Timbá libro rí niʼnirámáʼ Samuel 29:1-11
-
Filisteos namíñúún kuyáá David (1-11)
29 Filisteos nigimbíin soldado ndrígu̱ún náa Afec, mú israelitas nigimbíin náa mijngii iduu iyaʼ Jezreel.
2 Bi̱ nutañajúúnʼ filisteos nigún gajmiún soldado ndrígu̱ún bi̱ kúwá náa grupo dí cien ga̱jma̱a̱ dí mil. David gajmíi̱n xa̱bi̱i̱ nigún gajmiún Akís náa kidxúúnʼ.
3 Mú príncipes ndrígu̱ún filisteos nirajxi̱: “Ndiéjunʼ lá eni̱ gi̱i̱ hebreos bugi̱ rá.” Akís niriʼñúún: “Ikhaa nindxu̱u̱ David, xa̱bi̱i̱ rey Saúl bi̱ xtáa náa Israel. Naʼni má mbá tsiguʼ o itháan dí xtáá gajmuʼ. Asndu nákha mbiʼi dí niniñuuʼ Saúl ni̱ʼkha̱ náa ikhúún, na̱nguá ndi̱yo̱o̱ nimbá dí ra̱májánʼ náa ikhaa”.
4 Mú príncipes ndrígu̱ún filisteos tánigu̱u̱nʼ dí niʼthí ga̱jma̱a̱ nitháán: “Aratháán xa̱bu̱ buʼko̱ dí maʼga̱a̱. Dí matanga̱a̱la náa niraxnáá maxtáa. Xátatsiʼñánʼ dí maʼga gáxmína̱ʼ ga̱jma̱á nindxu̱xu̱, raʼkháa gáʼni dí ikhaa má gátanga̱a̱ maxmína̱ʼ ga̱jma̱á nindxu̱lú. Numuu dí mu ma̱ndoo magruiguíi Saúl, magruigú edxu̱ún xúgíinʼ soldado ndrígulú.
5 Lá raʼkháa ga̱jma̱a̱ numuu David bugi̱ nithi índo̱ nigún rutsia ga̱jma̱a̱ nuni̱ ajmúú:
‹Saúl nigudíin mil,mú David nigudíin 10 mil ráʼ.›”
6 Ikha jngóo Akís nindxa̱ʼóo David ga̱jma̱a̱ niʼthúu̱n: “Na̱xna̱ ajngóʼ ga̱jma̱a̱ mbiʼyuu Jeobá, dí ikháán nindxa̱a̱ʼ mbáa xa̱bu̱ jmbii, nadxuʼ má dí mi̱dxu̱ʼ gajmiáanʼ soldado ndrígióʼ náa muxmijná, na̱nguá ndi̱yo̱o̱ nimbá dí ra̱májánʼ náa ikháán asndu mbiʼi dí ni̱dxa̱ʼ náa ikhúún. Mú eʼwíinʼ xa̱bu̱ ñajunʼ tsékumu̱ún kuyaaʼ.
7 Ikha jngóo ayu̱u̱ʼ tsímáá ga̱jma̱a̱ xátani̱ nimbá dí maʼni xkájkiu̱ún xa̱bu̱ bi̱ nutañajúúnʼ filisteos”.
8 Mú David niʼthúu̱n Akís: “Ndiéjunʼ lá ni̱ni̱ rá. Asndu nákha mbiʼi dí ni̱ʼkhá náa ikháán, lá nitaxkamaa mbá dí raʼkhí niʼni xa̱bia̱a̱ʼ bugi̱ ráʼ. Tátioʼ rey, náá numuu dí xándoo maʼgá ga̱jma̱á nindxa̱a̱ʼ náa mataxmína̱ʼ gajmiáanʼ xa̱bu̱ sia̱nʼ ndrígia̱a̱ʼ rá.”
9 Akís niriʼñuu David: “Ikhúún nda̱yo̱o̱ dí nindxa̱a̱ʼ mbáa xa̱bu̱ májáanʼ, nindxa̱a̱ʼ xóo mbáa ángel ndrígióo Dios. Mú príncipes ndrígu̱ún filisteos nithi ‹Xátatsiʼñánʼ dí maʼga gáxmína̱ʼ ga̱jma̱á nindxu̱xu̱›.
10 Ikha jngóo miʼcha̱ gúguájxu̱u̱n gájtsíí, ikháán gajmiáanʼ xa̱bi̱i̱ tátiáaʼ bi̱ ni̱dxa̱ʼ gajmiáanʼ, guʼgua̱a̱la índo̱ na̱ʼkha̱ rajtsi”.*
11 Ikha jngóo David gajmíi̱n xa̱bi̱i̱, nitujxu̱ún miʼcha̱ mu matangi̱ín náa ku̱bu̱únʼ filisteos, ga̱jma̱a̱ filisteos nitsimún náa Jezreel.
Mbaʼa nota
^ O “rambiʼi”.
