Timbá libro rí niʼnirámáʼ Samuel 20:1-42
-
Jonatán nambájxu̱u̱ májánʼ ga̱jma̱a̱ David (1-42)
20 Ikhú David nigájnuu ragáyúu náa Nayot dí kaʼyoo Ramá. Ni̱jkha̱ gáʼyoo Jonatán ga̱jma̱a̱ nirajxu̱u̱: “Ndiéjunʼ lá ni̱ni̱. Ndiéjunʼ lá xkujndu nikuʼdáminaʼ. Ndiéjunʼ lá nikiéʼkhunʼ náa ana̱a̱ʼ* mu ikhaa maʼndoo maxíñu̱u̱n rá.”
2 Jonatán niriʼñuu: “¡Ikháán xákáñáaʼ! ¡Xátandxa̱ʼwa̱mínáʼ xúʼko̱! Anu̱ʼ maʼthúnʼ ginii asndu ndiéjunʼ má rí eyoo maʼni. Ndíjkha lá gárkaʼwumúʼúun dí xáʼthúnʼ. Na̱nguá, xárígá xúʼko̱”.
3 Mú David niʼni káñuu dí maxná ajngóo. Niʼthúu̱n: “Ana̱a̱ʼ ndaʼyoo kaʼwu dí nandaaʼ xtayoʼ, ikhaa mandxaʼwáminaʼ: ‹Itháan májánʼ dí Jonatán xáʼyoo mu xúʼko̱ xámínuuʼ›. ¡Dí natha̱a̱nʼ ikháán ga̱jma̱a̱ Jeobá nindxu̱u̱ gajkhun, rí ikhúún xtáá makhañúʼ!”.
4 Jonatán niʼthúu̱n David: “Ma̱ni̱ ga̱jma̱a̱ numaaʼ dí gátando̱ʼo̱ʼ”.
5 Ikhú David niʼthúu̱n Jonatán: “Gájtsíí ma̱ʼkha̱ gu̱nʼ rudiiʼ, ga̱jma̱a̱ nuguaʼthi̱i̱n dí maʼgúnʼ makuíʼtsú ga̱jmu̱ʼ rey. Rígi̱ dí gúʼnilú: Matatsiʼñúʼ maʼgá ga̱jma̱a̱ ikhúún markaʼwuminaʼ náa xanáá asndu wakíʼ nawi̱i̱n.
6 Á mu ana̱a̱ʼ na̱jkha̱nú ndaʼyoo dí nda̱wu̱u̱n, ikhú aratháán: ‹David niʼtákáñúʼ dí maniʼñúuʼ maʼga̱a̱ nacha̱ náa xuajñuu Belén, numuu dí ikhí maxnájxi̱ tsigijñaʼ dí nuxnajxi̱ mámbá tsiguʼ gajmíi̱n mbá xúgíinʼ bi̱ kúwá náa goʼwóo›.
7 Á mu naʼtháanʼ ‹Májánʼ má›, rúʼko̱ nandoo gáʼthúu̱n dí xáxíñu̱u̱n. Mú á mu nakiʼnáa, natha̱a̱nʼ gajkhun dí ikhaa nandoo maxíñu̱u̱n.
8 Agáwíinʼ a̱jkia̱a̱nʼ xtayoʼ,* numuu dí nimbánaaʼ ga̱jma̱a̱ʼ xa̱bia̱a̱ʼ náa inuu Jeobá. Á mu dí gúʼdoo aʼkhúnʼ, ataxíñu̱u̱n má ikháán. Ndíjkha lá gáraxnajxiún náa ana̱a̱ʼ.”
9 Mú Jonatán niʼthúu̱n: “¡Ndíjkha dí xúʼko̱ rathá! Á mu nadxawuun dí anu̱ʼ nandoo maxíña̱a̱n, lá naku̱ma̱a̱ʼ dí xáthanʼ ráʼ.”
10 Mú David nirajxu̱u̱ Jonatán: “Tsáá lá gáʼthunʼ á mu ana̱a̱ʼ nandoo maʼni dí raʼkhí rá.”
11 Jonatán niriʼñuu David: “Ayi̱, guʼgualú xanáá...”. Ikhú mbá nájmi̱i̱n nigún,
12 Jonatán niʼthúu̱n David: “Guniʼñááʼ dí Jeobá, Dios ndrígóo Israel mani̱ndxu̱u̱ testigo, gájtsíí o nawi̱i̱n xó má hora rígi̱ wáa maniminaʼ mba̱yo̱o̱ ndiéjunʼ endxa̱ʼwáminaʼ anu̱ʼ. Á mu nda̱yo̱o̱ dí nandxa̱ʼwáminaʼ rí májánʼ ga̱jma̱a̱ numaaʼ, makuʼmáa mbáa mu maʼga gáʼtháanʼ.
13 Jeobá gáʼni mamínuuʼ á mu nadxawuun dí anu̱ʼ nandoo maʼniaaʼ dí raʼkhí ga̱jma̱a̱ ikhúún tsétháanʼ dí matani̱ kríyamínáʼ. Jeobá gáxtáa ga̱jma̱á nindxa̱a̱ʼ xó má nixtáa ga̱jma̱a̱ anu̱ʼ.
14 Lá xágáwíinʼ a̱jkia̱a̱nʼ xtayoʼ xó má eʼni Jeobá xúgi̱ dí xtáá, ga̱jma̱a̱ nda̱wa̱á á mu nakháñuʼ ráʼ.
15 Ataniu̱u̱n dí májánʼ* má xúʼko̱ bi̱ kúwíin náa goʼwóʼ, tséʼniuu má índo̱ Jeobá gáʼni gámbíin xúgíinʼ xa̱bu̱ sia̱nʼ ndrígáaʼ náa xúgíʼ tsu̱du̱u̱ ku̱ba̱ʼ”.
16 Xúʼko̱ kaʼnii Jonatán nimbánuminaʼ gajmíi̱n bi̱ kúwá náa goʼwóo David. Ma̱ngaa niʼthúu̱n: “Jeobá mandi̱ʼi̱i̱n cuenta xa̱bu̱ sia̱nʼ ndrígóo David”.
17 Jonatán niʼni rí matanga̱a̱ mbu̱júu̱ maxná ajngóo David, numuu rí nandoo kaʼyoo xó má eyoo kaʼyaminaʼ ikhaa.
18 Jonatán niʼthúu̱n: “Gájtsíí ma̱ʼkha̱ gu̱nʼ rudiiʼ ga̱jma̱a̱ makujmaa dí ndawa̱a̱n, numuu dí i̱ndó xília̱a̱ʼ* gáwi̱ji̱.
19 Ga̱jma̱a̱ nawi̱i̱n makujmaa itháan dí ndawa̱a̱n. Ikhú gíʼmaa magajnáaʼ náa nitarkaʼwuminaʼ nákha mbiʼi rúʼko̱* ga̱jma̱a̱ midxa̱a̱ʼ náa mijngii itsí rígi̱.
20 Ikhúún mada̱ʼ ajtsú flecha náa níjniúu itsí, xóo ma̱ni̱ dí xtáá raxnu̱u̱ mbóo.
21 Índo̱ gákuʼmáa bi̱ nambáyúʼ, mathu̱u̱n: ‹Ayuʼ gátaʼyáaʼ flecha›. Á mu natadxawíín dí na̱thu̱u̱n ‹Flecha ni̱jkha̱nú mijngii gi̱i̱, aya̱a̱ʼ xtaaʼ›, ikhú ma̱ndoo midxa̱a̱ʼ, numuu dí natha̱a̱nʼ gajkhun ga̱jma̱a̱ numuu mbiʼyuu Jeobá, rúʼko̱ eyoo gáʼthúu̱n dí xúgíʼ má májánʼ, nda̱a̱ dí gátagíʼníí.
22 Mú á mu natadxawíín dí na̱thu̱u̱n dxámá ‹Flecha ni̱jkha̱nú asndu itháan ñuʼún›, ikhú atagájnaaʼ mi̱dxu̱ʼ, numuu dí Jeobá nandoo dí mi̱dxu̱ʼ.
23 Jeobá gánindxu̱u̱ testigo asndu kámuu náa dí nimbánulú mu̱ʼni̱”.
24 Ikha jngóo David ni̱jkha̱ gárkaʼwuminaʼ náa xanáá. Índo̱ nigájnuu gu̱nʼ rudiiʼ, rey nigi̱ʼi̱ makuiʼtsu náa mesa.
25 Rey gíʼ náa xíliu̱u̱ dí naguʼwuun má nagi̱ʼi̱, náa kuʼmuu pared. Náa inuu Saúl gíʼ Jonatán, ga̱jma̱a̱ náa níjniúu Saúl gíʼ Abner. Mú xíliu̱u̱ David mbaʼ wíji̱í.
26 Mbiʼi rúʼko̱ Saúl nda̱a̱ má dí niʼthí, numuu dí nindxa̱ʼwáminaʼ: “Mbáa rígá dí nigíʼnuu, mbáa tsagaa. Xúʼko̱, mbáa xóó tséʼni kaʼwumina̱a̱ʼ”.
27 Mú i̱mba̱ néjtsuu dí ni̱ʼkha̱ gu̱nʼ rudiiʼ, dí maʼni a̱jma̱ mbiʼi, mbaʼ wíji̱í xíliu̱u̱ David, ikhú Saúl nirajxu̱u̱ Jonatán: “Ndíjkha dí táʼkha̱ ri̱xi̱ ni má xúgi̱ a̱ʼdióo Jesé gákuiʼtsu rá.”
28 Jonatán niriʼñuu Saúl: “David niʼtákáñúʼ dí maniʼñúuʼ maʼga náa Belén.
29 Niʼthúnʼ: ‹Atatsíñúnʼ maʼgáaʼ, mbá péñu, numuu rí bi̱ kúwá náa goʼwóʼ muxnajxi̱ mbá tsigijñaʼ náa xuajin, mina̱a̱ʼ ndxájuʼ nindo̱ʼo̱ʼ dí maʼgáaʼ. Ikha jngóo, á mu májánʼ tayáá, natakáñaaʼ dí matatsiʼñúʼ maʼgáaʼ gáñu̱u̱n a̱ngui̱nʼ›. Ikhaa numuu rúʼko̱ dí táʼkha̱ náa mesóo rey”.
30 Ikhú Saúl ra̱ʼkhá tháán nikiʼnáa kaʼyoo Jonatán, niʼthúu̱n: “¡Ñajuanʼ mbáa skágunʼ! ¡A̱ʼdióo mbáa a̱ʼgu̱ bi̱ nda̱a̱ rí ejmaa! Lá naku̱ma̱a̱ʼ dí tséyóo dí májánʼ embájxa̱a̱ʼ ga̱jma̱a̱ʼ a̱ʼdióo Jesé ráʼ. ¡Natríyaʼ gamajkuaʼ má ikháán ga̱jma̱a̱ gamajkuu ru̱dáaʼ!
31 Nákha a̱ʼdióo Jesé xóó xtáa ndaʼya, ikháán ga̱jma̱a̱ reino ndrígáaʼ xájyúuʼ mba̱yu̱u̱ʼ. Ikha jngóo ataxúʼmaa mbáa bi̱ maʼga gáyáaʼ, gíʼmaa dí makhañúu”.*
32 Mú Jonatán niriʼñuu Saúl: “Náá numuu dí gíʼmaa makhañúu xá. Ndiéjunʼ lá niʼni”.
33 Ikhú Saúl nidaʼ kudú* náa gíʼ mu maxíyáa, Jonatán ni̱jkha̱nú ndiʼyoo kaʼwu dí anu̱u̱ nandoo maxíyáa David.
34 Ikhú mbá nacha̱ nitujxu sngañu̱u̱ʼ Jonatán náa mesa. Dí maʼni a̱jma̱ mbiʼi rúʼko̱ dí ni̱ʼkha̱ gu̱nʼ rudiiʼ na̱nguá niʼkhu̱ nimbá. Nixtáa ngíná ga̱jma̱a̱ numuu David ga̱jma̱a̱ numuu dí mina̱a̱ʼ má anu̱u̱ niríyaʼ majkhuu.
35 Miʼcha̱ Jonatán ni̱jkha̱ xanáá, xó má nimbánuminaʼ ga̱jma̱a̱ David, ni̱jkha̱ ga̱jma̱a̱ mbáa dxámá bi̱ nambáyúu.
36 Ikhí niʼthúu̱n dxámá bi̱ nambáyúu: “Atagáyáaʼ ga̱jma̱a̱ atayáaʼ flecha dí mada̱ʼ”. Ikhú bi̱ nambáyúu nigájnuu ragáyúu, ga̱jma̱a̱ Jonatán nidaʼ i̱mba̱ flecha itháan mitsínguánʼ náa wíji̱.
37 Índo̱ bi̱ nambáyúu Jonatán ni̱jkha̱nú náa nidaʼ flecha, ikhú Jonatán niʼthúu̱n gakhi̱i̱: “Nda̱a̱ flecha itháan ñuʼún ráʼ.”
38 Jonatán niʼthúu̱n gakhi̱i̱: “¡Ga̱ʼcha̱a̱ʼ! ¡Atagáyáaʼ! ¡Xátani̱ gajyuminaʼ!”. Ikhú bi̱ nambáyúu nigujxi̱i̱ flecha ga̱jma̱a̱ ni̱ʼkha̱a̱ náa wíji̱ tátióo.
39 Mú bi̱ nambáyúu tséʼyoo nimbá, i̱ndó Jonatán ga̱jma̱a̱ David ndiyáá dí nandoo gáʼthúu̱n dí xígi̱ nini̱.
40 Nda̱wa̱á Jonatán nixnúu aju̱u̱nʼ dí naxmínaʼ ga̱jma̱a̱ bi̱ nambáyúu, niʼthúu̱n: “Ayu̱u̱ʼ, adiédxuuʼ náa xuajin”.
41 Índo̱ bi̱ nambáyúu ni̱jkha̱a̱, ikhú David nigájnáa náa nirkaʼwuminaʼ, náa mijngii má ikhí, xígií náa sur. Ikhú nigiʼnduti̱ga̱* ga̱jma̱a̱ nismbáti̱go̱o̱ asndu mbayííʼ mbá ajtsú nuthu. Nda̱wa̱á nixnamijná beso ga̱jma̱a̱ nimbi̱ya̱ʼ, mú bi̱ itháan nimbi̱ya̱ʼ ninindxu̱u̱ David.
42 Jonatán niʼthúu̱n David: “Ayuʼ tsímáá, numuu dí nájmáánʼ nixná ajngúlú ga̱jma̱a̱ numuu mbiʼyuu Jeobá. Niʼthá: ‹Jeobá gánindxu̱u̱ testigo kámuu náa ikháán ga̱jma̱a̱ náa ikhúún, ma̱ngaa bi̱ gáguwáʼ náa ikháánʼlú›”.
Nda̱wa̱á David ni̱jkha̱, ga̱jma̱a̱ Jonatán nitanga̱a̱ náa xuajin.
Mbaʼa nota
^ O “tátiáaʼ”.
^ O “atasngájmún ngajua rí tsétumuu”.
^ O “skáñáan”.
^ Náa ajngáa hebreo naʼthí, “mbiʼi dí nuñejunʼ”.
^ Náa ajngáa hebreo naʼthí, “numuu rí ikhaa nindxu̱u̱ mbáa a̱ʼdióo dí nakháñulú”.
^ O “lanza”.
^ O “nixngutigamínáʼ”.
