Timbá libro rí niʼnirámáʼ Samuel 22:1-23
22 Ikha jngóo David nigájna̱a̱ ikhí ga̱jma̱a̱ ni̱jkha̱ gámbáyuminaʼ náa tsíñu dí rígá náa Adulam. Índo̱ a̱ngui̱i̱n ga̱jma̱a̱ xúgíinʼ bi̱ kúwíin náa goʼwóo anu̱u̱* nidxawíín, niguájtaa gúyáá ikhí.
2 Ma̱ngaa mbá xúgíinʼ xa̱bu̱ bi̱ guáʼdáá xkujndu, bi̱ gíʼmiin ga̱jma̱a̱ bi̱ na̱nguá kúwá tsímáá, nigún kidxuuʼ David ga̱jma̱a̱ ikhaa ninindxu̱u̱ bi̱ niʼtáñajúúnʼ. Xa̱bekha bi̱ xtáa gajmíi̱n nindxu̱ún xóo mbá 400.
3 Nda̱wa̱á David nigájna̱a̱ náa Mizpé dí kaʼyoo Moab ga̱jma̱a̱ niʼthúu̱n rey bi̱ xtáa náa Moab: “Mbá péñu,* atatsíñáánʼ dí anu̱ʼ ga̱jma̱a̱ ru̱dúʼ* maguanún ga̱jma̱á nindxa̱la asndu índo̱ gáyóo ndiéjunʼ gáʼni Dios ga̱jma̱a̱ numuʼ”.
4 Ikha jngóo anu̱u̱ ga̱jma̱a̱ ru̱dúu̱ niguanún náa rey bi̱ xtáa náa Moab, ikhiin niguanún ikhí mbá xúgíʼ mbiʼi dí David nijnguʼwúun ragáyúu mu maʼni kríyamínáʼ.
5 Itháan nda̱wa̱á profeta* Gad niʼthúu̱n David: “Xáguanáaʼ náa nitarkaʼwuminaʼ. Ayuʼ náa ku̱bu̱únʼ xa̱bu̱ Judá”. Ikha jngóo David nigájnuu ikhí ga̱jma̱a̱ ni̱jkha̱ náa xaxi̱ Héret.
6 Saúl niʼdxawuun dí nixka̱ma̱a̱ David ga̱jma̱a̱ xa̱bu̱ bi̱ ni̱jkha̱ gajmíi̱n. Nijuiʼtháán rígi̱ índo̱ ikhaa gíʼ náa agoo ixi̱ tamarisco* náa dí mitsídánʼ dí rígá náa Guibeá. Kayá kudú* náa ñawúunʼ ga̱jma̱a̱ mbá xúgíinʼ xa̱bi̱i̱ kúwá náa mbájndi ikhaa.
7 Ikhú Saúl niʼthúún mbá xúgíinʼ xa̱bi̱i̱ bi̱ kúwá mbájndi náa ikhaa: “Mbá péñu, xa̱bekha benjaminitas gudxawunʼla. Lá nakumalaʼ dí a̱ʼdióo Jesé maxnála mbaaʼ ga̱jma̱a̱ ku̱ba̱ʼ náa kiʼdu ixi̱ uva mbá xúgiáanʼ ikháanʼla ráʼ. Lá nakumalaʼ dí ikhaa magrui̱ga̱a̱nʼla mu mbuya̱ edxu̱u̱ náa mil ga̱jma̱a̱ náa 100 xa̱bu̱ ráʼ.
8 ¡Xúgiáanʼ ikháanʼla nigímbúmíjná mu mu̱niuʼ dí raʼkhí! ¡Nimbáa na̱nguá niʼthúnʼ á mu mina̱a̱ʼ a̱ʼdióʼ nimbánuminaʼ ga̱jma̱a̱ a̱ʼdióo Jesé! Nimbáa tségáwíinʼ a̱jkiu̱u̱n kaʼyoʼ ni má táʼthúnʼ dí mina̱a̱ʼ a̱ʼdióʼ niʼni dí xa̱bi̱ʼ magi̱ʼtu̱nʼ mu maxíñu̱u̱n, xó má xtáa rarígá xúgi̱”.
9 Ikhú Doeg xa̱bu̱ Edom, bi̱ naʼtáñajúúnʼ xa̱bi̱i̱ Saúl, niriʼñuu: “Ndi̱yo̱o̱ índo̱ a̱ʼdióo Jesé ni̱jkha̱nú náa Nob mu mbaʼyoo Ahimélec a̱ʼdióo Ahitub.
10 Ga̱jma̱a̱ Ahimélec nirajxu̱u̱ Jeobá ga̱jma̱a̱ mbiʼyuu ikhaa, ma̱ngaa nixnúu dí maguéʼga. Asndu nixnúu espádóo Goliat xa̱bu̱ filisteo”.
11 Mbá nacha̱ rey nikuʼma dí maguwáʼ kuya̱a̱ Ahimélec a̱ʼdióo Ahitub bi̱ nindxu̱u̱ ndxajkun, ga̱jma̱a̱ mbá xúgíinʼ ndxajkun bi̱ kúwá náa goʼwóo anu̱u̱ bi̱ kúwá náa Nob. Mbá xúgíinʼ nigún náa xtáa rey.
12 Ikhú Saúl niʼthúu̱n: “¡Atadxawíín dí natha̱nʼ, a̱ʼdióo Ahitub!”. Ikhaa niriʼñuu: “Gi̱i̱ xtáá tátioʼ”.
13 Saúl niʼthúu̱n: “Ndíjkha dí ikháán ga̱jma̱a̱ʼ a̱ʼdióo Jesé nuruwamíjna̱la mu̱niuʼ dí raʼkhí rá. Náá numuu dí niraxnáá pan ga̱jma̱a̱ mbá espada, ma̱ngaa nitrajxi̱i̱ Dios ga̱jma̱a̱ mbiʼyuu xá. Ikhaa nindxu̱u̱ xa̱bu̱ sia̱nʼ ndrígóʼ ga̱jma̱a̱ nandoo magi̱ʼtu̱nʼ mu maxíñu̱u̱n, ikhaa rúʼko̱ dí xtáa rarígá xúgi̱”.
14 Índo̱ Ahimélec niʼdxawuun rígi̱, ikhú niʼthúu̱n rey: “Lá xtáa i̱mba̱a̱ xa̱bia̱a̱ʼ bi̱ nindxu̱u̱ jmbii* xóo David ráʼ. Nindxu̱u̱ nigiúunʼ rey, naʼtáñajúúnʼ bi̱ nuñewa̱a̱n’ ga̱jma̱a̱ nduyamajkuíí bi̱ kúwá náa guʼwáaʼ.
15 Na̱nguá nindxu̱u̱ timbá miʼtsú dí narajxu̱u̱ Dios ga̱jma̱a̱ mbiʼyuu ikhaa. ¡Ikhúún nditháan xáni̱ dí xtaa raratá! Tátioʼ, xátani̱ tsu̱du̱ʼ ikhúún ni má nimbáa bi̱ xtáa náa goʼwóo anu̱ʼ. Tséyóo ndiéjunʼ xtaa raratá”.
16 Mú rey niʼthúu̱n: “¡Makhañáaʼ Ahimélec! Ikháán gajmiáanʼ mbá xúgíinʼ bi̱ kúwá náa goʼwóo ana̱a̱ʼ”.*
17 Ikhú rey niʼthún bi̱ nuñewa̱a̱n bi̱ kúwá mbájndi náa ikhaa: “¡Aʼguala, guradíin ndxajkun ndrígio̱o̱ Jeobá! ¡Ikhiin nimbayíí David! ¡Nduyáá má dí jnguʼwúun ragáyúu, mú ikhiin nda̱a̱ dí nithu̱nʼ!”. Bi̱ nuñewa̱a̱n rey táʼndúún gúradíin ndxajkun ndrígio̱o̱ Jeobá.
18 Ikhú rey niʼtáñajuunʼ Doeg xa̱bu̱ Edom: “¡Ayuʼ ikháán gáradíin!”. Mbá nacha̱ Doeg nigudíin ndxajkun. Mbiʼi rúʼko̱ nigudíin mbá 85 xa̱bekha bi̱ kugíʼ efod* dí niguma ga̱jma̱a̱ lino.
19 Ma̱ngaa nigudíin xa̱bu̱ bi̱ kúwá náa Nob, xuajin náa kúwá ndxajkun. Nigudíin ga̱jma̱a̱ espada xa̱bekha, gu̱ʼu̱, e̱ji̱n ga̱jma̱a̱ e̱jín dxáñáʼ, xó má xedi̱, búrru ga̱jma̱a̱ mugu̱.
20 Mú mbáa a̱ʼdióo Ahimélec a̱ʼdióo Ahitub bi̱ mbiʼyuu Abiatar niʼngo̱o̱ niʼni kríyamínáʼ, ga̱jma̱a̱ ni̱jkha̱ ragáyúu mu ma̱ngaa maʼga kidxuuʼ David.
21 Abiatar niʼthúu̱n David: “Saúl nigudíin ndxajkun ndrígio̱o̱ Jeobá”.
22 Índo̱ David niʼdxawuun rígi̱, ikhú niʼthúu̱n Abiatar: “Ndi̱yo̱o̱ má dí xúʼko̱ gárígá. Mbiʼi rúʼko̱, nákha ndi̱yo̱o̱ Doeg xa̱bu̱ Edom, niku̱mu̱ʼ má dí maʼthúu̱n Saúl. Ikhúún gúʼdoo aʼkhúnʼ dí nikháñún mbá xúgíinʼ bi̱ kúwá náa goʼwóo ana̱a̱ʼ.
23 Aguanáaʼ ga̱jma̱á nindxu̱ʼ. Xámíñáaʼ, numuu dí á mu mbáa gáʼndoo dí maxíña̱a̱n, mani̱ndxu̱u̱ asndu xóo ikhúún eyoo maxíñu̱u̱n. Mañewa̱a̱nʼ má ikhúún”.
Mbaʼa nota
^ O “tátée”.
^ O “Atani̱ mbá rí májánʼ”.
^ O “táteʼ ga̱jma̱a̱ náneʼ”.
^ O “gaʼyee, bi̱ naʼthí dí marigá”.
^ Ixi̱ rígi̱ najma̱a̱n náa ku̱ba̱ʼ mijxooʼ, majkhaʼ inúu ga̱jma̱a̱ riʼyu̱u̱ nindxu̱u̱ rosa o miʼxá.
^ O “lanza”.
^ O “bi̱ maku̱ma̱a̱ʼ xtayáá”.
^ O “tátiáaʼ”.
