Timbá libro rí niʼnirámáʼ Samuel 2:1-36
2 Ikhú Ana niʼtájkháan xígi̱:
“Ra̱ʼkhá tháán nadxuu a̱jkiu̱nʼ núma̱aʼ má Jeobá,Jeobá naxnúʼ tsiaki̱i̱.*
Nambaʼtoo rawunʼ mu mariʼñúúnʼ bi̱ tsíñún gúyóʼ,numuu rí xóo natani̱ kríñu̱u̱nʼ naʼni maxtáá gagi.
2 Ndawa̱a̱ nimbáa bi̱ kaʼwii xóo ikháán Jeobá.Ndawa̱a̱ nimbáa xóo ikháán.Nda̱a̱ i̱mba̱ tsíñu xóo Dios ndrígulú.
3 Guniʼñááʼ runi̱ mbaʼumíjna̱la̱ ga̱jma̱a̱ rí nutha̱.Xágájnuu náa rawanla ajngáa rí nuni̱ mbaʼumíjna̱ ga̱jma̱a̱,numuu rí Jeobá nindxu̱u̱ mbáa Dios bi̱ ndaʼyoo xúgíʼ,*i̱ndó ikhaa kaʼyoo maʼthí á mu májánʼ o ra̱májánʼ dí naʼni mbáa.
4 Xkamídá ndrígu̱ún xa̱bu̱ bi̱ xkujiinʼ najmigu̱u̱mú xa̱bu̱ bi̱ guabiinʼ* nundrigú itháán tsiaki̱i̱.
5 Bi̱ guáʼdáá wéñuuʼ ganitsu rí asndu napídúunʼ, ndayóoʼ rí muñajunʼ mu makánún rí mu̱phu̱,mú bi̱ naxkidxu̱u̱n nánguá enújngún ewiʼ.
A̱ʼgu̱ bi̱ tsíyoo gágiʼdiin e̱ji̱n* nigiʼdiin mbá juwiin e̱ji̱n,mú bi̱ gíʼdiin mbaʼin niguanúu mbáwíí.
6 Jeobá naʼni rí maxtáa mbáa ga̱jma̱a̱ makhañúu.Ikhaa naʼni rí majnguáanʼ náa Iñá wajinʼ* ga̱jma̱a̱ ikhaa naʼni rí magajnáa.
7 Jeobá naʼni dí magiʼdoo ga̱jma̱a̱ maʼni ngínáa mbáa.Ikhaa naʼni májti̱i̱ʼ ga̱jma̱a̱ magiʼdoo numuu mbáa.
8 Nakujxi̱i̱ náa yujndaʼ xa̱bu̱ guabaaʼnakujxi̱i̱ xa̱bu̱ ngínáa náa mbá ru̱tsu̱u̱ idiʼ*mu magíiʼ gajmíi̱n príncipega̱jma̱a̱ maxnúu magi̱ʼi̱ náa mbuyamajkuíí.
Dí kuajtuun ku̱ba̱ʼ nindxu̱u̱ ndrígóo Jeobá,ga̱jma̱a̱ náa tsu̱du̱u̱ ikhí grígu ku̱ba̱ʼ rí ma̱jma̱a̱.
9 Ikhaa nañewu̱u̱n xóo jngruigu̱u̱n bi̱ ni̱ndxu̱ún jmbiin náa ikhaa,mú xa̱bu̱ ra̱míjíinʼ naʼni rí maguanún wíí náa mikína,numuu rí mbáa xa̱bu̱ tséʼngo̱o̱ gáda̱ʼ i̱ndó ga̱jma̱a̱ tsiaki̱i̱ ndrígóo.
10 Jeobá majkúmiguiin bi̱ nuxmijná gajmiún ikhaa,*makiʼnáa kaʼñún maʼni rí majmidá asndu mekhuíí.
Asndu náa iwáá wámbarigo̱o̱ ku̱ba̱ʼ Jeobá manda̱ʼa̱a̱ cuenta.Ikhaa maxnúu tsiaki̱i̱ rey ndrígóo.Ikhaa maxnúu tsiaki̱i̱* bi̱ ndiyáaʼ”.
11 Nda̱wa̱á Elcaná ni̱jkha̱a̱ náa goʼwóo náa Ramá. Mú, ada̱ niguanúu niʼni ñajuunʼ Jeobá ga̱jma̱a̱ ndxajkun Elí.
12 Mú, e̱ji̱i̱n Elí nindxu̱ún xa̱bu̱ xkawiinʼ na̱nguá eyamajkuíí Jeobá.
13 Tsíñún gúndri̱gú i̱ndó rí kaʼñúún xóo rí mudrigú ndxajkun rí nuxnún xa̱bu̱ xuajin, ikhiin nuni̱ rígi̱: Índo̱ mbáa xa̱bu̱ naxnájxi̱ tsigijñaʼ, ikhú bi̱ nambáyúu ndxajkun na̱jkha̱ kayóo mbá tenedor dí mba̱a̱, dí gíʼdoo ajtsú iñuuʼ índo̱ xtáa ragaʼá xuwiʼ.
14 Ga̱jma̱a̱ nakumááʼ náa frígú raʼga̱ náa daan dí a̱jma̱ cháʼwuun náa dí ga̱jni̱ʼ yaʼduun o náa daan dí mbóó cháʼwuun. Ndxajkun naguanúu ga̱jma̱a̱ xúgíʼ dí naguwíi náa tenedor. Xúʼko̱ nuniu̱u̱n xúgíinʼ israelitas bi̱ nagún náa Siló.
15 Ma̱ngaa nákha xóó tséni rí maʼni gúniúu xtangoo xujkhúʼ, mbáa bi̱ nambáyúu ndxajkun naʼthúu̱n xa̱bu̱ bi̱ naxnájxi̱ tsigijñaʼ: “Araxnáá ndxajkun xuwiʼ mu makumbúʼ. Tsíyóo xuwiʼ rí ni̱ʼga̱, i̱ndó xuwiʼ maxaʼ gáʼndoo”.
16 Índo̱ xa̱bu̱ naʼthúu̱n “mú, ginii gíʼmaa mbuya̱a̱ dí maʼni gúniúu xtangoo xujkhúʼ. Nda̱wa̱á ma̱ndoo maguanáaʼ ga̱jma̱a̱ má rí nandaaʼ”, ikhú bi̱ nambáyúu ndxajkun nariʼñuu “na̱nguá, araxnúʼ ka. Á mu tsíyaaʼ marígú kaʼyáaʼ”.
17 Aʼkhá rí nuni̱ bi̱ numbañún ndxajkun ni̱jkha̱nú niʼni mba̱a̱ náa inuu Jeobá, numuu rí tsésngajma gamajkhu náa tsigijñaʼ rí nuxnajxi̱ náa inuu Jeobá.
18 Maski ajndu Samuel xóó má kaʼníí chíʼgíiʼ,* mú naʼni ñajunʼ náa inuu Jeobá ga̱jma̱a̱ kagíʼ mbá efod* dí niguma ga̱jma̱a̱ lino.
19 Ma̱ngaa mámbá tsiguʼ ru̱dúu̱* naʼxmí xtíñuu dí nda̱a̱ ñawúunʼ, ma̱ngaa na̱jkha̱ kayóo ga̱jma̱a̱ ajmbio̱o̱* índo̱ nagún gúxnajxi̱ tsigijñaʼ mámbá tsiguʼ.
20 Elí niʼni tsajkurámaaʼ Elcaná ga̱jma̱a̱ a̱ʼgiu̱u̱. Niʼthúu̱n: “Jeobá gáʼni dí maraʼdaa ada̱ náa a̱ʼgia̱a̱ʼ bugi̱ numuu rí ikhaa nixnájxi̱i̱ mbáa ada̱ náa Jeobá”. Ikhú ikhiin nitangiín náa guʼwún.
21 Jeobá nigáwíinʼ a̱jkiu̱u̱n kaʼyoo Ana ga̱jma̱a̱ ikhaa nitanga̱a̱ niguewáan ada̱.* Nigiʼdiin ajtsíin jiámá ga̱jma̱a̱ a̱jmi̱i̱n wa̱ʼxa̱ʼ.* Samuel ndija̱a̱ má xúʼko̱ náa inuu Jeobá.
22 Elí nikhi̱i̱ má ga̱jma̱a̱ ndaʼyoo má xúgíʼ dí xóo e̱ji̱i̱n niniu̱u̱n xúgíinʼ israelitas. Ma̱ngaa ndaʼyoo má rí nubúúnʼ gajmiún gu̱ʼu̱ bi̱ nuñajunʼ náa riejuun guʼwá xtíin rí nagimbíi̱n.
23 Ikhaa naʼthúún e̱ji̱i̱n: “Ndíjkha rí xúʼko̱ eni̱la rá. Xúgíinʼ xa̱bu̱ xuajin nuthu̱nʼ dí ra̱májánʼ rí nuni̱la.
24 Maxúni̱la xúʼko̱ e̱ji̱nʼ. Dí xóo jngruigu̱u̱n ruthi xa̱bu̱ xuajñuu Jeobá ga̱jma̱á numala, raʼkhí kayuuʼ.
25 Á mu mbáa xa̱bu̱ nakiéʼkúun náa inuu i̱mba̱a̱ xa̱bu̱, maxtáa mbáa bi̱ maʼtákáñúu Jeobá ga̱jma̱a̱ numuu ikhaa.* Mú, á mu mbáa xa̱bu̱ nakiéʼkúun náa Jeobá, tsáá gáʼtájkáan ga̱jma̱a̱ numuu ikhaa xá.” Mú ikhiin túdxawíín rí niʼthún anún numuu rí Jeobá niʼthí má rí magudíin.
26 Mú, Samuel na̱jkha̱ ra̱ja̱a̱ má xúʼko̱ ga̱jma̱a̱ Jeobá mangiin xa̱bu̱ nandún kuyáá itháán.
27 Ga̱jma̱a̱ mbáa xa̱bi̱i̱ Dios ni̱jkha̱ gáʼthúu̱n Elí: “Rígi̱ dí naʼthí Jeobá: ‹Lá na̱nguá ni̱ni̱ rí muni nuwúnʼ kaʼwu bi̱ naguwáʼ náa goʼwóo wajin xiʼñáaʼ nákha nikúwi̱i̱n náa Egipto, ga̱jma̱a̱ náa rí ninindxu̱ún ñumbáá náa goʼwóo faraón xáʼ.
28 Náa mbá xúgíʼ xuajin majkhaʼ* ndrígóo Israel ikhaa nindxu̱u̱ bi̱ nixtiʼyáaʼ mu maʼni ñajunʼ xóo ndxajkun. Ikhaa nixtiʼyáaʼ mu matsimuu náa mixnájxi̱ tsigijñaʼ, mu xúʼko̱ maxnájxi̱ tsigijñaʼ ma̱ngaa maxnájxi̱ rí ndataun* ga̱jma̱a̱ maʼga̱ kayóo efod náa inuʼ. Ga̱jma̱a̱ ni̱ni̱ rí bi̱ naguwáʼ náa guʼwún wajin xiʼñáaʼ mundrígúu xúgíʼ tsigijñaʼ dí nakarámáʼ dí nuxnajxi̱ israelitas.*
29 Ndíjkha rí tséyamajkuííla* tsigijñaʼ ga̱jma̱a̱ regalo ndrígóʼ rí nitañájunʼ maguma náa nduyamajkhuʼ xá. Ndíjkha rí itháán natayamajkún e̱jña̱a̱ʼ ki xóo ikhúún rá. Naʼni mbaʼwáanʼla numuu rí naphu̱ dí itháán májánʼ dí nuxnajxi̱ xa̱bu̱ xuajñunʼ Israel.
30 Ikha jngóo rígi̱ nindxu̱u̱ dí naʼtálaʼ Jeobá Dios ndrígóo Israel: “Gajkhun má dí ikhúún nitha̱ dí bi̱ kúwíi̱n náa guʼwáaʼ ga̱jma̱a̱ bi̱ naguwáʼ náa goʼwóo wajin xiʼñáaʼ makuwá má xúʼko̱ runi̱ ñajunʼ”. Mú dí xúgi̱ naʼthí Jeobá: “Nánguá eʼngo̱o̱ a̱jkiu̱nʼ dí xígi̱ kuwáanʼla runi̱. Numuu dí mbayamajkún bi̱ nduyamajkhuʼ, ga̱jma̱a̱ bi̱ tséyamajkhuʼ xíʼyamajkhún má mangiin”.
31 Na̱jkha̱ ratumuu má mbiʼi dí ma̱ni̱ gámbáa tsiaki̱i̱ ndrígáaʼ ga̱jma̱a̱ tsiaki̱i̱* ndrígu̱ún bi̱ kúwá náa goʼwóo ana̱a̱ʼ.* Nimbáa xa̱biya̱ bi̱ na̱ʼkha̱ náa guʼwáaʼ maʼga̱nú mikhi̱i̱.
32 Náa dí májánʼ dí magumiin xa̱bu̱ Israel, ikháán maraʼdaa mbáa bi̱ xándoo gáʼyaaʼ náa nduyamajkhuʼ, ga̱jma̱a̱ nimbáa xa̱biya̱ bi̱ xtáa náa guʼwáaʼ xáʼga̱nú mikhi̱i̱.
33 Mbáa bi̱ na̱ʼkha̱ náa guʼwáaʼ bi̱ ikhúún gániʼñuuʼ mu maʼni ñajunʼ náa nakarámáʼ tsigijñaʼ, ikhaa maʼni gámbóo idaaʼ ga̱jma̱a̱ maʼni dí matamíniiʼ wéñuuʼ. Ma̱ngaa mbaʼin bi̱ kúwíin náa guʼwáaʼ makhañún ga̱jma̱a̱ espada gúni̱ xa̱bu̱.
34 Dí magíʼnún e̱jña̱a̱ʼ Hofní ga̱jma̱a̱ Finehás, mani̱ndxu̱u̱ mbá tsinaʼ náa ikháán: Mbá mbiʼíí gákháñún a̱jmi̱i̱n ejña̱a̱nʼ.
35 Mbaʼyáaʼ mbáa bi̱ mani̱ndxu̱u̱ ndxajkun ndrígióʼ bi̱ mawi̱ji̱ jmbu. Ikhaa maʼnimbánuu dí nandoʼ.* Ma̱ni̱ goʼwóo* dí mbajyúuʼ asndu kámuu, ga̱jma̱a̱ ikhaa maʼni ñajuunʼ* bi̱ ndiʼyáaʼ.
36 Bi̱ xóó naguanún náa guʼwáaʼ maguwáʼ musmbati̱gu̱u̱n náa inuu ikhaa, ga̱jma̱a̱ munda̱ʼa̱a̱ dí maʼni numún ga̱jma̱a̱ munda̱ʼa̱a̱ pan. Muthán: “Mbá péñu, araxnúxu̱ ñajunʼ dí naguma náa ndxajkun mu maguáʼdááxu mbá chíʼgíiʼ pan mu̱phúxu̱”›”.
Mbaʼa nota
^ O “mbáa Dios bi̱ gíʼdoo ku̱ma̱”.
^ O “bi̱ nagún rajnguti̱gi̱i̱n”.
^ O “nindxu̱u̱ estéril”.
^ O mbáa “nakujxi̱i̱ náa náskhá”.
^ O mbáa “bi̱ nuxmijná gajmiún Jeobá mamíñún”.
^ O “lajuíin”.
^ O “jmba̱yi̱i̱”.
^ O “nánée”.
^ O “niʼni endi̱i̱”.
^ O “i̱jín go̱ʼo̱”.
^ O mbáa “Dios maʼnimbánuu numuu”.
^ O “tribu”.
^ O mbáa “maʼni rí matsimuu gúniuu tsigijñaʼ”.
^ Náa ajngáa hebreo naʼthí, “e̱ji̱i̱n Israel”.
^ Náa ajngáa hebreo naʼthí, “nujngupraʼáá”.
^ Náa ajngáa hebreo naʼthí, “marujturígú ñawáanʼ ga̱jma̱a̱ ñawúúnʼ”.
^ O “tátiáaʼ”.
^ O “dí rígá náa a̱jkiu̱nʼ”.
^ Nandoo gáʼthúu̱n náa naguwáʼ ndxajkun.
^ Náa ajngáa hebreo naʼthí, “majngruigo̱o̱ inuu”.
