Timbá libro rí niʼnirámáʼ Samuel 28:1-25
-
Saúl na̱jkha̱ gáʼyoo mbáa a̱ʼgú bi̱ narajxu̱u̱n wajinʼ náa En-Dor (1-25)
28 Nákha mbiʼi rúʼko̱ filisteos nigimbíin soldado ndrígu̱ún mu magún guxmijná gajmiún xa̱bu̱ Israel. Ikha jngóo Akís niʼthúu̱n David: “Xó má ikháán natayáá, rí ikháán gajmiáanʼ xa̱bia̱a̱ʼ magún ga̱jma̱á nindxu̱ʼ náa muxmijná”.
2 Índo̱ niʼdxawuun rígi̱ David niriʼñuu: “Natayáá má májánʼ ndiéjunʼ rí gáʼni xa̱bia̱a̱ʼ”. Akís niʼthúu̱n: “Ikha jngóo maʼgíínʼ mu matie̱wu̱nʼ má xúʼko̱”.
3 Samuel nikháñuu má ga̱jma̱a̱ xa̱bu̱ Israel nimbi̱ya̱ʼ ga̱jma̱a̱ numuu ikhaa, ma̱ngaa nidi̱i̱ náa xuajñuu Ramá. Saúl nixkawíin xúgíinʼ náa xuajin bi̱ nuni̱ xawan ga̱jma̱a̱ bi̱ nurajxu̱u̱n wajinʼ.
4 Filisteos nigimbúmíjná nigún náa Sunem ga̱jma̱a̱ ikhí nigi̱ʼi̱i̱n. Ikha jngóo Saúl nigímbíin soldado israelitas ga̱jma̱a̱ nigi̱ʼi̱i̱n náa Guilboa.
5 Índo̱ Saúl ndiʼyoo náa gíi̱nʼ filisteos ikhú nimíñuu ga̱jma̱a̱ asndu nikijxi̱i̱ a̱jkiu̱u̱n.
6 Maski ajndu Saúl narajxu̱u̱ Jeobá, Jeobá na̱nguá niriʼñuu, ni má náa xnuʼndaa, ni má náa Urim,* ni má náa profetas.*
7 Nda̱wa̱á Saúl niʼtáñajúúnʼ xa̱bi̱i̱: “Guʼyáaʼ mbáa xa̱bu̱ xawan numuu rí nandoʼ maʼgá gárajxu̱u̱ mbá”. Xa̱bi̱i̱ nitháán: “Xtáa mbáa a̱ʼgu̱ bi̱ naʼni xawan náa En-Dor”.
8 Ikha jngóo Saúl niriʼkhu̱u̱ xtíñuu ni̱jkha̱ gajmíi̱n a̱jmi̱i̱n xa̱bi̱i̱, mbruʼun nigún gúyáá bi̱ nurajxu̱u̱n wajinʼ. Niʼthúu̱n “Mbá péñu,* aratamíjná gajmiáanʼ espíritu mu marathu̱nʼ dí wíji̱ marigá nda̱wa̱á. Atatsaʼwáá ma̱ʼkha̱ bi̱ ikhúún gátháanʼ”.
9 Mú, a̱ʼgu̱ niriʼñuu: “Ikháán gíʼmaa ma̱ta̱ya̱a̱ rí niʼni Saúl rí nixkawíin bi̱ nuni̱ xawan ga̱jma̱a̱ bi̱ nurajxu̱u̱n wajinʼ náa xuajin. Ndíjkha rí nataniuʼ rígi̱ rá. Lá natayáʼ xóo mataxíñúu ráʼ.”
10 Saúl nixná ajngóo ga̱jma̱a̱ numuu mbiʼyuu Jeobá: “¡Na̱xna̱ ajngóʼ ga̱jma̱a̱ numuu mbiʼyuu Jeobá dí xaguma tsu̱da̱a̱ʼ nimbá ga̱jma̱a̱ numuu rígi̱!”.
11 Índo̱ niʼdxawuun rígi̱, a̱ʼgu̱ nirajxu̱u̱: “Tsáá eyaaʼ mathu̱u̱n ma̱ʼkha̱ rá.” Saúl niriʼñuu: “Aratháán ma̱ʼkha̱ Samuel”.
12 Índo̱ a̱ʼgu̱ ndiʼyoo “Samuel”,* ikhú nindxaʼwáskhá ga̱jma̱a̱ niʼthúu̱n Saúl: “Ndíjkha rí nitani̱ nduwúúnʼ rá. ¡Nindxa̱a̱ʼ Saúl!”.
13 Rey Saúl niʼthúu̱n: “Xámíñáaʼ, mú arathúnʼ tsáá xtaa ratayáá”. A̱ʼgu̱ niriʼñuu: “Nda̱yo̱o̱ mbáa natsimuu náa ku̱ba̱ʼ, xóo dios kaʼnii”.
14 Mbá nacha̱ Saúl nirajxu̱u̱: “Xú káʼnii nindxu̱u̱ xá.” A̱ʼgu̱ niriʼñuu: “Bi̱ xtáa ratsimuu nindxu̱u̱ mbáa xa̱bu̱ nikhi̱i̱ ga̱jma̱a̱ kagíʼ mbá xtíin rí nda̱a̱ ñawúunʼ”. Índo̱ ndiʼyoo rí nindxu̱u̱ Samuel ikhú Saúl niginduti̱ga̱* ga̱jma̱a̱ nismbáti̱go̱o̱ asndu mbayííʼ.
15 Samuel nirajxu̱u̱ Saúl: “Ndíjkha rí nitani̱ xkájkiunʼ mu matsimuʼ rá.” Saúl niriʼñuu: “Xtáá náa mbá awúu̱n xkujndu gakhi̱i̱ wéñuuʼ. Filisteos kúwá ruxmijná ga̱jma̱á nindxu̱ʼ ga̱jma̱a̱ Dios niʼni tsíngu̱u̱nʼ náa ikhúún na̱nguá eriʼñúʼ ni má náa profetas, ni má náa xnuʼndaa. Ikha jngóo nindxa̱ʼwa̱a̱ mu marathu̱nʼ ndiéjunʼ rí gáʼyóoʼ ma̱ni̱”.
16 Mú “Samuel” niʼthúu̱n: “Ndíjkha dí natrajxu̱ʼ ikhúún á mu dí Jeobá nitsíngunʼ náa ikháán ga̱jma̱a̱ dí xúgi̱ nindxu̱u̱ xa̱bu̱ sia̱nʼ ndrígáaʼ xá.
17 Jeobá maʼnimbánuu dí ikhúún nitaríya̱ʼ: Jeobá marígú káyáaʼ dí naratáñajunʼ ga̱jma̱a̱ maxnúu David.
18 Ikháán tátanimba̱a̱ʼ dí niʼtháanʼ Jeobá ga̱jma̱a̱ na̱nguá niradíin amalequitas, bi̱ nini̱ dí makásngañu̱u̱ʼ. Ikha jngóo Jeobá xtáa raʼniáanʼ rígi̱ xúgi̱.
19 Jeobá maxnájxi̱i̱n ikháán ga̱jma̱a̱ xúgíinʼ israelitas náa ñawúúnʼ filisteos. Gájtsíí ikháán gajmiáanʼ e̱jña̱a̱ʼ makuwá ga̱jma̱á ni̱ndxu̱ʼ. Ga̱jma̱a̱ Jeobá maʼni dí soldado israelitas mixnájxi̱i̱n náa ñawúúnʼ filisteos”.
20 Mbá nacha̱ Saúl nismbri̱ga̱a̱ ga̱jma̱a̱ niguanúu má mbayííʼ. Ra̱ʼkhá tháán nimíñuu dí niʼthúu̱n “Samuel”. Ma̱ngaa nánguá gíʼdoo tsiaki̱i̱, numuu dí na̱nguá nikuiʼtsu mbá kañiiʼ mbiʼi ga̱jma̱a̱ kañiiʼ mbruʼun.
21 Índo̱ a̱ʼgu̱ nikuʼmaminaʼ náa kri̱ga̱a̱ Saúl, ndiʼyoo dí ra̱ʼkhá tháán niʼni gawúunʼ dí niʼdxawuun, niʼthúu̱n: “Tátioʼ, nini̱mbo̱ʼ dí niratáñajunʼ, nixtáá xawii makhañúʼ mu ma̱ni̱ dí nirathúnʼ.
22 Dí xúgi̱ rá tátioʼ, mbá péñu, atatsimbaaʼ dí matha̱a̱nʼ ikhúún. Atatsíñúnʼ maxna̱a̱ʼ mbá xuíʼtóo pan mu mbi̱ya̱a̱ tsiaki̱i̱, mu xúʼko̱ maʼnga̱a̱ʼ midxu̱u̱ʼ”.
23 Mú ikhaa táʼndoo ga̱jma̱a̱ niʼthún: “Xákhu nimbá”. Numuu dí xa̱bi̱i̱ ga̱jma̱a̱ a̱ʼgu̱ nitsudaa, ikha jngóo niʼnimbo̱o̱ má kaʼñún. Nitujxi̱i̱ mbayííʼ ga̱jma̱a̱ nigri̱gu náa xiawoo.
24 A̱ʼgu̱ gíʼdaa mbáa xedi̱ xtangoo náa goʼwóo, ikha jngóo mbá nacha̱ nixíyáa.* Niguajthun harina, nixmíndú ga̱jma̱a̱ niʼni mújúunʼ pan dí ragíʼdoo levadura.
25 Ikhú nirajkuáa dí mi̱khu̱ Saúl gajmíi̱n xa̱bi̱i̱, ikhiin nigi̱ʼdi̱i̱ nipiʼtsu. Nda̱wa̱á nitujxiín, ga̱jma̱a̱ nigúun mbá kañiiʼ mbruʼun.
Mbaʼa nota
^ O “gaʼyee, bi̱ nuthi dí marigá”.
^ O “atani̱ mbá rí májánʼ”.
^ O “bi̱ nakujmaa xóo Samuel”.
^ O “nixngutigamínáʼ”.
^ O “nixnájxi̱i̱ xóo tsigijñaʼ”.
