Timbá libro rí niʼnirámáʼ Samuel 3:1-21
-
Samuel naxtiʼyáaʼ mu mani̱ndxu̱u̱ profeta (1-21)
3 Dxámá Samuel naʼni ñajuunʼ Jeobá ga̱jma̱a̱ Elí. Mbiʼi rúʼko̱ nánguá edxawíín aʼwóo Jeobá ga̱jma̱a̱ nánguá erígá nángi eʼni rí nawasngájmún.*
2 Mbóoʼ mbiʼi, Elí kraʼaa kabóoʼ náa xia̱wuu (nánguá ekrui̱go̱o̱ ga̱jma̱a̱ nánguá eʼngo̱o̱ gáʼyoo nimbá).
3 Lámpara ndrígóo Dios xóó tséjuíyuuʼ ga̱jma̱a̱ Samuel kraʼaa raʼgu náa guʼwá rí nduyamajkuíí* Jeobá, náa rígá Arca* ndrígóo Dios.
4 Ikhú Jeobá niʼthúu̱n Samuel, ga̱jma̱a̱ Samuel niriʼña: “Gi̱i̱ xtáá”.
5 A̱ʼkhu̱ ni̱jkha̱ ragáyúu náa kraʼaa Elí ga̱jma̱a̱ niʼthúu̱n: “Tátá, nitatsaʼwóʼ ráʼ. Gi̱i̱ xtáá”. Mú ikhaa niʼthúu̱n: “Na̱nguá, tándxaʼwa̱a̱ʼ jún. Ayu̱u̱ʼ gátaba̱a̱ʼ”. Ikha jngóo Samuel ni̱jkha̱a̱ gábóoʼ.
6 Jeobá niʼthúu̱n mbu̱júu̱, “¡Samuel!”. Ikhú Samuel nitu̱jxu̱u̱ ga̱jma̱a̱ ni̱jkha̱ náa kraʼaa Elí ga̱jma̱a̱ niʼthúu̱n: “Tátá, nitatsaʼwóʼ ráʼ. Gi̱i̱ xtáá”. Mú ikhaa niʼthúu̱n: “Na̱nguá a̱ʼdióʼ, tándxaʼwa̱a̱ʼ jún. Ayu̱u̱ʼ gátaba̱a̱ʼ”.
7 Samuel xóó tséʼninuwiinʼ Jeobá ga̱jma̱a̱ nditháan xóó tséʼdxawun aʼwóo Jeobá.
8 Jeobá nindxa̱ʼóo mbu̱júu̱ dí maʼni ajtsú nuthu. “¡Samuel!”. Ikhú Samuel nitu̱jxu̱u̱ ga̱jma̱a̱ ni̱jkha̱ náa kraʼaa Elí ga̱jma̱a̱ niʼthúu̱n: “Nitatsaʼwóʼ ráʼ. Gi̱i̱ xtáá”.
Ikhú Elí ni̱jkha̱nú ndiʼyoo dí Jeobá xtáa raʼthúu̱n ada̱.
9 Ikha jngóo Elí niʼthúu̱n Samuel: “Ayu̱u̱ʼ gátaba̱a̱ʼ, á mu naʼtháanʼ mbu̱júu̱, aratháán: ‹Arathúnʼ Jeobá, xa̱bia̱a̱ʼ xtáa raʼdxawaanʼ›”. Samuel ni̱jkha̱a̱ gábóoʼ mbu̱júu̱.
10 Ikhú Jeobá nitanga̱a̱ niʼthúu̱n mbu̱júu̱ xó má niʼni nákha ginii: “¡Samuel, Samuel!”. Samuel niriʼña: “Arathúnʼ, xa̱bia̱a̱ʼ xtáa raʼdxawaanʼ”.
11 Jeobá niʼthúu̱n Samuel: “Natayáá rá’. Ma̱ni̱ náa Israel mbá dí maʼni mamiñúu asndu tsáá bi̱ gádxawuun.
12 Mbiʼi rúʼko̱ manimbánuu kuduun mbá xúgíʼ rí nitha̱ magíʼnuu Elí gajmíi̱n bi̱ kúwá náa goʼwóo.
13 Gíʼmaa maratha̱a̱n dí ma̱ni̱ mumíniiʼ asndu kámuu xúgíinʼ bi̱ kúwá náa goʼwóo. Ga̱jma̱a̱ numuu dí raʼkhí dí kúwá runi̱ dí ikhaa má ndaʼyoo, dí e̱ji̱i̱n kúwá rutsijmaa Dios, mú ikhaa tséxprígún.
14 Ikha jngóo ni̱xna̱ ajngóʼ dí bi̱ kúwá náa goʼwóo Elí ni má tsigijñaʼ ni má regalo, maxáʼngo̱o̱ gáruguarámuuʼ dí nakiékún bi̱ kúwá náa goʼwóo Elí”.
15 Samuel kaʼmáaʼ raʼgu asndu índo̱ nijtsi, ikhú nirmbáʼtoo xkrugoo goʼwóo Jeobá. Nimíñuu gáʼthúu̱n Elí dí niwasngájmáá.
16 Mú Elí nindxa̱ʼóo Samuel ga̱jma̱a̱ niʼthúu̱n: “¡Samuel, a̱ʼdióʼ!”. “Gi̱i̱ xtáá”, niʼthí ikhaa.
17 Ga̱jma̱a̱ Elí nirajxu̱u̱: “Ndiéjunʼ niʼtháanʼ. Mbá péñu, xátarkaʼwaaʼ, Dios gáʼni dí matamíniiʼ á mu dí natarkaʼwumáʼaanʼ mbóó xígi̱ ajngáa rí ikhaa niʼtháanʼ”.
18 Ikha jngóo Samuel niʼthúu̱n má xúgíʼ, nimbá tárkaʼwumúʼuun. Ikhú Elí niʼthúu̱n: “Numuu dí Jeobá niʼthí, gaʼni má dí májánʼ gáʼyoo ikhaa”.
19 Samuel ni̱jkha̱ ragaja̱a̱ má xúʼko̱, Jeobá nixtáa ga̱jma̱a̱, ma̱ngaa naʼnimbánuu mbá xúgíʼ ajngáa rí naʼthí.
20 Mbá xúgíinʼ xa̱bu̱ Israel bi̱ kúwíin náa Dan asndu náa Beer-Seba, niguánú ndiyáá dí Jeobá nigíiʼ Samuel xóo profeta.*
21 Ga̱jma̱a̱ Jeobá nisngájmaminaʼ má xúʼko̱ náa Siló, numuu dí náa Siló Jeobá nisngájmaminaʼ náa Samuel índo̱ niʼdxawuun ajngóo Jeobá.
Mbaʼa nota
^ O “visión”.
^ Xóo muʼthá, guʼwá xtíin.
^ O “E̱jna̱”.
^ O “gaʼyee, bi̱ naʼthí dí marigá”.
