Timbá libro ndrígu̱ún Reyes 8:1-66
8 Nákha mbiʼi rúʼko̱, Salomón nigímbíin bi̱ kuya̱ edxu̱u̱ náa Israel: Mbá xúgíinʼ bi̱ kuya̱ edxu̱u̱ náa xuajin majkhaʼ* ga̱jma̱a̱ bi̱ kuya̱ edxu̱u̱ náa guʼwún anu̱ún náa xuajin Israel. Niguwáʼ gúyáá rey Salomón náa Jerusalén mu magúun kuñu̱u̱n arca* dí nimbánuu ndrígóo Jeobá asndu náa Xuajñuu David, xóo muʼthá, Sion.
2 Xúgíinʼ xa̱bu̱ Israel nigimbíin náa inuu rey Salomón índo̱ xtáa rarígá ndxa̱a̱,* nákha gu̱nʼ etanim,* xóo muʼthá, dí maʼni juwan gu̱nʼ.
3 Ikha jngóo xúgíinʼ bi̱ kuya̱ edxu̱u̱ náa Israel niguwáʼ, ga̱jma̱a̱ ndxajkun nixujxi̱ Arca.
4 Nigún kuñu̱u̱n Arca ndrígóo Jeobá, guʼwá xtíin náa nagimbíi̱n ga̱jma̱a̱ mbá xúgíʼ rí najmaa dí mikaʼwu dí rígá náa guʼwá xtíin. Nigún kudúún ndxajkun ga̱jma̱a̱ levitas.
5 Rey Salomón gajmíi̱n mbá xúgíinʼ xa̱bu̱ Israel, bi̱ nijuiʼthúún dí magimbíin gajmíi̱n, kúwá náa inuu Arca. Mugu̱ ga̱jma̱a̱ xedi̱ bi̱ kúwá majuixnájxi̱i̱n, ra̱ʼkhá tháán mbaʼin dí asndu tséʼngo̱o̱ magixnii.
6 Ikhú ndxajkun nigún kuñu̱u̱n arca dí nimbánuu ndrígóo Jeobá náa cuarto dí gídáʼ itháan awúún náa guʼwá, náa rí phú Mikaʼwu, náa agoo xpíjpiúún querubines.
7 Xpíjpiúún querubines juáʼwíi náa rígá Arca, ikha jngóo querubines nuruguáá Arca ga̱jma̱a̱ ixu̱u̱.
8 Ra̱ʼkhá tháán mbi̱jua̱ ixu̱u̱ rí inuu nakujmaa asndu náa cuarto dí Mikaʼwu, náa inuu cuarto dí gídáʼ itháan awúún, mú tsékujmaa asndu rexa̱a̱. Ikhí rígá asndu dí mbiʼi xúgi̱.
9 Nda̱a̱ i̱mba̱ náa Arca i̱ndó a̱jma̱ itsí wajpa dí Moisés nigruiʼyáʼ náa Horeb, índo̱ Jeobá nimbánuminaʼ ga̱jma̱a̱ xuajñuu Israel mbiʼi dí nigájnuu náa Egipto.
10 Índo̱ ndxajkun nigájni̱ín náa dí mikaʼwu, ikhú du̱u̱n nijnííʼ náa goʼwóo Jeobá.
11 Ndxajkun na̱nguá nindoo maguanún muñejunʼ ikhí ga̱jma̱a̱ numuu du̱u̱n, numuu dí agiuuʼ Jeobá nijnííʼ náa goʼwóo Jeobá.
12 Ikhú Salomón niʼthí: “Jeobá niʼthí dí ikhaa maxtáa náa majñu̱u̱ʼ du̱u̱n skuniʼ.
13 Niʼngo̱ʼ ni̱ni̱ mbá guʼwá mitsaanʼ* náa maraxtaa, mbá rí mbajyúuʼ náa maraxtaa asndu kámuu”.
14 Nda̱wa̱á rey nitangayi̱i̱ ga̱jma̱a̱ nigíʼdúu niʼni tsajkurámíinʼ mbá xúgíinʼ xa̱bu̱ Israel bi̱ guájun ikhí.
15 Niʼthí: “Gaguma mba̱a̱ Jeobá, Dios ndrígóo Israel, bi̱ niʼnimbánuu ga̱jma̱a̱ ñawúunʼ dí nikudaminaʼ náa anu̱ʼ* David:
16 ‹Asndu nákha mbiʼi dí xuajñunʼ Israel niríya̱a̱ʼ náa Egipto, na̱nguá niraʼwi̱i̱ nimbá xuajin dí rígá náa mbá xúgíʼ xuajin majkhaʼ ndrígóo Israel mu maʼni mbá guʼwá náa maguma mba̱a̱ mbiʼyuʼ. Mú dí xúgi̱, niraʼwi̱i̱ David mu maʼtáñajúúnʼ xa̱bu̱ xuajñunʼ Israel›.
17 Náa a̱jkiu̱u̱n anu̱ʼ David nigájnuu dí maʼni mbá guʼwá náa marigá mbiʼyuu Jeobá, Dios ndrígóo Israel.
18 Mú Jeobá niʼthúu̱n anu̱ʼ David: ‹Nigájnuu náa a̱jkia̱a̱nʼ dí matani̱ mbá guʼwá náa maguma mba̱a̱ mbiʼyuʼ, májánʼ má nindxu̱u̱ dí xúʼko̱ kaʼnii nindaaʼ matani̱.
19 Mú raʼkháa ikháán gátani̱ guʼwá. A̱ʼdiáaʼ* bi̱ gáraʼdaa ikhaa gáʼni guʼwá náa maguma mba̱a̱ mbiʼyuʼ›.
20 Jeobá niʼnimbánuu dí nikudaminaʼ, numuu dí ikhúún niriʼkuriya̱a̱ʼ anu̱ʼ David ga̱jma̱a̱ niʼgúnʼ náa xílí* dí nutañajunʼ náa Israel, xó má nikudaminaʼ Jeobá. Ma̱ngaa ni̱ni̱ mbá guʼwá náa marigá mbiʼyuu Jeobá, Dios ndrígóo Israel,
21 ikhí ni̱ni̱ mújúunʼ náa marigá Arca, náa kajti dí Jeobá nimbánuu gajmíi̱n wajin xiʼñúlú índo̱ niguwíin náa ku̱ba̱ʼ Egipto”.
22 Ikhú Salomón niwi̱ji̱ náa inuu dí nakarámáʼ tsigijñaʼ náa inuu Jeobá, náa inún mbá xúgíinʼ xa̱bu̱ Israel. Nikujxi̱ ñawúunʼ mekhuíí,
23 ga̱jma̱a̱ niʼthí: “Tátá Jeobá, Dios ndrígóo Israel. Ndawa̱a̱ nimbáa Dios xóo ikháán rijma̱a̱ náa mekhuíí ni má mbayííʼ náa ku̱ba̱ʼ. Ikháán natanimbaníí dí nataxúdaminaʼ ga̱jma̱a̱ natasngájmún dí nandaaʼ xtañún* xa̱bia̱a̱ʼ, bi̱ jngruigu̱u̱n náa kamba̱a̱ʼ ga̱jma̱a̱ xúgíʼ a̱jkiu̱ún.
24 Nitanimbaníí dí nitaxúdaminaʼ náa xa̱bia̱a̱ʼ David bi̱ nindxu̱u̱ anu̱ʼ. Nitaxúdaminaʼ ga̱jma̱a̱ rawaanʼ, dí xúgi̱ nitanimbaníí ga̱jma̱a̱ ñawáanʼ.
25 Dí xúgi̱ rá, Tátá Jeobá, Dios ndrígóo Israel, atanimbaníí dí nitaxúdaminaʼ náa xa̱bia̱a̱ʼ David, bi̱ nindxu̱u̱ anu̱ʼ, índo̱ niratháán: ‹Á mu ejña̱a̱nʼ najngrui̱gu̱u̱n náa kambo̱ʼ xó má nijngrui̱ga̱a̱ʼ ikháán, maxtáa má xúʼko̱ náa inuʼ mbáa bi̱ na̱ʼkha̱ náa ikháán bi̱ magi̱ʼi̱ náa xílí rí nutañajunʼ náa Israel›.
26 Dí xúgi̱, Dios ndrígóo Israel, mbá péñu,* gambanúu dí nitaxúdaminaʼ náa xa̱bia̱a̱ʼ David, bi̱ nindxu̱u̱ anu̱ʼ.
27 Lá maxtáa Dios náa tsu̱du̱u̱ ku̱ba̱ʼ ráʼ. Asndu mekhu dí itháán tsídánʼ tséʼngo̱o̱ maraxtaa ikháán, ¡iwáála náa guʼwá dí ikhúún ni̱ni̱ rá!
28 Dí xúgi̱, atadxawíín dí naʼtájkháan ga̱jma̱a̱ dí nanda̱ʼa̱a̱ʼ xa̱bia̱a̱ʼ bugi̱. Tátá Jeobá, Dios ndrígóʼ, atadxawíín dí nanda̱ʼa̱a̱ʼ matambáyíí ga̱jma̱a̱ dí naʼtájkháan xa̱bia̱a̱ʼ bugi̱ náa inaaʼ dí mbiʼi xúgi̱.
29 Atiejxi̱i̱ mbiʼíí mbruʼun guʼwá rígi̱, náa dí ikháán niratá ‹Mbiʼyuʼ marigá ikhí› mu matadxawíín dí naʼtájkháan xa̱bia̱a̱ʼ náa guʼwá rígi̱.
30 Atadxawíín dí nanda̱ʼa̱a̱ʼ xa̱bia̱a̱ʼ bugi̱ ga̱jma̱a̱ dí nanda̱ʼa̱a̱ʼ xuajñanʼ Israel náa jmbuu guʼwá rígi̱. Atadxawún asndu mekhuíí náa xtaa. Atadxawún ga̱jma̱a̱ atani̱ mba̱a̱ a̱jkia̱a̱nʼ xtayuxuʼ.
31 Á mu dí mbáa xa̱bu̱ nakiéʼkúun ga̱jma̱a̱ i̱mba̱a̱, nutsudaa dí maxná ajngóo,* á mu dí tséʼnimbánuu mamínuuʼ, á mu dí nda̱wa̱á dí nixná ajngóo nato̱ʼo̱o̱ ga̱jma̱a̱ nawi̱ji̱ náa inuu dí nakarámáʼ tsigijñaʼ dí rígá náa guʼwá rígi̱,
32 atadxawíín asndu mekhuíí ga̱jma̱a̱ atanimbaníí numún xa̱bia̱a̱ʼ: Aratá dí gíʼdoo aʼkhúun xa̱bu̱ ra̱májáanʼ ga̱jma̱a̱ atani̱ dí ra̱májánʼ dí naʼni matanga̱a̱ náa edxu̱u̱, aratá dí ragíʼdoo aʼkhúun xa̱bu̱ májáanʼ ga̱jma̱a̱ atani̱ numa̱a̱ xó má dí naʼni.
33 Á mu dí xa̱bu̱ xuajñaanʼ Israel tséʼngu̱u̱n gúni̱ gajmiún xa̱bu̱ sia̱nʼ ga̱jma̱a̱ numuu dí nakiéʼkúún má xúʼko̱ náa ikháán, mú á mu natangiín, nuni̱ mba̱a̱ mbiʼyaaʼ, nutajkháan ga̱jma̱a̱ nunda̱ʼa̱a̱ʼ dí matambáñún náa guʼwá rígi̱,
34 ikhú atadxawún asndu mekhuíí, atani̱ mba̱a̱ a̱jkia̱a̱nʼ xtayáá dí nikiéʼkhúún xa̱bu̱ xuajñanʼ Israel ga̱jma̱a̱ aya̱a̱ʼ xtiin náa ku̱ba̱ʼ dí niraxnún wajin xiʼñúúnʼ.
35 Índo̱ mekhu gágúgoo ga̱jma̱a̱ ni xáxnúu ruʼwa, numuu dí nakiéʼkúún má xúʼko̱ náa ikháán, mú á mu nutajkháan náa jmbuu guʼwá rígi̱, nuni̱ mba̱a̱ mbiʼyaaʼ ga̱jma̱a̱ nuniña̱a̱nʼ aʼkhá dí nuni̱, numuu dí ikháán nitani̱ dí muxruigumíjná,
36 ikhú atadxawún asndu mekhuíí ga̱jma̱a̱ atani̱ mba̱a̱ a̱jkia̱a̱nʼ aʼkhá dí nuni̱ xa̱bia̱a̱ʼ, aʼkhúun xuajñanʼ Israel, numuu dí ikháán matasngajmún kamba̱a̱ májánʼ náa gíʼmaa majngruigu̱u̱n, atani̱ dí maxnúu ruʼwa náa tsu̱du̱u̱ ku̱ba̱ʼ dí niraxnáá xuajñanʼ maʼni mbayuuʼ.
37 Á mu dí náa mbaaʼ Israel narígá ewiʼ, nandii, naxnúu giñánʼ mijkha, na̱ʼkha̱ e̱wi, natu̱ʼu̱u̱n tsíʼbu,* o xa̱bu̱ sia̱nʼ nuruguamaʼáan náa mbá xuajin dí rígá náa mbaaʼ o á mu narígá i̱mba̱ gamiéjunʼ o nandii,
38 tséʼniuu má xóo gáʼtájkáan, dí gánda̱ʼa̱a̱ʼ mbáa xa̱bu̱ o mbá xúgíinʼ xa̱bu̱ xuajñanʼ Israel índo̱ gúxuʼwíi ñawúúnʼ náa jmbuu guʼwá rígi̱ (numuu rí mámbáa ndaʼyoo xóo e̱ʼkhu̱ a̱jkiu̱u̱n),
39 ikhú atadxawíín asndu mekhuíí, asndu náa xtaa, atani̱ mba̱a̱ a̱jkia̱a̱nʼ xtañún ga̱jma̱a̱ ataniu̱u̱n dí májánʼ. Atani̱ numa̱a̱ mámbáa xó má dí naʼni, numuu dí ikháán natatsinuuʼ a̱jkiu̱ún (mbáwíín ikháán natatsinuuʼ májánʼ a̱jkiu̱u̱n mámbáa xa̱bu̱),
40 mu xúʼko̱ mamiñún kuyaaʼ náa mbá xúgíʼ mbiʼi dí gákúwá náa ku̱ba̱ʼ dí niraxnún wajin xiʼñúxu.
41 Ma̱ngaa ga̱jma̱a̱ numuu xa̱bu̱ na̱ʼkha̱á bi̱ na̱nguá xtáa náa xuajñanʼ Israel, bi̱ na̱ʼkha̱ náa xuajin tsínguáʼ ga̱jma̱a̱ numuu mbiʼyaaʼ
42 (numuu dí mudxawíín ga̱jma̱a̱ numuu mbiʼyaaʼ, ma̱ngaa ga̱jma̱a̱ tsiaki̱i̱ dí gíʼdoo ñawáanʼ), na̱ʼkha̱ ga̱jma̱a̱ naʼtájkáan náa guʼwá rígi̱,
43 atadxawíín asndu mekhuíí, asndu náa xtaa, atani̱ xúgíʼ dí gánda̱ʼa̱a̱ʼ xa̱bu̱ na̱ʼkha̱á, mu xúʼko̱ xúgíʼ xuajin dí rígá náa tsu̱du̱u̱ ku̱ba̱ʼ muniʼnuuʼ mbiʼyaaʼ, mamiñún kuyaaʼ xó má eʼni xuajñanʼ Israel ga̱jma̱a̱ mbuyáá dí mbiʼyaaʼ nigri̱ga̱a̱ náa guʼwá dí ni̱ni̱.
44 Á mu xa̱bu̱ xuajñanʼ nagún gúxmijná gajmiún xa̱bu̱ sia̱nʼ ndrígu̱ún náa kamba̱a̱ dí nitaxúʼmiin ga̱jma̱a̱ nutakáñáaʼ ikháán Jeobá náa jmbuu xuajin dí nitraʼwíí ga̱jma̱a̱ náa jmbuu guʼwá dí ni̱ni̱ mu maguma mba̱a̱ mbiʼyaaʼ,
45 ikhú atadxawíín asndu mekhuíí dí gútajkáan, dí gúnda̱ʼa̱a̱ʼ ga̱jma̱a̱ ataniu̱u̱n dí májánʼ.
46 Á mu dí nakiéʼkúún náa ikháán (numuu dí ndawa̱a̱ nimbáa bi̱ tsékiéʼkúun) ga̱jma̱a̱ ikháán nakhásngaña̱a̱nʼ xtañún, naraxnájxi̱i̱n náa xa̱bu̱ sia̱nʼ ga̱jma̱a̱ ikhiin nagún kudiin náa xuajñún tséʼniuu á mu tsínguáʼ o mijngii,
47 ga̱jma̱a̱ ikhiin nugíiʼ a̱jkiu̱ún índo̱ kúwá náa xuajin dí ni̱jkha̱ kiʼdiin, natangiín náa ikháán ga̱jma̱a̱ nunda̱ʼa̱a̱ dí matambáñún asndu náa xuajñún xa̱bu̱ sia̱nʼ, nutha̱nʼ ‹Nixuʼdámíjna̱xu̱ aʼkhá, nikiéʼkuxuʼ, nini̱xu dí raʼkhí kayuuʼ›,
48 á mu natangiín náa ikháán ga̱jma̱a̱ xúgíʼ a̱jkiu̱ún, ga̱jma̱a̱ xúgíʼ xóo nindxu̱ún* náa xuajñún xa̱bu̱ sia̱nʼ náa dí ni̱jkha̱ kiʼdiin, nutakáñaaʼ náa jmbuu ku̱ba̱ʼ dí niraxnún wajin xiʼñúúnʼ ga̱jma̱a̱ náa xuajin dí ikháán nitraʼwíí, ma̱ngaa náa guʼwá dí ikhúún ni̱ni̱ mu maguma mba̱a̱ mbiʼyaaʼ,
49 ikhú atadxawíín asndu mekhuíí, asndu náa xtaa, dí nutajkháan ga̱jma̱a̱ dí nunda̱ʼa̱a̱ʼ matambáñún, ataniu̱u̱n dí májánʼ,
50 atani̱ mba̱a̱ a̱jkia̱a̱nʼ xtayáá xuajñanʼ dí nikiéʼkúun náa ikháán. Atani̱ mba̱a̱ a̱jkia̱a̱nʼ xtayáá mbá xúgíʼ dí nikiéʼkhún náa ikháán. Matani̱ dí xa̱bu̱ sia̱nʼ ndrígu̱ún muniu̱u̱n dí májánʼ ga̱jma̱a̱ magáwíinʼ a̱jkiu̱ún kuñún,
51 (numuu dí ikhiin nindxu̱ún xuajñanʼ dí kiejunʼ, ikháán nitrawíin náa Egipto, náa horno dí nurkuiya̱ ajua̱nʼ).
52 Atadxawíín* dí nanda̱ʼa̱a̱ʼ xa̱bia̱a̱ʼ ga̱jma̱a̱ xuajñanʼ Israel, atadxawún má xúʼko̱ índo̱ gútha̱nʼ.*
53 Numuu dí ikháán nitani̱ wájíi xóo xuajñanʼ náa mbá xúgíʼ xuajin dí rígá náa tsu̱du̱u̱ ku̱ba̱ʼ, xó má niratá náa xa̱bia̱a̱ʼ Moisés índo̱ nitrawíin náa Egipto wajin xiʼñúxu, Tátá Jeobá bi̱ itháán mba̱a̱”.
54 Índo̱ Salomón niguámbóo niʼtájkháan xúgíʼ rígi̱ náa inuu Jeobá ga̱jma̱a̱ dí nindo̱ʼo̱o̱ náa inuu dí nakarámáʼ tsigijñaʼ náa Jeobá, nitujxi̱i̱ náa nismbáti̱go̱o̱ rakujxi̱ ñawúunʼ mekhuíí.
55 Índo̱ niwi̱ji̱, niʼni tsajkurámíinʼ mbá xúgíinʼ xa̱bu̱ Israel, niʼthí gakhi̱i̱:
56 “Gaguma mba̱a̱ Jeobá, bi̱ nixnúu xuajñuu Israel mbá náa mbayáa jxu̱u̱ʼ xó má ikhaa nikudaminaʼ. Niʼnimbánuu xúgíʼ ajngáa májánʼ dí nikudaminaʼ maʼni náa xa̱bi̱i̱ Moisés.
57 Jeobá Dios ndrígúlú gáxtáa ga̱jma̱á nindxu̱lú xó má nixtáa gajmíi̱n wajin xiʼñúlú. Nditháan xániñulú ni má xániñatigáanʼlú.
58 Gaʼni dí a̱jkiu̱lú makuʼmaminaʼ náa ikhaa, mu xúʼko̱ majngruigulú náa xúgíʼ kambo̱o̱ ga̱jma̱a̱ muʼnimbulú kiʼtáñajunʼ ndrígóo, xtángoo ga̱jma̱a̱ dí nikuʼmiin munimbaníí wajin xiʼñúlú.
59 Ga̱jma̱a̱ Jeobá Dios ndrígúlú gágiwa̱a̱nʼ a̱jkiu̱u̱n mbiʼíí mbruʼun ajngáa dí nijmuʼ mu ma̱ndo̱ʼo̱o̱ Jeobá, mu xúʼko̱ ikhaa maʼniuu dí májánʼ xa̱bi̱i̱ ga̱jma̱a̱ xuajñuu Israel xó má dí gáʼyóoʼ mámbá mbiʼi.
60 Xúʼko̱ xúgíinʼ xa̱bu̱ xuajin bi̱ kúwá náa tsu̱du̱u̱ ku̱ba̱ʼ mbuyáá dí Jeobá nindxu̱u̱ Dios bi̱ gajkhun. ¡Ndawa̱a̱ i̱mba̱a̱!
61 Gu̱ni̱ ñajuunʼ Jeobá Dios ndrígúlú ga̱jma̱a̱ xúgíʼ a̱jkia̱la, gunimbaníí xtángoo ga̱jma̱a̱ gu̱nimba̱la kiʼtáñajunʼ ndrígóo xó má kuwáanʼla runi̱ xúgi̱”.
62 Rey gajmíi̱n mbá xúgíinʼ xa̱bu̱ Israel ra̱ʼkhá tháán mba̱a̱ tsigijñaʼ gamajkhu nixnajxi̱ náa inuu Jeobá.
63 Salomón nixnájxi̱ tsigijñaʼ gamajkhu náa inuu Jeobá tsigijñaʼ dí tsímáá:* Mbá 22,000 xedi̱ ga̱jma̱a̱ mbá 120,000 mugu̱. Xúʼko̱ kaʼnii niʼni dí rey gajmíi̱n xúgíinʼ israelitas nini̱ ndxo̱o̱ goʼwóo Jeobá.
64 Nákha ikhú, rey ndiyóoʼ dí maʼni kaʼwi̱i̱ náa ta̱pho̱o̱ rexo̱o̱ guʼwá dí awúún náa goʼwóo Jeobá, numuu dí ikhí ndiyóoʼ maxnájxi̱ tsigijñaʼ dí nakarámáʼ, tsigijñaʼ dí tsígáʼ ga̱jma̱a̱ xtangoo tsigijñaʼ dí tsímáá. Náa nakarámáʼ tsigijñaʼ dí niguma ga̱jma̱a̱ cobre dí rígá náa inuu Jeobá tséʼngo̱o̱ mu matrámáʼ tsigijñaʼ dí nakarámáʼ, tsigijñaʼ dí tsígáʼ ga̱jma̱a̱ xtangoo tsigijñaʼ dí tsímáá.
65 Mbiʼi rúʼko̱, Salomón niʼni ndxa̱a̱ gajmíi̱n mbá xúgíinʼ xa̱bu̱ Israel, náa inuu Jeobá Dios ndrígulú. Ra̱ʼkhá tháán mbaʼin xa̱bu̱ bi̱ naguwáʼ tsínguáʼ, xóo náa Lebó-Hamat* ga̱jma̱a̱ náa mata* ndrígóo Egipto. Ndxa̱a̱ ndijyúuʼ mbá juwan mbiʼi ga̱jma̱a̱ nda̱wa̱á ndijyúuʼ i̱mbá juwan mbiʼi, ikha jngóo dí mbá xúgíʼ nindxu̱u̱ 14 mbiʼi.
66 I̱mba̱ néjtsu̱ú* niʼtángawún xa̱bu̱ xuajin, ikhiin nini̱ tsajkurámaaʼ rey, asndu nadxún nigúun guʼwún, numuu rí ndiyáá xóo Jeobá nisngájmuu dí májáanʼ a̱jkiu̱u̱n David ga̱jma̱a̱ xuajñuu Israel.
Mbaʼa nota
^ O “tribu”.
^ O “e̱jna̱”.
^ O “nagui̱i̱”.
^ O “táteʼ”.
^ Náa ajngáa hebreo naʼthí, “a̱ʼdiáaʼ bi̱ magajnúu náa tsu̱da̱a̱ʼ”.
^ O “trono”.
^ O “atani̱ mbá rí májánʼ”.
^ O “dí maʼni majuiʼtasríguíi”. Xóo muʼthá, dí gákudaminaʼ ma̱ndoo maʼni dí majuiʼtasríguíi o mamínuuʼ á mu dí naʼni nduwaʼ o tséʼnimbánuu.
^ Náa ajngáa hebreo naʼthí, “gambaʼtoo má xúʼko̱ idaaʼ”.
^ O “atadxawíín xúgíʼ dí gúnda̱ʼa̱a̱”.
^ O “índo̱ nadxu̱ʼ mata̱ʼa̱a̱ʼ náa Hamat”.
^ O “bóo”.
^ Náa ajngáa hebreo naʼthí, “migiñuʼ”. Xóo muʼthá, i̱mba̱ néjtsuu dí 14 mbiʼi.
