Timbá libro rí niʼnirámáʼ Samuel 12:1-25
12 Nda̱wa̱á Samuel niʼthún xúgíinʼ xa̱bu̱ Israel: “Ni̱ni̱* xúgíʼ má dí ikháanʼla nindo̱ʼo̱ʼ, ga̱jma̱a̱ niʼgíiʼ mbáa rey mu maʼtáñajuanla.
2 ¡Gi̱i̱ xtáa rey bi̱ maxnála ikha!* Ikhúún nikiu̱u̱n má ga̱jma̱a̱ ni̱ʼkha̱ má xngiʼxóʼ, ga̱jma̱a̱ e̱ji̱nʼ kúwá náa majñala. Asndu nákha chíʼgiúúnʼ ni̱ʼkhá raxnala ikha asndu dí mbiʼi xúgi̱.
3 Gi̱i̱ xtáá. Lá mbá miʼtsú nirígú kaʼyuuʼ xediu̱u̱ o búrriu̱u̱ mbáa ráʼ. Ni̱ni̱ koʼwóoʼ o ni̱ni̱ ngínáa mbáa ráʼ. Nigruígú mbújkha̱a̱ mu xánimbo̱ʼ dí gáʼthí mbáa ráʼ. Á mu xúʼko̱, guxruígu̱u̱n náa inuu Jeobá ga̱jma̱a̱ náa bi̱ ikhaa niraʼwíi, ga̱jma̱a̱ ikhúún martanga̱a̱”.
4 Ikhiin niriʼñáán: “Nditháan na̱nguá nitani̱ kuʼwúxu ni má tátani̱ gínáanʼxu̱. Ga̱jma̱a̱ na̱nguá nitrigú nimbá dí nixnáa’ mbáa”.
5 Ikhú ikhaa niʼthún: “Jeobá nindxu̱u̱ testigo xúgi̱, ga̱jma̱a̱ bi̱ niraʼwíi, dí ikháanʼla na̱nguá kuaʼdáá mbá numuu dí muxruígu̱u̱n”.* Ikhiin niriʼñáán: “Ikhaa nindxu̱u̱ testigo”.
6 Ikhú Samuel niʼthún xa̱bu̱ xuajin: “Jeobá, bi̱ nijmiuu Moisés ga̱jma̱a̱ Aarón bi̱ niguwíín wajin xiʼñála náa Egipto, ikhaa nindxu̱u̱ testigo náa xúgíʼ rígi̱.
7 Dí xúgi̱ gu̱ni̱ ratamijnála, numuu dí manda̱ʼa̱a̱la cuenta náa inuu Jeobá, ma̱ngaa ma̱ni̱ marmáʼáan a̱jkia̱la xúgíʼ dí májánʼ niʼni Jeobá ga̱jma̱a̱ numala ma̱ngaa náa wajin xiʼñála.
8 Índo̱ Jacob ni̱jkha̱ náa Egipto ga̱jma̱a̱ wajin xiʼñála ikháanʼ nitakáñíí Jeobá dí mambáñún, Jeobá nikuʼmaa Moisés ga̱jma̱a̱ Aarón mu maguwíín náa Egipto mu ma̱ʼkha̱a̱ kagui̱i̱n makuwíin gi̱i̱.
9 Mú wajin xiʼñála nimbumún kuyáá Jeobá Dios ndrígu̱ún, ikha jngóo ikhaa niniñúúnʼ* náa ñawúunʼ Sísara, náa bi̱ naʼtáñajúúnʼ soldado bi̱ kúwá náa Hazor, ma̱ngaa náa ñawúúnʼ xa̱bu̱ filisteos ga̱jma̱a̱ náa rey ndrígóo Moab, bi̱ nixmijná gajmiún.
10 Ikhú nitakáñíí Jeobá dí mambáñún. Nitháán: ‹Nixuʼdámíjnáxu̱ aʼkhá, Jeobá, numuu dí niniʼñáánʼxu̱ ga̱jma̱a̱ ndiyamajkhún Baal ga̱jma̱a̱ xtiʼkúún Astoret. Mú dí xúgi̱, atani̱ káwáanʼxu náa ñawúúnʼ xa̱bu̱ sia̱nʼ ndrígúxu̱, mu xúʼko̱ mu̱ni̱xu̱ʼ ñajuaanʼ ikháán›.
11 Ga̱jma̱a̱ Jeobá nikuʼmaa Jerubaal, Bedán, Jefté ga̱jma̱a̱ Samuel mu muni̱ káwíin náa ñawúúnʼ xa̱bu̱ sia̱nʼ ndrígu̱ún bi̱ kúwíin náa mbájndi kúwá, mu ikháanʼla makuwáanʼ májánʼ.
12 Índo̱ ndi̱ya̱a̱la dí Nahás rey ndrígu̱ún ammonitas, ni̱ʼkha̱ mu maxmíjná gajmiála, ikháanʼla nindo̱ʼo̱ʼ mbaʼa nuthu ‹¡Nanduxuʼ dí muguáʼdáaxu mbáa rey!› mú bi̱ phú Rey nindxu̱u̱ Jeobá Dios ndrígala.
13 Májánʼ má, gi̱i̱ xtáa rey bi̱ nira̱ʼwi̱i̱la, bi̱ ikháanʼ ninda̱ʼa̱a̱. Jeobá nigíiʼ mbáa rey mu maʼtáñajuanla.
14 Á mu ikháanʼ namíñala kuya̱a̱ Jeobá, nu̱nila ñajuunʼ ga̱jma̱a̱ nu̱nimbala dí naʼtála, ga̱jma̱a̱ tsénújngurámála xúgíʼ dí naʼtáñajuanla mu̱ni̱ Jeobá, á mu dí xúgiáanʼ ikháanʼla ga̱jma̱a̱ rey ndrígala nu̱ni̱ ñajuunʼ Jeobá Dios ndrígala, xúgíʼ dí gúni̱ magajnúu májánʼ.
15 Mú á mu tsénimbala dí naʼtála Jeobá ga̱jma̱a̱ nanújngurámala dí Jeobá naʼtála mu̱ni̱, ñawúunʼ Jeobá maʼni gínáanʼla ikháanʼ ga̱jma̱a̱ ana̱la.
16 Dí xúgi̱, gu̱ni̱ ratamijnála ga̱jma̱a̱ gu̱ya̱a̱la mbá dí mitsaanʼ* wéñuuʼ gáʼni Jeobá náa inala.
17 Nindxu̱u̱ mbiʼi dí naxtagijxi̱i̱ trigo áán. Ma̱ndo̱ʼo̱o̱ Jeobá dí maʼni mundxa̱ʼwa̱ a̱jkhu̱u̱n* ga̱jma̱a̱ maxnúu ruʼwa. Ikhú mbu̱ya̱a̱la ga̱jma̱a̱ makruaʼala dí raʼkhí dí ni̱nila náa iduu Jeobá, índo̱ ninda̱ʼa̱a̱ mbáa rey”.
18 Nda̱wa̱á Samuel niʼtákáñuu Jeobá, ga̱jma̱a̱ Jeobá niʼni dí murjmidá a̱jkhu̱u̱n ga̱jma̱a̱ dí maxnúu ruʼwa mbiʼi rúʼko̱, ikha jngóo xúgíinʼ xa̱bu̱ xuajin ra̱ʼkhá tháán nimíñúún kuyáá Jeobá ga̱jma̱a̱ Samuel.
19 Xúgíinʼ xa̱bu̱ xuajin nitháán Samuel: “Aratakáñíí Jeobá Dios ndrígáaʼ ga̱jma̱a̱ numuxuʼ, bi̱ nindxu̱xu̱ xa̱bia̱a̱ʼ, tsíyuxu makañúxu, numuu dí nini̱xu dí ra̱májánʼ ga̱jma̱a̱ dí xúgi̱ kuwáanʼxu̱ ruxuʼdámíjna̱ aʼkhá dí nunda̱ʼa̱a̱xu mbáa rey”.
20 Ikha jngóo Samuel niʼthúún xa̱bu̱ xuajin: “Xámiñalaʼ. Gajkhun má dí ni̱nila xúgíʼ dí ra̱májánʼ rígi̱. Mú dí xúgi̱ xúniʼñáánʼ rajkua kidxuuʼ Jeobá. Gu̱ni̱ ñajuunʼ Jeobá ga̱jma̱a̱ xúgíʼ a̱jkia̱la.
21 Xúni̱ tsíngumijnálá náa ikhaa dí mbuyamajkún xándú bi̱ raguáʼdáá numún, bi̱ nda̱a̱ dí ejmiin mbá kayuuʼ. Ikhiin xájmiin gúni̱ kríyaaʼ nimbáa, numuu dí raguáʼdáá tsiaki̱i̱.
22 Ga̱jma̱a̱ numuu dí mba̱a̱ mbiʼyuu, Jeobá xániñuuʼ xuajñuu. Numuu dí Jeobá niraʼwáanla ikháan mu mani̱ndxa̱la xuajñuu.
23 Ga̱jma̱a̱ ikhúún xániʼñúuʼ ratajkáan numala. Á mu dí maniʼñúuʼ, makiéʼkhunʼ náa Jeobá. Masngála má xúʼko̱ náa kamba̱a̱ dí májánʼ ga̱jma̱a̱ jmbu dí gíʼmaa muʼguala.
24 Mú ikháanʼla gamiñálá kuya̱a̱ Jeobá. Gu̱nila má xúʼko̱ ñajuunʼ* ga̱jma̱a̱ xúgíʼ a̱jkia̱la. Garmáʼáan a̱jkia̱la dí ra̱ʼkhá tháán mitsaanʼ dí niʼni ga̱jma̱á nindxa̱la.
25 Mú á mu ikháanʼla nduʼyáʼ mu̱nila dí ra̱májánʼ, xó má ikháanʼla ga̱jma̱a̱ rey ndrígala makhañála”.
Mbaʼa nota
^ Náa ajngáa hebreo naʼthí, “nidxawuun aʼwála”.
^ Náa ajngáa hebreo naʼthí, “bi̱ majngruigo̱o̱ náa inala”.
^ Náa ajngáa hebreo naʼthí, “na̱nguá nixkamaa nimbá náa ñawúnʼ”.
^ Náa ajngáa hebreo naʼthí, “nigujui̱i̱n”.
^ O “nagui̱i̱”.
^ O “bi̱gu̱”.
^ O “ga̱jma̱a̱ rí gajkhun”.
