikháñúu má”.
16 Índo̱ Acab niʼdxuun dí Nabot nikháñúu, mbá nacha̱ ni̱jkha̱ náa mbayuuʼ dí kiʼdu uva mu maguanúu ga̱jma̱a̱ ikhaa.
17 Mú Elías xa̱bu̱ tisbita nigruigú ajngóo Jeobá rígi̱:
18 “Ayuʼ ga̱jma̱a̱ arajtaa mu mataxkamaminaʼ ga̱jma̱a̱ʼ Acab, rey ndrígóo Israel bi̱ xtáa náa Samaria. Ikhaa xtáa náa mbayuuʼ Nabot náa kiʼdu uva. Ni̱jkha̱ ikhí mu maguanúu ga̱jma̱a̱.
19 Gíʼmaa dí maratha̱a̱n: ‹Rígi̱ dí naʼthí Jeobá: “Nitaxíyáa mbáa xa̱bu̱ ma̱ngaa ndayá káyííʼ mbayuuʼ ráʼ.”› Nda̱wa̱á aratháán: ‹Rígi̱ dí naʼthí Jeobá: “Náa má nixtííʼ xu̱wánʼ eʼdiuu Nabot, ikhí má gúxtííʼ eʼdiaaʼ mangáán”›”.
20 Acab niʼthúu̱n Elías: “¡Nitaxkamún xa̱bu̱ sia̱nʼ ndrígóʼ!”. Elías niriʼñuu: “Aán, nixkamán. Dios niʼthí: ‹Ga̱jma̱a̱ numuu rí nitani̱ dí ra̱májánʼ náa iduu Jeobá,
21 makuʼmá mbá gamiéjunʼ náa ikháán, magíjxi̱i̱ mbá kayuuʼ ga̱jma̱a̱ ma̱ni̱ gámbíin náa Israel xúgíinʼ xa̱bekha* bi̱ naguwáʼ náa Acab, asndu bi̱ tséjmiin gúmbayúmíjná ga̱jma̱a̱ bi̱ guabiinʼ.
22 Ma̱ni̱ gámbáa guʼwáaʼ xó má niguámbáa goʼwóo Jeroboán a̱ʼdióo Nebat ga̱jma̱a̱ xó má niguámbáa goʼwóo Baasá a̱ʼdióo Ahíya, numuu dí nitani̱ dí makásnga̱ñu̱ʼ ga̱jma̱a̱ nitani̱ dí xa̱bu̱ Israel muxuʼdamíjna̱ aʼkhá›.
23 Jeobá ma̱ngaa niʼthí dí magíʼnuu Jezabel: ‹Xu̱wánʼ gúphii Jezabel náa mbaaʼ Jezreel.
24 Bi̱ naguwáʼ náa Acab bi̱ gákháñún náa xuajin muphu̱u̱n xu̱wánʼ. Mú bi̱ gákháñún náa xanáá muphu̱u̱n ñu̱ʼu̱ bi̱ jngruigu̱u̱n rijma̱a̱.
25 Na̱nguá nixtáa nimbáa bi̱ xóo Acab, bi̱ ndiyáʼ* maʼni dí ra̱májánʼ náa iduu Jeobá rí a̱ʼgiu̱u̱ Jezabel niʼniuu dí maʼni.
26 Niʼni dí raʼkhí kayuuʼ dí ndiʼyamajkhún xándú bi̱ xkawi̱i̱nʼ, xó má nini̱ xúgíinʼ amorreos bi̱ Jeobá nixkawíin náa inún israelitas›”.
27 Índo̱ Acab niʼdxuun ajngáa rígi̱, nixkuʼtu xtíñuu ga̱jma̱a̱ nigúwúunʼ xtíin mi̱du̱.* Tákuiʼtsu, ga̱jma̱a̱ nibóoʼ náa tsu̱du̱u̱ xtíin mi̱du̱, ngíná inuu jngruigo̱o̱.
28 Ikhú Elías xa̱bu̱ tisbita nigruigú ajngóo Jeobá rígi̱:
29 “Lá nitayáá xóo nikruígúminaʼ Acab ni̱ni̱ ráʼ. Ga̱jma̱a̱ numuu dí nikruígúminaʼ náa inuʼ, xáʼkhá ka̱yo̱ʼ gamiéjunʼ índo̱ ikhaa xtáa ndaʼya. Ma̱ʼkhá ka̱yo̱ʼ gamiéjunʼ náa goʼwóo índo̱ gáxtáa raʼtáñajunʼ a̱ʼdióo”.
Mbaʼa nota
^ Náa ajngáa hebreo naʼthí, “bi̱ numijxújmún náa pared”. Ajngáa hebreo rígi̱ naʼthí ga̱jma̱a̱ numún xa̱bekha.
^ Náa ajngáa hebreo naʼthí, “bi̱ nigujuamínáʼ maʼni”.
