Timbá libro rí niʼnirámáʼ Samuel 10:1-27
10 Samuel niguajtuun náa ga̱jnu̱ʼ aceite ga̱jma̱a̱ nixidirámuu náa edxu̱u̱ Saúl, nixnúu beso ga̱jma̱a̱ niʼthúu̱n: “Jeobá niraʼwíín mu mbi̱ya̱ edxu̱u̱ náa xuajñuu.
2 Dí xúgi̱, índo̱ gídxúuʼ ga̱jma̱a̱ índo̱ gánújngaaʼ náa mijngii nijuiʼdi̱i̱ Raquel, náa mbañúúnʼ benjaminitas náa Zelzá, ikhí mataxkamiin a̱jmi̱i̱n xa̱bekha. Ikhiin muthaanʼ: ‹Nikujmíinʼ má búrru bi̱ xtaa ratañíinʼ. Rí xúgi̱ ana̱a̱ʼ* nánguá exmiéjuunʼ kaʼñún ikhiin, naxmiéjuunʼ kaʼyala ikháanʼ ga̱jma̱a̱ jngruigo̱o̱ raʼthí: “Ndiéjunʼ gáni̱ mu maxkama̱a̱ a̱ʼdióʼ rá.”›
3 Ikháán ayuʼ má xúʼko̱ asndu mi̱dxu̱ʼnú náa ixi̱ mba̱a̱ dí rígá náa Tabor. Ikhí mataxkamiin ajtsíin xa̱bekha bi̱ natsimún náa Betel mu mbuyamajkuíí Dios bi̱ gajkhun. Mbáa maʼga kagui̱i̱n ajtsíin e̱jín tsujthu̱nʼ, i̱mba̱a̱ kagu̱ ajtsú pan ga̱jma̱a̱ i̱mba̱a̱ kayá mbá daan rayaʼ mba̱a̱ náa ka̱jnu̱ʼ vino.
4 Ikhiin murajxa̱a̱ʼ xú káʼnii xtaa ga̱jma̱a̱ muxnaaʼ a̱jma̱ pan. Ikháán atandrigú.
5 Nda̱wa̱á dí rúʼko̱ mi̱dxu̱ʼnú náa bíjní ndrígóo Dios bi̱ gajkhun, náa kúwíin soldado filisteos. Índo̱ gídxúʼnú náa xuajin matañu̱u̱n mbá nguáthi̱i̱n profetas* kúwá raguájta̱án náa rí mitsidanʼ. Ikhiin magún ruthi xó má nuthi profetas ga̱jma̱a̱ náa inún ikhiin magún xa̱bu̱ rudi̱i̱ ajua̱nʼ dí cuerdóo, pandereta, flauta ga̱jma̱a̱ arpa.
6 Espíritu santo* ndrígóo Jeobá maʼni dí maraʼdáá tsiaki̱i̱, ikháán mangáán mi̱dxu̱ʼ raratá gajmiáanʼ xó má nuthi profetas. Mani̱ndxa̱a̱ʼ i̱mba̱ núthii kayuuʼ xa̱bu̱.
7 Índo̱ garigá xúgíʼ rígi̱, atani̱ xúgíʼ rí gándoo matani̱ numuu rí Dios bi̱ gajkhun xtáa ga̱jma̱á nindxa̱a̱ʼ.
8 Arajtaa giníín náa Guilgal. Ikhí muxkamamijnálú mu ikhúún maxnajxí tsigijñaʼ dí nakarámáʼ ga̱jma̱a̱ tsigijñaʼ dí tsímáá.* Araʼtu̱nʼ mbá juwan mbiʼi asndu índo̱ ikhúún gáʼgánú ga̱jma̱a̱ ikhú matha̱a̱n ndiéjunʼ rí gíʼmaa matani̱”.
9 Índo̱ Saúl nitanga̱a̱ ga̱jma̱a̱ niniñuuʼ Samuel, Dios niʼni rí mani̱ndxu̱u̱ i̱mba̱ núthii kayuuʼ xa̱bu̱ ga̱jma̱a̱ mbiʼi má rúʼko̱ nirígá xúgíʼ rígi̱.
10 Índo̱ nigún rutsimún náa bíjní ga̱jma̱a̱ ikhí nixkamiin mbá nguáthi̱i̱n profetas. Ga̱jma̱a̱ ikhú má espíritu santo ndrígóo Dios niʼni rí magiʼdoo tsiaki̱i̱, ikhaa ni̱jkha̱ gajmíi̱n ga̱jma̱a̱ nigíʼdu̱u̱ niʼthí xó má nuthi profetas.
11 Índo̱ xa̱bu̱ bi̱ nuniʼniiʼ Saúl nákha ginii ndiyáá rí na̱jkha̱ gajmíi̱n profetas ga̱jma̱a̱ naʼthí xó má nuthi ikhiin, nitamijná: “Ndiéjunʼ nigíʼnuu a̱ʼdióo Quis rá. Lá Saúl ma̱ngaa nindxu̱u̱ profeta ráʼ.”
12 Ikhú mbáa xa̱bu̱ bi̱ wíji̱ ikhí niʼthí: “Tsáá lá anu̱ún xúgíinʼ ikhiin xá.” Ikhí nigájnuu ajngáa rí nuthi xa̱bu̱ “Lá Saúl ma̱ngaa nindxu̱u̱ profeta ráʼ.”
13 Índo̱ niguámbóo niʼthí xó má nuthi profetas, ni̱jkha̱ náa rí mitsídánʼ.
14 Nda̱wa̱á a̱muu Saúl nirajxu̱u̱ ga̱jma̱a̱ bi̱ nambáyúu: “Náá nijkuala rá.” Saúl niriʼñuu: “Ni̱jkuáxu gúʼñíinʼ búrru, mú na̱nguá nixkami̱i̱nxu, ikha jngóo ni̱jkuáxu gúyáa Samuel”.
15 Ikhú a̱muu nirajxu̱u̱: “Ndiéjunʼ niʼtála Samuel rá. Guthu̱nʼla mbá péñu”.
16 Saúl niriʼñuu a̱muu: “Niʼthúxu dí búrru nikujmíin má”. Mú táʼthúu̱n nimbá rí niʼthúu̱n Samuel dí mani̱ndxu̱u̱ rey.
17 Samuel nigímbíin xa̱bu̱ xuajin náa inuu Jeobá náa Mizpá
18 ga̱jma̱a̱ niʼthún israelitas: “Rígi̱ dí naʼthí Jeobá, Dios ndrígóo Israel: ‹Ikhúún nindxu̱ʼ bi̱ nigúwíin israelitas náa Egipto ga̱jma̱a̱ bi̱ niʼni káwáanʼla náa ñawúúnʼ xa̱bu̱ egipcio, ma̱ngaa náa xúgíinʼ xa̱bu̱ xuajin* bi̱ nini̱ gínáanʼla.
19 Rí xúgi̱ ikháanʼla niniʼñáánʼ Dios ndrígala bi̱ naʼni káwáanʼla, bi̱ niʼni káwáanʼla náa xúgíʼ dí raʼkhí ga̱jma̱a̱ náa rí nimíníinla. Ikháanʼ ni̱tha̱: “¡Tséʼniuu má! Atagíiʼ mbáa rey mu maʼtáñajunxu”. Rí xúgi̱, gu̱ni̱la̱ rí kaʼyala má náa inuu Jeobá xó má xuajin majkhaʼ* ndrígala ga̱jma̱a̱ náa guʼwá rí naguwa̱ʼla›”.
20 Ikha jngóo Samuel niʼni rí maguwáʼ kanuu xúgíʼ xuajin majkhaʼ ndrígóo Israel, bi̱ nixtiʼyáaʼ ninindxu̱u̱ xuajin chíʼgíiʼ* ndrígóo Benjamín.
21 Nda̱wa̱á niʼni rí makuʼmaminaʼ xuajin chíʼgíiʼ ndrígóo Benjamín ga̱jma̱a̱ mámbá guʼwíin nixuʼmamijná. Nixtaʼwíin bi̱ naguwáʼ náa guʼwún matritas. Nda̱wa̱á kayuuʼ bi̱ nixtiʼyáaʼ ninindxu̱u̱ Saúl a̱ʼdióo Quis. Mú, ndiyáaʼ mbá xúgíʼ ga̱jma̱a̱ na̱nguá nixka̱ma̱a̱.
22 Ikha jngóo nirajxi̱i̱ Jeobá: “Xtáa má gi̱i̱ xa̱bu̱ buʼko̱ ráʼ.” Ga̱jma̱a̱ Jeobá niriʼñúún: “A̱ʼkhu̱ xtáa rarkaʼwumi̱na̱ʼ”.
23 Nigún ragáñúún gúya̱a̱ ga̱jma̱a̱ niriya̱a̱ʼ ikhí. Índo̱ Saúl nigruigú ñajunʼ náa majñu̱únʼ xa̱bu̱ xuajin, ndiyáá dí ra̱ʼkhá tháán mba̱yi̱ʼ ga̱jma̱a̱ rí nimbáa tsénújngoo náa xpajpoo.
24 Samuel niʼthúún xa̱bu̱ xuajin: “Gu̱ya̱a̱la bi̱ Jeobá niraʼwíi. Ndawa̱a̱ nimbáa xóo ikhaa náa xúgíinʼ xa̱bu̱ xuajin”. Ga̱jma̱a̱ xúgíinʼ nigi̱ʼdi̱i̱ nindxa̱ʼwa̱: “¡Gaguma mba̱a̱ rey!”.
25 Ikhú Samuel niʼthúún xa̱bu̱ xuajin rí kaʼñúún munda̱ʼa̱ reyes, niʼnirámáʼ náa mbá libro ga̱jma̱a̱ nitámáʼ náa inuu Jeobá. Nda̱wa̱á niʼthúún xúgíinʼ rí matangi̱ín náa guʼwún.
26 Saúl ma̱ngaa nitanga̱a̱ náa goʼwóo náa Guibeá gajmíi̱n soldado bi̱ Jeobá nixkajxi̱i̱ a̱jkiu̱ún mu dí muguáʼdáá tsiaki̱i̱.
27 Mú tikhuun xa̱bu̱ ra̱míjíinʼ nithi: “Xú káʼnii gáʼngo̱o̱ gáʼni káwáánʼlú bugi̱”. Túyamajkuíí ga̱jma̱a̱ na̱nguá nixnáá regalo. Mú ikhaa nda̱a̱ rí niʼthí.*
Mbaʼa nota
^ O “tátiáaʼ”.
^ O “gaʼyee, bi̱ nuthi dí marigá”.
^ Náa ajngáa hebreo naʼthí, “reino”.
^ O “tribu”.
^ O “lajuíin”.
^ Náa ajngáa hebreo naʼthí, “xóo mbáa xa̱bu̱ bi̱ tséʼtí”.
