Timbá libro rí niʼnirámáʼ Samuel 30:1-31
30 Índo̱ niʼni ajtsú mbiʼi David gajmíi̱n xa̱bi̱i̱ niguánú náa Ziclag, bi̱ amalequitas nitu̱ʼu̱u̱n náa sur* ga̱jma̱a̱ náa Ziclag, náa Ziclag niguámbu̱u̱n nini̱ gámbáa ga̱jma̱a̱ nitsikha̱a̱.
2 Nigún kudiin gu̱ʼu̱ ga̱jma̱a̱ mbá xúgíinʼ bi̱ kúwá náa xuajin, e̱ji̱n ga̱jma̱a̱ xabuanii.* Nimbáa túxiyáa, mú nigún kudiin.
3 Índo̱ David gajmíi̱n xa̱bi̱i̱ niguánú ndiyáá dí niguámbu̱u̱n nitsikha̱a̱ xuajin ga̱jma̱a̱ nigún kudiin guʼñu̱ún, mangiin e̱jñu̱ún.
4 David gajmíi̱n xa̱bi̱i̱ nimbiya ngínún. Nimbi̱ya̱ʼ dí asndu niʼni néʼngu̱u̱n dí nánguá eʼngu̱u̱n mumbi̱ya̱ʼ itháan.
5 Ma̱ngaa nigún kudiin a̱jmi̱i̱n gu̱ʼwi̱i̱ David, Ahinoam bi̱ na̱ʼkha̱ náa Jezreel, ga̱jma̱a̱ Abigaíl bi̱ ninindxu̱u̱ a̱ʼgiu̱u̱ Nabal xa̱bu̱ carmelita.
6 David ra̱ʼkhá tháán nixmiéjuunʼ, numuu dí xa̱bi̱i̱ nuthi dí muxnáá ga̱jma̱a̱ itsí, xúgíinʼ kúwá ngíná numuu dí ninimbáti̱gi̱i̱n e̱jñu̱ún. Mú David nindo̱ʼo̱o̱ Jeobá Dios ndrígóo dí maxnúu tsiaki̱i̱.
7 Ikhú David niʼthúu̱n ndxajkun Abiatar, a̱ʼdióo Ahimélec: “Mbá péñu,* ayi̱ jcháaʼ efod”.* Ikhú Abiatar ni̱jkha̱ kayóo efod.
8 David nirajxu̱u̱ Jeobá: “Lá maʼgá kidxúúnʼ mbá grupo kuʼwáʼ bugi̱ ráʼ. Maʼngo̱ʼ maxkamiin xáʼ.” Ikhaa niriʼñuu: “Aan, ayuʼ raraxkún, numuu dí maʼnga̱a̱ʼ mataxkamiin ga̱jma̱a̱ matandrígúu xúgíʼ dí nigún kudúún”.
9 Mbá nacha̱ David gajmíi̱n mbá 600 xa̱bekha bi̱ xtáa gajmíi̱n nigi̱ʼdi̱i̱ nigún ga̱jma̱a̱ niguánú náa mata dí rígá náa Besor, náa niguanún tikhun xa̱bekha.
10 David ni̱jkha̱ gajmíi̱n mbá 400 xa̱bi̱i̱, mú mbá 200 niguanún kidííʼ,* numuu dí ra̱ʼkhá tháán néʼngu̱u̱n, xáʼngu̱u̱n gákidiin náa mata Besor.
11 Xa̱bi̱i̱ David nixkamaa mbáa xa̱bu̱ egipcio náa xanáá, niguwáánʼ kuya̱a̱ náa David. Nixniʼtsíí ga̱jma̱a̱ nixnáá iyaʼ maga̱a̱n,
12 ma̱ngaa nixnáá mi̱khu̱ a̱jma̱ pan dí niguma ga̱jma̱a̱ uva nijndooʼ, ma̱ngaa nixnáá mbá xuiʼtóo pan dí niguma ga̱jma̱a̱ higo dí kaxújmbi̱i̱. Índo̱ niguámbóo ni̱ʼkhu̱, ndiyáa tsiaki̱i̱,* numuu dí na̱nguá ni̱ʼkhu̱ ni má tágáan nimbá náa mbá ajtsú mbiʼi ga̱jma̱a̱ mbá ajtsú mbruʼun.
13 David nirajxu̱u̱: “Náá edxa̱ʼ. Tsáá nindxu̱u̱ patriáan.” Ikhaa niriʼñuu: “Nindxu̱ʼ xa̱bu̱ egipcio, ñumbáá ndrígóo mbáa xa̱bu̱ amalequita. Patriúnʼ niniñuʼ, numuu dí nákha ragajtsú mbiʼi niʼniuʼ nandii.
14 Ikháanʼ nitu̱ʼu̱xu náa sur náa mbañúúnʼ xa̱bu̱ keretitas, náa mbayuuʼ Judá ga̱jma̱a̱ sur náa mbayuuʼ Caleb, ma̱ngaa nigídáaxu aguʼ mikha̱a̱ Ziclag”.
15 Índo̱ David niʼdxawuun rígi̱, ikhú nirajxu̱u̱: “Lá ma̱ndoo mi̱dxu̱ʼ jchún náa kúwá mbá grupo kuʼwáʼ buʼko̱ ráʼ.” Ikhaa niriʼñuu: “Á mu naraxná ajngáaʼ ga̱jma̱a̱ mbiʼyuu Dios dí xátaxíñu̱u̱n ga̱jma̱a̱ dí xáraxnajxiún náa patriúnʼ, ikhúún maʼgá ka̱ña̱a̱n náa kúwá kuʼwáʼ buʼko̱”.
16 Ikhú ni̱jkha̱ kayáa náa kúwíin ga̱jma̱a̱ ikhí gríguiin náa mbá xúgíʼ inuu bíjní, kúwá ruphiʼtsu ga̱jma̱a̱ naʼwa̱a̱n. Nuni̱ ndxa̱a̱ numuu rí niʼngu̱u̱n niguwáʼ kudúún rí mba̱ʼu̱ dí rígá náa ku̱bu̱únʼ filisteos ga̱jma̱a̱ náa ku̱bo̱o̱ʼ Judá.
17 David ni̱jkha̱ gáʼñúún, nixmínaʼ gajmíi̱n nákhíí miʼcha̱ ga̱jma̱a̱ asndu wakíʼ dí i̱mba̱ néjtsuu. Nimbáa tákríya̱a̱ʼ, i̱ndó mbá 400 xa̱bekha bi̱ nigájnún ragáñúún gajmiún camello.
18 David niʼngo̱o̱ nigruigúu mbá xúgíʼ dí nigún kudúún amalequitas ga̱jma̱a̱ niʼngo̱o̱ niʼni káwíin mbá a̱jmi̱i̱n gu̱ʼwi̱i̱.
19 Nimbáa ni táʼyóoʼ, xúgíinʼ kúwá ikhí: E̱ji̱n ga̱jma̱a̱ xabuanii, niʼngu̱u̱n nini̱ káwíin e̱jñu̱ún ga̱jma̱a̱ mbá xúgíʼ dí guáʼdáá. David niʼngo̱o̱ nigruigúu mbá xúgíʼ rí nigún kudúún.
20 David niguanúu gajmíi̱n xúgíinʼ mugu̱ ga̱jma̱a̱ xediu̱ún amalequita. Ga̱jma̱a̱ xa̱bi̱i̱ nigún kudiin xujkhúʼ bugi̱ náa inún xujkiún má ikhiin. Nithi: “Rígi̱ nindxu̱u̱ dí nigruigúu David”.
21 David ni̱jkha̱ náa kúwá bi̱ mbá 200 xa̱bi̱i̱ bi̱ ra̱ʼkhá tháán niʼni néʼngu̱u̱n dí táʼngu̱u̱n gágún gajmiún, niguanún kidííʼ náa mata dí rígá náa Besor. Ikhiin nigájnún gútsijníí David ga̱jma̱a̱ bi̱ na̱jkha̱ gajmíi̱n. Índo̱ David ni̱jkha̱nú mijngii náa ikhiin, nirajxu̱u̱n xú kaʼnii kúwá.
22 Mú náa xa̱bu̱ bi̱ ni̱jkha̱ gajmíi̱n David, kúwá tikhun xa̱bekha bi̱ ra̱míjíinʼ ga̱jma̱a̱ bi̱ nda̱a̱ gamajkhún, nigi̱ʼdi̱i̱ nithi: “Ikhiin tágún ga̱jma̱á nindxu̱lú, ikha jngóo xúxnún nimbá dí nindrígúulú. I̱ndó guxníinʼlú guʼñu̱ún ga̱jma̱a̱ e̱jñu̱ún. Gundriguíin ga̱jma̱a̱ gagún gajmiún”.
23 Mú, David niʼthún: “Na̱nguá a̱ngui̱nʼ, xúni̱ xúʼko̱ ga̱jma̱a̱ dí Jeobá nixnúlú. Ikhaa niʼni káwáánʼlú ga̱jma̱a̱ nixnájxi̱i̱n náa ñawúnlú kuʼwáʼ buʼko̱, bi̱ nidakáyulú dí kuaʼdáá.
24 Lá nakumalaʼ dí mbáa maʼni xó má e̱tha̱la ikháanʼ ráʼ. Mbáníí gúndrigúu mbá xúgíinʼ bi̱ nigajtaa gáxmína̱ʼ ga̱jma̱a̱ bi̱ niguanúu mañewu̱u̱n dí kuaʼdáá. Xúgíinʼ mudrigúu ikháá má”.
25 Asndu nákha mbiʼi rúʼko̱ David niraʼwíí marigá rígi̱ ga̱jma̱a̱ ni̱jkha̱nú ninindxu̱u̱ xtángoo náa Israel. Xúʼko̱ kaʼnii rígá asndu rí mbiʼi xúgi̱.
26 Índo̱ David nitanga̱a̱ náa Ziclag nikuʼma mbá nguéjma̱ dí nigruigúu náa inún bi̱ kuya̱ edxu̱u̱ náa Judá bi̱ nimbájxu̱u̱ gajmíi̱n. Nikuʼma rí majuiʼthúún: “Rígi̱ nindxu̱u̱ mbá regalo dí na̱xna̱la dí nigruígú káñún xa̱bu̱ sia̱nʼ ndrígóo Jeobá”.
27 Ikhaa nikuʼma náa inún bi̱ kúwá náa Betel, náa Ramot dí kaʼyoo Négueb,* náa Jatir,
28 náa Aroer, náa Sifmot, náa Estemoa,
29 náa Racal, náa xuajñún jerahmeelitas, náa xuajñún quenitas,
30 náa Hormá, náa Borasán, náa Atac,
31 náa Hebrón ga̱jma̱a̱ náa mbá xúgíʼ xuajin náa dí David gajmíi̱n xa̱bi̱i̱ nikúwá.
Mbaʼa nota
^ O “Négueb”.
^ O “tátá wanii”.
^ O “Atani̱ mbá rí májánʼ”.
^ O “tsudi̱í”.
^ Náa ajngáa hebreo naʼthí, “espíritu ndrígóo nitanga̱a̱ náa ikhaa”.
^ O “xígií náa sur”.
