Timbá libro rí niʼnirámáʼ Samuel 26:1-25
26 Nda̱wa̱á xa̱bu̱ bi̱ kúwá náa Zif nigún náa Guibeá ga̱jma̱a̱ nitháán Saúl: “David xtáa rarkaʼwuminaʼ náa bíjní Hakilá, náa ridoo Jesimón”.*
2 Ikha jngóo Saúl nigajtaa náa ku̱ba̱ʼ mijxooʼ* Zif gajmíi̱n mbá 3,000 soldado bi̱ kijmarathiin májánʼ bi̱ kúwá náa Israel mu mbuyáaʼ ikhí David.
3 Saúl nigi̱ʼi̱ gajmíi̱n xa̱bi̱i̱ náa mijngii kamba̱a̱ náa bíjní Hakilá, dí rígá náa ridoo Jesimón. Índo̱ David xtáa náa ku̱ba̱ʼ mijxooʼ niʼdxawuun dí Saúl ni̱ʼkha̱ gáyáaʼ.
4 Ikha jngóo David nikuʼmiin tikhuun bi̱ muyama mu mbuyáá á mu gajkhun Saúl xtáa ikhí.
5 Nda̱wa̱á David ni̱jkha̱ náa dí Saúl gajmíi̱n xa̱bi̱i̱ nigi̱ʼi̱i̱n, ndiʼyoo dí Saúl xtáa raʼgu, xúʼko̱ má bi̱ naʼtáñajúúnʼ soldado ndrígóo bi̱ mbiʼyuu Abner a̱ʼdióo Ner. Saúl xtáa raʼgu náa ta̱pho̱o̱ dí gíi̱nʼ, ga̱jma̱a̱ soldado kúwá mbájndi náa ikhaa.
6 Ikhú David nirajxu̱u̱ Ahimélec xa̱bu̱ hitita ga̱jma̱a̱ Abisái a̱ʼdióo Zeruyá, ndxájuu Joab: “Tsáá gágajtaa ga̱jma̱á ni̱ndxu̱ʼ náa xtáa Saúl rá.” Ikhú Abisái niriʼñuu: “Maʼgá ikhúún ga̱jma̱á nindxa̱a̱ʼ”.
7 Mbruʼun David ga̱jma̱a̱ Abisái niʼngu̱u̱n nitu̱ʼu̱u̱n náa gíi̱nʼ, ndiyáá dí Saúl kri̱ga̱a̱ raʼgu ga̱jma̱a̱ kudú* ndrígóo wíji̱ mbayííʼ náa mijngii edxu̱u̱. Abner gajmíi̱n soldado kúwá runuʼ náa mbájndi kri̱ga̱a̱.
8 Abisái niʼthúu̱n David: “Xúgi̱ Dios naxnájxi̱i̱ xa̱bu̱ sia̱nʼ ndrígáaʼ náa ñawáanʼ. Mbá péñu,* atatsíñúnʼ maxkruaʼa jngayii kudú. Kááʼ mbóó má gáxnúu, xáʼyóoʼ má maxnu̱u̱ imbo̱o̱”.
9 Mú David niʼthúu̱n Abisái: “Xátani̱ gawíínʼ. Tsáá lá gándoo gáʼniuu dí ra̱májánʼ bi̱ Jeobá niraʼwíi dí asndu xágiʼdoo aʼkhúun rá.”
10 David niʼthúu̱n xóó: “Na̱xna̱ ajngóʼ ga̱jma̱a̱ mbiʼyuu Jeobá, dí mina̱a̱ʼ má Jeobá gáxíyáa o mbóo mbiʼi makhañúu xó má xúgiáánʼ nakháñulú o maʼga gáxmína̱ʼ ga̱jma̱a̱ ikhí gákháñuu.
11 Nda̱yo̱o̱ xú kaʼnii Jeobá eʼyoo xúgíʼ, ¡nditháan xániuu dí ra̱májánʼ bi̱ Jeobá niraʼwíi! Ikha jngóo, ayá kudú dí wíji̱ náa edxu̱u̱ ga̱jma̱a̱ rayaʼ náa ga̱jnu̱ʼ iyaʼ, guʼgua̱a̱ʼlú”.
12 Ikhú David ndiyá kudú ga̱jma̱a̱ rayaʼ náa ga̱jnu̱ʼ iyaʼ dí wíji̱ náa mijngii edxu̱u̱ Saúl, ga̱jma̱a̱ nigúun. Nimbáa táʼñún ni má táʼyoo dí nirígá. Xúgíinʼ nunuʼ. Na̱nguá ndijñún, numuu dí Jeobá niʼni dí munuʼ midu̱u̱n.
13 Ikhú David nikidaa náa i̱mba̱ ridoo mata* ga̱jma̱a̱ nifri̱gu náa inuu kúbá, mitsínguánʼ náa gríguiin ikhiin.
14 David niʼthún gakhi̱i̱ soldado ga̱jma̱a̱ Abner a̱ʼdióo Ner: “¡Abner! ¡Atriʼñuʼ!”. Abner niriʼñuu: “Tsáá lá ñajuaanʼ ikháán dí jngrui̱ga̱a̱ʼ ratandxaʼwájmaa rey rá.”
15 David niʼthúu̱n Abner: “Ikháán dí nindxa̱a̱ʼ mbáa xa̱bu̱ bi̱ tsémíñúu. Ndawa̱a̱ imba̱a̱ náa Israel xóo ikháán. Náá numuu dí na̱nguá nitiewa̱a̱n tátiáa rey rá. Numuu dí mbáa soldado nito̱ʼo̱o̱ náa giáa̱nʼ mu maxíyáa.
16 Tátanimbaníí ñajunʼ dí kajkuáa ñawáanʼ. Na̱xna̱ ajngóʼ ga̱jma̱a̱ mbiʼyuu Jeobá, dí ikháanʼla gíʼmaa makhañála, numuu dí na̱nguá nikuwáanʼla xawii muñewa̱a̱n tátialaʼ, bi̱ Jeobá niraʼwíi. ¡Atiejxi̱ ma̱ta̱ya̱a̱! Náá rígá kudú ndrígóo rey ga̱jma̱a̱ rayaʼ dí ga̱jnu̱ʼ iyaʼ dí wájun náa edxu̱u̱ xá.”
17 Saúl nininuuʼ aʼwóo David ga̱jma̱a̱ niʼthúu̱n: “David, a̱ʼdióʼ, aʼwáaʼ ikháán rúʼko̱ ráʼ.” David niriʼñuu: “Aan, aʼwóʼ ikhúún, tátioʼ rey”.
18 Ga̱jma̱a̱ niʼthúu̱n xóó: “Tátioʼ, náá numuu dí naraxkáá xa̱bia̱a̱ʼ bugi̱ rá. Ndiéjunʼ lá ni̱ni̱. Dí lá nikiéʼkhun wéñuuʼ rá.
19 Mbá péñu, tátioʼ rey, atadxawíín xa̱bia̱a̱ʼ. Á mu Jeobá nindxu̱u̱ bi̱ naʼni dí mataniu̱ʼ dí ra̱májánʼ, maxnajxí mbá tsigijñaʼ rí tsígáʼ ga̱jma̱a̱ ikhaa magruigú.* Mú, á mu xa̱bu̱ú eni̱, gajuiʼtatsruíguíin náa inuu Jeobá. Numuu dí nixkoʼ, nixkriñu̱u̱nʼ náa xuajñuu* Jeobá. Nindxu̱u̱ asndu xóo kuwáanʼla ru̱thu̱nʼ ‹¡Ayuʼ, atayamajkún eʼwíinʼ dioses!›.
20 Dí xúgi̱ natakháñaaʼ dí xágadíí eʼdiuʼ mbayííʼ tsínguáʼ náa inuu Jeobá. Rey ndrígóo Israel nigájnuu gáyáaʼ mbáa ñu̱únʼ dí asndu xóo ndayáaʼ maxíyáa mbáa ñu̱ʼu̱ náa kúbá”.
21 Saúl niriʼñuu: “Nikuʼdáminaʼ aʼkhá. Atanga̱án, a̱ʼdióʼ David, ní xániaaʼ má dí ra̱májánʼ, numuu dí xúgi̱ nitayáá dí vida ndrígóʼ gíʼdoo numuu. Ikhúún ni̱ni̱ xóo mbáa xa̱bu̱ skágunʼ. Ni̱ni̱ mbá dí raʼkhí kayuuʼ”.
22 David niʼthúu̱n: “Gi̱i̱ rígá kudú ndrígóo rey. Ga̱ʼkha̱ mbáa xa̱bia̱a̱ʼ gáyáa.
23 Jeobá má gáʼni numa̱a̱ mámbáa xó má májánʼ eʼni ga̱jma̱a̱ dí nawi̱ji̱ jmbu. Maski ajndu Jeobá nixnájxi̱i̱n náa ñawúnʼ mbiʼi rígi̱, mú ikhúún na̱nguá nindoʼ gániu̱u̱ dí ra̱májánʼ bi̱ Jeobá niraʼwíi.
24 Gagiʼdoo numuu vida ndrígóʼ náa iduu Jeobá, xó má nigiʼdoo numuu vida ndrígáaʼ náa ikhúún mbiʼi rígi̱. Ikhaa gáʼni kríñu̱u̱nʼ náa xúgíʼ gamiéjunʼ”.
25 Saúl niriʼñuu: “Dios gáʼni tsajkurámáánʼ, a̱ʼdióʼ David. Ikháán matani̱ dí mba̱ʼu̱, xúgíʼ dí gátani̱ magajnúu májánʼ”. Ikhú David niguajtuun kamba̱a̱ ni̱jkha̱ ga̱jma̱a̱ Saúl nitanga̱a̱ náa goʼwóo.
Mbaʼa nota
^ O mbáa “náa ku̱ba̱ʼ mijxooʼ”.
^ O “desierto”.
^ O “lanza”.
^ O “atani̱ mbá rí májánʼ”.
^ O “bóo”.
^ Náa ajngáa hebreo naʼthí, “majyayuu”.
^ Náa ajngáa hebreo naʼthí, “ku̱ba̱ʼ dí magruigúu, ma̱ngaa ma̱ndoo manindxu̱ún xa̱bu̱ʼ”.
