Timbá libro rí niʼnirámáʼ Samuel 13:1-23
13 Saúl gíʼdoo ...* tsiguuʼ índo̱ ninindxu̱u̱ rey, ga̱jma̱a̱ niʼtáñajúúnʼ a̱jma̱ tsiguʼ xa̱bu̱ Israel.
2 Saúl niraʼwíin mbá 3,000 xa̱bekha israelitas. Bi̱ mbá 2,000 xtáa gajmíi̱n ikhaa náa Micmash ga̱jma̱a̱ náa kúbá Betel, bi̱ mbá 1,000 xtáa gajmíi̱n Jonatán náa Guibeá náa ku̱bu̱únʼ benjaminitas. Xa̱bu̱ xuajin bi̱ xóó naguanún, niʼthún dí matangi̱ín náa guʼwún.*
3 Jonatán nigudíin soldado filisteos bi̱ kúwá náa Gueba, filisteos nidxawíín dí nirígá. Saúl nikuʼmiin xa̱bu̱ dí mundiyííʼ chi̱ji̱ʼ náa mbá xúgíʼ xuajin ga̱jma̱a̱ nithi: “¡Gudxawíín rígi̱ hebreos!”.
4 Mbá xúgíinʼ israelitas nidxawíín dí nirígá: “Saúl niʼni gámbíin mbá grupo soldado filisteos, dí xúgi̱ filisteos tsíñún gúñún israelitas”. Ikha jngóo nijuiʼthúún xa̱bekha dí magimbíin gajmiún Saúl náa Guilgal.
5 Mangiin filisteos nigimbúmíjná mu magún gúxmijná gajmiún israelitas. Guáʼdáá mbá 30,000 carros dí nuxmijná ga̱jma̱a̱, mbá 6,000 bi̱ nudruwíin wáyú, ra̱ʼkhá tháán mbaʼin soldado dí nindxu̱ún asndu xóo jui̱ʼi̱ dí rígá náa rawuunʼ lamáa.* Nitsimún náa Micmash, náa Bet-Aven xígií náa nagájnuu a̱jkha̱ʼ,* ga̱jma̱a̱ nigi̱ʼi̱i̱n ikhí.
6 Israelitas nimíñúún nini̱ xa̱bu̱ sia̱nʼ. Ikha jngóo nirkaʼwumijná náa tsíñu, náa iñáʼ, náa xpátsí, náa iñáʼ dí rígá náa agoo ku̱ba̱ʼ ga̱jma̱a̱ náa iñáʼ dí najnu̱ʼ iyaʼ.
7 Tikhuun hebreos asndu nikidiin náa mañu Jordán náa ku̱ba̱ʼ Gad ga̱jma̱a̱ Galaad. Mú Saúl niguanúu náa Guilgal, ga̱jma̱a̱ bi̱ niguanúu gajmíi̱n ra̱ʼkhá tháán nimíñúún dí asndu naguíʼiin.
8 Nigi̱ʼthu̱u̱n mbá juwan mbiʼi asndu índo̱ gáʼga̱nú Samuel. Mú Samuel tséjkha̱nú náa Guilgal, ga̱jma̱a̱ xa̱bi̱i̱ Saúl nagúun.
9 Nda̱wa̱á kayuuʼ Saúl niʼthí: “Gaguwaʼla kudiin xujkhúʼ mu maxnajxíin xóo tsigijñaʼ dí nakarámáʼ, ga̱jma̱a̱ tsigijñaʼ dí tsímáá”.* Ikhú nigíʼdúu nixnájxi̱ tsigijñaʼ dí nakarámáʼ.
10 Mú índo̱ niguámbóo nixnájxi̱ tsigijñaʼ dí nakarámáʼ ni̱jkha̱nú Samuel. Saúl nigájnuu gátsijnuu mu marajxi̱i̱.*
11 Samuel niʼthúu̱n: “Ndiéjunʼ lá nitani̱ rá.” Saúl niriʼñuu: “Índo̱ ndi̱yo̱o̱ dí xa̱bu̱ nuniñuʼ ga̱jma̱a̱ ikháán tsédxa̱ʼnú mbiʼi dí niratá, ma̱ngaa dí filisteos kúwá ragimbíin náa Micmash.
12 Nindxa̱ʼwa̱mínáʼ: ‹Filisteos maguajtáan náa Guilgal mu muxiñún, ga̱jma̱a̱ ikhúún tséʼyáʼ dí mambáyuʼ Jeobá›. Ikha jngóo ndiyóoʼ dí maxnajxí má tsiaki̱i̱ tsigijñaʼ dí nakarámáʼ”.
13 Samuel niʼthúu̱n Saúl: “Raʼkhí kayuuʼ nindxu̱u̱ dí nitani̱. Tátanimba̱a̱ʼ dí niʼtáñajuaanʼ matani̱ Jeobá Dios ndrígáaʼ. Á mu dí nitanimba̱a̱ʼ Jeobá maʼni rí mbajyúuʼ reino ndrígáaʼ náa Israel asndu kámuu.
14 Mú dí xúgi̱ rá, reino ndrígáaʼ ní xájyúuʼ. Jeobá maxkamaa mbáa xa̱bu̱ bi̱ maʼni dí maʼdxuu a̱jkiu̱u̱n. Ga̱jma̱a̱ Jeobá magíiʼ mu mayéʼga edxu̱u̱ náa xuajñuu, numuu dí ikháán tátanimba̱a̱ʼ dí Jeobá nikuʼmáán matani̱”.
15 Ikhú Samuel nigájnáa náa Guilgal ga̱jma̱a̱ nitsimuu náa Guibeá náa ku̱bu̱únʼ benjaminitas. Saúl niguxnii xa̱bekha bi̱ xóó xtáa gajmíi̱n nindxu̱ún mbá 600.
16 Saúl ga̱jma̱a̱ a̱ʼdióo Jonatán, mangiin xa̱bekha bi̱ xóó kúwá gajmiún niguanún náa Gueba náa mbañúúnʼ benjaminitas. Bi̱ filisteos nigi̱ʼi̱i̱n náa Micmash.
17 Ga̱jma̱a̱ soldado filisteos nigájnún mbá ajtsú grupo náa gíi̱nʼ. Mbá grupo nigún náa kamba̱a̱ Ofrá, dí na̱jkha̱ xígií náa ku̱ba̱ʼ Sual,
18 i̱mba̱ grupo nigún náa kamba̱a̱ dí na̱jkha̱ náa Bet-Horón, ga̱jma̱a̱ dí maʼni ragajtsú grupo nigún náa kamba̱a̱ dí na̱jkha̱ náa ndawaa asndu náa nakujmaa mata* Zeboím, dí na̱jkha̱ náa ku̱ba̱ʼ mijxooʼ.*
19 Ndawa̱a̱ nimbáa bi̱ naʼni mújúunʼ ajua̱nʼ náa mbá xúgíʼ ku̱bu̱únʼ xa̱bu̱ Israel, numuu dí filisteos nithi: “Xúniʼñáánʼ dí nimbáa hebreo maʼni espada ni má kudú”.*
20 Israelitas ndayóoʼ dí muguajtáan asndu náa kúwá filisteos mu ikhiin muriya̱a̱ʼ rawuunʼ arado, pico, hacha ga̱jma̱a̱ chídí xngaa.
21 Ndayóoʼ dí muni̱ numáá mbá migiñuʼ gramos plata* mu maríya̱a̱ʼ rawuunʼ arado, pico, ajua̱nʼ dí mbá ajtsú iñúuʼ, hacha, ma̱ngaa mu maʼni májáanʼ ixi̱ kudú.
22 Índo̱ mugi̱ʼdi̱i̱ muxmijná, xa̱bu̱ bi̱ ni̱jkha̱ gajmíi̱n Saúl ga̱jma̱a̱ Jonatán na̱nguá kuda espada ni má kudú. I̱ndó Saúl ga̱jma̱a̱ a̱ʼdióo Jonatán kuda ajua̱nʼ dí muxmijná ga̱jma̱a̱.
23 Ga̱jma̱a̱ mbá grupo soldado filisteos nigún náa ta̱pho̱o̱ mata Micmash.
Mbaʼa nota
^ Náa texto hebreo na̱nguá eʼthí nguáthá tsiguuʼ.
^ Náa ajngáa hebreo naʼthí, “guʼwá xtíin ndrígu̱ún”.
^ O “mar”.
^ O “este”.
^ Náa ajngáa hebreo naʼthí, “maʼni tsajkurámaaʼ”.
^ O “bóo”.
^ O “desierto”.
^ O “lanza”.
