Timbá libro rí niʼnirámáʼ Samuel 24:1-22
24 Índo̱ Saúl nitanga̱a̱ náa rí ni̱jkha̱ gáxkúún filisteos, nitháán rígi̱: “David xtáa náa ku̱ba̱ʼ mijxooʼ* náa En-Guedí”.
2 Ikha jngóo Saúl ni̱jkha̱ gajmíi̱n mbá 3,000 soldado bi̱ kijmaratiin májánʼ bi̱ kúwíin náa xúgíʼ Israel, ni̱jkha̱ gáyáaʼ David gajmíi̱n xa̱bi̱i̱ náa rawuunʼ xpátsí náa jngumún tsujtu xáná.
3 Saúl ni̱jkha̱nú náa gúlu̱ún mugu̱ dí niguma ga̱jma̱a̱ itsí, dí gíʼ náa rawuunʼ kamba̱a̱. Ikhí rígá mbá tsíñu ga̱jma̱a̱ nito̱ʼo̱o̱ gámíjxuuʼ* ikhí. David gajmíi̱n xa̱bi̱i̱ jngútiʼiin asndu náa awúún tsíñu.
4 Ikhú xa̱bi̱i̱ David nitháán: “Mbiʼi rígi̱ dí Jeobá naʼtháanʼ: ‹Maxnajxíi xa̱bu̱ sia̱nʼ ndrígáaʼ náa ñawáanʼ. Ma̱ndoo matani̱i̱ rí májánʼ má gáta̱ya̱a̱›”. Ikha jngóo David nitu̱jxu̱u̱ tsumáá ni̱jkha̱ nirujtu rawuunʼ xtíñuu Saúl dí nda̱a̱ ñawúunʼ.
5 Nda̱wa̱á David niʼni gawúunʼ ku̱ma̱ ndrígóo* dí nirujtu xtíñuu Saúl dí nda̱a̱ ñawúunʼ.
6 Niʼthún xa̱bi̱i̱: “Maxándoo maniu̱u̱ rúʼko̱ tátioʼ, numuu rí nindxu̱u̱ bi̱ Jeobá niraʼwíi. Nda̱yo̱o̱ xú káʼnii eʼyoo Jeobá, ikha jngóo nditháan maxániuu dí ra̱májánʼ bi̱ Jeobá niraʼwíi”.
7 Índo̱ David niʼthúún rígi̱ xa̱bi̱i̱, nirikhún* rí xúxnáá Saúl. Ga̱jma̱a̱ Saúl nigájnáa náa tsíñu ni̱jkha̱a̱.
8 Ikhú David nitu̱xu̱u̱ ga̱jma̱a̱ nigájnáa náa tsíñu nindxaʼwájmaa Saúl: “¡Rey tátá ndrígóʼ!”. Índo̱ Saúl nitanga̱a̱ niyejxi̱ kidííʼ, David nigiʼnduti̱ga̱* ga̱jma̱a̱ nismbáti̱go̱o̱ asndu mbayííʼ.
9 David nirajxu̱u̱ Saúl: “Ndíjkha rí natadxawúún bi̱ nuthi ‹David nandoo gáʼniaaʼ dí ra̱májánʼ›.
10 Xúgi̱ ma̱ndoo ma̱ta̱ya̱a̱ ga̱jma̱a̱ idaaʼ dí Jeobá nixnájxi̱i̱n náa ñawúnʼ náa tsíñu. Nithu̱nʼ rí maxíña̱a̱n, mú nigáwíinʼ a̱jkiu̱nʼ ka̱ya̱a̱ʼ ga̱jma̱a̱ nitamínáʼ: ‹Xániuu dí ra̱májánʼ tátioʼ numuu rí nindxu̱u̱ bi̱ Jeobá niraʼwíi›.
11 Anu̱ʼ,* atayáá rawuunʼ xtíñaaʼ rí mbi̱jua̱ dí nda̱a̱ ñawúunʼ rí ka̱ya̱ náa ñawúnʼ. Índo̱ nirujtu ma̱ndoo maxíña̱a̱n, mú na̱nguá ni̱ni̱. Xúgi̱ ma̱ndoo ma̱ta̱ya̱a̱ rí na̱nguá eyoʼ mania̱a̱ʼ nimbá dí ra̱májánʼ ni dí makujximinaʼ náa ikháán. Na̱nguá nikiéʼkhun náa ikháán. Mú ikháán nindxa̱a̱ʼ bi̱ natañúuʼ mu mataxíñúu.
12 Jeobá gánindxu̱u̱ bi̱ gáʼnimbánuu numulú. Jeobá gáʼni gínáán dí xígi̱ kaʼnii taniuʼ, mú ikhúún na̱nguá endxa̱ʼwáminaʼ mania̱a̱ʼ dí ra̱májánʼ.
13 Xó má eʼthí náa mbá ajngáa ku̱ma̱, ‹Náa xa̱bu̱ ramíjíin na̱ʼkha̱ dí ra̱májánʼ›. Ikha jngóo ikhúún xániaaʼ dí ra̱májánʼ.
14 Tsáá lá eyoo maguguaa rey ndrígóo Israel rá. Tsáá lá edxu̱ʼ raxkáá. Ikhúún rí nindxu̱ʼ mbáa xu̱wánʼ bi̱ nikháñuu, rí nindxu̱ʼ mbáa ñu̱úʼ ráʼ.
15 Jeobá gáʼnimbánuu numulú, ikhaa gáʼthí tsáá eʼni rí májánʼ. Ikhaa gáʼyoo dí xtáa rarígá ga̱jma̱a̱ ikhaa gámbáyúʼ. Ikhaa gáʼniuʼ rí májánʼ ga̱jma̱a̱ maʼni kríñu̱u̱nʼ náa ñawáanʼ”.
16 Índo̱ David niguámbóo niʼthí ajngáa rígi̱, Saúl nirajxu̱u̱: “David, a̱ʼdióʼ, ikháán aʼwáaʼ rúʼko̱ ráʼ.” Ikhú Saúl nigíʼdu̱u̱ nimbi̱ya̱ʼ gakhi̱i̱.
17 Ga̱jma̱a̱ niʼthúu̱n David: “Ikháán nindxa̱a̱ʼ itháán jmbii ki xóo ikhúún, numuu rí nitaniuʼ rí májánʼ, mú ikhúún xtáá rania̱a̱ʼ dí ra̱májánʼ.
18 Xtaa raratunʼ xúgi̱ rí májánʼ rí nitaniuʼ numuu rí Jeobá nixnájxiu̱u̱n náa ñawáanʼ, mú na̱nguá nitaxíñúu.
19 Tsáá lá bi̱ naxkamaa xa̱bu̱ sia̱nʼ ndrígóo ga̱jma̱a̱ naniñuuʼ maʼga̱a̱ rí asndu nda̱a̱ dí eʼniuu xá. Jeobá gáʼni numa̱a̱ dí nitaniuʼ xúgi̱.
20 Rí xúgi̱ nda̱yo̱o̱ májánʼ dí ikháán mani̱ndxa̱a̱ʼ rey ga̱jma̱a̱ dí reino ndrígóo Israel marigá má xúʼko̱ náa ñawáanʼ.
21 Rí xúgi̱ araxná ajngáaʼ ga̱jma̱a̱ mbiʼyuu Jeobá rí xátani̱ gámbíin bi̱ gáguwáʼ náa ikhúún, índo̱ ikhúún ni ndawu̱u̱n. Araxná ajngáaʼ rí xátani̱ jngudi̱i̱ mbiʼyuʼ náa bi̱ naguwáʼ náa goʼwóo anu̱ʼ”.
22 Ikha jngóo David nixná ajngóo náa Saúl. Nda̱wa̱á dí rúʼko̱ Saúl ni̱jkha̱a̱ náa goʼwóo, ga̱jma̱a̱ David nitsima̱a̱ gajmíi̱n xa̱bi̱i̱ náa numbayúmíjná.
Mbaʼa nota
^ O “desierto”.
^ Náa ajngáa hebreo naʼthí, “ni̱jkha̱ gárúgoo rajkhúu”.
^ Náa ajngáa hebreo naʼthí, “a̱jkiu̱u̱n”.
^ O mbáa “nigadríʼiin”.
^ O “nixngutigamínáʼ”.
^ O “táteʼ”.
