Timbá libro ndrígu̱ún Reyes 5:1-18
5 Índo̱ Hiram rey ndrígóo Tiro niʼdxawun dí Salomón nigi̱ʼi̱ rey nda̱wa̱á dí anu̱u̱,* nikuʼmiin xa̱bi̱i̱ magún gúyáá, numuu dí Hiram nimbájxu̱u̱ ga̱jma̱a̱* David.
2 Ikhú Salomón nikuʼma ajngáa rígi̱ náa Hiram:
3 “Ikháán natayáá má májánʼ dí anu̱ʼ David táʼngo̱o̱ gáʼni mbá guʼwá náa marigá mbiʼyuu Jeobá Dios ndrígóo. Ga̱jma̱a̱ numuu rí xa̱bu̱ bi̱ kúwá náa mbájndi nixtáa nigiʼdu̱u̱n gajmiún. Asndu índo̱ Jeobá nigruigi̱i̱n xa̱bu̱ sia̱nʼ náa agoo rajkhúu.
4 Mú dí xúgi̱ Jeobá niʼni marigá dí tsímáá náa mbájndi xtáá, nda̱a̱ nimbá dí gamíi ga̱jma̱a̱ na̱nguá rígá nimbá dí ra̱májánʼ.
5 Ikha jngóo gúʼdoo awan ma̱ni̱ mbá guʼwá náa marigá mbiʼyuu Jeobá Dios ndrígóʼ, xó má Jeobá nikudaminaʼ náa anu̱ʼ David índo̱ niʼthúu̱n: ‹A̱ʼdiáaʼ bi̱ maʼgíiʼ náa xílí* dí naratáñajunʼ, ikhaa maʼni mbá guʼwá náa marigá mbiʼyuʼ›.
6 Ikha jngóo dí xúgi̱ ndayóʼ ixi̱, ataxúʼmiin xa̱bia̱a̱ʼ dí murujtu ixi̱ cedro dí rígá náa Líbano. Xa̱bi̱ʼ muñajunʼ gajmiún xa̱bia̱a̱ʼ, ga̱jma̱a̱ ikhúún ma̱ni̱ númun xa̱bia̱a̱ʼ nguáthá má gárata̱ ikháán. Numuu dí ikháán má natayáá májánʼ dí ndawa̱a̱ nimbáa náa ikháanʼxu̱ bi̱ najmañuu marujtu ixi̱ xóo xa̱bu̱ sidonios”.
7 Índo̱ Hiram niʼdxuun ajngáa rí niʼthí Salomón ra̱ʼkhá tháán nidxuu ga̱jma̱a̱ niʼthí: “¡Gaguma mba̱a̱ Jeobá xúgi̱, numuu dí nixniúu David mbáa ada̱ bi̱ najmañuu bi̱ maʼtáñajunʼ náa xuajin dí ra̱ʼkhá tháán mba̱a̱ rígi̱!”.
8 Ikha jngóo Hiram nikuʼma ajngáa rí muthán Salomón: “Nidxawuun dí niratá, ma̱ni̱ xúgíʼ dí naratá, maxna̱a̱ʼ ixi̱ cedro ga̱jma̱a̱ ixi̱ enebro.
9 Xa̱bi̱ʼ maguajtáan náa Líbano kudúún ixi̱, markawún náa lamáa.* Muruʼwa̱a̱ ixi̱ mu maʼga kruámuuʼ náa lamáa asndu makidiin kudúún náá má gárata̱ ikháán. Ikhí gúrajkui̱i̱ʼ mu ikháán midxu̱u̱ʼ xtaaʼ ga̱jma̱a̱ ikháán maraxnu̱ʼ ganitsu dí gánda̱ʼa̱a̱ mu mu̱phu̱ bi̱ kúwá náa goʼwóʼ”.
10 Ikha jngóo Hiram nixnúu Salomón xúgíʼ ixi̱ cedro ga̱jma̱a̱ enebro rí ikhaa nandoo.
11 Mámbá tsiguʼ Salomón naxnúu Hiram rí mu̱phu̱ bi̱ kúwá náa goʼwóo 4 millón 400 mil litro* trigo ga̱jma̱a̱ 4,400 litro* aceite dí oliva dí itháan májánʼ.*
12 Jeobá nixnúu dí majmañuu Salomón xó má nikudaminaʼ, Hiram ga̱jma̱a̱ Salomón nimbánúún ga̱jma̱a̱ nikúwá tsímáá.
13 Rey Salomón ndiñíinʼ mbá 30,000 xa̱bekha bi̱ kúwá náa mbá xúgíʼ Israel mu muñajunʼ gakhi̱i̱.
14 Nakuʼmiin magún náa Líbano mbá 10,000 xa̱bekha rí mbá gu̱nʼ. Mbá gu̱nʼ kúwá náa Líbano ga̱jma̱a̱ a̱jma̱ igu̱nʼ kúwá náa guʼwún. Adoniram kayá edxu̱u̱ náa bi̱ nuñajunʼ gakhi̱i̱.
15 Salomón nigiʼdiin mbá 70,000 bi̱ nurangoo ga̱jma̱a̱ mbá 80,000 bi̱ nuxui̱ʼta̱ itsí náa kúbá.
16 Ma̱ngaa, mbá 3,300 bi̱ kuya̱ edxu̱u̱ bi̱ Salomón nigruigi̱i̱n mu mbuyáá xóo nuñajunʼ xa̱bu̱.
17 Rey nikuʼmiin rí magún gúndiwíi itsí mba̱ʼu̱, itsí rí numuu, mu magi̱ʼi̱ rajkhúu guʼwá ga̱jma̱a̱ itsí rí niwiʼtá.
18 Ikha jngóo ñumbáá bi̱ nigiʼdiin Salomón ga̱jma̱a̱ Hiram gajmiún guebalitas nixui̱ʼtha̱ itsí, ga̱jma̱a̱ nini̱ májáánʼ ixi̱ ga̱jma̱a̱ itsí mu maguma guʼwá.
Mbaʼa nota
^ O “tátée”.
^ O “nindoo kaʼyoo”.
^ O “trono”.
^ O “mar”.
^ Náa ajngáa hebreo naʼthí, “20 coros”.
^ O “aceite dí niguma ga̱jma̱a̱ aceitunas dí nigixmbi̱i̱”.
