Timbá libro rí niʼnirámáʼ Samuel 15:1-35
15 Samuel niʼthúu̱n Saúl: “Jeobá nikuʼmún mu maraʼwi̱i̱n mani̱ndxa̱a̱ʼ rey náa xuajñuu Israel. Dí xúgi̱ atadxawíín dí Jeobá gíʼdoo maʼtháanʼ.
2 Rígi̱ dí naʼthí Jeobá bi̱ naʼtáñajúúnʼ ángeles: ‹Mandi̱ʼi̱i̱n cuenta amalequitas ga̱jma̱a̱ numuu dí niniu̱u̱n israelitas, dí nixmijná gajmiún índo̱ nigájníí náa Egipto.
3 Ikha jngóo, ayuʼ gátaxmíjná gajmiáanʼ amalequitas. Atani̱ gámbíin ga̱jma̱a̱ atani̱ gámbáa xúgíʼ dí guáʼdáá. Xágáwíinʼ a̱jkia̱a̱nʼ xtañún. Aradíin xa̱bekha, gu̱ʼu̱, e̱ji̱n ga̱jma̱a̱ e̱jín dxáñáʼ, ma̱ngaa xedi̱, mugu̱, camellos ga̱jma̱a̱ búrru›”.
4 Ikha jngóo Saúl nigímbíin soldado ga̱jma̱a̱ niguxnii xúgíinʼ xa̱bekha náa Telaim. Kúwá mbá 200,000 soldado bi̱ naguwáʼ náa xuajin majkhaʼ* dí rígá náa Israel ga̱jma̱a̱ mbá 10,000 bi̱ naguwáʼ náa Judá.
5 Saúl ni̱jkha̱nú asndu náa xuajin Amalec ga̱jma̱a̱ nikuʼmiin soldado ndrígióo dí murkaʼwumijná náa mijngii mata.*
6 Ikhú Saúl niʼthún bi̱ quenitas: “Aʼgua̱a̱ʼla, gu̱ni̱ tsíngumi̱jna̱ náa amalequitas, mu xúʼko̱ xágúdiáanʼla mangáanʼ. Numuu dí ikháanʼla niniu̱u̱n dí májánʼ* xúgíinʼ israelitas índo̱ nigájnún náa Egipto”. Ikha jngóo, bi̱ quenitas nini̱ tsíngumi̱jna̱ náa amalequitas.
7 Nda̱wa̱á dí rúʼko̱ Saúl ni̱jkha̱ ragudíin amalequitas, nigíʼdúu náa Havilá asndu náa Sur dí naguanúu náa níjniúu Egipto.
8 Nigudíin mbá xúgíinʼ xa̱bu̱ ga̱jma̱a̱ espada, ndaʼya nigujtuwiin Agag, rey ndrígu̱ún amalequitas.
9 Saúl gajmíi̱n xa̱bi̱i̱ túxiyáa Agag, ma̱ngaa túradíin xúgíinʼ xujkhúʼ bi̱ itháan míjíinʼ xóo mugu̱, xedi̱, xujkhúʼ bi̱ mbaʼwi̱i̱n, mugu̱ e̱jmba̱a̱, ga̱jma̱a̱ túni̱ gámbu̱u̱n mbá xúgíʼ dí gíʼdoo numuu. Táʼndún gúni̱ gámbáa xúgíʼ rúʼko̱. Mú xúgíʼ dí tséjmaa ga̱jma̱a̱ dí tánigu̱u̱nʼ nini̱ gámbáa.
10 Ikhú Jeobá niʼthúu̱n rígi̱ Samuel:
11 “Nagáwíinʼ a̱jkiu̱nʼ dí niʼgíiʼ Saúl xóo rey, numuu dí niniñuʼ ga̱jma̱a̱ táʼnimbo̱o̱ ajngóʼ”. Samuel ra̱ʼkhá tháán nixmiéjuunʼ, kañiiʼ mbruʼun niʼtákáñuu Jeobá.
12 I̱mba̱ néjtsuu, nákhíí miʼcha̱ nigijxi̱i̱ Samuel mu maʼga gáʼyoo Saúl, mú nitháán: “Saúl ni̱jkha̱ náa Carmelo ga̱jma̱a̱ ikhí nigíʼ mbá itsí mba̱a̱ náa mbaʼyamajkuminaʼ. Nda̱wa̱á ni̱jkha̱a̱ ga̱jma̱a̱ nigajtaa náa Guilgal”.
13 Índo̱ Samuel nixkamaa, ikhú Saúl niʼthúu̱n: “Jeobá gáʼni tsajkurámáánʼ. Nini̱mbo̱ʼ dí niʼthí Jeobá”.
14 Mú Samuel nirajxu̱u̱: “Á mu dí xúʼko̱, náá numuu dí nadxawuun nundxa̱ʼwa̱ mugu̱ ga̱jma̱a̱ xedi̱ rá.”
15 Ikhú Saúl niriʼñuu: “Nindxu̱ún xujkiún amalequitas. Soldado túradíin mugu̱ bi̱ itháan míjíinʼ ga̱jma̱a̱ xedi̱ mu majuixnájxi̱i̱n náa inuu Jeobá Dios ndrígáaʼ. Mú dí i̱ʼwáʼ nini̱ gámbáaʼxu má”.
16 Samuel niʼthúu̱n Saúl: “¡Ikhí rá! Matha̱a̱n dí Jeobá niʼthúnʼ mbruʼun”. Saúl niriʼñuu, “Arathúnʼ”.
17 Samuel niʼthúu̱n: “Lá narmáʼáan a̱jkia̱a̱nʼ dí niku̱ma̱a̱ʼ dí na̱nguá xtaʼdáá numaaʼ índo̱ ni̱dxa̱ʼnú ninindxa̱a̱ʼ bi̱ ndiyá edxu̱u̱ náa xuajin majkhaʼ dí rígá náa Israel, ga̱jma̱a̱ índo̱ Jeobá niraʼwíín mu mani̱ndxa̱a̱ʼ rey ndrígu̱ún xa̱bu̱ Israel ráʼ.
18 Nda̱wa̱á Jeobá nikuʼmáán dí matani̱ mbá ñajunʼ ga̱jma̱a̱ niʼtháanʼ: ‹Aradíin amalequitas xa̱bu̱ aʼkhá buʼko̱. Ataxmína̱ʼ gajmiáanʼ asndu matani̱ gámbíin›.
19 Náá numuu dí tátatsimba̱a̱ʼ dí niʼtháanʼ Jeobá. Dí phú nitani̱, ¡nirajxi̱i̱ dí niguanáa ga̱jma̱a̱ nitani̱ dí ra̱májánʼ náa iduu Jeobá!”.
20 Mú Saúl niʼthúu̱n Samuel: “¡Nini̱mbo̱ʼ má dí niʼthúnʼ Jeobá jún! Ninimbánuu ñajunʼ dí nixnúʼ ma̱ni̱ Jeobá, ni̱ni̱ gámbíin amalequitas ga̱jma̱a̱ ni̱ʼkhá ka̱ya̱a̱ Agag, rey ndrígu̱ún amalequitas.
21 Mú soldado niguwáánʼ kudiin mugu̱, xedi̱, xóo muʼthá dí itháan májánʼ dí nijuixnájxi̱ mu maguma gámbáa, mu majuixnájxi̱ náa inuu Jeobá Dios ndrígáaʼ náa Guilgal”.
22 Samuel niʼthúu̱n: “Ndiéjunʼ lá itháan eni̱gu̱u̱ʼ Jeobá: Tsigijñaʼ dí nakarámáʼ ga̱jma̱a̱ i̱ʼwáʼ tsigijñaʼ, o dí matatsi̱mba̱a̱ʼ dí naʼthí Jeobá dxe̱ʼ. Nakujmaa kaʼwu dí: Itháan májánʼ dí matatsi̱mba̱a̱ʼ ki xóo dí maraxnaxí mbá tsigijñaʼ, dí matani̱ dí gáʼtháan nindxu̱u̱ itháan májánʼ ki xóo maraxnaxí tsébu̱ún mugu̱ e̱jmba̱a̱.
23 Dí xátatsimba̱a̱ʼ nindxu̱u̱ mbá aʼkhá mbiiʼ wéñuuʼ, ikháá má xóo dí matani̱ xawan. Ga̱jma̱a̱ dí matani̱ xó má nandaaʼ ikháán nindxu̱u̱ ikhaa má xóo dí matani̱ magia, ga̱jma̱a̱ dí matayamajkhún xándú.* Ikháán tátatsimba̱a̱ʼ dí niʼtháanʼ Jeobá, ikha jngóo xániñuuʼ dí mani̱ndxa̱a̱ʼ rey”.
24 Ikhú Saúl niʼthúu̱n Samuel: “Nikuʼdáminaʼ aʼkhá. Tánimbo̱ʼ dí Jeobá niʼtáñajunʼ ma̱ni̱ ga̱jma̱a̱ dí nirathúnʼ ikháán, numuu dí nimíñúʼ ka̱ñu̱u̱n xa̱bu̱, ni̱ni̱ xó má ikhiin nithu̱nʼ.
25 Dí xúgi̱, mbá péñu, atani̱ mba̱a̱ a̱jkia̱a̱nʼ xtayoʼ ga̱jma̱a̱ aʼkhá dí ni̱ni̱, atanga̱án ga̱jma̱á nindxu̱ʼ mu masmbatígo̱ʼ náa inuu Jeobá”.
26 Mú Samuel niriʼñuu Saúl: “Xátangu̱ún ga̱jma̱á nindxa̱a̱ʼ, numuu dí tátatsimba̱a̱ʼ dí niʼtháanʼ Jeobá ga̱jma̱a̱ dí xúgi̱ Jeobá xániñuuʼ dí mani̱ndxa̱a̱ʼ má xúʼko̱ rey náa Israel”.
27 Índo̱ Samuel nitanga̱a̱ mu maʼga̱a̱, Saúl niguajthun rawuunʼ xtíñuu dí na̱nguá gíʼdoo ñawúunʼ ikhú nithu.
28 Samuel niʼthúu̱n Saúl: “Xígi̱ kaʼnii nirígú káyáaʼ xúgi̱ Jeobá reino ndrígáaʼ náa Israel. Maxnúu mbáa bi̱ itháan májáanʼ ki xóo ikháán.
29 Ma̱ngaa Dios bi̱ mba̱a̱ ndrígóo Israel, maʼnimbánuu má xúʼko̱ ajngóo, xári̱ʼkhu̱u̱ xóo endxa̱ʼwáminaʼ,* numuu dí ikhaa nditháan tséri̱ʼkhu̱u̱ xóo endxa̱ʼwáminaʼ xóo eni̱ xa̱bu̱ numbaaʼ”.
30 Saúl niriʼñuu: “Gajkhun má, nikuʼdáminaʼ aʼkhá. Mú mbá péñu,* atani̱ mbu̱u̱n náa inún bi̱ kuya̱ edxu̱u̱ náa xuajin ga̱jma̱a̱ náa inún xúgíinʼ xa̱bu̱ Israel. Atanga̱án ga̱jma̱á nindxu̱ʼ ga̱jma̱a̱ ikhúún masmbatígo̱ʼ náa inuu Jeobá Dios ndrígáaʼ”.
31 Ikha jngóo Samuel nitanga̱a̱ ni̱jkha̱a̱ kidxuuʼ Saúl, ga̱jma̱a̱ Saúl nismbáti̱go̱o̱ náa inuu Jeobá.
32 Samuel niʼthí: “Aguwaʼla ku̱ya̱a̱ Agag, rey ndrígu̱ún amalequitas”. Ikhú Agag nimíñuu* gákuʼmaminaʼ náa ikhaa, numuu dí nindxa̱ʼwáminaʼ: “Ní xúxiñún má”.
33 Mú Samuel niʼthúu̱n: “Xó má ikháán niradíin ga̱jma̱a̱ espada ndrígáaʼ e̱jñu̱ún gu̱ʼu̱, xúʼko̱ má gákháñún e̱ji̱i̱n ru̱dáaʼ ma̱ngaa”. Ikhú Samuel nirujkuriga̱a̱ Agag náa inuu Jeobá náa Guilgal.
34 Ikhú Samuel ni̱jkha̱a̱ Ramá, ga̱jma̱a̱ Saúl ni̱jkha̱a̱ náa goʼwóo dí rígá náa Guibeá.
35 Samuel ni tátanga̱a̱ mbaʼyoo Saúl náa xúgíʼ mbiʼi dí xóó nixtáa, mú nijmúu kaʼyoo. Jeobá nigáwíinʼ a̱jkiu̱u̱n dí nigíiʼ Saúl xóo rey náa Israel.
Mbaʼa nota
^ O “tribu”.
^ O “bóo”.
^ Náa ajngáa hebreo naʼthí, “terafim”.
^ O “xágáwíinʼ a̱jkiu̱u̱n”.
^ O “ataniu̱ʼ mbá rí májánʼ”.
^ O mbáa “niku̱mu̱u̱ dí nándáa má dí gágíʼnuu”.
