Timbá libro rí niʼnirámáʼ Samuel 1:1-28
1 Nixtáa mbáa efraimita náa Ramataim-Zofim,* náa mbaaʼ rí naguanúu náa kúbá Efraín, mbiʼyuu Elcaná. Nindxu̱u̱ a̱ʼdióo Jeroham, a̱ʼdióo Elihú, a̱ʼdióo Tohu, a̱ʼdióo Zuf.
2 Ikhaa nigiʼdiin a̱jmi̱i̱n gu̱ʼwi̱i̱. Mbáa mbiʼyuu Ana, ga̱jma̱a̱ i̱mba̱a̱ mbiʼyuu Peniná. Peniná nigiʼdiin e̱ji̱i̱n, mú Ana na̱nguá nigiʼdaa nimbáa.
3 Xa̱bu̱ bugi̱ natsimuu xúgíʼ tsiguʼ náa Siló mu mbaʼyamajkuu Jeobá bi̱ naʼtáñajúúnʼ ángeles ga̱jma̱a̱ mu maxnájxi̱ tsigijñaʼ. Ikhí kúwá mbá a̱jmi̱i̱n e̱ji̱i̱n Elí, Hofní ga̱jma̱a̱ Finehás, ikhiin nuni̱ ñajunʼ xóo ndxajkun náa inuu Jeobá.
4 Mbóo mbiʼi Elcaná nixnájxi̱ mbá tsigijñaʼ ga̱jma̱a̱ niruiʼta̱a̱ tsigijñaʼ rígi̱, nixnúu mbá chíʼgíiʼ* Peniná bi̱ nindxu̱u̱ a̱ʼgiu̱u̱, ga̱jma̱a̱ mbá xúgíinʼ e̱ji̱i̱n jiámá ga̱jma̱a̱ wa̱ʼxa̱ʼ,*
5 mú Ana nixnúu dí itháan májánʼ, numuu dí ikhaa nindxu̱u̱ bi̱ nandoo kaʼyoo. Mú Jeobá niʼni dí ikhaa xágiʼdiin e̱ji̱n.*
6 Peniná bi̱ nindxu̱u̱ i̱mba̱a̱ a̱ʼgiu̱u̱ Elcaná, natsíjmaa má xúʼko̱* mu xáxtáa tsímáá, numuu dí Jeobá tséʼni magiʼdiin e̱ji̱n.
7 Xúʼko̱ kaʼnii eʼniuu mámbá tsiguʼ. Mámbá índo̱ Ana natsimuu náa goʼwóo Jeobá, ra̱ʼkhá tháán etsíjmaa dí naʼniuu asndu mambi̱ya̱ʼ Ana ga̱jma̱a̱ dí xákuiʼtsu.
8 Mú Elcaná bi̱ nindxu̱u̱ ajmbio̱o̱* niʼthúu̱n: “Ana, ndíjkha dí natambi̱ya̱ʼ. Náá numuu dí tsétasiʼtsu. Ndíjkha dí xtaa ngíná.* Xtaʼdún ikhúún. Lá raʼkháa itháan májánʼ dí xtaʼdún ikhúún, ki xóo dí maraʼdiin gu̱wi̱i̱nʼ e̱jña̱a̱ʼ ráʼ.”
9 Nda̱wa̱á dí niguámbu̱u̱n nipiʼtsu náa Siló, Ana nitu̱jxu̱u̱ ga̱jma̱a̱ ni̱jkha̱. Mbiʼi rúʼko̱, ndxajkun Elí gíʼ náa riejuun guʼwá dí nduyamajkuíí* Jeobá.
10 Ana ra̱ʼkhá tháán najmúu, nagíʼdu̱u̱ naʼtákáñuu Jeobá ga̱jma̱a̱ tséwi̱ji̱i̱ rambi̱ya̱ʼ.
11 Ga̱jma̱a̱ nikudaminaʼ maʼni rígi̱: “¡Jeobá bi̱ naʼtáñajúúnʼ ángeles! Atayáá xóo xtáá ramínúuʼ. Á mu dí narmáʼáan a̱jkia̱a̱nʼ xtayoʼ ikhúún bi̱ ni̱ndxu̱ʼ xa̱bia̱a̱ʼ, á mu dí tsémbumaaʼ xtayoʼ ga̱jma̱a̱ natani̱ dí magúʼdaa mbáa dxámá, maxnia̱a̱ʼ ikháán Jeobá, mu maʼni ñajuaanʼ náa xúgíʼ mbiʼi dí gáxtáa. Ga̱jma̱a̱ nditháan xútu tátsiu̱u̱n”.
12 Índo̱ ikhaa mba̱yu̱u̱ʼ nixtáa raʼtákáñuu Jeobá, Elí nixtáa raʼyoo xóo eʼba̱a̱n rawuunʼ.
13 Ana nixtáa raʼthí náa awúu̱n a̱jkiu̱u̱n. Naʼba̱a̱n rawuunʼ mú tséwáán dí eʼthí. Elí nikumu̱u̱ dí najnga̱a̱.
14 Ikha jngóo Elí niʼthúu̱n: “Asndu nguáná gátatsiʼñáánʼ rajnga̱a̱n rá. Atatsíñáánʼ wáa ragi̱i̱n vino”.
15 Ana niriʼñuu: “¡Na̱nguá tátioʼ! Tága̱nʼ vino ni má i̱mba̱ iyaʼ najnga̱a̱. Xtáá ramínúuʼ wéñuuʼ, ikha jngóo xtáá rambáʼtoo a̱jkiu̱nʼ náa inuu Jeobá.
16 Xátayo̱ʼ xóo mbáa a̱ʼgu̱ bi̱ ragíʼdoo numuu. Á mu dí nixtáá ra̱ta̱ xúʼko̱ kaʼnii, nitha̱ numuu dí ra̱ʼkhá tháán exmiéjunʼ ga̱jma̱a̱ nagawúnʼ wéñuuʼ”.
17 A̱ʼkhu̱ Elí niʼthúu̱n: “Ayu̱u̱ʼ tsímáá, ga̱jma̱a̱ Dios ndrígóo Israel gáxnáa dí nitanda̱ʼa̱a̱”.
18 Ikhaa niʼthúu̱n: “Atayáá dí nindxu̱u̱ má xúʼko̱ májáanʼ xa̱bia̱a̱ʼ”. Ikhú Ana ni̱jkha̱a̱ ga̱jma̱a̱ nikuiʼtsu, nánguá kujmaa dí najmúu.
19 Dí i̱mba̱ néjtsuu, miʼcha̱ niguájxu̱u̱n ga̱jma̱a̱ nda̱wa̱á dí nismbati̱gu̱u̱n náa inuu Jeobá, nitangiín náa guʼwún náa Ramá. Elcaná nibóoʼ ga̱jma̱a̱ Ana, ga̱jma̱a̱ Jeobá nirmáʼáan a̱jkiu̱u̱n kaʼyoo.
20 Ana niguewáan ada̱* ga̱jma̱a̱ asndu táʼni mbá tsiguʼ* índo̱ nigiʼdaa mbáa dxámá. Nixná mbiʼyuu Samuel,* numuu dí ikhaa niʼthí: “Jeobá nindo̱ʼo̱o̱ dí maxniúʼ”.
21 Nda̱wa̱á Elcaná nitsimuu gajmíi̱n mbá xúgíinʼ bi̱ kúwá náa goʼwóo mu muxnajxi̱ tsigijñaʼ gamajkhu náa inuu Jeobá dí nuxnajxi̱ mámbá tsiguʼ, ma̱ngaa tsigijñaʼ índo̱ nuxudamíjna̱ mbá dí muni̱.
22 Mú Ana tátsimuu, numuu dí niʼthúu̱n ajmbio̱o̱: “Asndu índo̱ gániñuuʼ raʼxúuʼ ada̱, ikhú gáʼgá ka̱ya̱a̱ mu maxnáximinaʼ náa inuu Jeobá, ga̱jma̱a̱ asndu ikhú má gáguanúu ikhí”.
23 Elcaná niriʼñuu: “Atani̱ dí májánʼ má gáta̱ya̱a̱. Aguanáaʼ asndu índo̱ ada̱ gániñuuʼ raʼxúuʼ. Jeobá gáʼnimbánuu dí niratá”. Ikha jngóo, ikhaa niguanúu náa goʼwóo ga̱jma̱a̱ nixníxuu má xúʼko̱ a̱ʼdióo asndu índo̱ niniñuuʼ raʼxúuʼ.
24 Índo̱ ada̱ niniñuuʼ raʼxúuʼ, ikhú nitsimuu ga̱jma̱a̱ náa Siló. Ma̱ngaa ni̱jkha̱ kayáa mbáa a̱ʼdá xédí bi̱ ajtsú tsiguuʼ, ga̱jma̱a̱ niguéjkha̱ mbá 22 litro* harina ga̱jma̱a̱ mbá daan rayaʼ mba̱a̱ vino. Ni̱jkha̱nú ga̱jma̱a̱ ada̱ náa goʼwóo Jeobá náa Siló.
25 Ikhú nixiyáa xedi̱ ga̱jma̱a̱ nigún kuya̱a̱ ada̱ náa Elí.
26 Ana niʼthúu̱n: “¡Tátioʼ, mba̱a̱ a̱jkia̱a̱nʼ gátani̱! Tátioʼ, natha̱a̱nʼ gajkhun dí ikhúún nindxu̱ʼ a̱ʼgu̱ bi̱ nixtáa raʼtákáñuu Jeobá gi̱i̱.
27 Nitakáñuu Jeobá dí maxniúʼ ada̱ bugi̱ ga̱jma̱a̱ ikhaa nixniúʼ.
28 Dí xúgi̱ naxnajxíi náa Jeobá. Maxnatíʼñuu Jeobá náa xúgíʼ mbiʼi dí gáxtáa”.
Ga̱jma̱a̱ Elcaná nismbáti̱go̱o̱ náa inuu Jeobá.
Mbaʼa nota
^ O “Ramá, mbáa zufita”.
^ O “lajuíin”.
^ O “i̱jín go̱ʼo̱”.
^ Náa ajngáa hebreo naʼthí, “Jeobá nirugoo xtíjyúu”.
^ O “tsíyoo gáʼyoo”.
^ O “jmba̱yi̱i̱”.
^ O “ngíná eʼni a̱jkia̱a̱nʼ”.
^ Xóo muʼthá, guʼwá xtíin.
^ O “niʼni endi̱i̱”.
^ O mbáa “índo̱ ni̱jkha̱nú mbiʼi”.
^ Rí nandoo gáʼthúu̱n ‹mbiʼyuu Dios›.
