Timbá libro rí niʼnirámáʼ Samuel 23:1-29
23 Nda̱wa̱á nitháán David: “Filisteos kúwá ratu̱ʼu̱u̱n náa Queilá ga̱jma̱a̱ kúwá runi̱ kuʼwáʼ rí nixtagijxi̱i̱ dí nijuiʼdu”.
2 David nirajxu̱u̱ Jeobá: “Lá gíʼmúún maʼgá gáxmijná gajmíʼ xa̱bu̱ filisteos ráʼ.” Jeobá niriʼñuu: “Aan, ayuʼ gátaxmíjná gajmiáanʼ filisteos, ga̱jma̱a̱ atani̱ káwíin xa̱bu̱ Queilá”.
3 Mú xa̱bi̱i̱ David nitháán: “Á mu dí namíñulú má kuwáánʼ gi̱i̱ náa Judá, ¡iwáálá índo̱ gúʼgua̱ gúxmijná gajmiúlú soldado filisteos náa Queilá rá!”.
4 Ikhú David nitanga̱a̱ nirajxu̱u̱ Jeobá, ga̱jma̱a̱ dí xúgi̱ Jeobá niriʼñuu: “Arajthun kamba̱a̱ mi̱dxu̱ʼ. Arajtaa náa Queilá, numuu dí maxnajxíin filisteos náa ñawáanʼ”.
5 Ikha jngóo David gajmíi̱n xa̱bi̱i̱ nigún náa Queilá, ga̱jma̱a̱ nixmijná gajmiún filisteos. Nigudíin mbaʼin ga̱jma̱a̱ ni̱jkha̱a̱ kagui̱i̱n xujkiún. Xúʼko̱ niʼni dí David niʼngo̱o̱ niʼni káwíin xa̱bu̱ Queilá.
6 Índo̱ Abiatar a̱ʼdióo Ahimélec nigáyúu ni̱jkha̱ náa Queilá mu maʼga kidxuuʼ David, kayá ni̱jkha̱ mbá efod.*
7 Ikhú nitháán Saúl: “David xtáa náa Queilá”. Saúl niʼthí: “Dios nixnájxi̱i̱ náa ñawúnʼ, numuu dí ikhaa má nito̱ʼo̱o̱ náa xuajin dí gíʼdoo xkrugua dí rígá dí kraʼa jngayuu, ga̱jma̱a̱ dí xúgi̱ nánguá náa ma̱ndoo magáyúu”.
8 Ikha jngóo Saúl nigímbíin xúgíinʼ soldado ndrígóo mu magún gúxmijná, mu maguajtáa náa Queilá ga̱jma̱a̱ muruguama̱ʼa̱a̱n David gajmíi̱n xa̱bi̱i̱.
9 Índo̱ David niʼdxawuun dí Saúl xtáa raríya̱ʼ awan mu maʼga gáxíyáa, ikhú niʼthúu̱n ndxajkun Abiatar: “Ayi̱ jcháaʼ gi̱i̱ efod”.
10 Ikhú David niʼthí: “Jeobá, Dios ndrígóo Israel, nidxawuun dí Saúl nandoo gáʼkha̱ náa Queilá maʼni gámbáa xuajin ga̱jma̱a̱ numuʼ.
11 Lá muxnajxiu̱u̱n náa ñawúunʼ Saúl xa̱bu̱ bi̱ kuya̱ edxu̱u̱* náa xuajin rígi̱ ráʼ. Lá gajkhun dí Saúl magajtaa xó má niʼdxuun xa̱bia̱a̱ʼ ráʼ. Jeobá, Dios ndrígóo Israel, aratháán xa̱bia̱a̱ʼ mbá péñu”. Jeobá niriʼñuu: “Aan magajtaa”.
12 David nirajxu̱u̱: “Lá muxnajxiu̱u̱n ikhúún gajmíʼ xa̱bi̱ʼ náa ñawúunʼ Saúl xa̱bu̱ bi̱ kuya̱ edxu̱u̱ náa Queilá ráʼ.” Jeobá niriʼñuu: “Aan muxnajxiáanʼla”.
13 Mbá nacha̱ David nigájna̱a̱ náa Queilá gajmíi̱n xa̱bi̱i̱, naʼni xóo mbá 600, nigún rajnguʼwún. Índo̱ Saúl niʼdxawuun dí David nigájna̱a̱ náa Queilá, ikhú nánguá ni̱jkha̱ raxkoo.
14 David nirkaʼwuminaʼ náa ku̱ba̱ʼ mijxooʼ* náa dí rakáʼnii mi̱dxu̱ʼ, náa kúbá dí rígá náa ku̱ba̱ʼ mijxooʼ Zif. Saúl ndiyáaʼ má xúʼko̱, mú Jeobá na̱nguá nixnájxi̱i̱ náa ñawúunʼ.
15 Índo̱ David xtáa náa ku̱ba̱ʼ mijxooʼ Zif, náa Hores, ndiʼyoo má dí Saúl nigájnuu gáyáaʼ mu maxíyáa.
16 Jonatán a̱ʼdióo Saúl ni̱jkha̱ gáʼyoo David náa Hores, nimbáyúu mu maku̱mu̱u̱ kaʼyoo itháan Jeobá.
17 Niʼthúu̱n: “Xámíñáaʼ, numuu dí anu̱ʼ* Saúl xáxkamáánʼ má. Ikháán gánindxa̱a̱ʼ rey náa Israel, ga̱jma̱a̱ ikhúún matañájunʼ nda̱wa̱á dí ikháán. Anu̱ʼ Saúl ndaʼyoo májánʼ má dí xúʼko̱ gárígá”.
18 Ikhú mbá nájmi̱i̱n nimbánúún náa inuu Jeobá. Nda̱wa̱á Jonatán ni̱jkha̱a̱ náa goʼwóo ga̱jma̱a̱ David niguanúu má náa Hores.
19 Nda̱wa̱á xa̱bu̱ Zif nitsimún náa Guibeá, náa xtáa Saúl, nitháán: “David xtáa rarkaʼwuminaʼ náa mijngii kuwáanʼxu̱, náa dí rakáʼnii mi̱dxu̱ʼ náa Hores, náa bíjní Hakilá, xígií náa sur* náa Jesimón.*
20 Tátá rey, índo̱ gáʼndaaʼ marajtaa, arajtaa. Numuu dí ikháanʼxu̱ muxnajxíi̱xu̱ náa ñawáanʼ”.
21 Saúl niriʼñúún: “Jeobá gáʼni tsajkurámáanʼla, numuu dí nigáwíinʼ a̱jkia̱la kuyoʼ.
22 Gaʼguala, gunimíjna̱ mbu̱ya̱a̱la mbá péñu náá phú mina̱a̱ʼ xtáa ga̱jma̱a̱ tsáá ndiʼyoo ikhí, numuu dí nithu̱nʼ dí ra̱ʼkhá tháán lístíi.
23 Gu̱ya̱a̱la májánʼ náa phú erkaʼwuminaʼ ga̱jma̱a̱ gaguwa̱ʼ ku̱ya̱la mbóo mu mba̱yo̱o̱ á mu gajkhun. Ikhú maʼgá ga̱jma̱á nindxa̱la ga̱jma̱a̱ á mu xtáa náa xuajin mbaʼyáaʼ náa mbá xúgíʼ guʼwíin bi̱ kúwá náa Judá”.
24 Ikha jngóo nigún ginuun náa Saúl ga̱jma̱a̱ nigún náa Zif. Índo̱ David gajmíi̱n xa̱bi̱i̱ kúwá rurkaʼwumijná náa ku̱ba̱ʼ mijxooʼ Maón, náa Arabá, xígií náa sur ndrígóo Jesimón.
25 Nda̱wa̱á Saúl ni̱jkha̱nú gajmíi̱n xa̱bi̱i̱ mu mbuyáaʼ. Índo̱ David niʼdxawuun nigajtaa náa tsíñu ga̱jma̱a̱ niguanúu náa ku̱ba̱ʼ mijxooʼ dí rígá náa Maón. Índo̱ Saúl niʼdxawuun, ikhú nigíʼdu̱u̱ nixkoo náa ku̱ba̱ʼ mijxooʼ Maón.
26 David gajmíi̱n xa̱bi̱i̱ kúwá náa mbá níjniúu kúbá índo̱ Saúl ni̱ʼkha̱nú náa i̱mba̱ níjniúu. David ndiyáʼ nacha̱ xóo magáyúu, mú Saúl gajmíi̱n xa̱bi̱i̱ gítháán má muxkamiin mu murugui̱i̱n.
27 Mú ni̱ʼkha̱nú mbáa xa̱bu̱ ga̱jma̱a̱ niʼthúu̱n Saúl: “¡Ga̱ʼcha̱a̱ʼ! ¡Ndayóoʼ dí mata̱nga̱án! ¡Numuu dí filisteos kúwá ruxmijná náa xuajñulú!”.
28 Ikha jngóo Saúl niniñuuʼ raxkoo David, nitanga̱a̱ gáxmijná gajmíi̱n filisteos. Ikha jngóo mbaaʼ rúʼko̱ nixna mbiʼíí Tsíñu dí Niwiʼtáa.
29 Nda̱wa̱á David nitsimuu ni̱jkha̱ gámbáyuminaʼ náa dí rakáʼnii mi̱dxu̱ʼ náa En-Guedí.
Mbaʼa nota
^ O mbáa “xa̱bu̱ bi̱ mbañúúnʼ ikhí”.
^ O “desierto”.
^ O “táteʼ”.
^ Náa ajngáa hebreo naʼthí, “ñawún májáanʼ”.
^ O mbáa “náa ku̱ba̱ʼ mijxooʼ”.
