Timbá libro rí niʼnirámáʼ Samuel 27:1-12
-
Filisteos nuxnáá xuajin Ziclag David (1-12)
27 David nindxa̱ʼwáminaʼ: “Mbóo mbiʼi makhañúʼ náa ñawúunʼ Saúl. Itháan májánʼ gáʼni dí maʼgá náa ku̱bu̱únʼ filisteos. Ga̱jma̱a̱ xúʼko̱ Saúl maniñuuʼ raʼñúnʼ náa ku̱bu̱únʼ xa̱bu̱ Israel ga̱jma̱a̱ xúʼko̱ ma̱ni̱ kriya̱mínáʼ náa ñawúunʼ”.
2 Ikha jngóo David ni̱jkha̱ gajmíi̱n mbá 600 xa̱bi̱i̱ náa xtáa Akís a̱ʼdióo Maoc, rey ndrígóo Gat.
3 David gajmíi̱n xa̱bi̱i̱ niguanún náa Gat gajmiún Akís, mámbáa ni̱jkha̱ gajmíi̱n bi̱ kúwá náa goʼwóo. David ni̱jkha̱ gajmíi̱n a̱jmi̱i̱n gu̱ʼwi̱i̱: Ahinoam bi̱ na̱ʼkha̱ náa Jezreel ga̱jma̱a̱ Abigaíl bi̱ nindxu̱u̱ carmelita, bi̱ ninindxu̱u̱ a̱ʼgiu̱u̱ Nabal.
4 Índo̱ nitháán Saúl dí David nigáyúu ni̱jkha̱ náa Gat, ikhú niniñuuʼ rayáaʼ.
5 Ikhú David niʼthúu̱n Akís: “Á mu dí májánʼ tayáá, nandoʼ dí maraxnu̱ʼ maxtáá náa mbá xuajin chíʼgíiʼ.* Numuu rí ndíjkha dí xa̱bia̱a̱ʼ maxtáa náa xuajin dí naratañájunʼ rá.”
6 Mbiʼi rúʼko̱ Akís nixnúu dí maxtáa náa Ziclag. Ikha jngóo Ziclag kaʼñúún reyes bi̱ kúwá náa Judá asndu dí mbiʼi xúgi̱.
7 David nixtáa mbá tsiguʼ ga̱jma̱a̱ mbá a̱jkhu̱ igu̱nʼ náa mbañúúnʼ filisteos.
8 David nitsimuu gajmíi̱n xa̱bi̱i̱ mu muxmijná gajmiún guesuritas, guirzitas ga̱jma̱a̱ amalequitas, numuu dí kúwíin náa ku̱ba̱ʼ dí na̱jkha̱ xígií náa Telam xígií náa Sur asndu náa ku̱ba̱ʼ Egipto.
9 Índo̱ David nato̱ʼo̱o̱ náa xuajin, nagudíin xúgíinʼ xa̱bekha ga̱jma̱a̱ gu̱ʼu̱. Mú najkha̱a̱ kagui̱i̱n mugiu̱ún, xediu̱ún, búrriu̱ún ga̱jma̱a̱ camellos, ma̱ngaa xtíin. Nda̱wa̱á natanga̱a̱ náa xtáa Akís.
10 Ikhú Akís narajxu̱u̱: “Náá xuajin nitaxmína̱ʼ xúgi̱ rá.” David nariʼñuu: “Náa sur* ndrígóo Judá”, o “Náa mbañúúnʼ jerahmeelitas xígií náa sur”, o “Náa mbañúúnʼ quenitas xígií náa sur”.
11 David nagudíin xúgíinʼ xa̱bekha ga̱jma̱a̱ gu̱ʼu̱ mu nimbáa xáʼga kiʼyáa náa Gat, numuu dí niʼthí: “Raʼkháa gáʼni dí musngajma ga̱jma̱a̱ muthi ‹David niʼni rígi̱ ga̱jma̱a̱ rúʼko̱”. (Xígi̱ kaʼnii niʼni náa mbá xúgíʼ mbiʼi dí nixtáa náa xuajin chíʼgíiʼ ndrígu̱ún filisteos).
12 Akís naʼnimbo̱o̱ kaʼyoo David ga̱jma̱a̱ nandxa̱ʼwáminaʼ: “Xúgi̱ dí xa̱bu̱ xuajñuu Israel nawiñu̱u̱nʼ kuyáá, ikha jngóo ikhaa mani̱ndxu̱u̱ má xúʼko̱ xa̱bi̱ʼ”.
