Timbá libro rí niʼnirámáʼ Samuel 19:1-24
19 Itháan nda̱wa̱á Saúl niʼthúu̱n a̱ʼdióo Jonatán ga̱jma̱a̱ xúgíinʼ xa̱bi̱i̱ dí xtáa raríya̱ʼ awan maxíyáa David.
2 Mú Jonatán niʼthúu̱n rígi̱ David, numuu dí nandoo kaʼyoo. Niʼthúu̱n: “Anu̱ʼ* Saúl nandoo maxíña̱a̱n. Mbá péñu,* tsumáá gátani̱ miʼcha̱ gájtsíí. Atayáʼ náa matarkaʼwuminaʼ ga̱jma̱a̱ aguanáaʼ ikhí.
3 Ikhúún maʼgá ga̱jmu̱ʼ anu̱ʼ xanáá náa mijngii gáraxtaa. Mathu̱u̱n ga̱jma̱a̱ numaaʼ, á mu rígá dí naʼthúnʼ, matha̱a̱n má”.
4 Jonatán niʼthúu̱n anu̱u̱ dí májánʼ ga̱jma̱a̱ numuu David. Niʼthúu̱n: “Rey ragíʼmaa makiéʼkhun náa David bi̱ nindxu̱u̱ xa̱bi̱i̱. Ikhaa tákiéʼkhun náa ikháán. Xúgíʼ dí ikhaa niʼni ninindxu̱u̱ májánʼ má náa ikháán.
5 Nixtáa xawii mu makhañúu índo̱ ni̱jkha̱ gáxíyáa filisteo, núma̱a̱ má dí xúʼko̱ niʼni, Jeobá niʼni dí maʼngu̱u̱n mudaaʼ* xúgíinʼ xa̱bu̱ Israel. Ikháán mina̱a̱ʼ nitayáá rígi̱ ga̱jma̱a̱ ra̱ʼkhá tháán nidxaanʼ. Nda̱a̱ mbá numuu dí mataxíyáa David, náá numuu dí makiéʼkaanʼ ga̱jma̱a̱ mataxi̱díí eʼdiuu dí ragíʼdoo aʼkhúun xá.”
6 Saúl niʼnimbo̱o̱ dí niʼthúu̱n Jonatán ga̱jma̱a̱ ikhaa nixná ajngóo: “Na̱xna̱ ajngóʼ ga̱jma̱a̱ mbiʼyuu Jeobá, dí xáxíyáa”.
7 Jonatán nindxa̱ʼóo David ga̱jma̱a̱ niʼthúu̱n xúgíʼ. Nda̱wa̱á ni̱jkha̱a̱ kayáa mbu̱júu̱ náa xtáa Saúl, ga̱jma̱a̱ David niʼni mbu̱júu̱ ñajuunʼ xó má nákha ginii.
8 Itháan nda̱wa̱á nitangiín mbu̱júu̱ nixmijná, David nigájnuu gáxmína̱ʼ gajmíi̱n filisteos, ra̱ʼkhá tháán mbaʼin nigudíin. Ga̱jma̱a̱ filisteos nigájnún ragáñúún náa ikhaa.
9 Mbóo mbiʼi, mbá espíritu dí ra̱májánʼ dí na̱ʼkha̱ náa Jeobá nito̱ʼo̱o̱ náa Saúl índo̱ ikhaa gíʼ náa goʼwóo kayá mbá kudú,* ga̱jma̱a̱ David xtáa raʼdu̱u̱ arpa.
10 Saúl nigíʼ maxkruaʼa jngayii David ga̱jma̱a̱ kudú náa pared, mú ikhaa nigiʼnduti̱ga̱* ga̱jma̱a̱ kudú nifraʼa náa pared. David nigájna̱a̱ ikhí, ga̱jma̱a̱ mbruʼun má rúʼko̱ nigájnuu ragáyúu.
11 Nda̱wa̱á Saúl nikuʼmiin tikhuun xa̱bekha mu muyama náa goʼwóo David mu xúʼko̱ muxiyáa miʼcha̱ dí i̱mba̱ néjtsuu. Mú Mical a̱ʼgiu̱u̱ David, niʼthúu̱n: “Á mu dí tségájnaaʼ mbruʼun rígi̱, miʼcha̱ gájtsíí mani̱ndxa̱a̱ʼ mbáa xa̱bu̱ nikháñuu”.
12 Mbá nacha̱ Mical nimbáyúu David mu magajtaa náa ventana mu xúʼko̱ maʼni kríyamínáʼ.
13 Ikhú Mical ni̱jkha̱ gáyáa mbáa xándú* nitámáanʼ náa xiawoo, náa dí kaʼnii magri̱gu edxu̱u̱ ikhí nigrígu mbá xtíin di kiʼxmí ga̱jma̱a̱ xtátsiu̱u̱n tsujthu̱nʼ ga̱jma̱a̱ nixtrámaaʼ mbá xtíin.
14 Índo̱ niguánú xa̱bekha bi̱ Saúl nikuʼmiin murugua̱a̱ David, Mical niʼthún: “Naʼniuu nandii”.
15 Ikhú mbu̱júu̱ Saúl nikuʼmiin xa̱bu̱ magún gúyáá David ga̱jma̱a̱ niʼthún: “Aguwaʼ kuyala xiawoo náa kaʼmáaʼ mu maxíyáa”.
16 Índo̱ xa̱bu̱ nitu̱ʼu̱u̱n, ndiyáá dí náa xiawoo kaʼmáaʼ mbáa xándú* ga̱jma̱a̱ dí náa kaʼmáʼ edxu̱u̱ David ikhí grígu mbá xtíin di kiʼxmí ga̱jma̱a̱ xtátsiu̱u̱n tsujthu̱nʼ.
17 Saúl nirajxu̱u̱ Mical: “Náá numuu dí nitani̱ nduwúúnʼ rá. Náá numuu dí nitatsíñánʼ magajnúu xa̱bu̱ sia̱nʼ ndrígóʼ.” Mical niriʼñuu: “Ikhaa niʼthúnʼ ‹¡Matatsiʼñúʼ magajnúʼ o maxíña̱a̱n dxe̱ʼ!›”.
18 David bi̱ nigájnuu ragáyúu ni̱jkha̱ gáʼyoo Samuel náa Ramá, ga̱jma̱a̱ niʼthúu̱n xúgíʼ dí Saúl niʼniuu. Nda̱wa̱á mbá nájmi̱i̱n nigún náa Nayot ga̱jma̱a̱ ikhí má niguanún.
19 Nda̱wa̱á nitháán Saúl: “David xtáa náa Nayot dí kaʼyoo Ramá”.
20 Mbá nacha̱ Saúl nikuʼmiin tikhuun xa̱bekha mu magún gúrugua̱a̱ David. Índo̱ niguánú ndiyáá dí mbaʼin profetas* bi̱ guanuu kúwá rutariya̱ʼ ga̱jma̱a̱ Samuel wíji̱ raxnúún ikha. Ikhú espíritu santo* ndrígóo Dios ni̱ʼkha̱ náa ikhiin ga̱jma̱a̱ mangiin nigíʼdi̱i̱ nini̱ xó má eni̱ profetas.
21 Índo̱ Saúl niʼdxuun, nikuʼmiin bi̱ maʼni raga̱jma̱ grupo ikhiin mangiin nigi̱ʼdi̱i̱ nini̱ xó má eni̱ profetas. Ikha jngóo Saúl nikuʼmiin mbu̱júu̱ bi̱ maʼni ragajtsú grupo xa̱bekha ikhiin mangiin nigi̱ʼdi̱i̱ nini̱ xó má eni̱ profetas.
22 Nda̱wa̱á kayuuʼ ikhaa mina̱a̱ʼ ni̱jkha̱ Ramá. Índo̱ ni̱jkha̱nú náa iñáʼ mba̱a̱ dí najnu̱ʼ iyaʼ dí rígá náa Secú, nirajxu̱u̱n xa̱bu̱: “Náá xtáa Samuel ga̱jma̱a̱ David.” Ikhiin niriʼñáán: “Náa Nayot dí kaʼyoo Ramá”.
23 Índo̱ xtáa ra̱jkha̱ náa kamba̱a̱ Nayot dí kaʼyoo Ramá, ikhú espíritu santo ndrígóo Dios nirígá náa ikhaa. Ga̱jma̱a̱ ikhaa ma̱ngaa nigíʼdu̱u̱ niʼni xó má eʼni mbáa profeta náa mbá xúgíʼ kamba̱a̱ asndu índo̱ ni̱jkha̱nú náa Nayot dí kaʼyoo Ramá.
24 Ikhaa ma̱ngaa niguwíi xtíñuu ga̱jma̱a̱ nigíʼdu̱u̱ niʼni xóo profeta náa inuu Samuel. Nibóoʼ ikhí mbá tsaʼtsaaʼ* mbiʼi rúʼko̱ ga̱jma̱a̱ mbruʼun má rúʼko̱. Ikhí nigájnuu ajngáa dí nuthi xa̱bu̱ “Lá Saúl ma̱ngaa nindxu̱u̱ profeta ráʼ.”
Mbaʼa nota
^ O “táteʼ”.
^ O “atani̱ mbá rí májánʼ”.
^ O “niʼni dí makáwíin”.
^ O “lanza”.
^ O “nixngutigamínáʼ”.
^ O “xándú bi̱ kúwá guʼwáá”. Náa ajngáa hebreo naʼthí, “terafim”.
^ Náa ajngáa hebreo naʼthí, “terafim”.
^ O “gaʼyee, bi̱ nuthi dí marigá”.
^ O “ga̱jma̱a̱ i̱ndó xtíñuu rí awúún”.
