Timbá libro rí niʼnirámáʼ Samuel 31:1-13
-
Nakháñúu Saúl gajmíi̱n ajtsíin e̱ji̱i̱n (1-13)
31 Rí xúgi̱ filisteos kúwá ruxmijná gajmiún israelitas. Israelitas nigáñún nini̱ filisteos ga̱jma̱a̱ mbaʼin wéñuuʼ nikháñún náa kúbá Guilboa.
2 Filisteos nigún ruxkáá mijngii xígi̱ Saúl gajmíi̱n e̱ji̱i̱n ga̱jma̱a̱ niʼngu̱u̱n nixiyáa Jonatán, Abinadab ga̱jma̱a̱ Malki-Súa, e̱ji̱i̱n Saúl.
3 Rí nigiʼdu̱u̱n gajmiún Saúl niʼni gakhi̱i̱ wéñuuʼ. Bi̱ kuda xkamídá ndiyáá ga̱jma̱a̱ nini̱ gawíínʼ wéñuuʼ.
4 Ikhú Saúl niʼthúu̱n bi̱ kayá escudo ndrígóo: “Atríya̱ʼ espadaaʼ ga̱jma̱a̱ ataxkruaʼa jngañún. Tsíyóʼ dí xa̱bu̱ bi̱ túthu xtóo xuyuuʼ tsáʼkhún maguwáʼ ga̱jma̱a̱ muxiñún ikhiin, ni má rí muni̱ ngínún wéñuuʼ”. Mú bi̱ kayá escudo ndrígóo na̱nguá nindoo numuu dí ra̱ʼkhá tháán nimíñuu. Ikha jngóo mínaaʼ má Saúl niguajthun espada ga̱jma̱a̱ niniñuuʼ dí mafraʼa jngayii.
5 Índo̱ bi̱ kayá escudo ndrígóo ndiʼyoo rí nikháñúu, ikhú ma̱ngaa niniñuuʼ dí mafraʼa jngayii espada, xúʼko̱ nikháñún mbá najmiin.
6 Xúʼko̱ kaʼnii niʼni dí Saúl gajmíi̱n mbá ajtsíin e̱ji̱i̱n ga̱jma̱a̱ bi̱ kayá escudo ndrígóo, ma̱ngaa mbá xúgíinʼ xa̱bi̱i̱ nikháñún mbóó mbiʼi rúʼko̱.
7 Índo̱ israelitas bi̱ kúwá náa mata* ga̱jma̱a̱ bi̱ kúwá náa mbaaʼ Jordán ndiyáá rí soldado Israel nigáñún, ma̱ngaa rí Saúl gajmíi̱n e̱ji̱i̱n nikháñún, ikhú niniña̱a̱nʼ xuajñún ga̱jma̱a̱ nigáñún. Nda̱wa̱á dí rúʼko̱ filisteos niguwáʼ ga̱jma̱a̱ nikúwá ikhí.
8 I̱mba̱ néjtsuu índo̱ filisteos nigún gúndri̱gú káñún dí gíʼdoo numuu bi̱ nikháñún, ndiyáá rí kri̱ga̱a̱ Saúl gajmíi̱n ajtsíin e̱ji̱i̱n nikháñún náa kúbá Guilboa.
9 Nirujturígú edxu̱u̱ Saúl ga̱jma̱a̱ nindrigú káyííʼ aju̱u̱nʼ ga̱jma̱a̱ nixuʼma ajngáa náa mbá xúgíʼ mbañúúnʼ filisteos mu xúʼko̱ muthún mámbá xuajin dí nirígá, ma̱ngaa náa guʼwá rí nduyamajkhún xándiu̱ún.
10 Nigúun kudúún aju̱u̱nʼ náa guʼwá rí nduyamajkuíí xtiʼkúún Astoret ma̱ngaa nijngriguíin* náa xtájtsí ndrígóo Bet-San.
11 Índo̱ xa̱bu̱ xuajin bi̱ kúwá náa Jabés-Galaad nidxawíín rí filisteos nini̱i̱ Saúl,
12 xúgíinʼ soldado nigún mbá kañiiʼ mbruʼun ga̱jma̱a̱ nirígúu xuyuuʼ Saúl gajmíi̱n e̱ji̱i̱n náa xtájtsí ndrígóo Bet-San. Nitangiín náa Jabés ga̱jma̱a̱ ikhí má nitsi̱ki̱i̱n.
13 Nda̱wa̱á nidu̱u̱ i̱tsu̱ún náa agoo ixi̱ tamarisco* dí wíji̱ náa Jabés ga̱jma̱a̱ túphiʼtsu mbá juwan mbiʼi.
Mbaʼa nota
^ O “bóo”.
^ O “nirajngaríguíin”.
^ Ixi̱ rígi̱ najma̱a̱n náa ku̱ba̱ʼ mijxooʼ, majkhaʼ inúu ga̱jma̱a̱ riʼyu̱u̱ nindxu̱u̱ rosa o miʼxá.
