Timbá libro rí niʼnirámáʼ Samuel 18:1-30
18 Índo̱ David niguámbóo niʼtámíjná ga̱jma̱a̱ Saúl, ikhú Jonatán nimbájxu̱u̱ májánʼ ga̱jma̱a̱ David, Jonatán ni̱jkha̱nú nindoo kaʼyoo xó má eyoo kaʼyaminaʼ ikhaa.
2 Asndu má nákha mbiʼi rúʼko̱, Saúl niʼni rí David maguanúu ga̱jma̱a̱, tániñuuʼ rí maʼga̱a̱ náa goʼwóo anu̱u̱.*
3 Jonatán nindoo kaʼyoo David xó má eyoo kaʼyaminaʼ ikhaa, ikha jngóo ikhaa ga̱jma̱a̱ David nimbánúún.
4 Ma̱ngaa Jonatán niríyaʼ xtíñuu mbi̱jua̱ dí kagíʼ rí nda̱a̱ ñawúunʼ nixnúu magúwúunʼ David. Ma̱ngaa nixnúu xtíñuu dí naxmínaʼ ga̱jma̱a̱, espádóo, xkamídóo ga̱jma̱a̱ cinturiúun.
5 David nigíʼdu̱u̱ nigájnuu raxmína̱ʼ, tséʼniuu má náá ekuʼmaa maʼga Saúl, xúgíʼ dí naʼni nagájnuu májánʼ.* Ikha jngóo, Saúl nigíiʼ mu mbayá edxu̱u̱ náa xa̱bu̱ bi̱ nuxmijná. Rígi̱ ninigu̱u̱nʼ xa̱bi̱i̱ Saúl ga̱jma̱a̱ xúgíinʼ xa̱bu̱ xuajin.
6 Índo̱ David gajmíi̱n soldado ndrígóo natangiín náa nigún gúradíin filisteos, gu̱ʼu̱ bi̱ kúwá náa xúgíʼ xuajin ndrígóo Israel nagájnún gútsijníí rey Saúl. Nagájnún runi̱ ajmúú, nutsia ga̱jma̱a̱ gagi, nudi̱i̱ panderetas ga̱jma̱a̱ laúdes.*
7 Gu̱ʼu̱ bi̱ nagájnún gúndriguíin ga̱jma̱a̱ numuu dí niʼngu̱u̱n nida̱a̱ʼ, nuni̱ ajmúú:
“Saúl nigudíin mil,mú David nigudíin 10 mil”.
8 Saúl ra̱ʼkhá tháán nikiʼnáa. Tánigu̱u̱ʼ mbá kayuuʼ ajmúú. Niʼthí: “Nuthi dí David nigudíin 10 mil, mú ikhúún... káaʼ mil. ¡I̱ndó má ndayóoʼ dí mugíiʼ mani̱ndxu̱u̱ rey!”.
9 Asndu má nákha mbiʼi rúʼko̱, Saúl nigíʼdu̱u̱ ndiʼyoo má xúʼko̱ dí naʼni David.
10 I̱mba̱ néjtsuu, mbá espíritu dí ra̱májánʼ dí na̱ʼkha̱ náa Dios nito̱ʼo̱o̱ náa Saúl, ga̱jma̱a̱ ikhaa nigíʼdu̱u̱ niʼni skágui̱i̱nʼ* náa goʼwóo. Rígi̱ nirígá índo̱ David xtáa raʼdu̱u̱ arpa, xó má naguʼwuun naʼni. Saúl kayá mbá kudú* náa ñawúunʼ,
11 nidaʼ náa David. Niʼthí: “¡Maxkruaʼa jngayii ga̱jma̱a̱ kudú náa pared!”. A̱jma̱ nuthu niʼni xígi̱, náa a̱jma̱ nuthu rígi̱ David niʼngo̱o̱ niʼni kríyamínáʼ.
12 Ikhú Saúl nimíñuu kaʼyoo David, numuu dí Jeobá xtáa ga̱jma̱a̱ David, mú nánguá xtáa ga̱jma̱a̱ Saúl.
13 Ikha jngóo Saúl niʼni wájíiʼ náa ikhaa ga̱jma̱a̱ nigíiʼ mu mbayá edxu̱u̱ náa mil soldado. David ninindxu̱u̱ bi̱ nixná ikhúún soldado náa nixmijná.*
14 Xúgíʼ dí naʼni David nagájnuu májánʼ,* Jeobá xtáa ga̱jma̱a̱ ikhaa.
15 Saúl nigíʼdúu nimíñuu kaʼyoo David, numuu dí xúgíʼ dí naʼni nagájnuu májánʼ.
16 Mú xúgíinʼ xa̱bu̱ Israel mangiin xa̱bu̱ Judá nindúún kuyáá David, numuu dí ikhaa naxná ikhúún náa nuxmijná.
17 Saúl niʼthúu̱n David: “Maxnia̱a̱ʼ Merab, wáxióʼ* bi̱ giʼnii mu mbi̱ya̱a̱. I̱ndó rí na̱nda̱ʼa̱a̱ dí xámíñáaʼ dí matani̱ má xúʼko̱ ñajunʼ, ma̱ngaa dí mataxmína̱ʼ ga̱jma̱a̱ numuu Jeobá”. Numuu dí Saúl nandxa̱ʼwáminaʼ: “Xáxíyáa má ikhúún. Muxiyáa filisteos”.
18 Mú David nirajxu̱u̱ Saúl: “Tsáá lá nindxu̱ʼ ikhúún ga̱jma̱a̱ bi̱ ka̱ñu̱u̱n, ma̱ngaa bi̱ kúwá náa goʼwóo anu̱ʼ náa Israel mu ikhúún mani̱ndxu̱ʼ nigiúunʼ rey rá.”
19 Índo̱ ni̱jkha̱nú mbiʼi rí wáxióo Saúl bi̱ mbiʼyuu Merab mbayáa David, Saúl nixniúu má mbayáa Adriel xa̱bu̱ meholatita.
20 Mú i̱mba̱a̱ wáxióo Saúl bi̱ mbiʼyuu Mical, ninigu̱u̱ʼ kaʼyoo David. Índo̱ nitháán rígi̱ Saúl ikhaa ninigu̱u̱ʼ.
21 Saúl nindxa̱ʼwáminaʼ: “Maxniu̱u̱ mbayáa ikhaa, mu xúʼko̱ ma̱ndoo maguajtúwiin David, ga̱jma̱a̱ xúʼko̱ ikhaa makhañúu náa ñawúúnʼ xa̱bu̱ filisteos”. Ikha jngóo dí maʼni a̱jma̱ nuthu, Saúl niʼthúu̱n David: “Xúgi̱ mani̱ndxa̱a̱ʼ nigiúnʼ”.
22 Saúl nikuʼmiin xa̱bi̱i̱: “Guta̱a̱nla rígi̱ ngu̱ʼwa̱á David: ‹Rey nadxuu a̱jkiu̱u̱n kaʼyaaʼ, ga̱jma̱a̱ xúgíinʼ xa̱bi̱i̱ nandún kuyaaʼ. Ikha jngóo ganindxa̱a̱ʼ nigiúunʼ rey›”.
23 Índo̱ xa̱bi̱i̱ Saúl nitháán rígi̱ David, ikhaa niriʼñúún: “Lá nakumalaʼ dí ragákhíi gáʼni rí mbáa xa̱bu̱ bi̱ xóo ikhúún, bi̱ ngínáa, bi̱ na̱nguá gíʼdoo numuu, mu mani̱ndxu̱u̱ nigiúunʼ rey ráʼ.”
24 Ikhú xa̱bi̱i̱ Saúl nitháán rí David niʼthúún.
25 Mú Saúl niʼtáñajúúnʼ: “Guta̱a̱nla rígi̱ David: ‹I̱ndó dí nandoo rey ga̱jma̱a̱ numuu wáxióo ni̱ndxu̱u̱ dí midxa̱a̱ʼ xtaaʼ mbá 100 edxu̱u̱ xtóo xuyuuʼ tsáʼkhún filisteos, mu xúʼko̱ xa̱bu̱ sia̱nʼ ndrígóo muni̱ numa̱a̱ xó má ikhiin nini̱i̱›”. Saúl xtáa raríya̱ʼ awan dí David makhañúu náa ñawúúnʼ xa̱bu̱ filisteos.
26 Ikhú xa̱bi̱i̱ Saúl nigún kuñu̱u̱n ajngáa rígi̱ náa David, ga̱jma̱a̱ ikhaa ninigu̱u̱ʼ dí mani̱ndxu̱u̱ nigiúunʼ rey. Nákha xóó tséjkha̱nú mbiʼi rúʼko̱,
27 David nigájnúu gajmíi̱n xa̱bi̱i̱, nigudíin mbá 200 filisteos ni̱ʼkha̱a̱ kagu̱u̱ náa rey edxu̱u̱ xtóo xuyuuʼ tsáʼkhún ikhiin mu xúʼko̱ ma̱ndoo mani̱ndxu̱u̱ nigiúunʼ. Ikha jngóo Saúl nixnájxiu̱u̱ Mical mu maʼni a̱ʼgiu̱u̱.
28 Saúl ni̱jkha̱nú ndiʼyoo dí Jeobá xtáa ga̱jma̱a̱ David ga̱jma̱a̱ dí wáxióo Mical nandoo kaʼyoo.
29 Rígi̱ niʼni dí Saúl mamiñúu kaʼyoo itháan David. Ga̱jma̱a̱ ninindxu̱u̱ xa̱bu̱ sia̱nʼ ndrígóo náa xúgíʼ mbiʼi dí nixtáa.
30 Mámbá índo̱ príncipes ndrígu̱ún filisteos nagájnún gúxmijná, David nagájnuu májánʼ dí naʼni* ki xóo xúgíinʼ eʼwíinʼ xa̱bi̱i̱ Saúl, ma̱ngaa nuthi dí májánʼ ga̱jma̱a̱ numuu.
Mbaʼa nota
^ O “tátée”.
^ O “nandxa̱ʼwáminaʼ májánʼ dí maʼni”.
^ Nindxu̱u̱ mbá ajua̱nʼ dí najmún nákha wajyúuʼ dí gíʼdoo ajtsú cuérdóo.
^ O “niʼni xóo profeta”.
^ O “lanza”.
^ Náa ajngáa hebreo naʼthí, “nagájnáa ga̱jma̱a̱ nata̱ʼa̱a̱ náa inún xa̱bu̱ xuajin”.
^ O “David nandxa̱ʼwáminaʼ májánʼ dí maʼni”.
^ O “a̱ʼdéʼ dxáʼgú”.
^ O “nandxa̱ʼwáminaʼ tháan májánʼ dí maʼni”.
